Exodus 38;1-31
38 Ndien enye ada eto acacia anam itieuwa emi ẹsiwade edifọp uwa. Uniọn̄ esie edi cubit ition, ubom esie onyụn̄ edi cubit ition, ukem ukem ke n̄kan̄ mbinan̄, enye onyụn̄ okon̄ ke cubit ita.+
2 Ndien enye anam nnụk+ ke inụk esie mbinan̄. Nnụk esie ẹwọrọ enye ke idem. Ekem enye ada okpoho+ ofụk enye.
3 Ndien enye anam kpukpru n̄kpoduoho itieuwa, eso ye udọk usio ntọn̄ ye usan ye fork ye n̄kpọ ufọp incense. Enye ada okpoho anam kpukpru n̄kpoduoho emi.+
4 Enye onyụn̄ anam n̄kpọ un̄wan n̄kpọ esịn ke itieuwa emi, kpa n̄kpọ un̄wan n̄kpọ emi ẹnamde ke okpoho, ke idak mben inua itieuwa, ekpere ufọt itieuwa.+
5 Ekem enye anam ekara n̄kpọ inan̄ ke utịt n̄kan̄ mbinan̄ ekpere n̄kpọ un̄wan n̄kpọ emi ẹnamde ke okpoho, nte itie ndisịn nnyan eto.
6 Ndien enye ada eto acacia anam nnyan eto onyụn̄ ada okpoho ofụk mmọ.+
7 Enye onyụn̄ ọdọn̄ nnyan eto emi ke mme ekara n̄kpọ oro ẹdude ke n̄kan̄ mbiba ke itieuwa emi, man ẹda ẹmen enye.+ Enye akada obukpọk anam enye nte ana-in̄wan̄ ekebe.+
8 Ekem enye ada ukụtiso ifịn iban oro ẹkenamde utom ke enyịnusụn̄ tent usopidem+ anam besịn ye n̄kpọ udori besịn ke okpoho.+
9 Ndien enye anam okụre odu.+ Enye ada eti linen oro ẹfiakde-fiak anam ọfọn̄ ikpehe okụre eke ọniọn̄de ke cubit ikie ke n̄kan̄ oro esede Negeb, ke edem usụk.+
10 Enye ada okpoho anam adaha edịp ye etak edịp. Enye onyụn̄ ada silver anam ntok enyọn̄ adaha ye ikek mmọ.+
11 Ndien n̄kan̄ edem edere edi cubit ikie. Enye ada okpoho anam adaha edịp ye etak edịp. Onyụn̄ ada silver anam ntok enyọn̄ adaha ye ikek mmọ.+
12 Edi ọfọn̄ ikpehe n̄kan̄ edem usoputịn ekedi cubit aba ye duop.+ Adaha mmọ ẹdi duop, etak mmọ ẹnyụn̄ ẹdi duop. Ntok enyọn̄ adaha ye ikek mmọ ẹkedi silver.
13 Ndien n̄kan̄ edem usiahautịn ekedi cubit aba ye duop.+
14 Ọfọn̄ ikpehe n̄kan̄ kiet edi cubit efịt. Adaha mmọ ẹdi ita, etak mmọ ẹnyụn̄ ẹdi ita.+
15 Amaedi n̄kan̄ eken, n̄kan̄ emi ye n̄kan̄ oko, emi inuaotop okụre odude, ọfọn̄ ikpehe ekedi cubit efịt. Adaha mmọ ẹdi ita, ẹtak mmọ ẹnyụn̄ ẹdi ita.+
16 Kpukpru ọfọn̄ ikpehe okụre emi ẹdude ẹkanade ẹkedi eti linen oro ẹfiakde-fiak.
17 Ndien ẹkeda okpoho ẹnam mme etak adaha oro. Ẹda silver ẹnam ntok enyọn̄ adaha ye ikek mmọ ẹnyụn̄ ẹda silver ẹfụk enyọn̄ mmọ, ikek kpukpru adaha okụre oro ẹnyụn̄ ẹdi silver.+
18 Ndien ọfọn̄ enyịnusụn̄ inuaotop okụre ekedi utom ọdọk-ọfọn̄, emi ẹnamde ke blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen oro ẹfiakde-fiak,+ uniọn̄ esie ekedi cubit edịp, enye onyụn̄ okon̄ ke cubit ition, ukem ye ọfọn̄ ikpehe okụre.+
19 Ndien ẹkeda okpoho ẹnam adaha mmọ mbinan̄ ye etak mmọ mbinan̄. Ẹkeda silver ẹnam ntok mmọ ẹnyụn̄ ẹda silver ẹfụk enyọn̄ mmọ ye ikek mmọ.
20 Ndien ẹkeda okpoho ẹnam kpukpru ọkpọhọ tent utuakibuot ye ọkpọhọ+ okụre emi ẹkedude ẹkanade.
21 Emi edi ibat n̄kpọ oro ẹkedude ke tent utuakibuot, kpa tent utuakibuot Ntiense,+ emi Moses eketemede ete ẹbat, nte utom nditọ Levi+ emi ẹkedude ke idak Ithamar+ eyen Aaron oku.
22 Ndien Bezalel,+ eyen Uri, eyen Hur, owo esien Judah, anam kpukpru se Jehovah eketemede Moses.
23 Ndien Oholiab,+ eyen Ahisamach, owo esien Dan, anamutom usọ ye andikịm fansi ye ọdọk-ọfọn̄ ke blu blu ndidi ye idet erọn̄ emi enyenede uduot mmọn̄ibọn̄ ye ididuot ndidi ye eti linen, odu ye enye.
24 Kpukpru gold oro ẹkedade ẹnam utom edisana ebiet ẹkedi ukem ye gold edifụn̄ uwa,+ talent edịp ye usụkkiet ye shekel ikie itiaba ye edịp ye duop ke shekel+ edisana ebiet.+
25 Ndien silver emi mbon esop oro ẹsịnde enyịn̄ ẹkenọde ekedi talent ikie ye shekel tọsịn kiet ikie itiaba ye ata ye efịt ke shekel edisana ebiet.
26 Ubak shekel emi owo kiet kiet ọkọnọde ekedi ubak shekel ke shekel edisana ebiet, eke kpukpru owo emi ẹbede ẹdụk otu mbon emi ẹsịnde enyịn̄, ọtọn̄ọde ke owo isua edịp dọk,+ ẹdi owo tọsịn ikie itiokiet ye ita, ikie ition ye aba ye duop.+
27 Ndien enye ada talent silver ikie anam etak edisana ebiet ye etak emi ẹyịride ikpehe. Talent ikie anam etak ikie, talent kiet ke etak kiet.+
28 Ndien enye ada shekel tọsịn kiet ikie itiaba ye ata ye efịt anam ntok enyọn̄ adaha onyụn̄ ofụk enyọn̄ mmọ onyụn̄ adian mmọ ọtọkiet.
29 Ndien okpoho edifụn̄ uwa ekedi talent ata ye duop ye shekel tọsịn iba ikie inan̄.
30 Emi ke enye akada anam etak inuaotop tent usopidem itieuwa okpoho ye n̄kpọ un̄wan n̄kpọ oro ẹnamde ke okpoho, emi esịnede ke itieuwa, ye kpukpru n̄kpoduoho itieuwa,
31 ye etak okụre emi ẹdude ẹkanade, ye etak inuaotop okụre, ye kpukpru ọkpọhọ tent utuakibuot ye kpukpru ọkpọhọ tent+ okụre emi ẹdude ẹkanade.
