Esther 8;1-17
8 Ke usen oro Edidem Ahasuerus ayak ufọk Haman,+ emi asuade mme Jew,+ esịn Esther ọbọn̄ an̄wan ke ubọk; Mordecai onyụn̄ edi ke iso edidem, koro Esther akasiande edidem se enye edide ye imọ.+
2 Ndien edidem osio n̄kpanuen+ ufịk idiọn̄ọ emi enye ọkọbọde Haman ọnọ Mordecai; Esther onyụn̄ enịm Mordecai ke etubom ufọk Haman.+
3 Akan oro, Esther ọtọn̄ọ ntak etịn̄ ikọ ke iso edidem, onyụn̄ ọduọ enye ke ukot, onyụn̄ atua ekpe enye ubọk oyom+ mfọn ete enye abiat idiọkn̄kpọ+ Haman Agagite, ye uduak+ emi enye akaduakde aban̄a mme Jew.+
4 Ndien edidem anyan esan̄ ubọn̄+ gold ọnọ Esther, Esther onyụn̄ adaha adada ke iso edidem.
5 Ntre Esther ọdọhọ ete: “Edieke ọfọnde edidem ke enyịn, ami nnyụn̄ n̄kụtde mfọn+ ke iso esie, n̄kpọ emi onyụn̄ enende ke iso edidem, ami nnyụn̄ mfọnde enye ke enyịn, yak ẹwet n̄kpọ ẹkpụhọde n̄wed+ oro ẹkewetde, kpa uduak Haman, eyen Hammedatha Agagite,+ emi enye ekewetde ete ẹsobo mme Jew+ oro ẹdude ke ofụri ikpehe obio ukara+ edidem.
6 Koro ndikeme didie ndiyọ afanikọn̄ emi edisịmde orụk mi, ndinyụn̄ n̄keme didie nditie n̄kụt nte ẹsobode mme iman mi?”
7 Ntre Edidem Ahasuerus ọdọhọ Esther ọbọn̄ an̄wan ye Mordecai, eyen Jew, ete: “Sese! Mmayak ufọk Haman nsịn Esther ke ubọk,+ ẹmenyụn̄ ẹyịri enye ke eto,+ koro enye akanyande ubọk esie otụk mme Jew.
8 Mbufo ẹwet ndien ke ibuot mme Jew nte ọfọnde mbufo ke enyịn ke enyịn̄+ edidem ẹnyụn̄ ẹda n̄kpanuen edidem ẹfịk idiọn̄ọ; koro owo mîkemeke ndikpụhọde+ n̄wed eke ẹwetde ke enyịn̄ edidem ẹnyụn̄ ẹdade n̄kpanuen edidem ẹfịk idiọn̄ọ.”
9 Ntem ẹkot mme ewetn̄wed+ edidem ẹdi ke ini oro, ke ọyọhọ ọfiọn̄ ita, oro edi, ọfiọn̄ Sivan, ke ọyọhọ usen edịp ye ita ke ọfiọn̄ oro; ndien ẹwet kpukpru se Mordecai eketemede, ẹnọ ẹsọk mme Jew ye mme satrap+ ye mme andikara ye mbọn̄ ke mme ikpehe obio ukara emi ẹtọn̄ọde ke India tutu ẹsịm Ethiopia, ikpehe obio ukara+ ikie ye edịp ye itiaba, ẹnọ ẹsọk ikpehe obio ukara kiet kiet ke ido uwetn̄kpọ+ esie ẹnyụn̄ ẹnọ ẹsọk idụt kiet kiet nte usem+ esie edide, ẹnyụn̄ ẹnọ ẹsọk mme Jew ke ido uwetn̄kpọ ye ke usem+ mmọ.
10 Ndien enye ewet ke enyịn̄ Edidem+ Ahasuerus onyụn̄ ada n̄kpanuen+ ufịk idiọn̄ọ edidem efịk idiọn̄ọ+ onyụn̄ ada n̄wed oro esịn ke ubọk mme ọnọ-etop emi ẹdorode ke enan̄-mbakara,+ emi ẹwatde enan̄-mbakara isụn̄utom emi ẹsidade ẹka utom edidem, kpa mme ọsọp-itọk uman enan̄-mbakara,
11 nte ke edidem enyịme mme Jew emi ẹdude ke kpukpru obio ẹsop idem+ ẹnyụn̄ ẹn̄wana ẹban̄a ukpọn̄ mmọ, ẹsọhi, ẹnyụn̄ ẹwot ẹnyụn̄ ẹsobo kpukpru udịmowo+ ye mme ikpehe obio ukara emi ẹsuade mmọ, nditọwọn̄ ye iban, ẹnyụn̄ ẹbụme inyene mmọ,+
12 ke usen kiet+ ke kpukpru ikpehe obio ukara Edidem Ahasuerus, ke ọyọhọ usen duopeta,+ ke ọyọhọ ọfiọn̄ duopeba, oro edi, ọfiọn̄ Adar.+
13 Ẹnyene ndinọ n̄wed+ emi kiet nte ibet ẹsọk kpukpru nsio nsio ikpehe obio ukara, ẹnyụn̄ ẹtan̄a enye ke kpukpru mme idụt, ẹte mme Jew ẹben̄e idem ẹnọ usen emi man ẹsio mme asua mmọ usiene.+
14 Ndien mme ọnọ-etop,+ emi ẹwatde enan̄-mbakara isụn̄utom emi ẹsidade ẹka utom edidem, ẹdaha isan̄, uyo edidem onyụn̄ esịn mmọ ẹsọp ukot;+ ndien ẹtan̄a ibet oro ke akwa ufọk ubọn̄ Shushan.+
15 Edi Mordecai oto ke iso edidem ọwọrọ, esịne blu blu ọfọn̄idem+ ubọn̄ ye eti linen, onyụn̄ ayara akamba anyanya gold, esịne eti akwa ọfọn̄idem,+ emi ẹdade idet erọn̄ emi enyenede uduot mmọn̄ibọn̄+ ẹnam. Ndien obio Shushan osio n̄kpo idara.+
16 Ndien mme Jew ẹkụt un̄wana ye idatesịt+ ye inemesịt ye ukpono.
17 Ndien ke ofụri ikpehe obio ukara ye ke nsio nsio obio, ebiet ekededi emi uyo edidem ye ibet esie ẹsịmde, mme Jew ẹdara ẹnyụn̄ ẹnem esịt, emi ekedi akamba usọrọ+ ye usen inemesịt; ndien ediwak owo+ ke otu mme idụt ke edem oro ẹkabade ẹdi mme Jew;+ koro ndịk+ mme Jew akanamde mmọ.
