Ephesus 4;1-32
4 Mmọdo, ami emi ndide owo-n̄kpọkọbi+ ke Ọbọn̄, n̄kpe mbufo ubọk nte ẹsan̄a nte odotde+ ye ikot emi ẹkekotde+ mbufo,
2 ke ọyọhọ nsụhọdeidem+ ye ifụre ifụre ido, ye anyanime,+ ẹyọde kiet eken ke ima,+
3 ẹsịnde ifịk ẹn̄wana ndimụm edidianakiet eke spirit n̄kama, ẹnyụn̄ ẹdude ke mbọbọ emem.+
4 Idem kiet+ odu, spirit kiet+ onyụn̄ odu, kpa nte ẹkekam ẹkotde mbufo ke idotenyịn+ kiet oro ẹkekotde mbufo ẹnọ;
5 Ọbọn̄ kiet,+ mbuọtidem kiet,+ baptism kiet;+
6 Abasi kiet+ ye Ete kpukpru owo, emi akarade kpukpru owo onyụn̄ anamde utom ke idem kpukpru owo onyụn̄ odude ke esịt kpukpru owo.
7 Edi ẹma ẹwụt nnyịn owo kiet kiet mfọnido oro owo mîdotke+ nte ekemde ye udomo oro Christ edemede enọ mfọn.+
8 Ntem enye ọdọhọ ete: “Ke ini enye ọdọkde ke enyọn̄ enye ada mbuotekọn̄ ọnyọn̄; enye ọnọ irenowo nte enọ.”+
9 Ndien nso ke ikọ oro “enye ọdọkde”+ ọwọrọ? Ọwọrọ nte ke enye n̄ko ama osụhọde esịm usụhọde ikpehe, oro edi, isọn̄.+
10 Kpa owo emi okosụhọrede mi, edi enye n̄ko ọkọdọk+ okon̄ akan kpukpru mme heaven,+ man enye akpanam kpukpru n̄kpọ ẹyọhọ.+
11 Ndien enye ọkọnọ ndusụk owo nte mme apostle,+ ndusụk owo nte mme prọfet,+ ndusụk owo nte mme ọkwọrọ eti mbụk,+ ndusụk owo nte mme ekpemerọn̄ ye mme andikpep,+
12 man ẹnen̄ede+ ndisana owo, man ẹsan̄a utom, man ẹbọp idem Christ ọkọri,+
13 tutu kpukpru nnyịn ikabade idi kiet ke mbuọtidem ye ke nnennen ifiọk Eyen Abasi, ikpon iwọrọ+ owo, isịm ọyọhọ idaha emi Christ ekesịmde;+
14 man nnyịn ikûdi aba nditọwọn̄, emi kpukpru ofụm ukpepn̄kpọ+ ye abian̄a+ owo ye nsu emi ẹdade n̄kari ẹtịbi, ẹberide+ nte oyobio ẹnyụn̄ ẹmende ẹyo.
15 Edi ẹyak nnyịn itịn̄ akpanikọ+ inyụn̄ ida ima ikọri+ ke kpukpru n̄kpọ ke idak enye emi edide ibuot,+ kpa Christ.
16 Oto ke enye ofụri idem,+ emi ẹnamde akpaha adiana kiet onyụn̄ anam utom ọtọkiet ebe ke kpukpru ikek oro ẹnọde se ẹyomde, nte ekemde ye utom ndido kiet kiet ke nnennen udomo, ọbọp idem ọkọri man anam enye ọsọn̄ọ owụhọ ke ima.+
17 Ke ntre, emi ke ndọhọ nnyụn̄ nsọn̄ọ ntịn̄ ke Ọbọn̄, nte mbufo ẹkûka iso aba ẹsan̄a kpa nte mme idụt+ ẹsan̄ade ke ikpîkpu ekikere+ mmọ,
18 ke adan̄aemi mmọ ẹdude ke ekịm ke ekikere,+ ẹnyụn̄ ẹdian̄arede+ ẹkpọn̄ uwem oro enyenede Abasi, ke ntak unana ifiọk+ oro esịnede mmọ ke idem, ke ntak isọn̄esịt+ mmọ.
19 Sia esịt mmọ ama okodoro ufiọn,+ mmọ ẹyak idem ẹnọ obukpo ido+ ndinam kpukpru orụk mbubiam ido+ ke idiọkitọn̄.+
20 Edi idịghe ntre ke mbufo ẹkekpep ẹto Christ,+
21 n̄kọm mbufo ẹma ẹkop se enye eketịn̄de, ẹma ẹnyụn̄ ẹkpep n̄kpọ ẹto enye,+ kpa nte akpanikọ+ odude ke Jesus,
22 ete mbufo ẹsio akani owo+ ẹduọk, emi ekemde ye ido uwem mbufo eke eyo oko, emi onyụn̄ ọdiọn̄de-diọn̄ abiara+ ekekem ye mme abian̄a abian̄a udọn̄ esie;+
23 edi yak mbufo ẹkabade ẹdi obufa ke odudu oro anamde utom ke ekikere mbufo,+
24 ẹnyụn̄ ẹmen obufa owo+ ẹsịne+ emi ẹkebotde+ ekekem ye uduak Abasi ke ata edinen ido+ ye akpanikọ.
25 Ntem, ke emi mbufo ẹma ẹkeduọn̄ọ nsu,+ yak owo mbufo kiet kiet etịn̄ akpanikọ ọnọ mbọhọidụn̄ esie,+ koro nnyịn idide ndido idem kiet eken.+
26 Ẹyat esịt, edi ẹkûnam idiọkn̄kpọ;+ ẹkûyak utịn osụhọde edisịm iyatesịt mbufo,+
27 ẹkûnyụn̄ ẹyak ufan̄ ẹnọ Devil.+
28 Yak owo emi esiyịpde inọ okûyịp aba,+ edi yak enye anam ọkpọsọn̄ utom, ada ubọk esie anam eti utom,+ man enye ekpenyene n̄kpọ ndideme nnọ owo eke odude ke unana.+
29 Ẹkûyak mbumbu ikọ ọwọrọ mbufo ke inua,+ edi ẹtịn̄ se ededi oro ọfọnde ndida mbọp owo nte ekemde ye idaha kiet kiet, man ada ufọn ọsọk mme andikop.+
30 N̄ko, ẹkûnam edisana spirit Abasi ofụhọ,+ kpa spirit emi ẹkedade ẹfịk mbufo idiọn̄ọ+ ẹnịm ẹnọ usen eke ẹdidade ufak+ ẹsio mbufo ke ufụn.
31 Ẹsion̄o kpukpru idiọk udu+ ye iyatesịt ye ifụtesịt ye mfiori ye ikọ isụn̄i+ ẹfep ke idem mbufo ọkọrọ ye kpukpru idiọkn̄kpọ.+
32 Edi ẹfọn ido+ ye kiet eken, ẹtua owo mbọm,+ ẹfen kiet eken ke ofụri esịt kpa nte Abasi n̄ko ekefende mbufo ke ofụri esịt ebe ke Christ.+
