2 Corinth 9;1-15
9 Edi kaban̄a utom+ oro enyenede ndisana owo, ufọn idụhe ami ndiwewet mbufo,
2 koro mmọfiọk unyịmesịt eke mbufo ẹnyenede emi ndade mbụre mbụre mban̄a mbufo nnọ mbon Macedonia, nte ke Achaia odu ke mben̄eidem ke ofụri isua kiet idahaemi,+ ndien ifịk oro mbufo ẹnyenede emedemede ediwak mmọ.
3 Edi mmosio nditọete ndọn̄ ẹdi, mbak mbụre eke nnyịn ibụrede iban̄a mbufo ediwọrọ ikpîkpu ke n̄kpọ emi, edi man mbufo ẹtịm ẹben̄e idem,+ kpa nte n̄kesidọhọde mbufo ẹnam.
4 Mbak ndusụk, edieke mbon Macedonia ẹsan̄ade ye ami ẹdi ẹnyụn̄ ẹdide ẹdikụt ke mbufo iben̄eke idem, nnyịn ye mbufo ididia bụt ke mbụre oro nnyịn ikobụrede.
5 Ke ntre mma n̄kere ke oyom ẹsịn udọn̄ ẹnọ nditọete ẹte ẹdi ke ọtọ mbufo ẹdibem iso ẹtịm enọ ntatubọk oro ẹken̄wọn̄ọde ndinọ,+ man emi ekpedi enọ ntatubọk inyụn̄ idịghe n̄kpọ eke ẹnyịkde-nyịk ẹbọ.+
6 Edi kaban̄a emi, owo eke ọtọde ke ufat+ ọyọdọk ke ufat; edi owo eke ọtọde ke ntatubọk+ ọyọdọk uwak uwak n̄ko.
7 Yak owo kiet kiet anam kpa nte enye ebierede ke esịt esie, okûnam mmen̄e mmen̄e+ m̀mê ke edinyenyịk, koro Abasi amama owo eke ọnọde ke idatesịt.+
8 Akan oro, Abasi ekeme ndinam kpukpru mfọnido esie oro owo mîdotke awak ọnọ mbufo, man, ke adan̄aemi mbufo ẹyụhọde ke kpukpru n̄kpọ kpukpru ini, mbufo ẹkpenyene ekese ndida nnam kpukpru nti utom.+
9 (Kpa nte ẹwetde ẹte: “Enye amatat ubọk ọnọ owo n̄kpọ, enye ọmọnọ mme ubuene n̄kpọ, edinen ido esie odu ke nsinsi.”+
10 Edi enye emi ọnọde asuan n̄kpasịp uwak n̄kpasịp nditọ onyụn̄ ọnọde owo uyo ndita+ ọyọnọ mbufo n̄kpasịp nditọ onyụn̄ anam ọtọt, enye oyonyụn̄ anam mfri edinen ido mbufo ọtọt.)+
11 Ke kpukpru n̄kpọ ẹmenam mbufo ẹnyene inyene man mbufo ẹkpetat ubọk ẹnọ enọ ke kpukpru usụn̄, ndien emi anam mme owo ekọm Abasi;+
12 koro utom oro ẹnamde ẹnọ mme owo mi ikụreke ke ndinọ ndisana owo+ se inanade mmọ uwak uwak, edi n̄ko ndinọ Abasi ediwak ekọm.
13 Ebede ke uyarade oro utom emi ọnọde, mmọ ẹnọ Abasi ubọn̄ koro mbufo ẹmesụk ibuot ẹnọ eti mbụk emi aban̄ade Christ,+ nte mbufo ẹtan̄ade an̄wan̄wa ẹte ke ẹmesụk ibuot, koro mbufo ẹmenyụn̄ ẹtat ubọk ke etịbe eke mbufo ẹnọde ẹsọk mmọ ẹnyụn̄ ẹnọde ẹsọk kpukpru owo;+
14 mmọ ẹnam n̄kpeubọk ẹnọ mbufo onyụn̄ ọdọn̄ mmọ ndikụt mbufo ke ntak akakan mfọnido Abasi oro owo mîdotke+ emi odude ye mbufo.
15 Ekọm enyene Abasi ke ntak enọ mfọn esie oro inua mîkemeke ndibụk.+
