2 Chronicle 28;1-27
28 Ahaz+ ekedi isua edịp ke ini enye ọtọn̄ọde ndikara, enye onyụn̄ akara isua efịtekiet ke Jerusalem,+ ndien enye inamke se inende ke enyịn Jehovah nte David ete ete+ esie akanamde.
2 Edi enye akasan̄a ke usụn̄ ndidem Israel,+ onyụn̄ anam mme editara+ mbiet Baal.+
3 Enye ama onyụn̄ anam nsụn̄ikan̄+ uwa oto itịghede eyen Hinnom+ ọwọrọ ọdọk onyụn̄ ọfọp nditọiren+ esie ke ikan̄, nte ekemde ye mme mbubiam+ n̄kpọ mme idụt oro Jehovah ekebịnde efep ke iso nditọ Israel.+
4 Ndien enye esiwa uwa+ kpukpru ini onyụn̄ anam nsụn̄ikan̄ uwa ọwọrọ ọdọk ke mme edikon̄ ebiet+ ye ke n̄kpri obot+ ye ke idak kpukpru orụk eto eke ẹsehede.+
5 Ntre Jehovah Abasi esie ayak enye esịn ke ubọk+ edidem Syria+ tutu mmọ ẹkan enye ẹnyụn̄ ẹtan̄ ediwak mmọ nte mbuotekọn̄ ẹnyọn̄ọ Damascus.+ Ndien ẹyak enye ẹsịn ke ubọk edidem Israel+ n̄ko, enye onyụn̄ akan enye onyụn̄ owot ata ediwak owo.
6 Ndien Pekah+ eyen Remaliah+ owot owo tọsịn ikie ye edịp ke usen kiet ke Judah, koro mmọ ẹkekpọn̄de Jehovah+ Abasi mme ete ete mmọ, kpukpru mmọ ẹkedi mbon uko.
7 N̄ko-n̄ko, Zichri ọkpọsọn̄ owo Ephraim+ owot Maaseiah eyen edidem ye Azrikam etubom ufọk ye Elkanah emi ekedide udiana edidem.
8 Akan oro, nditọ Israel ẹtan̄ nditọete mmọ owo tọsịn ikie iba, iban ye nditọiren ye nditọiban ẹnyọn̄ọ nte mbuotekọn̄; mmọ ẹnyụn̄ ẹbụme n̄kpọ mmọ nte n̄kpọ mbụme, ekem mmọ ẹda n̄kpọ mbụme emi ẹdi Samaria.+
9 Ndien prọfet Jehovah odu do emi ekerede Oded. Ntre enye ọwọrọ okosobo ye udịmekọn̄ emi ẹkedide Samaria onyụn̄ ọdọhọ mmọ ete: “Sese! Ekedi koro Jehovah Abasi mme ete ete mbufo okofụtde esịt+ ye Judah akanam enye ayak mmọ esịn mbufo ke ubọk, man mbufo ẹwot mmọ ke ifụtesịt+ emi ọdọkde esịm enyọn̄.+
10 Ndien, ke emi, mbufo ke ẹkere ndinam mbon Judah ye Jerusalem ẹkabade ẹdi ifịn iren+ ye ifịn iban mbufo. Nte mbufo inyeneke ubiomikpe ke iso Jehovah Abasi mbufo?
11 Ndien, ke emi, ẹkpan̄ utọn̄ ẹnọ mi ẹnyụn̄ ẹda mbuotekọn̄ emi mbufo ẹketan̄de ke otu nditọete+ mbufo ẹkeyak, koro ikan̄-ikan̄ iyatesịt Jehovah odorode mbufo ke idem.”+
12 Ntem ndusụk mme etubom+ nditọ Ephraim,+ Azariah eyen Jehohanan, Berechiah eyen Meshillemoth ye Jehizkiah eyen Shallum ye Amasa eyen Hadlai ẹdaha ẹda ẹbiọn̄ọ mbon oro ẹtode ekọn̄ ẹnyọn̄ ẹdi,
13 ẹnyụn̄ ẹdọhọ mmọ ẹte: “Mbufo ẹkûda mbuotekọn̄ oro ẹdụk ẹdi mi, koro emi edisụn̄ọde ke nnyịn ndinyene ubiomikpe ke iso Jehovah. Mbufo ẹyom ndinam idiọkn̄kpọ ye ubiomikpe nnyịn ẹtetịm ẹkpon, koro nnyịn imenyenyene akamba ubiomikpe,+ ndien ikan̄-ikan̄ iyatesịt+ omodoro Israel ke idem.”
14 Ntem mbonekọn̄+ ẹkpọn̄ mbuotekọn̄+ ye mme n̄kpọ mbụme oro ke iso mbọn̄+ ye ke iso ofụri esop.
15 Ekem mbon oro ẹkesiakde enyịn̄+ do ẹdaha ẹda ẹnyụn̄ ẹmụm mbuotekọn̄ oro, ẹnyụn̄ ẹsion̄o ọfọn̄ ke otu n̄kpọ mbụme oro ẹsịne kpukpru mbon oro ẹsan̄ade iferi. Ntre mmọ ẹsịne mmọ ọfọn̄+ ẹnyụn̄ ẹsịne mmọ ikpaukot ẹnyụn̄ ẹnọ mmọ udia+ ẹnyụn̄ ẹnọ mmọ n̄kpọ ẹn̄wọn̄+ ẹnyụn̄ ẹfiọn̄ọ mmọ aran. N̄ko-n̄ko, amaedi owo ekededi eke mîkemeke ndisan̄a, mmọ ẹnọ mme ass ẹmen+ mmọ ẹkeyak ke Jericho,+ kpa obio eyop,+ ekpere nditọete mmọ. Ekem mmọ ẹfiak ẹnyọn̄ọ Samaria.+
16 Ini oro ke Edidem Ahaz+ ọkọdọn̄ utom ọnọ ndidem Assyria+ ete ẹdin̄wam imọ.
17 Ndien mbon Edom+ ẹtọn̄ọ ntak ẹdi ẹdin̄wana ye mbon Judah ẹnyụn̄ ẹtan̄ mbuotekọn̄ ẹnyọn̄ọ.
18 Ndien mbon Philistia+ ẹbụmede ẹda ekọn̄ ẹdụk obio Shephelah+ ye Negeb+ Judah ẹkekan ẹnyụn̄ ẹda Beth-shemesh+ ye Aijalon+ ye Gederoth+ ye Soco+ ye n̄kpri obio esie ye Timnah+ ye n̄kpri obio esie ye Gimzo ye n̄kpri obio esie; ndien mmọ ẹdụn̄ do.
19 Koro Jehovah okosụhọrede+ Judah enịm ke ntak Ahaz edidem Israel, sia enye akayakde Judah ẹnam n̄kpọ ẹbe ubọk,+ unana edinam akpanikọ nnọ Jehovah okonyụn̄ okponde.
20 Ekem Tilgath-pilneser+ edidem Assyria edin̄wana ye enye onyụn̄ anam enye ofụhọ,+ inyụn̄ isọn̄ọke enye idem.
21 Koro Ahaz ọkọkwọkde kpukpru n̄kpọ ke ufọk Jehovah+ ye ke ufọk edidem+ ye ke ufọk mbọn̄,+ ada ọnọ edidem Assyria+ ke enọ; edi oro ikan̄wamke enye.
22 Edi ke ini emi enye anamde enye okop mfụhọ, enye, oro edi Edidem Ahaz, ọdọdiọn̄ aka iso ke unana edinam akpanikọ nnọ Jehovah.+
23 Ndien enye ọtọn̄ọ ndiwa uwa nnọ mme abasi+ Damascus+ oro ẹken̄wanade ye enye, onyụn̄ ọdọhọ ete: “Sia edide mme abasi ndidem Syria ke ẹn̄wam mmọ,+ mmọn̄ n̄wa uwa nnọ mmọ man mmọ ẹn̄wam+ mi.” Ndien mmọ ẹnam enye ye ofụri Israel ẹtuak ukot ẹduọn̄ọ.+
24 N̄ko-n̄ko, Ahaz atan̄ n̄kpoduoho+ ufọk ata Abasi obon ọtọkiet onyụn̄ okpok n̄kpoduoho ufọk ata Abasi n̄ken̄e n̄ken̄e,+ onyụn̄ eberi mme usụn̄+ ufọk Jehovah, onyụn̄ anam mme itieuwa ọnọ idemesie ke kpukpru inụk Jerusalem.+
25 Ndien enye anam mme edikon̄ ebiet+ ke kpukpru obio, idem ke mme obio Judah ndida nnam nsụn̄ikan̄ uwa ọwọrọ ọdọk ọnọ mme abasi+ efen, tutu enye ayat+ Jehovah Abasi mme ete ete esie esịt.
26 Amaedi mme n̄kpọ+ efen emi ẹban̄ade enye ye kpukpru usụn̄ esie, akpa ye akpatre, sese ẹwet mmọ ẹsịn ke N̄wed+ Ndidem Judah ye eke Israel.
27 Ekem Ahaz osụhọde ana ye mme ete ete esie, mmọ ẹnyụn̄ ẹbụk enye ke obio, ke Jerusalem, edi mmọ ikobụkke enye ke itie ubụk ndidem Israel.+ Ndien Hezekiah eyen esie akara ke itie esie.
