Abasi oyom fi ọdiọn̄ọ imọ, asan̄a ekpere imọ, ama onyụn̄ anam n̄kpọ imọ ke ofụri esịt. (Matthew 22:37, 38; James 4:8) Nte Jesus okodude uwem ye mme n̄kpọ oro enye ekekpepde mme owo ẹkeme ndin̄wam fi ọfiọk nte akpanamde uduak Abasi. (John 7:16, 17) Jesus iketịn̄ke-tịn̄ kpọt se idide uduak Abasi—enye ama ananam emi owụt. Ke akpanikọ, Jesus ọkọdọhọ ke imọ ikodụhe uwem man ‘inam uduak idem imọ, edi ikodu man inam uduak Abasi.’—John 6:38.

Ndi oyom ẹwụt mi san̄asan̄a idiọn̄ọ m̀mê n̄kukụt mbemiso mfiọk se Abasi oyomde mi nnam?

 Baba-o, koro Bible esịne etop oro Abasi ọnọde ubonowo. Se idin̄wamde fi “eben̄e idem ọyọhọ ọyọhọ ndinam eti utom ekededi” odu ke Bible. (2 Timothy 3:16, 17) Abasi oyom fi ada se esikotde ke Bible ye “ukeme ukere n̄kpọ” oro Abasi ọnọde fi ọfiọk se enye oyomde fi anam.—Rome 12:1, 2; Ephesus 5:17.

Ndi Mmekeme Ndinam Se Abasi Oyomde?

 Ih, emekeme, koro Bible ọdọhọ ete: “Ewụhọ Abasi inen̄ekede isọn̄ nnyịn ndinam.” (1 John 5:3, Easy-to-Read Version) Edi emi iwọrọke ke esimem utom kpukpru ini ndinịm ewụhọ Abasi. Edi ufọn oro edibọde enen̄ede okpon akan ukeme ekededi oro afo ekesịnde man enịm mme ewụhọ Abasi. Jesus ke idem esie ọkọdọhọ ete: “Mbon oro ẹkopde ikọ Abasi ẹnyụn̄ ẹnamde enye ẹsikam ẹkop inemesịt.”—Luke 11:28, Good News Translation.