Edisana spirit edi odudu emi Abasi esidade anam n̄kpọ kpukpru ini. (Micah 3:8; Luke 1:35) Ke ini Abasi ọnọde spirit esie ọwọrọ, oro ọwọrọ ke enye osio odudu esie anam uduak esie.—Psalm 104:30; 139:7.

 Ẹkabade ikọ oro “spirit,” ke Bible, ẹto ikọ Hebrew emi ruʹach ye ikọ Greek emi pneuʹma. Ediwak ini ke Bible ẹsikabade ikọ iba oro nte anamutom odudu Abasi, m̀mê edisana spirit. (Genesis 1:2) Edi ikọ mbiba oro ọwọrọ n̄kpọ awak. Ke ndusụk itie mmọ ẹwọrọ:

•   Ibifịk emi owo en̄wekde.—Habakkuk 2:19; Ediyarade 13:15.

•   Ofụm.—Genesis 8:1; John 3:8.

•   Ibifịk uwem.—Job 34:14, 15.

•   Ido m̀mê edu uwem.—Numbers 14:24.

•   Mbon emi ẹdide spirit, utọ nte Abasi ye mme angel.—1 Ndidem 22:21; John 4:24.

 Kpukpru se ikọ oro ọwọrọde emi owụt ke ẹtịn̄ ẹban̄a n̄kpọ emi enyịn owo mîkemeke ndikụt, edi emi ekemede ndinam se enyịn owo okụtde. ‘Ukem nte ofụm, spirit Abasi, enen̄ede enyene odudu kpa ye oro owo mîkemeke ndikụt spirit oro, enye mînyụn̄ idịghe odu-uwem-n̄kpọ.’—An Expository Dictionary of New Testament Words, by W. E. Vine.

 Ke ndusụk itie, Bible okot edisana spirit “ubọk” Abasi m̀mê “nnuenubọk” Abasi. (Psalm 8:3; 19:1; Luke 11:20; se n̄ko Matthew 12:28.) Kpa nte owo esidade ubọk esie anam nsio nsio n̄kpọ, Abasi esida edisana spirit esie anam nsio nsio n̄kpọ. Ke uwụtn̄kpọ:

•   Ama ada obot enyọn̄ ye isọn̄.—Psalm 33:6; 104:30; Isaiah 66:1, 2.

•   Ama ada anam ẹwet Bible.—2 Peter 1:20, 21.

•   Ama ada ọnọ ikọt esie odudu ẹnam utịben̄kpọ ẹnyụn̄ ẹsịn ifịk ẹkwọrọ ikọ.—Luke 4:18; Utom 1:8; 1 Corinth 12:4-11.

•   Esida an̄wam ikọt esie ẹnyene nti edu.—Galatia 5:22, 23.

Edisana spirit idịghe owo

 Bible okot edisana spirit “ubọk” Abasi, “nnuenubọk” Abasi, m̀mê “ibifịk” Abasi man owụt ke spirit oro idịghe owo nte Abasi. (Exodus 15:8, 10) Ubọkowo isidahake ikpọn̄ ikanam n̄kpọ, enyene-idem esida enye anam. Kpasụk ntre ke edi ye edisana spirit; spirit oro ikemeke ndinam n̄kpọ ekededi, Abasi esida enye anam n̄kpọ. (Luke 11:13) Bible ada edisana spirit odomo n̄ko ye mmọn̄, onyụn̄ ọdọhọ ke owo emi enyenede spirit oro ọyọhọ ye mbuọtidem ye ifiọk. Kpukpru emi owụt ke spirit oro idịghe owo.—Isaiah 44:3; Utom 6:5; 2 Corinth 6:6.

 Bible etịn̄ ke Abasi ekere Jehovah, ke Eyen esie ekere Jesus Christ; edi idụhe itie ndomokiet ke Bible emi ọdọhọde ke edisana spirit enyene enyịn̄. (Isaiah 42:8; Luke 1:31) Ini ẹkewụtde Stephen heaven ke n̄kukụt, enye okokụt owo iba kpọt, idịghe owo ita. Bible ọdọhọ ete: “Enye, ọyọhọ ye edisana spirit, owụk enyịn ese enyọn̄ onyụn̄ ada okụt ubọn̄ Abasi ye Jesus nte adade ke ubọk nnasia Abasi.” (Utom 7:55) Abasi akada edisana spirit esie anam Stephen okụt n̄kukụt oro.

 Se mme owo ẹsitịn̄de: Edisana spirit, m̀mê holy ghost edi Abasi; enye onyụn̄ esịne ke otu owo ita emi ẹdianade ẹnam Abasi kiet nte ẹtịn̄de ke 1 John 5:7, 8 ke Bible King James.

 Akpanikọ: Okpokot 1 John 5:7, 8 ke Bible King James, oyokụt ke ẹma ẹsịn ikọ emi, “ke heaven, Ete, Ikọ, ye Holy Ghost: ndien mbita emi ẹdi kiet. Onyụn̄ enyene mbita emi ẹtiede ntiense ke isọn̄.” Mbon emi ẹsinamde ndụn̄ọde ẹban̄a n̄kpọ Bible, ẹdọhọ ke itie oro ikesịneke ke se apostle John ekewetde, ke ikpanaha ẹsịn enye ke Bible. Ete kiet emi ekerede Prọfesọ Bruce M. Metzger ama ewet ete: “Ikọ oro ikesịneke ke N̄wed Abasi, ikponyụn̄ inaha ẹsịn enye ke Obufa Testament.”—A Textual Commentary on the Greek New Testament.

 Se mme owo ẹsitịn̄de: Bible esitịn̄ n̄kpọ aban̄a edisana spirit nte etịn̄ aban̄a owo; oro owụt ke edisana spirit edi owo.

 Akpanikọ: Ndusụk ini Bible esitịn̄ n̄kpọ aban̄a edisana spirit nte etịn̄ aban̄a odu-uwem-owo, edi oro iwọrọke ke edisana spirit edi owo. Bible esinyụn̄ etịn̄ n̄kpọ n̄ko aban̄a ọniọn̄, n̄kpa, ye idiọkn̄kpọ nte etịn̄ aban̄a owo. (Mme N̄ke 1:20; Rome 5:17, 21) Ke uwụtn̄kpọ, Bible ọdọhọ ke ọniọn̄ esinam “utom,” ke ọniọn̄ onyụn̄ enyene “nditọ.” Bible ọdọhọ n̄ko ke idiọkn̄kpọ esibian̄a owo, owot owo, onyụn̄ anam owo esịn esịt ke n̄kpọ owo.—Matthew 11:19; Luke 7:35; Rome 7:8, 11.

 Kpasụk ntre, ke ini apostle John ekewetde se Jesus eketịn̄de, enye ama okot edisana spirit “andin̄wam” (paraclete), onyụn̄ ọdọhọ ke spirit oro ọyọnọ uyarade, ayada usụn̄, eyetịn̄ ikọ, oyokop n̄kpọ, ayatan̄a, ọyọnọ ubọn̄, oyonyụn̄ ọbọ n̄kpọ. Okpokot se John eketịn̄de oro ke Bible Ikọmbakara, John eketịn̄ n̄kpọ aban̄a edisana spirit ke itie oro nte n̄kpọ eke ẹdọhọde ke spirit oro edi erenowo. (John 16:7-15) Se ikanamde enye etịn̄ ntre edi sia ke ikọ Greek, ẹma ẹkokot n̄kpọ “andin̄wam” (pa·raʹkle·tos), ẹsiwak nditịn̄ mban̄a n̄kpọ oro nte ẹtịn̄ ẹban̄a erenowo. Edi ke ini John okokotde edisana spirit pneuʹma, ikọ Greek emi ẹkemede ndida ntịn̄ n̄kpọ mban̄a odu-uwem-n̄kpọ ye n̄kpọ emi mîdịghe odu-uwem-n̄kpọ, John ama esịn ikọ emi owụtde ke edisana spirit idịghe owo.—John 14:16, 17.

 Se mme owo ẹsitịn̄de: Ndinịm owo baptism ke enyịn̄ edisana spirit owụt ke edisana spirit edi owo.

 Akpanikọ: Bible esiwak ndidọhọ ke “enyịn̄,” man owụt odudu emi ẹdade ẹnam n̄kpọ m̀mê ebiet emi ẹdade odudu ẹnam n̄kpọ oro. (Deuteronomy 18:5, 19-22; Esther 8:10) Emi onyụn̄ etie nte ndidọhọ ke Ikọmbakara nte “in the name of the law,” emi ọwọrọde ke enyịn̄ ibet; ikọ oro isiwọrọke ke ibet edi owo. Owo ndina baptism “ke enyịn̄ ” edisana spirit ọwọrọ ke enye ọdiọn̄ọ ke Abasi esida spirit oro an̄wam imọ inam uduak esie.—Matthew 28:19.

 Se mme owo ẹsitịn̄de: Mme apostle ye mme mbet Jesus eken ẹma ẹnịm ke edisana spirit edi owo.

 Akpanikọ: Bible idọhọke ntre; mbụkeset onyụn̄ owụt ke ikọ oro idịghe akpanikọ. N̄wed emi ẹkotde Encyclopædia Britannica ọdọhọ ete: “Ke mbono emi ẹdiọn̄ọde nte mbono Council of Constantinople, emi ẹkenịmde ke ọyọhọ isua 381, ke ẹkedọhọ ke edisana spirit edi owo, ke spirit oro adiana anam Abasi-Ita-ke-Kiet.” Ẹkenịm mbono oro ke n̄kpọ nte isua 250 ama ekebe tọn̄ọ akpatre apostle akakpa.