Ke 2017, nditọete 12 ẹma ẹdụk ubom ke ebiet kiet ke Nicaragua emi ẹkotde Mosquito Coast m̀mê Miskito Coast ẹka ata nsannsan ebiet. Ubom mmọ ekekere Sturi Yamni. Brọda Stephen emi eketienede asan̄a ke ubom oro ọkọdọhọ ete, “Enyene nditọete nnyịn ifan̄ emi ẹdụn̄de ke ata nsannsan ebiet, itie emi mmọ ẹsinyụn̄ ẹkwọrọde ikọ okpon ata etieti. Ikaka do man ikọsọn̄ọ mmọ idem inyụn̄ itiene mmọ ikwọrọ ikọ do.”

 To ke ebiet emi nditọete 12 oro ẹkedụkde ubom ẹtọn̄ọ uwat sịm obio La Cruz de Río Grande emi mmọ ẹkekade edi n̄kpọ nte kilomita 200. Mmọ ẹma ẹwat ekpri mmọn̄ emi ẹkotde Pearl Lagoon ẹbe do ẹdụk akpa emi ẹkotde Río Grande de Matagalpa. Enyịn̄ ubom mmọ oro ke usem Miskito ọwọrọ “Eti Mbụk.” Edi nditọete nnyịn ikọdiọn̄ọke ke se mmimọ ikade oro, ke imen eti mbụk isọk mme owo emi ẹdụn̄de ke mben akpa oro. Ke mmọ ẹma ẹkewat n̄kpọ nte hour 12, owo isịnke ini emi mmọ ẹtuakde ẹda ẹduọk odudu okoneyo, nditọete oro ẹma ẹdisịm obio La Cruz de Río Grande emi mmọ ẹkekade. Nditọete itiokiet emi ẹkedụn̄de ke obio oro ẹma ẹdara ndikụt nditọete mmọ.

 Edi enyene-ndịk n̄kpọ ama etịbe okoneyo usen emi mmọ ẹkesịmde obio oro. Ata akamba oyobio ama osio mmọn̄ ediyọhọ akpa Río Grande de Matagalpa. Ke ufan̄ hour ifan̄, mmọn̄ akpa oro ama ọtọ ọyọhọ esụk onyụn̄ emen mme ufọk emi ẹkedude ke mben akpa oro. N̄kpọ emi ama aka iso ofụri usen iba. Mmọn̄ ama ọtọ emen Ufọkmbono Obio Ubọn̄ ye ediwak ufọk ke La Cruz. Nditọete emi ẹketode ẹdi ẹma ẹn̄wam mbon obio oro yak ẹwọrọ ke ufọk mmọ emi mmọn̄ ọkọtọde emen. Ata ediwak mmọ ẹkena ke ufọkenyọn̄ sista kiet okoneyo iba emi ẹketienede.

 Ke ọyọhọ okoneyo ita tọn̄ọ nte n̄kpọ oro eketịbe, ọbọn̄ obio La Cruz ama edika ebịne nditọete emi ẹketode ẹdi ọdọhọ ẹn̄wam mmimọ. Sia ubom emi nditọete nnyịn oro ẹkewatde ẹdi ekedide n̄kukụre ubom emi ọsọn̄de idem ekem se ẹdade ẹwat akpa emi mmọn̄ ama ọkọtọ ọyọhọ do, ọbọn̄ obio oro ama edidọhọ yak mmọ ẹn̄wam mmimọ ẹmen n̄kpọ nte owo duop ẹka ẹken̄wam mme owo ke mme obio efen emi mmọn̄ ọkọtọde emen. Nditọete nnyịn oro ẹma ẹnyịme ndin̄wam.

 Usenubọk edemusen oro, nditọete ita ẹma ẹmen mme owo oro ẹtọn̄ọ isan̄. Stephen ọdọhọ ete, “Itetịn̄ mi, mmọn̄ akpa oro ke akadama idat, ke odụri mme ikpọ eto emi oyobio okowụberede ọdọn̄ ke mmọn̄, ndusụk itie ke akpa oro ke oyụt, mmọn̄ onyụn̄ efehe ọsọp ata etieti.” Kpa ye kpukpru oro, nditọete ita oro ẹma ẹkeme ndiwat mme owo oro n̄ka obio ita yak ẹken̄wam mme owo do.

 Nditọete ita oro ẹma ẹda ifet oro ẹdọn̄ mbon obio oro esịt, sia mmọ ẹma ẹnyene mbọm tutu. Mmọ ẹma ẹnyụn̄ ẹnọ mme owo Ẹdemede! isua 2017 emi ibuotikọ ekedide “Se Akpanamde ke Ini Afanikọn̄.” Ibuotikọ Ẹdemede! oro ama ekem ye se iketịbede inọ mmọ oro.

 Mme owo ke mme obio oro nditọete oro ẹkekade ẹken̄wam ẹma ẹnen̄ede ẹkọm nditọete oro nte mmọ ẹkedide ẹdin̄wam mmimọ, ẹnyụn̄ ẹdade Ikọ Abasi ẹdọn̄ mmimọ esịt. Ndusụk mbon obio oro ẹkedọhọ ẹte, “Esinenem mmọ ndin̄wam mme owo ke ini nnanenyịn.” Ndusụk ẹdọhọ, “Mmọ ẹnen̄ede ẹma mme mbọhọidụn̄ mmọ.” Ediwak owo ke mme obio oro ẹnen̄ede ẹma ndikop ukwọrọikọ idahaemi sia mmọ ẹma ẹkụt kpukpru se Mme Ntiense Jehovah ẹkenamde ndin̄wam nditọete mmọ ye mbon en̄wen.