Enɔ anyi ɖe anyigba, ƒoƒoe vɔ̃ɖiwo tee tso eƒe ta va se ɖe afɔ gɔme. Kpɔe ɖa le susu me be enɔ anyi ɖi gblɔyii, ede mo to, etsi akogo, eye ŋusẽ boo megale eŋu be wòanya tagbatsu siwo le eŋu hɔ̃ɔ la gɔ̃ hã o. Ebɔbɔ nɔ dzofi me wònye konyifafa ƒe dzesi, eye esi wɔna aɖeke megale eŋu o la, ɖeko wòtsɔ sonu gaglɛ nɔ ŋuti kumee. Bubu nɔ eŋu tsã, gake fifia amewo doa vloe! Exɔlɔ̃wo, aƒelikawo kple ƒometɔwo gbe nu le egbɔ. Amewo ɖea alɔme le eŋu, ɖeviwo kura gɔ̃ hã. Esusu be yeƒe Mawu, Yehowa, hã tso ɖe ye ŋu, gake eda ƒu le go ma me.—Hiob 2:8; 19:18, 22.

Hiob ye nye amea. Mawu gblɔ tso eŋu be: “Ame aɖeke mede enu le anyigba dzi o.” (Hiob 1:8) Ƒe alafa geɖe megbe gɔ̃ hã la, Yehowa bu Hiob be enye ame siwo le dzɔdzɔe wu siwo nɔ anyigba dzi kpɔ la dometɔ ɖeka.—Ezekiel 14:14, 20.

Ðe nya vɔ̃wo dzɔ ɖe dziwò alo be èle nɔnɔme sesẽwo me toma? Hiob ƒe ŋutinyaa ate ŋu afa akɔ na wò ŋutɔ. Ate ŋu ana nàgasrɔ̃ nu geɖe wu tso nɔnɔme aɖe si wòle be wòanɔ Mawu subɔla wɔnuteƒe ɖe sia ɖe si la ŋu—eyae nye fɔmaɖimaɖi. Amegbetɔwo ɖea nɔnɔme sia fiana ne woléa nuteƒewɔwɔ na Mawu me ɖe asi bliboe ale gbegbe be woyia edzi wɔa eƒe lɔlɔ̃nu ne nɔnɔme sesẽwo va wo dzi gɔ̃ hã. Na míagasrɔ̃ nu geɖe tso Hiob gbɔ.

Anɔ eme be ɣeaɖeɣi le Hiob ƒe ku megbee nuteƒewɔla Mose ŋlɔ nu tso Hiob ƒe ŋutinyaa ŋu. Menye nu siwo dzɔ le anyigba dzi ku ɖe Hiob ŋu koe Mawu ƒe gbɔgbɔ ʋã Mose wòɖe fia o, ke ena míenya nanewo tso nu siwo dzɔ le dziƒo hã ŋu.

Le ŋutinyaa ƒe gɔmedzedze la, Hiob nɔ agbe si me dzidzeme le eye wònɔ dzidzɔ kpɔm. Nu dze edzi nɛ, eye wònye ame xɔŋkɔ si ŋu bubu nɔ le Uz-nyigba dzi—anɔ eme be du sia nɔ Arabia ƒe dziehe. Enaa nu ame siwo hiã tu eye wòkpena ɖe wɔnamanɔŋutɔwo ŋu. Mawu yra Hiob kple srɔ̃a wodzi vi ewo. Gawu la, Hiob dea asixɔxɔ ƒomedodo si le eya kple Yehowa dome ŋu. Edina vevie be yeawɔ nu wòadze Yehowa ŋu, abe ale si tɔgbuiawo Abraham, Isak, Yakob, kple Yosef wɔe ene. Abe blemafofo mawo ene la, Hiob hã nɔ abe nunɔla ene na eƒe ƒomea, elabe esaa vɔwo ɖe viawo ta edziedzi.—Hiob 1:1-5; 31:16-22.

Gake nuwo va trɔ kpata le Hiob ƒe agbe me. Ŋutinyaa ɖe nu siwo yi edzi le dziƒo la fia, si wɔe be míenya nu siwo Hiob mate ŋu anya o. Yehowa ƒe dɔla wɔnuteƒewo kpe ta le Mawu ŋkume, eye aglãdzela Satana hã va do. Yehowa nya be Hiob, si nye ame dzɔdzɔe la, ƒe nu vea dɔme na Satana, eya ta ehe Satana ƒe susu yi Hiob ƒe fɔmaɖimaɖi si ɖe dzesi la dzi. Satana tɔ gbe Mawu gblɔ bena: “Dzodzroe Hiob vɔ̃a Mawua? Ðe menye wòe tɔ kpɔ ɖe eya ŋutɔ kple eƒe aƒe kpakple eƒe nuwo katã ŋu godoo va kpe oa?” Satana lé fu fɔmaɖilawo. Ale si wosubɔa Yehowa Mawu tso dzi blibo me la ɖenɛ fiana be Satana nye nugbeɖola vɔ̃ɖi si melɔ̃a ame o. Eya ta Satana te tɔ ɖe edzi be ɖokuitɔdidi ta koe Hiob subɔa Mawu ɖo. Satana gblɔ be ne nu sia nu dome gblẽ na Hiob la, aƒo fi ade Yehowa le eya ŋutɔ ŋkume!—Hiob 1:6-11.

Yehowa na mɔnukpɔkpɔ gã aɖe Hiob le eƒe manyamanya me: Eyae nye be wòaɖee afia be Satana nye aʋatsokala. Mawu ɖe mɔ na Satana be wòagblẽ nu siwo katã nɔ Hiob si la dome. Gake meɖe mɔ nɛ be wòaka asi Hiob ŋutɔ ŋu o. Satana tso kaba ɖe tame vɔ̃ si wòɖo ɖe Hiob ŋu la ŋu. Le ŋkeke ɖeka pɛ ko me la, Satana he vɔ̃ geɖe va Hiob dzi. Wova gblɔ nɛ be eƒe lãhawo katã nu yi—gbã, eƒe nyiwo kple tedziwo, eyome eƒe alẽwo eye mlɔeba, eƒe kposɔwo. Esi gavloe wue nye be, wowu eƒe subɔvi siwo nɔ lã mawo dzi kpɔm la hã. Le alẽawo gome la, wova gblɔ na Hiob be “Mawu ƒe dzo,” si ate ŋu afia dzikedzo, ye tsrɔ̃ wo. Hafi Hiob nakpɔ ame siwo gbegbe ku nɛ la adze sii alo ase ale si yeva da ahee gɔme la, nya si wogava gblɔ nɛ ya gavɔ̃ɖi wu gɔ̃ hã. Via ewoawo kpe ta le wo nɔvi tsitsitɔ ƒe aƒe me, eye kasia ya sesẽ aɖe ƒo va lɔ xɔa ɖe eme ale be wòmu dze ɖeviawo dzi eye wo katã woku!—Hiob 1:12-19.

Asesẽ ŋutɔ be míanya ale si Hiob se le eɖokui me, alo be manya wɔ o gɔ̃ hã. Hiob dze eƒe awuwo, elũ ta, eye wòtsra ɖe anyigba. Hiob ƒo nya ta be Mawu gbɔe nu siwo nɔ ye si la tso eye eya kee gaxɔ wo. Le nyateƒe me la, Satana wɔ nu ayetɔe ale be wòdze abe Mawue na vɔ̃ mawo dzɔ ɖe Hiob dzi ene. Ke hã, Hiob meƒo fi de Mawu abe ale si Satana gblɔe ene o. Hiob gblɔ boŋ be: “Woakafu Yehowa ƒe ŋkɔ ɖaa.”—Hiob 1:20-22.

Dzi ku Satana vevie, eye wògbe tanana. Egava do ɖe Yehowa ŋkume ake esime eƒe dɔlawo katã kpe ta. Yehowa gakafu Hiob ɖe eƒe fɔmaɖimaɖi ta, elabe togbɔ be Satana he fukpekpe mawo katã va edzi hã la, mena ta o. Satana gblɔ na Mawu be: “Ŋutigbalẽ ɖe ŋutigbalẽ teƒe, eye amegbetɔ atsɔ nu sia nu si le esi la ana ɖe eƒe agbe ta. Gake ne èdo wò asi ɖa ka asi eƒe ƒu kple eƒe ŋutilã ŋu la, aƒo fi ade wò le wò ŋutɔ wò ŋkume godoo.” Satana ka ɖe edzi be ne Hiob dze dɔ vevie la, aƒo fi ade Mawu. Ke hã, Yehowa ka ɖe Hiob dzi bliboe, eya ta eɖe mɔ na Satana be wòahe dɔléle ava edzi, ɖeko meɖe mɔ nɛ be wòaɖe eƒe agbe ɖa o.—Hiob 2:1-6.

Eteƒe medidi o, Satana he dɔléle vɔ̃ɖi si ŋu míeƒo nu tsoe le nyatia ƒe gɔmedzedze la va Hiob dzi. Kpɔ ale si srɔ̃a ƒe nu awɔ nublanui ɖa. Eƒe dzi gbã gudugudu le via ewo siwo ku la ta xoxo, eye fifia, srɔ̃a ye nye esia le fu kpem vevie evɔ naneke meli wòawɔ tso eŋu o! Esi nu te ɖe edzi vevie ta la, egblɔ na Hiob be: “Ègalé wò nuteƒewɔwɔ me ɖe asi kokokoa? Gbe Mawu, ne nàku!” Menye aleae Hiob nya be ye srɔ̃ lɔlɔ̃a ƒoa nui o. Ðeko wòƒo nya ta be esi ye srɔ̃ megate ŋu nɔ nuwo ŋu bum nyuie o tae wòƒo nu nenema ɖo. Ke hã, egaɖoe kplikpaa be yemagbe Mawu alo aƒo fi adee o. Mewɔ nu vɔ̃ kple eƒe nuyiwo o.—Hiob 2:7-10.

Ènya be ŋutinya wɔnublanui sia ka wò hã? De dzesii be menye Hiob ɖeɖe ko ŋue Satana ƒe gbetɔame vɔ̃ɖia ku ɖo o, ke ame amegbetɔwo katã ye. Satana gblɔ be: “Amegbetɔ atsɔ nu sia nu si le esi la ana ɖe eƒe agbe ta.” Ne míagblɔe le mɔ bubu nu la, Satana xɔe se be mía dometɔ aɖeke mate ŋu awɔ nuteƒe na Yehowa bliboe o! Ele tɔ tem ɖe edzi be mèlɔ̃ Mawu ŋutɔŋutɔ o, eye be àgbe nu le Mawu gbɔ enumake ale be nàƒo asa na fukpekpe. Eya ta nya si gblɔm Satana le ye nye be wò hã ènye ɖokuitɔdila abe ye ke ene! Ðe nàdi be yeaɖee afia be eƒe nutsotsoa nye alakpa? Mɔnukpɔkpɔ ma le ʋuʋu ɖi na mía dometɔ ɖe sia ɖe. (Lododowo 27:11) Azɔ na míagakpɔ kuxi bubu siwo gava Hiob dzi.

Ŋutsu etɔ̃ aɖewo siwo nya Hiob la se nu tso nya vɔ̃ siwo dzɔ ɖe edzi la ŋu, eye wozɔ mɔ va egbɔ be yewoafa akɔ nɛ. Biblia yɔ ŋutsu mawo be Hiob xɔlɔ̃wo. Esi wokpɔe le adzɔge ɖaa la, womekpɔe dze sii o. Vevesese ɖi tsi ɖe Hiob ŋu, eye dɔlélea wɔe be eƒe ŋutigbalẽ nyɔ tsiɖitsiɖi ale gbegbe be eƒe dzedzeme va trɔ kura. Ŋutsu etɔ̃awo, siwo ŋkɔe nye Elifaz, Bildad kple Zofar, wɔ abe ɖe veve si sem Hiob nɔ la te ɖe wo dzi ene eye wofa avi sesĩe henɔ ke hlẽm ɖe woƒe tame. Eyome wobɔbɔ nɔ Hiob gbɔ le anyigba numaƒomaƒoe. Wonɔ anyi ɖe egbɔ kwasiɖa ɖeka blibo, zã kple keli, nya aɖeke magblɔmagblɔe. Mele be míasusui be esi wodi be yewoafa akɔ na Hiob tae womegblɔ nya aɖeke o ɖo o, elabe womebia nya aɖeke Hiob o, eya ta womeganya nu bubu aɖeke le Hiob ŋu wu esi ame bubuwo hã nya o, si nye be Hiob nɔ veve sem.—Hiob 2:11-13; 30:30.

Mlɔeba, eva hiã be Hiob ŋutɔ nado nya aɖe ɖa. Etsɔ vevesese ƒo fi de gbe si gbe wodzii. Eye eɖe nu siwo tae wònɔ veve sem vevie ɖo la dometɔ ɖeka gblɔ. Esusu be Mawu gbɔe yeƒe fukpekpewo tso! (Hiob 3:1, 2, 23) Togbɔ be xɔse sẽŋu gakpɔtɔ nɔ Hiob si hã la, ehiã na akɔfafa vevie ŋutɔ. Gake esi Hiob xɔlɔ̃awo te nuƒoƒo la, ekpɔe be woƒe ɖoɖoezizia kura nyo wu.—Hiob 13:5.

Elifaz, si anya nye tsitsitɔ le ame etɔ̃awo dome eye wòtsi wu Hiob sãa lae te nuƒoƒo. Emegbe ame eve susɔeawo hã ƒo nu. Ne míagblɔe la, wowɔ nu movitɔe esi woawo hã woƒo nu abe Elifaz ene. Nya siwo ŋutsu mawo gblɔ la dometɔ aɖewo dze abe ɖe naneke megblẽ le wo ŋu o ene, elabe nya siwo amewo gblɔna tso Mawu ŋu, siwo dze abe wole eteƒe ene, la ko gblɔm wonɔ. Le kpɔɖeŋu me, wogblɔ be Mawu kɔ boo, ehea to na ame vɔ̃ɖiwo, eye wòɖoa eteƒe na ame nyuiwo. Gake tso esime wote nuƒoƒo ko la, woƒe nyawo ɖee fia be wometsɔ ɖe le eme na Hiob ŋutɔŋutɔ o. Elifaz zã nya siwo dze abe ɖe susu nɔ wo me ene hegblɔ be ne Mawu nye ame nyui, eye wòhea to na ame vɔ̃ɖiwo, eye edze ƒãa be ɖe wole to hem na Hiob la, ke nu kae ema fia? Ðe manye be Hiob ŋutɔ nye ame vɔ̃ɖi le mɔ aɖe nu oa?—Hiob 4:1, 7, 8; 5:3-6.

Mewɔ nuku o be Hiob meda asi ɖe eƒe nuŋububu ma dzi o. Eƒo nu tsi tre ɖe eŋu vevie. (Hiob 6:25) Gake aɖaŋuɖola etɔ̃ mawo gaka ɖe edzi geɖe wu be Hiob wɔ nu gbegblẽ aɖe tsɔ ɣla, eye be le mɔ aɖe nu la, edze na vɔ̃ siwo katã nɔ edzi vam. Elifaz tso Hiob nu be enye dadala, evɔ̃ɖi, eye mevɔ̃a Mawu o. (Hiob 15:4, 7-9, 20-24; 22:6-11) Zofar gblɔ na Hiob be wòadzudzɔ nu vɔ̃ɖi wɔwɔ, eye megana nu vɔ̃ wɔwɔ nanɔ enu vivim o. (Hiob 11:2, 3, 14; 20:5, 12, 13) Eye nya si Bildad gblɔ ya gavloe ŋutɔ. Eƒe nyawo fia be nu vɔ̃ aɖee Hiob ƒe viwo anya wɔ, eya ta wodze na ku vavã!—Hiob 8:4, 13.

Ŋutsu mawo siwo ƒe nuŋububu tro la gawɔ nane si nyra wu. Menye ɖeko wogblɔ be Hiob menɔ nuteƒe wɔm na Mawu bliboe o, ke wogblɔ kpee hã be viɖe aɖeke mele eŋu be ame nadze agbagba be yeawɔ nuteƒe na Mawu o! Esi Elifaz dze nuƒoƒo gɔme la, eɖɔ ŋutega dovoɖiname aɖe si me wòse gbɔgbɔ aɖe ŋkɔ le. Le kadodo ma si yi edzi le Elifaz kple gbɔgbɔ vɔ̃ ma dome megbe la, egblɔ nyataƒonya vɔ̃ɖi aɖe be: Mawu “meka ɖe eƒe subɔlawo dzi o, eye wòkpɔa vodada le mawudɔlawo ŋu.” Eƒe nya mawo le fiafiam be amegbetɔwo mate ŋu adze Mawu ŋu gbeɖe o! Emegbe Bildad gblɔ be Mawu metsɔ ɖeke le Hiob ƒe nuteƒewɔwɔ me o, abe ale si ko matsɔ ɖeke le nyévi ƒe nuteƒewɔwɔ me o ene!—Hiob 4:12-18; 15:15; 22:2, 3; 25:4-6.

Ðe nèdze agbagba be yeafa akɔ na ame aɖe si le nɔnɔme sesẽwo me tom la kpɔa? Esia wɔwɔ menɔa bɔbɔe o. Gake míate ŋu asrɔ̃ nu geɖe tso Hiob ƒe yeaɖixɔlɔ̃awo ƒe nuwɔnawo me, vevietɔ ku ɖe nya siwo mele be míagblɔ o ŋu. Ŋutsu mawo gblɔ nya geɖe siwo dze abe ɖe susu le wo me ene, gake womese veve aɖeke ɖe Hiob nu o, eye womeyɔ eƒe ŋkɔ teti gɔ̃ hã o! Wometsɔ ɖeke le eme be Hiob ƒe dzi gbã o, eye womekpɔe be ehiã be yewoawɔ nu ɖe eŋu lɔlɔ̃tɔe o. * Eya ta ne wò ame vevi aɖe lé blanui la, dze agbagba nàwɔ nu ɖe eŋu le lɔlɔ̃ me, tsɔ ɖe le eme nɛ, eye nànyo dɔme nɛ. Dze agbagba nàdo ŋusẽ eƒe xɔse eye nàde dzi ƒo nɛ, kpe ɖe eŋu be wòaɖo ŋu ɖe Mawu ŋu eye wòaka ɖe edzi be Mawu nyoa dɔme ŋutɔ, ekpɔa nublanui geɖe, eye wòwɔa nu dzɔdzɔe ɣesiaɣi. Anye ne nu mae Hiob awɔ na exɔlɔ̃awo ne woawoe le nɔnɔme si me tom wòle la me. (Hiob 16:4, 5) Ke hã, aleke wòwɔ nui esi woyi edzi nɔ nu ƒom tsi tre ɖe eƒe nuteƒewɔwɔ ŋu?

Hiob si ƒe nu wɔ nublanui la ƒe dzi gbã xoxo hafi nyahehe legbee mawo gava dze tòa me. Elɔ̃ ɖe edzi tso gɔmedzedzea me be yeƒo nu kple “adã” ɣeaɖewoɣi, eye yeƒe nya aɖewo nye “ame si mɔkpɔkpɔ bu ɖo” la ƒe nuƒoƒo. (Hiob 6:3, 26) Míate ŋu ase nu si tae la gɔme. Esi nu te ɖe edzi vevie tae wòƒo nu nenema ɖo. Eƒe nyawo ɖee fia hã be mese nu si tututu nɔ dzɔdzɔm la gɔme o. Esi wònye be zi ɖeka le vo me koe vɔ̃ mawo va Hiob kple eƒe ƒomea dzi eye wòdze gɔ̃ hã abe ŋusẽ si gbɔ dzɔdzɔmetɔ ŋu ye nɔ megbe na wo ene ta la, Hiob susui be Yehowa gbɔe wotso. Nu vevi aɖewo yi edzi siwo menɔ nyanya na Hiob o, eya ta nu siwo eya ŋutɔ susu siwo mele eteƒe o dzie wònɔ te ɖo ƒo nya ta.

Ke hã, xɔse sẽŋu aɖe ŋutɔe nɔ Hiob si. Xɔse si nɔ esi la dze ƒãa le nya siwo wògblɔ le nyahehe legbee ma me—egblɔ nyateƒenya siwo nya se, siwo dea dzi ƒo na mí egbea. Esime wònɔ nu ƒom tso ale si nuwɔwɔwo wɔ nukui ŋu la, ekafu Mawu le mɔ ɖedzesi aɖewo nu, eye ame aɖeke mate ŋu aƒo nu nenema Mawu ƒe kpekpeɖeŋu manɔmee o. Le kpɔɖeŋu me, egblɔ be Yehowa “meku anyigba la ɖe naneke ŋu o”; ƒe alafa geɖe va yi hafi dzɔdzɔmeŋutinunyalawo va nya nyateƒenya sia. * (Hiob 26:7) Eye esi Hiob ƒo nu tso etsɔmemɔkpɔkpɔ si nɔ esi eŋu la, eɖee fia be yeka ɖe nya aɖe si dzi nuteƒewɔla bubuwo hã xɔ se la dzi. Hiob xɔe se be ne yeku la, Mawu aɖo ŋku ye dzi, yeƒe nu adzroe vevie, eye ava fɔ ye ɖe tsitre gbe ɖeka.—Hiob 14:13-15; Hebritɔwo 11:17-19, 35.

Ke nya si fɔ ɖe te ku ɖe fɔmaɖimaɖi ŋu ya ɖe? Elifaz kple exɔlɔ̃ eveawo te tɔ ɖe edzi be Mawu metsɔ ɖeke le amegbetɔwo ƒe fɔmaɖimaɖi me o. Ðe Hiob lɔ̃ ɖe nuŋububu totro ma dzia? Kura o! Hiob gblɔ kakaɖedzitɔe be Mawu dea asixɔxɔ fɔmaɖimaɖi ŋu. Etsɔ kakaɖedzi gblɔ tso Yehowa ŋu be: “Adze si nye fɔmaɖimaɖi.” (Hiob 31:6) Azɔ hã, Hiob kpɔe dze sii kɔtɛ be ɖeko yeaɖi akɔfala mawo di be yewoato yewo ƒe nuŋububu totrowo dzi aƒo nu atsi tre ɖe yeƒe fɔmaɖimaɖi ŋu. Ema wɔe be Hiob va ƒo nu legbee aɖe si na ŋutsu etɔ̃ mawo zi ɖoɖoe mlɔeba.

Hiob nya be yeƒe fɔmaɖimaɖi ku ɖe nu sia nu si yewɔna le agbe me ŋu. Eya ta eƒo nu tso ale si wòwɔa nuteƒe le eƒe nuwɔna kple agbenɔnɔ me ŋu. Le kpɔɖeŋu me, eƒo asa na trɔ̃subɔsubɔ ƒomevi ɖe sia ɖe; enyo dɔme na amewo eye wòwɔ nu ɖe wo ŋu bubutɔe; enɔ agbe dzadzɛ hede asixɔxɔ eƒe srɔ̃ɖeɖe ŋu; eye ƒo wo katã ta la, eyi edzi wɔ nuteƒe na Yehowa, si nye Mawu vavã ɖeka kolia la. Ema tae Hiob te ŋu gblɔ tso dzi blibo me be: “Nyemaɖe asi le nye fɔmaɖimaɖi ŋu va se ɖe esime maku o!”—Hiob 27:5; 31:1, 2, 9-11, 16-18, 26-28.

Ðe fɔmaɖimaɖi me léle ɖe asi le vevie na wò hã abe ale si wònɔ na Hiob enea? Ele bɔbɔe be míagblɔ be míenye fɔmaɖilawo, gake Hiob kpɔe be menye egbɔgblɔ koe nye nyaa o, ke boŋ ele be míaɖee afia le míaƒe nuwɔnawo me. Míeɖenɛ fiana be míetsɔ mía ɖokui na Mawu tso dzi blibo me ne míeɖoa toe eye míewɔa nu siwo sɔ le eŋkume le míaƒe agbenɔnɔ me gbe sia gbe—ne míele nɔnɔme sesẽwo me tom gɔ̃ hã. Ne míenɔa agbe nenema la, míana dzi nadzɔ Yehowa godoo eye dzi naku eƒe futɔ Satana, abe ale si ko Hiob wɔe le blema ene. Esiae nye mɔ nyuitɔ kekeake si dzi míato asrɔ̃ Hiob ƒe xɔse!

Ke hã, Hiob ƒe ŋutinyaa mese ɖe afi ma o. Eƒe susu va dzo le nu si koŋ nɔ vevie wu la dzi, eye wònɔ eya ŋutɔ ƒe dzɔdzɔenyenye ta ʋlim ale gbegbe be mete ŋu ʋli Mawu ƒe ŋkɔ ta o. Ehiã be woaɖɔe ɖo ahakpe ɖe eŋu be Mawu ƒe susu le nuwo ŋu nasu esi. Tsɔ kpe ɖe eŋu la, egakpɔtɔ nɔ veve sem henɔ nu xam vevie, eye wòhiã na akɔfafa vavãtɔ ale gbegbe. Nu kae Yehowa awɔ na ŋutsu fɔmaɖila sia si si xɔse sẽŋu nɔ? Nyati bubu aɖe si ava do la aɖo biabia sia ŋu.