Wodzim le ƒe 1941 me le Virrat le Finland, eye nye ƒometɔwo nye tokunɔwo. Fofonye kple danye, nɔvinyeŋutsu kple nɔvinyenyɔnu siwo nye nye tsɛwo, kple nye ƒometɔ bubu geɖewo nye tokunɔwo. Eya ta asi koe míezãna tsɔ wɔa dzesiwo tsɔ ɖoa dze kple mía nɔewo.

 Meva nɔ sukukpo dzi le suku aɖe si didi tso míaƒe aƒe me kilometa 240. Le suku la, wode se na mí vevie be míagazã tokunɔgbe o. Ɣemaɣi le Finland la, nu si wowɔna le tokunɔwo ƒe suku ye nye be wozia sukuviwo dzi be woalé ŋku ɖe amewo ƒe nuyiwo ŋu anya nya si gblɔm wole. Ne míaƒe nufialawo kpɔ mí míele tokunɔgbe zãm la, wotsɔa ati ƒoa mí vevie ale gbegbe be míaƒe asibidewo tena hena ŋkeke geɖe.

 Esi mewu sukua nu la, mede suku bubu si wosrɔ̃a agbledede le. Agble nɔ dzinyelawo si, eya ta ehiã be masrɔ̃ agbledede. Esi metrɔ yi aƒe me la, mekpɔ Gbetakpɔxɔ kple Nyɔ! magazinewo le kplɔ̃ dzi. Fofonye gblɔ nam be magazine siawo ƒo nu tso Biblia me nya nyui aɖewo ŋu, eye be atsu kple asi aɖe siwo menye tokunɔwo o va nɔ Biblia srɔ̃m kple ye kple danye. Ale si wowɔna srɔ̃a nua ye nye be woŋlɔa woƒe nyawo ɖe pepa dzi.

 Fofonye gblɔ nam be le Mawu Fiaɖuƒea te la, anyigba azu paradiso nyui aɖe, eye woafɔ ame kukuwo ɖe tsitre. Gake nu si amewo fiam va yi ye nye be ne amewo ku la, woyia dziƒo. Ewɔ nam be ɖewohĩ fofonye mese nu si Ðasefoawo fiae la gɔme o le esi womezã tokunɔgbe o ta.

 Esi atsu kple asia gava dzinyelawo gbɔ la, mebia nya wo tso nu siwo fofonye gblɔ nam la ŋu. Wogblɔ nam be, “Nya siwo fofowò gblɔ la le eteƒe.” Eyome woxlẽ nya siwo Yesu gblɔ tso tsitretsitsia ŋu nam le Yohanes 5:28, 29. Woɖe eme nam be Mawu ava tsrɔ̃ ame vɔ̃ɖiwo ɖa le anyigba dzi, eye ame dzɔdzɔewo anɔ agbe tegbee le lãmesẽ kple ŋutifafa me.—Psalmo 37:10, 11; Daniel 2:44; Nyaɖeɖefia 21:1-4.

 Esi medi be manya nu geɖe wu ta la, mena Ðasefo aɖe si ŋkɔe nye Antero va nɔ Biblia srɔ̃m kplim. Antero menya tokunɔgbe o, eya ta ne ebia nyam le nusrɔ̃gbalẽa me la, meŋlɔa ŋuɖoɖoawo ɖe pepa dzi. Ne Antero xlẽ ŋuɖoɖoa vɔ la, eŋlɔa biabia bubuwo alo be etsɔa numeɖeɖe aɖewo kpena ɖe eŋu. To mɔnu sia dzi la, egbɔa dzi ɖi srɔ̃a nu kplim gaƒoƒo eve kwasiɖa sia kwasiɖa.

 Le ƒe 1960 me la, mede Yehowa Ðasefowo ƒe takpekpe gã aɖe. Esi wɔnaa nɔ edzi yim la, woɖe nyaawo gɔme ɖe tokunɔgbe me. Le Fiɖa ŋdɔ la, woɖe gbeƒã be woanyrɔ amewo le ŋkeke si kplɔe ɖo dzi. Eya ta le Memleɖa ŋdi la, metsɔ nye tsimewu kple papahũ ɖe asi eye meyi ɖaxɔ nyɔnyrɔ! a Le ɣeyiɣi kpui aɖe megbe la, dzinyelawo kple nɔvinyewo hã xɔ nyɔnyrɔ.

 Medi be magblɔ nu siwo mesrɔ̃ la ŋu nya na tokunɔ bubuwo, eye mekpɔe be mɔ nyuitɔ si dzi mato awɔ esiae nye be mazã tokunɔgbe. Eya ta meva biã ŋku ɖe gbeƒãɖeɖe na tokunɔ siwo le mía de la ŋu.

 Le esia megbe kpuie la, meʋu yi Tampere, si nye dugã aɖe si me dɔwɔƒe gãwo le. Mɔ si dzi metona dia tokunɔwoe nye be metsana tso aƒe me yi aƒe me nɔa amewo biam be wonya tokunɔ aɖe hã. Meto mɔ sia dzi va nɔ Biblia srɔ̃m kple ame geɖe, eye le ƒe ʋɛ aɖewo ko megbe la, ame ewo kple edzivɔ va zu gbeƒãɖelawo le Tampere.

 Le ƒe 1965 me la, medo go nɔvinyɔnu dzetugbe aɖe si ŋkɔe nye Maire. Míeɖe srɔ̃ le ƒe si kplɔe ɖo me. Maire srɔ̃ tokunɔgbea le ɣeyiɣi kpui aɖe ko megbe, eye le ƒe 50 siwo me nye kplii míesubɔ Yehowa ɖekae la, enye kpeɖeŋutɔ wɔnuteƒe nam eye wòdoa vevie nu ŋutɔ.

 Ƒe eve le míaƒe srɔ̃ɖeɖe megbe la, míedzi ŋutsuvi si ŋkɔe nye Marko, gake eya menye tokunɔ o. Le aƒe me la, esrɔ̃ gbe si dadaa dona, si nye Finlandgbe eye wòsrɔ̃ Finland Tokunɔgbe hã. Marko xɔ nyɔnyrɔ esi wòxɔ ƒe 13.

 Le ɣeyiɣi aɖe megbe la, nɔvi bubuwo va wɔ ɖeka kpli mí le tokunɔgbe ƒuƒoƒo si nɔ Tampere la me. Eya ta le ƒe 1974 me la, míeʋu yi Turku, afi si Ðasefo tokunɔ aɖeke menɔ o. Le afi ma la, míegava nɔ tokunɔwo dim tso aƒe me yi aƒe me. Le ƒe siwo me míenɔ Turku la, nye Biblia nusrɔ̃vi 12 xɔ nyɔnyrɔ.

 Le ƒe 1987 me la, wokpe Marko be wòava subɔ le Betel. Le ɣeyiɣi aɖe megbe la, ŋusẽ va ɖo míaƒe tokunɔgbe ƒuƒoƒo si le Turku la ŋu, eya ta míegawɔ ɖoɖo be míaʋu ayi teƒe bubu.

 Le ɣeyiɣi mawo me la, ablɔɖe va nɔ anyi be míaɖe gbeƒã le Ɣedzeƒe Europa dukɔwo me. Eya ta le January 1992 me la, nye kple nɔviŋutsu bubu si nye tokunɔ míezɔ mɔ yi Tallinn, le Estonia.

 Míeva ke ɖe nɔvinyɔnu aɖe si nɔviaŋutsu nye tokunɔ ŋu. Togbɔ be nɔviaŋutsua metsɔ ɖeke le Fiaɖuƒe gbedeasia me o hã la, enyo dɔme na mí kpe ɖe mía ŋu míeke ɖe tokunɔ geɖe ŋu le Estonia. Le zã mamlɛtɔ do ŋgɔ na míaƒe dzodzo le Estonia la, ekplɔ mí yi kpekpe aɖe si Estonia Tokunɔwo Ƒe Habɔbɔ Si Le Tallinn la wɔ. Míeyi kaba eye míetsɔ magazine kple agbalẽ gbogbo aɖewo siwo le Estonia kple Russiagbe me la ɖo kplɔ̃e. Míema agbalẽ 100 kple magazine siwo ade 200, eye míexɔ ame 70 ƒe adrɛs. Zã ma mee míeɖo gbeƒãɖeɖe na tokunɔgbedolawo gɔme anyi le Estonia!

 Le esia megbe kpuie la, nye kple Maire míezɔa mɔ edziedzi yia Estonia ɖaɖea gbeƒã. Míeva ɖe ɣeyiɣi si míezãna ɖe míaƒe dɔwɔɖuiwo ŋu la dzi kpɔtɔ eye míezu gbesiagbe mɔɖelawo. Le ƒe 1995 me la, míeʋu yi teƒe si te ɖe Helsinki ŋu ale be wòanɔ bɔbɔe be míanɔ tɔdziʋu ɖom ayi Tallinn. Gbeƒãɖeɖedɔa kpɔ dzidzedze le Estonia sãsãsã wu ale si míesusu!

 Biblia nusrɔ̃vi gbogbo aɖewo nɔ mía si, eye wo dometɔ 16 va xɔ nyɔnyrɔ. Nyɔnu eve siwo nye dadaviwo hã nɔ wo dome. Wonye tokunɔwo ganye ŋkunɔwo hã. Esi womekpɔa nu o ta la, metsɔa nye asi ɖoa woƒe asiwo dzi wɔa tokunɔgbe dzesiwo ale be woase nya si gblɔm mele na wo la gɔme.

 Nusɔsrɔ̃ kple tokunɔawo menɔ bɔbɔe o. Le ɣeyiɣi mawo me la, womeɖe Biblia-srɔ̃gbalẽ aɖeke gɔme ɖe tokunɔgbe siwo me míeɖea gbeƒã le la me o. Eya ta mewɔa nɔnɔmetata siwo le míaƒe agbalẽawo me la ŋu dɔ ale gbegbe. Metso nɔnɔmetataawo le míaƒe agbalẽwo me heƒo wo nu ƒu wɔ agbalẽbabla si mezãna le gbeadzi.

 Alɔdzedɔwɔƒe si le Finland la bia tso asinye be mayi Latvia kple Lithuania be makpɔ ɖa be nu kae woate ŋu awɔ be gbeƒãɖeɖe le tokunɔgbe me nakeke ta le Baltic dukɔ mawo me hã. Míezɔ mɔ yi dukɔ mawo me zi geɖe eye míekpe ɖe Ðasefo siwo le dukɔ mawo me ŋu be woake ɖe tokunɔwo ŋu. Dukɔ ɖe sia ɖe kple tokunɔgbe si wodona le afi ma. Eya ta mesrɔ̃ Estonia, Latvia, kple Lithuania tokunɔgbewo. Eye esi wònye be tokunɔ siwo tso Russia la le Baltic dukɔwo me ta la, mesrɔ̃ Russia tokunɔgbe vi aɖe hã.

 Nublanuitɔe la, esi míenɔ mɔ zɔm yi Estonia kple Baltic dukɔwo me ƒe enyi megbe la, wokpɔ ahɔhɔ̃medɔ aɖe (Parkinson’s disease) le Maire ŋu, eya ta míegava nɔ mɔa zɔm o.

 Le ƒe 1997 me la, woɖo ƒuƒoƒo si anɔ míaƒe agbalẽwo gɔme ɖem ɖe tokunɔgbe mea ɖe Finland Alɔdzedɔwɔƒea. Esi míete ɖe alɔdzedɔwɔƒea ŋu ta la, nye kple Maire míekpe asi ɖe eŋu woɖe agbalẽwo gɔme ɖe tokunɔgbe me, eye egbea gɔ̃ hã megawɔa dɔ sia ɣeaɖewoɣi. Míewɔ dɔ aduadu kple mía vi Marko le alɔdzedɔwɔƒea. Emegbe le srɔ̃a Kirsi ƒe kpekpeɖeŋu me la, Marko kpe asi ɖe eŋu wona hehe gbegɔmeɖeƒuƒoƒowo le dukɔ bubuwo me be woaɖe míaƒe agbalẽwo gɔme ɖe tokunɔgbe me.

 Tsɔ kpe ɖe eŋu la, alɔdzedɔwɔƒea wɔ ɖoɖo ale be wofia tokunɔgbea gbeƒãɖela siwo menye tokunɔwo o. Dzidzɔtɔe la, gbeƒãɖela geɖe va kpe asi ɖe tokunɔgbe ƒuƒoƒowo kple hamewo ŋu, eye wole kpekpeɖeŋu nam le gbeƒãɖeɖedɔa kple hame ƒe kpekpewo me, eye wo dometɔ aɖewo le agbanɔamedzinɔƒewo.

 Le ƒe 2004 me la, nye kple Maire míekpe asi ɖe eŋu woɖo Finland tokunɔgbe hame gbãtɔ ɖe Helsinki. Le ƒe etɔ̃ me la, ŋusẽ ɖo hamea ŋu, dzo nɔ nɔviawo me, eye mɔɖela geɖewo hã nɔ hamea me.

 Míegava nɔ ɖoɖowo wɔm ake be míaʋu ayi afi si hiahiã geɖe wu le. Le ƒe 2008 me la, míeʋu yi afi si te ɖe Tampere ŋu eye míegava wɔ ɖeka kple tokunɔgbe me ƒuƒoƒo si me míedzo le ƒe 34 aɖewoe nye ema la. Le ƒe ɖeka megbe la, ƒuƒoƒo ma va zu tokunɔgbe me hame evelia le Finland.

 Kaka ɣemaɣi la, dɔléle si nɔ fu ɖem na Maire la gava nɔ gã dom ɖe edzi. Dzidzɔe wònye nam be melé be nɛ va se ɖe esime wòku le ƒe 2016 me. Ele eme be mesusua Maire ŋutɔ ya, gake mele mɔ kpɔm na ɣeyiɣi si me magakpɔe ake le xexe yeyea me, afi si dɔléle maganɔ anyi o.—Yesaya 33:24; Nyaɖeɖefia 21:4.

 Ƒe 60 ye nye esia metsɔ gbeƒãɖeɖe na hanyevi tokunɔwo ɖo dɔe, eye dzo si le menye be magblɔ nya nyuia na wo la gakpɔtɔ le bibim!