Agbea le sesẽm fifia ale gbegbe be ɣeaɖewoɣi la míenyana nu si míawɔ o. Gake zi geɖe la, míaƒe nuwɔnawo gbɔe wòatso be míakpɔ dzidzɔ alo míakpɔe o, ke menye nɔnɔme si me míele ye o. Biblia na míenya be togbɔ be kuxiwo li hã la, “ame si ƒe dzi le dzidzɔ kpɔm la tua aglo ɣesiaɣi.” (Lododowo 15:15) Nu kawoe míate ŋu awɔ be míakpɔ dzidzɔ geɖe wu? Kpɔ Biblia ƒe aɖaŋuɖoɖo siwo ate ŋu akpe ɖe ŋuwò ɖa.

 Biblia gblɔ be: “Nuxaxa le dzi me ɖe wòtea ame ƒe dzi ɖe anyi, ke nya nyui nana dzi kpɔa dzidzɔ.”—Lododowo 12:25.

•   Biblia ate ŋu akpe ɖe ŋuwò ale be nàgatsi dzimaɖi fũu o. Ne èdi be yeanya nu geɖe tso esia ŋu la, xlẽ nyati si nye “Nu Si Biblia Gblɔ Tso Dzimaɖitsitsi Ŋu.”

 Biblia gblɔ be: “Xɔlɔ̃ vavã lɔ̃a ame ɣeawokatãɣi eye ame nɔvi wònye wodzi ɖe xaxagbe ŋu.”—Lododowo 17:17.

•   Aɖaŋuɖoɖowo le Biblia me siwo ate ŋu akpe ɖe ŋuwò be wò kple xɔ̃wòwo dome nanɔ nyuie, eye esia awɔe be màtsi akogo o. Xlẽ nyati si nye “Dze Xɔlɔ̃wo Be Nàgatsi Akogo O—Ale Si Biblia Ate Ŋu Akpe Ðe Ŋuwò.”

 Biblia gblɔ be: “Lɔ̃ Yehowa wò Mawu kple wò dzi blibo kple wò luʋɔ blibo kpakple wò tamesusu blibo. . . . Lɔ̃ hawòvi abe wò ŋutɔ ɖokuiwò ene.” a—Mateo 22:37-39.

•   Gbedodoɖa ate ŋu akpe ɖe ŋuwò be wò kple Mawu dome nava nɔ kplikplikpli. Ne èdi be yeanya nu geɖe la, xlẽ nyati si nye “Ðe Mawu Sea Míaƒe Gbedodoɖawoa?”

•   Ne míewɔna ɖe Yesu ƒe nufiame si woyɔna be Sikasededea dzi la, aɖee fia be míelɔ̃ amewo. Ne èdi be yeanya nufiame ma la, xlẽ nyati si nye “Nu Kae Nye Sikasedede La?” Ele yevugbe me.

 Ðewohĩ àdi be yeasrɔ̃ nu geɖe ku ɖe ale si Biblia ate ŋu akpe ɖe ŋuwò be nàkpɔ dzidzɔ le ɣeyiɣi sesẽ siawo me ŋu? Ne nenemae la, ke te míaƒe Biblia-sɔsrɔ̃ femaxee ƒe ɖoɖoa kpɔ.