Kristotɔwo Ƒe Hela Ŋɔŋlɔawo ƒo nu tso Roma-ʋafiawo ŋu enuenu. Ðoƒe mae nɔ asrafo siwo wu Yesu la ƒe amegã si. Eye ɖoƒe ma kee Kornelio, si nye Dukɔwo me tɔ gbãtɔ si zu Kristotɔ la nɔ. Aʋafia ye asrafomegã si nɔ eteƒe esime wodi be asrafowo naƒo Paulo la nye, eye aʋafia kee asrafomegã si ŋkɔe nye Yulio, si kplɔ Paulo yi Roma la hã nye.—Marko 15:39; Dɔwɔwɔwo 10:1, etenuŋɔŋlɔ; 22:25; 27:1.

Aʋafia nyea asrafomegã si nɔa asrafo 50 alo 100 nu. Eƒe dɔe nye be wòana hehe wo ahakpe ɖe wo ŋu woazu asrafo bibi siwo wɔa se dzi; eléa ŋku ɖe woƒe asrafowuwo kple woƒe aʋawɔnuwo ŋu, eye eyae kplɔa wo heɖea gbe na wo le aʋagbe dzi.

Ðoƒe kɔkɔtɔ si asrafo gbɔlo ate ŋu aɖoe nye aʋafia ƒe ɖoƒe. Ame siwo nɔa ɖoƒe sia la nyea ame siwo wɔ asrafodɔ ƒe geɖe henye ŋgɔnɔla bibiwo. Aʋafiawoe na ŋusẽ geɖe nɔ Roma-srafoha bliboa ŋu eye woawoe na be wonye aʋawɔla bibi siwo wɔa se dzi. Numekugbalẽ aɖe gblɔ be “zi geɖe la, [aʋafiawo] nyea asrafo siwo kpɔ nu teƒe henya nu geɖe wu bubuawo le asrafohaa me.”

Zi geɖe la, gadzẽgba siwo ƒe ŋkume wozrɔ̃ nyuie lae nyea ahuhɔ̃e siwo wozãna le Biblia-ŋlɔɣiwo, gake wogatea ŋu nyea akɔbli, klosalo, sika, alo sika kple akɔblia tsaka hã. Eya ta womenɔ abe ahuhɔ̃e siwo li egbea ene o. Zi gbãtɔ si woyɔ ahuhɔ̃e ŋkɔ le Biblia me lae nye avɔgbadɔ si nye Israel-viwo ƒe tadeaguƒe vevitɔ la tuɣi. Nyɔnuwo tsɔ woƒe ahuhɔ̃ewo na be woatsɔ awɔ zɔ la kple eƒe anyinɔ. (2 Mose 38:8) Ema fia be, hafi woate ŋu awɔ ahuhɔ̃eawo ŋu dɔ alea la, ele be woalólo wo.

Zi geɖe la, ne blemaduwo nɔƒe kulawo ke ɖe ahuhɔ̃ewo ŋu le tome le Israel-nyigbaa dzi kple eƒe nutowo me la, wonɔa nyɔnuwo ƒe atsyɔ̃ɖonuwo kple lekewɔnu bubuwo dome. Ahuhɔ̃eawo nɔa kotoe, wowɔa woƒe asiléƒewo ɖe nyɔnuwo ƒe nɔnɔme me, eye wonyea ati, ga, alo nyiɖu, siwo woɖo atsyɔ̃ na nyuie. Eye zi geɖe la, womeɖoa atsyɔ̃ na ahuhɔ̃ea ƒe megbe o.

Ahuhɔ̃e siwo nɔ anyi le blema la metea ŋu kpɔa nu nyuie abe esiwo li egbea ene o. Esia na míese nu si apostolo Paulo wɔnɛ esi wògblɔ be, ‘Fifia la, míekpɔa nu flukpee to gahuhɔ̃e me’ la gɔme.—1 Korintotɔwo 13:12.