Wodzim le Székesfehérvár, le Hungary; enye dugã aɖe si ƒe ŋkɔ nyɔ le ŋutinyaa me anɔ abe ƒe 1,000 kple edzivɔ enye esia ene. Gake nublanuitɔe la, megaɖoa ŋku ale si gbegbe xexemeʋa gbãtɔ gblẽ nu le dugã sia ŋui la dzi kokoko.

Tɔgbuinye kple mamanye ye hem le nye ɖevime. Dzi dzɔam ne meɖo ŋku wo dzi—vevietɔ mamanye Elisabeth. Eyae kpe ɖe ŋunye mexɔ Mawu dzi se kple dzi blibo. Tso esime mexɔ ƒe etɔ̃ la, nye kplii míegblɔa gbedodoɖa si woyɔna ɣeaɖewoɣi be Aƒetɔ Ƒe Gbedodoɖa la fiẽ sia fiẽ. Togbɔ be ekpe ɖe ŋunye alea hã la, esi mexɔ ƒe 20 kple edzivɔ ko hafi meva se nu si gbedodoɖa ma fia gɔme nyuie.

Tɔgbuinye kple mamanye gbɔe menɔ le nye ɖevime, elabena dzinyelawo nɔ dɔ dzi sesĩe zã kple keli be yewoakpɔ ga atso aƒe nyui aɖe. Ke hã ƒomea katã va ƒoa ƒu ɖua nu ɖekae le ɣleti ɖe sia ɖe ƒe Memleɖa evelia dzi. Míaƒe anyinɔnɔ ɖekae alea dɔa dzidzɔ nam ŋutɔ.

Le ƒe 1958 me la, dzinyelawo ƒe didia va eme na wo; wote ŋu ƒle aƒe aɖe si me xɔdɔme etɔ̃ le, si me nye kpli wo míate ŋu anɔ. Meva nɔ dzinyelawo gbɔ mlɔeba—dzi dzɔm ale gbegbe! Gake ɣleti ade megbe la, nye dzidzɔa nu yi. Kansadɔ wu fofonye.

Nye dzi gbã gudugudu. Meɖo ŋku edzi be menɔ gbedodoɖa dzi na Mawu be: “Mawu, menɔ kuku ɖem na wò be nàkpɔ fofonye ƒe agbe ta. Elabe mehiãe vevie. Nu ka tae mèse nye gbedodoɖawo o?” Medi vevie be manya afi si fofonye le. Mebiaa ɖokuinye be: ‘Dziƒoe wòyia? Alo ɖe eƒe agbe nu yi tegbeea?’ Eye meʋãa ŋu ɖevi siwo wo fofo gale agbe le wo gbɔ la.

Meyia ameɖibɔ me ɖadoa gbe ɖa gbe sia gbe kloe hena ƒe geɖe. Medzea klo ɖe fofonye ƒe yɔdo gbɔ hedoa gbe ɖa be: “Mawu, meɖe kuku, medi be manya afi si fofonye le.” Medoa gbe ɖa hã be Mawu nekpe ɖe ŋunye mase tameɖoɖo si tae míele agbe ɖo la gɔme.

Esi mexɔ ƒe 13 la, metso nya me be masrɔ̃ Germanygbe. Mesusui be ɖewohĩ make ɖe nye biabiawo ƒe ŋuɖoɖowo ŋu le Germanytɔwo ƒe agbalẽ gbogbo siwo me nunya geɖe le la me. Le ƒe 1967 me la, medze gbea sɔsrɔ̃ gɔme le Jena dugãa me. Ɣemaɣi  la, enɔ afi si woyɔna tsã be Ɣedzeƒe Germany. Mevu ɖe Germany nunyalawo ƒe agbalẽwo xexlẽ ŋu abe ale si tsikɔwuitɔ noa tsi ene, vevietɔ esiwo ƒo nu tso nu si ta amegbetɔwo le agbe ɖo ŋu. Togbɔ be meke ɖe nu nyui aɖewo ŋu le wo me hã la, wo dometɔ aɖeke mete ŋu fa akɔ nam o. Eya ta meyi edzi nɔa Mawu biam be wòakpe ɖe ŋunye makpɔ ŋuɖoɖo na nye biabiawo.

Le ƒe 1970 me la, metrɔ yi Hungary; afi mae medo go Rose, si meva ɖe emegbe la le. Ɣemaɣi la, Hungary nɔ Kɔmiunisttɔwo ƒe dziɖuɖu te. Esi míeɖe srɔ̃ eteƒe medidi o la, nye kple Rose míesi yi Austria. Míaƒe taɖodzinue nye be emegbe la, míaʋu ayi Sydney, Australia, afi si nyruinye le.

Le ɣeyiɣi kpui aɖe ko me la, mekpɔ dɔ le Austria. Gbe ɖeka, nye dɔwɔhati aɖe gblɔ nam be mate ŋu akpɔ nye biabiawo katã ƒe ŋuɖoɖowo le Biblia me. Eye wòtsɔ Biblia-srɔ̃gbalẽ aɖewo nam. Mede ɣeyiɣi aɖeke o, mexlẽ wo katã eye wodo dzidzɔ nam ale gbegbe be megblɔ be, ne magakpɔ bubuwo la, avivi nunye ŋutɔ. Eya ta meŋlɔ agbalẽ na Yehowa Ðasefowo, elabena woawoe ta agbalẽawo, eye mebia wo be woaɖo agbalẽ bubuwo ɖem.

Le míaƒe srɔ̃ɖeɖe ƒe ŋkuɖodzizã gbãtɔ dzi la, ɖekakpui Austria vidzidzi aɖe si nye Ðasefo la va mía ƒeme. Etsɔ agbalẽ siwo mebia la vɛ hegblɔ nam be yedi be yeasrɔ̃ Biblia kplim, eye melɔ̃. Esi wònye be Biblia-sɔsrɔ̃a nɔ nunye vivim ta la, míesrɔ̃nɛ zi eve le kwasiɖaa me, eye míaƒe nusɔsrɔ̃ zi ɖeka tea ŋu xɔna abe gaƒoƒo ene sɔŋ ene!

Nu siwo Ðasefoawo nɔ fiayem le Biblia me la do dzidzɔ nam ale gbegbe. Esi wotsɔ Mawu ƒe ŋkɔ, Yehowa, fiam le nye Biblia me le Hungarygbe me la, ewɔ nuku nam ŋutɔ. Mede sɔleme ƒe 27 sɔŋ, gake nyemese woyɔ Mawu ƒe ŋkɔ zi ɖeka pɛ hã kpɔ o. Ale si Biblia ɖo nye biabiawo ŋu nyuie la wɔ nuku nam ŋutɔ. Le kpɔɖeŋu me, mesrɔ̃e le Biblia me be ame siwo ku la meganya naneke o, ɖeko wòle abe alɔ̃ dɔm wole ene. (Nyagblɔla 9:5, 10; Yohanes 11:11-15) Mesrɔ̃ nu tso Mawu ƒe ŋugbedodo si le Biblia me ku ɖe xexe yeye si me ‘ku maganɔ o’ la hã ŋu. (Nyaɖeɖefia 21:3, 4) Mele mɔ kpɔm be magava kpɔ fofonye ake, elabena ‘woafɔ ame siwo ku la ɖe tsitre’ le xexe yeye ma me.—Dɔwɔwɔwo 24:15.

Rose hã va dze Biblia-sɔsrɔ̃ gɔme kple dzi blibo. Míese nu si fiam wole mí la gɔme kabakaba ale gbegbe míewu agbalẽa sɔsrɔ̃ nu le ɣleti eve pɛ ko me! Míekpɔa gome le Ðasefowo ƒe nusɔsrɔ̃ ɖe sia ɖe si wowɔna le Fiaɖuƒe Akpata me la me. Lɔlɔ̃, dɔmenyonyo, kple ɖekawɔwɔ si le Yehowa Ðasefowo dome la wɔ nuku na mí ŋutɔ.—Yohanes 13:34, 35.

Le ƒe 1976 me la, mɔnukpɔkpɔ su nye kple Rose si míeʋu yi Australia. Esi míenya ge ɖe dukɔa me ko la, míebia Yehowa Ðasefowo ta enumake. Ðasefo siwo le afi ma la xɔ mí alɔeve. Eye le ƒe 1978 me la, míeva zu Yehowa Ðasefowo.

Meke ɖe biabia siwo ƒe ŋuɖoɖo dim menɔ ɣeyiɣi didi aɖe la ŋu azɔ. Esi mele tetem ɖe Yehowa Mawu ŋu la, meva kpɔe be meke ɖe Fofo lɔ̃ame si tɔgbi meva susu me nam kpɔ o la ŋu. (Yakobo 4:8) Eye esi meva nyae be magava kpɔ fofonye si dzim la ake le xexe yeyea me la, edoa dzidzɔ nam ale gbegbe.—Yohanes 5:28, 29.

Le ƒe 1989 me la, nye kple Rose míetso nya me be míatrɔ ayi Hungary ale be míate ŋu aƒo nu tso míaƒe dzixɔsewo ŋu na míaƒe ƒometɔwo kple ame bubu ɖe sia ɖe si míado goe. Mɔnukpɔkpɔ su mía si míefia Biblia me nyateƒea ame alafa geɖe. Wo dometɔ siwo nye ame 70 kple edzivɔwo va wɔ ɖeka kpli mí míele Yehowa subɔm; danye si dzim hã le wo dome.

Medo gbe ɖa ƒe 17 sɔŋ be Mawu nakpe ɖe ŋunye makpɔ ŋuɖoɖo na nye biabiawo. Ema megbe la, ƒe 39 va yi, eye mekpɔtɔ nɔ gbedodoɖaa dzi, gake azɔ ko mate ŋu agblɔ na Mawu be, “Fofonye si le dziƒo, mekpɔe be èlɔ̃m vevie, akpe na wò be nèɖo gbe siwo medo ɖa na wò tso nye ɖevime ke la ŋu nam.”