Fia Nu Viwòwo

Sem Kpɔ Xexe Eve Aɖewo Ƒe Vɔ̃ɖivɔ̃ɖinyenye Teƒe

NOA ƒe vi Sem tsi agbe le xexe aɖe ƒe tsɔtsrɔ̃ me, eye wòge ɖe xexe bubu aɖe me. Ènya nu si tae wotsrɔ̃ xexe gbãtɔ si me Sem nɔ agbe le, kple ale si eya kple eƒe ƒomea wɔ nɔ agbe le evelia mea?​— * Na míaɖo dze tso eŋu.

Biblia gblɔ be, “amegbetɔwo ƒe vɔ̃ɖivɔ̃ɖi” sɔ gbɔ ŋutɔ le ɣeyiɣi siwo me Sem nye sɔhɛ. Nu sia nu si ŋu amewo buna la nyea “vɔ̃ ko ɖaa.” Eya ta ènya nu si Mawu wɔa?— Ena tsiɖɔɖɔ gã aɖe va tsrɔ̃ xexe vɔ̃ɖi ma. Apostolo Petro ŋlɔ be: “[Wotsrɔ̃] xexe si nɔ anyi ɣemaɣi esime tsi ɖee.”—1 Mose 6:5; 2 Petro 3:6.

Èkpɔ nu si tae Mawu tsrɔ̃ xexe ma la azɔa?— Ameawo vɔ̃ɖi, eye woƒe tamesusuwo “nye vɔ̃ ko ɖaa.” Yesu ƒo nu tso nya sia ŋu. Egblɔ be, amewo nɔ agbe ɖum “do ŋgɔ na tsiɖɔɖɔa, wonɔ nu ɖum, nɔ nu nom, eye wonɔ srɔ̃ ɖem, eye wonɔ [wo tsɔm] na be woaɖe.” Yesu gblɔ kpee be: “Wometsɔ ɖeke le eme o, va se ɖe esime tsiɖɔɖɔa va, eye wòkplɔ wo katã yii.”—Mateo 24:37-39.

Nu ka mee ame mawo metsɔ ɖeke le o?— Sem fofo, Noa, nye “dzɔdzɔenyenye ƒe gbeƒãɖela,” gake ameawo meɖo to nya siwo wògblɔ na wo o. Noa ɖo to Mawu hekpa aɖakaʋu aɖe si ate ŋu anɔ tsi dzi, si me eya ŋutɔ kple eƒe ƒomea nɔ dedie le esime Tsiɖɔɖɔa va. Noa, srɔ̃a, kple viaŋutsuawo—Sem, Xam, kple Yafet—kple wo srɔ̃wo koe tsɔ ɖe le nu si Mawu bia tso wo si be woawɔ la me. Ame susɔeawo katã wɔ nu si dze woa ŋutɔwo ŋu, eya ta Tsiɖɔɖɔa kplɔ wo katã dzoe.—2 Petro 2:5; 1 Petro 3:20.

Anɔ abe ƒe ɖeka le Tsiɖɔɖɔa megbe ene la, Sem kple eƒe ƒomea do go le aɖakaʋua me va anyigba ƒuƒui dzi. Ame vɔ̃ɖiawo katã tsrɔ̃, gake eteƒe medidi o nuwo gava trɔ. Kanaan, si nye Sem nɔviŋutsu Xam vi, wɔ nu baɖa aɖe si na Noa gblɔ be: “Woaƒo fi ade Kanaan.” Nimrod, si nye Xam ƒe tɔgbuiyɔvi aɖe, hã nye ame vɔ̃ɖi. Etsi tsitre ɖe Yehowa, Mawu vavã la ŋu, eye wògblɔ na amewo be yewoatu xɔ kɔkɔ aɖe si woyɔ be Babel, si ana yewoazu ame xɔŋkɔwo.  Alekee nèsusu be Sem kple fofoa ase le wo ɖokui me tso nuwɔna sia ŋu?—1 Mose 9:25; 10:6-10; 11:4, 5.

Medzɔ dzi na wo kura o, eye medzɔ dzi na Yehowa hã o. Ènya nu si Yehowa wɔa?— Etɔtɔ gbe na ameawo ale be womagate ŋu ase nya si wo nɔviwo nɔ gbɔgblɔm la gɔme o. Esia na wodzudzɔ xɔa tutu eye ame siwo kpɔe be yewole gbe ɖeka dom la ʋu ɖanɔ teƒe ɖeka. (1 Mose 11:6-9) Gake Mawu metɔtɔ gbe na Sem kple eƒe ƒomea ya o. Eya ta wote ŋu yi edzi wɔ ɖeka hekpe ɖe wo nɔewo ŋu le Mawu subɔsubɔ me. Ènya ɣeyiɣi didi si Sem tsɔ subɔ Yehowa?—

Sem nɔ agbe ƒe 600 sɔŋ. Enɔ agbe ƒe 98 do ŋgɔ na Tsiɖɔɖɔa, eye wòganɔ agbe ƒe 502 le ema megbe. Míeka ɖe edzi be ekpe ɖe Noa ŋu le aɖakaʋua kpakpa kple nuxɔxlɔ̃ amewo tso Tsiɖɔɖɔa ŋu me. Gake nu kae nèsusu be Sem wɔ le ƒe 500 kple edzivɔ siwo wògatsɔ nɔ agbe le Tsiɖɔɖɔa megbe la me?— Noa yɔ Yehowa be “Sem ƒe Mawu.” Sem anya lé fɔ ɖe Yehowa subɔsubɔ ŋu eye wòkpe ɖe eƒe ƒomea me tɔwo hã ŋu be wowɔ nenema. Emegbe, Abraham, Sara, kple Isak hã va dzɔ tso Sem ƒe ƒomea me.—1 Mose 9:26; 11:10-31; 21:1-3.

Azɔ bu xexe si me míele egbea, si me vɔ̃ɖinyenye le dzidzim ɖe edzi le tso Sem ƒe ŋkekeawo me ke la ŋu kpɔ. Nu kae ava dzɔ ɖe edzi?— Biblia gblɔ be “xexea nu va yina.” Gake Biblia do ŋugbe be: “Ame si wɔa Mawu ƒe lɔlɔ̃nu la nɔa anyi yi mavɔmavɔ me.” Eya ta ne míewɔ Mawu ƒe lɔlɔ̃nu la, míate ŋu anɔ ame siwo atsi agbe ayi ɖe Mawu ƒe xexe yeyea me la dome. Ekema le Mawu ƒe kpekpeɖeŋu me la, míate ŋu anɔ agbe tegbee le dzidzɔ me le anyigba dzi!—1 Yohanes 2:17; Psalmo 37:29; Yesaya 65:17.

[Etenuŋɔŋlɔ]

Nyabiasewo:

○ Xexe ka mee Sem nɔ gbã, eye susu eve kawo tae Mawu tsrɔ̃ xexe ma?

○ Ɣeyiɣi didi kae Sem nɔ agbe, eye ame ka ƒomevie wònye?

○ Nu kae ava dzɔ ɖe xexe sia dzi kpuie?

○ Nu kae wòle be míawɔ be míatsi agbe le xexe sia tsrɔ̃ɣi?

[Nɔnɔmetata si le axa 17]

[Nɔnɔmetata si le axa 17]

[Nɔnɔmetata si le axa 17]