Ɣeyiɣi Sesẽwo Mee Míele Fifia

BIBLIA gblɔe ɖi be ameƒomea ato “ɣeyiɣi sesẽ siwo me nɔnɔ sesẽ la” me. Eyɔ ɣeyiɣi siawo be “ŋkeke mamlɛawo.” (2 Timoteo 3:1-5; 2 Petro 3:3-7) Yesu Kristo hã ƒo nu tso ɣeyiɣi siawo ke ŋu esime wònɔ nya aɖe si eƒe nusrɔ̃lawo biae ku ɖe “nuɖoanyi sia ƒe nuwuɣi” ŋu la ŋu ɖom. (Mateo 24:3) Ðe míele ŋkeke mamlɛawo me fifia? Tsɔ nu siwo Biblia gblɔ ɖi la sɔ kple nyatakaka aɖewo siwo do nyitsɔ laa siwo me nya aɖewoe nye esiwo gbɔna la kpɔ, eye wò ŋutɔ nàƒo nya ta na ɖokuiwò.

Nu si Biblia gblɔ ɖi: aʋawɔwɔ anɔ anyigba dzi godoo—Luka 21:10; Nyaɖeɖefia 6:4.

Nya si nyatakaka siwo do nyitsɔ laa la gblɔ: “Ame siwo ku le aʋawɔwɔ me le ƒe alafa 20 lia me sɔ gbɔ wu esiwo ku le aʋawɔwɔ me le ƒe alafa siwo katã va yi tso Kristo dziɣi ke la me zi gbɔ zi etɔ̃ sɔŋ.”—Ŋkuléle Ðe Xexea Me Ŋu Habɔbɔ.

Nu si Biblia gblɔ ɖi: nuɖuɖu ƒe veve kple dɔlélewo—Luka 21:11; Nyaɖeɖefia 6:5-8.

Nya si nyatakaka siwo do nyitsɔ laa la gblɔ: Le ƒe 2004 me la, wobu akɔnta be ame miliɔn 863 mekpɔa nu nyui ɖuna wòdea edeƒe o, eye esia sɔ gbɔ wu ƒe 2003 me tɔ miliɔn 7 sɔŋ.—Dukɔ Ƒoƒuawo Ƒe Nuɖuɖu Kple Agbledede Habɔbɔ.

Ame miliɔn 1,000 aɖewo le aƒe madeamedziwo me, nugododeƒe kple gbeɖuɖɔkɔƒe mele ame miliɔn 2,600 aɖewo si o; eye ame miliɔn 1,100 mekpɔa tsi nyui nona o.—Ŋkuléle Ðe Xexea Me Ŋu Habɔbɔ.

Asrãdɔ (atikesi) léa ame miliɔn 500; HIV-AIDS (ɖikanakudɔ) le ame miliɔn 40 ŋu; yɔmekpe wu ame miliɔn l.6 le ƒe 2005 me.—Xexea Me Ƒe Lãmesẽ Habɔbɔ.

Nu si Biblia gblɔ ɖi: anyigba la gbegblẽ—Nyaɖeɖefia 11:18.

Nya si nyatakaka siwo do nyitsɔ laa la gblɔ: “Amegbetɔwo ƒe dɔwɔnawo kplɔ anyigba la va ɖo anyigbadzinu gbagbe gbogbo aɖewo tsɔtsrɔ̃ ɖa keŋkeŋ ƒe agbo nu.” “Dzɔdzɔmenu siwo léa agbe ɖe te la dometɔ eve kloe le etɔ̃ me nu le yiyim le anyigba dzi godoo.”—Ƒe Akpe Ðeka Ƒe Ŋkuléle Ðe Anyigbadzinu Gbagbewo Ŋu.

 “Ale si amegbetɔwo le ɖi ƒom ya me na be Anyigba la ƒe yamenuto me ƒe nɔnɔme gblẽ ɖe edzi va ɖo sesẽaƒe, eye esia ate ŋu ahe afɔku gãwo ava anyigbaa dzi.”—NASA, Goddard Yamenutome Ŋuti Nusrɔ̃ƒe.

Nu si Biblia gblɔ ɖi: woaɖe gbeƒã Mawu Fiaɖuƒe ŋuti nya nyuia le anyigba dzi godoo—Mateo 24:14; Nyaɖeɖefia 14:6, 7.

Nya si nyatakaka siwo do nyitsɔ laa la gblɔ: Le ƒe 2007 me la, Yehowa Ðasefo 6,957,854 zã gaƒoƒo si wu miliɔn 1,400 tsɔ ɖe gbeƒã Mawu Fiaɖuƒe ŋuti nya nyuia le dukɔ 236 me.—2008 Yearbook of Jehovah’s Witnesses (Ƒegbalẽ).

Abe ale si míekpɔe fifi laa ene la, Biblia gblɔe ɖi be togbɔ be nya vɔ̃wo sɔŋ koe anɔ dzɔdzɔm hã la, susu geɖewo li siwo tae míakpɔ mɔ na etsɔme nyui aɖe ɖo. Yesu ƒo nu tso Mawu Fiaɖuƒe ŋuti “nya nyui” la ŋu. Nu kae nye Mawu Fiaɖuƒe la? Aleke wòna etsɔme nyui ƒe mɔkpɔkpɔ ameƒomeae? Eye vi kae Mawu Fiaɖuƒea aɖe na wò?

[Nɔnɔmetata si le axa 5]

Biblia gblɔ nu siwo teƒe kpɔm míele le xexea me egbea la ɖi