Ènyaa?

Le Efesotɔwo 2:11-15 la, mɔxenu ŋutɔŋutɔe apostolo Paulo wɔnɛ esime wòƒo nu tso gli aɖe si ma Yudatɔwo kple ame siwo menye Yudatɔwo o dome ŋua?

Le lɛta si apostolo Paulo ŋlɔ ɖo ɖe Efesotɔwo me la, egblɔ vovototo si nɔ Israel viwo kple “ame tutɔwo” dome. Egblɔ be “gli” aɖe nɔ anyi “si ma wo dome.” (Efesotɔwo 2:11-15) Paulo nɔ nu ƒom tso “Se si me sededewo” le si wona to Mose dzi la ŋu, gake esi wòzã nya “gli” la, ate ŋu ana nuxlẽlawo ƒe susu nayi kpe aɖe si nye dometsonu si nɔ anyi ŋutɔŋutɔ la dzi.

Le ƒe alafa gbãtɔ Mía Ŋɔli me la, xɔxɔnu vovovowoe nɔ Yehowa ƒe gbedoxɔ si nɔ Yerusalem la ŋu, eye ame aɖewo koe tea ŋu yia afi mawo. Ame sia ame tea ŋu yia Dukɔwo me tɔwo ƒe Xɔxɔnu la, gake Yudatɔ kple ame siwo trɔ dzi me zu Yudatɔwo koe tea ŋu yia gbedoxɔa ƒe xɔxɔnuwo dometɔ ɖe sia ɖe. Adzrala aɖe si wotsɔ atsyɔ̃ɖokpe wɔe si woyɔna be Soreg, si wogblɔ be ekɔkɔ anɔ meta 1.3 la ma Dukɔwo me tɔwo ƒe Xɔxɔnu la tso xɔxɔnu siawo gbɔ. Le Yudatɔ ŋutinyaŋlɔla Flavius Josephus si nɔ anyi le ƒe alafa gbãtɔ me ƒe nya nu la, woŋlɔ nuxlɔ̃amenyawo ɖe gli sia ŋu, ɖewo le Helagbe me, eye ɖewo hã le Latingbe me, be amedzro aɖeke negato mɔxekpɔ la ŋu age ɖe kɔkɔeƒe la me o.

Woke ɖe Helagbe me nuŋɔŋlɔ siwo le dometsogli sia ŋu la dometɔ aɖe ŋu. Exlẽ be: “Amedzro aɖeke negato mɔxekpɔ si wotɔ ɖe kɔkɔeƒea ŋu la ŋuti age ɖe eme o. Woawu ame sia ame si woalé be ege ɖe eme la godoo, eye amea ŋutɔe wu eɖokui.”

Anɔ eme godoo be Paulo zã Soreg tsɔ tsi tsitre ɖi na Mose ƒe Sea ƒe nubabla si ma Yudatɔwo kple Dukɔwo me tɔwo dome hena ɣeyiɣi didi aɖe la. Yesu ƒe vɔsakua ɖe Se ƒe nubabla la ɖa, eye wòto esia dzi ‘mu gli, si ma wo dome la ɖa.’

Nu ka tae zi geɖe la, Israel to 12 ko ŋue woƒoa nu tso, evɔ wònye le nyateƒe me la, to 13 wonye?

Israel towo alo ƒomeawo dzɔ tso Yakob, ame si ŋkɔ wova trɔ emegbe be Israel, ƒe viŋutsuwo me. Viŋutsu 12 woe nɔ blemafofo sia si, woƒe ŋkɔwoe nye: Ruben, Simeon, Lewi, Yuda, Dan, Naftali, Gad, Aser, Isaxar, Zebulon, Yosef, kple Benyamin. (1 Mose 29:32–30:24; 35:16-18) Wotsɔ nɔviŋutsu siawo dometɔ 11 ƒe ŋkɔwo na woƒe towo, gake wometsɔ Yosef ŋkɔ na to aɖeke o. Ke boŋ wotsɔ viaŋutsu siwo nye Efrayim kple Manase siwo wobu bliboe be wonye to ƒe tawo ƒe ŋkɔwo na to eve. Eya ta Israel towo ƒe xexlẽme va nye 13. Ekema nu ka tae Biblia ƒoa nu tso to 12 ko ŋu zi geɖe?

Le Israel viwo dome la, woɖe ŋutsu siwo le Lewi toa me ɖe vovo koŋ na subɔsubɔdɔwɔwɔ le Yehowa ƒe avɔgbadɔa me, eye emegbe le gbedoxɔa me. Eya ta womenyea asrafowo o. Yehowa gblɔ na Mose be: ‘Megatia amewo xlẽ le Lewi to la me o, eye megatsɔ woƒe xexlẽme kpe ɖe Israel vi bubuawo tɔ ŋu o; ke boŋ natsɔ nɔƒe, si me se la le, kple eŋu nuwo katã ade Lewitɔwo si.’—4 Mose 1:49, 50.

Womena anyigba Lewi viwo le Ŋugbedodonyigbaa dzi hã o. Ke boŋ wona du 48 wo le to vovovoawo me le Israel nyigba katã dzi.—4 Mose 18:20-24; Yosua 21:41.

Susu eve siawo tae zi geɖe la, womeyɔa Lewi toa ŋkɔ ne wole nu ƒom tso Israel toawo ŋu o. Esia tae Israel to 12 ko ŋue woƒoa nu tsoe.—4 Mose 1:1-15.

[Nɔnɔmetata si le axa 21]

Archaeological Museum of Istanbul