Ðe Amedzɔtsolãme Ƒe Nufiafia Wɔ Ðeka Kple Bibliaa?

ÐE WÒNYE nyateƒe be Mawu na lãwo trɔ vivivi va zu amegbetɔwoa? Ðe Mawu na nu gbagbe vi suesuewo trɔ va zu tɔmelãwo, eye tɔmelãwo hã va trɔ zu lã siwo tana kple esiwo naa no wo viwo, si wɔe be mlɔeba kese ƒomevi aɖewo va trɔ zu amegbetɔwoa? Dzɔdzɔmeŋutinunyala kple subɔsubɔhakplɔla aɖewo gblɔna be yewoxɔ amedzɔtsolãme kple Biblia siaa ƒe nufiafia dzi se. Wogblɔna be, lododoe nya si Biblia gbalẽ si nye Mose ƒe Agbalẽ Gbãtɔ gblɔ tso amegbetɔwɔwɔ ŋu la nye. Ðewohĩ èbia ɖokuiwò kpɔ be: ‘Ðe nufiafia si nye be amegbetɔwo dzɔ tso lã me la wɔ ɖeka kple Biblia ƒe nufiafiaa?’

Ehiã vevie be míanya ale si míewɔ va dzɔ hafi míate ŋu ase ame siwo míenye, afi si míeɖo tae, kple ale si míanɔ agbee la me. Ne míenya ale si amegbetɔ wɔ va dzɔ ko hafi míate ŋu ase nu si ta Mawu ɖe mɔ fukpekpe li ɖo kple tameɖoɖo si le esi ku ɖe amegbetɔwo ƒe etsɔ me ŋu la gɔme. Ƒomedodo nyui mate ŋu anɔ mía kple Mawu dome ne kakaɖedzi mele mía si be eyae nye mía Wɔla o. Eya ta mina míadzro nu si Biblia gblɔ tso ale si amegbetɔwo wɔ va dzɔ, nɔnɔme si me wole fifia, kple nu si woanɔ mɔ kpɔm na le etsɔ me ŋu la me kpɔ. Emegbe míakpɔe ɖa ne amedzɔtsolãme ƒe nufiafiaa wɔ ɖeka kple nu si Biblia gblɔ.

Esime Ame Ðeka Koe Nɔ Anyi

Amedzɔtsolãme ŋuti nufialawo gblɔna be lãwo ƒe ƒuƒoƒo aɖee trɔ vivivi va zu amegbetɔwo, eye womelɔ̃na ɖe edzi be ame ɖeka pɛ koe nɔ anyi le gɔmedzedzea me o. Gake Biblia ya gblɔ nya si to vovo kura. Egblɔ be ame ɖeka, si nye Adam, mee míedzɔ tso. Biblia me nuŋlɔɖiwo gblɔ be Adam nye ame ŋutɔŋutɔ si nɔ anyi kpɔ. Eyɔ srɔ̃a kple viawo dometɔ aɖewo ƒe ŋkɔwo na mí. Egblɔ nu siwo wòwɔ, nya siwo wògblɔ, ɣeyiɣi si me wònɔ agbe, kple ɣeyiɣi si me wòku la na mí tsitotsito. Yesu mebu nuŋlɔɖi mawo be wonye gli siwo wotona na ame manyagbalẽwo o. Esime wònɔ nu ƒom na subɔsubɔhakplɔla agbalẽnyalagã aɖewo la, egblɔ be: “Ðe miexlẽe kpɔ be ame si wɔ ame tso gɔmedzedzea me la, atsu kple asi wòwɔ woe . . . oa?” (Mateo 19:3-5) Emegbe Yesu yɔ nya siwo wogblɔ tso Adam kple Xawa ŋu le 1 Mose 2:24.

Luka, si nye ŋutinyaŋlɔla bibi aɖe si kpɔ gome le Biblia ŋɔŋlɔ me la, ƒo nu tso Adam ŋu be enye ame ŋutɔŋutɔ abe Yesu ke ene. Luka yɔ Yesu ƒe dzidzime yi megbemegbe va ɖo keke ame gbãtɔ la dzi. (Luka 3:23-38) Esime apostolo Paulo hã nɔ nu ƒom na ameha aɖe si dome xexemenunyala siwo de Helatɔwo ƒe suku kɔkɔwo le la, egblɔ na wo be: “Mawu si wɔ xexea kple nu siwo katã le eme [la] . . . wɔ amewo ƒe dukɔ sia dukɔ tso ame ɖeka me, be woanɔ anyigba blibo la dzi, eye wòɖo ɣeyiɣi ɖoɖiwo kple amegbetɔwo nɔƒewo ƒe liƒowo ɖi.” (Dɔwɔwɔwo 17:24-26) Eme kɔ ƒãa be, Biblia ƒe nufiafiae nye be, “ame ɖeka” mee míedzɔ tso. Ðe nu si Biblia gblɔ tso ale si amegbetɔ nɔ le gɔmedzedzea me ŋu la wɔ ɖeka kple amedzɔtsolãme ƒe nufiafiaa?

Amegbetɔ Bu Eƒe Blibodedea

Le Biblia ƒe nya nu la, Yehowa wɔ ame gbãtɔ wòde blibo. Mawu mate ŋu awɔ nu si mede blibo o gbeɖe o. Nuŋlɔɖi si li tso nuwo wɔwɔ ŋu la gblɔ  be: ‘Mawu wɔ ame ɖe ye ŋutɔ ƒe nɔnɔme. Eye Mawu kpɔ nu siwo katã wòwɔ la, eye kpɔ ɖa, wonyo ŋutɔ.’ (1 Mose 1:27, 31) Nu kae wòfia ne wogblɔ be ame aɖe nye ame deblibo?

Tiatiawɔblɔɖe le ame deblibo si, eye ate ŋu asrɔ̃ Mawu ƒe nɔnɔmewo bliboe. Biblia gblɔ be: “Mawu wɔ amegbetɔwo woto mɔ ɖeka, ke woawo dia ayedzedze geɖe.” (Nyagblɔla 7:29) Adam ŋutɔe tiae be yeadze aglã ɖe Mawu ŋu. To eƒe aglãdzedzea me la, ebu blibodede na eya ŋutɔ kple eƒe dzidzimeviwo. Amegbetɔwo ƒe blibomademade ye wɔe be, togbɔ be míedina be míawɔ nu nyui hã la, zi geɖe la, míete ŋu wɔnɛ o. Apostolo Paulo ŋlɔ be: “Nu si medina la, menye eyae mewɔna o; hafi nu si melé fu la boŋ ye mewɔna.”—Romatɔwo 7:15.

Biblia gblɔ be, ne ɖe amegbetɔwo de blibo la, anye ne woyi edzi nɔ agbe le lãmesẽ blibo me hafi. Nya si Mawu gblɔ na ame gbãtɔ, Adam la, na eme kɔ ƒãa be, ne ɖe wòɖo to Mawu la, anye ne maku akpɔ o. (1 Mose 2:16, 17; 3:22, 23) Ne ɖe Yehowa wɔ amegbetɔ kple susu be wòava dze dɔ alo adze aglã la, anye ne megblɔ be ‘enyo ŋutɔ’ le ewɔwɔ vɔ megbe o. Blibodede si amegbetɔwo bu la na míese nu si tae togbɔ be wowɔ míaƒe ŋutilã le mɔ nyuitɔ kekeake nu hã la, nu gblẽna le mía ŋu, eye míedzea dɔ la gɔme. Eya ta amedzɔtsolãme ƒe nufiafiaa mewɔ ɖeka kple Biblia o. Le amedzɔtsolãme ƒe nufiafia nu la, ale si amegbetɔ le fifia la nyo wu ale si wònɔ tsã esime wònɔ lã ƒe nɔnɔme me. Biblia ya ɖee fia be ale si amegbetɔ le fifia la gblẽ boŋ, elabena ede blibo tsã.

Susu si nye be Mawu na lãwo trɔ vivivi va zu amegbetɔ hã mewɔ ɖeka kple nu si Biblia gblɔ tso ame si ƒomevi Mawu nye ŋu o. Ne nyateƒee nya sia nye la, ekema efia be Mawu ŋutɔe kplɔ amegbetɔwo de dɔléle kple nɔnɔme wɔnublanui si me wole fifia la me. Evɔ Biblia gblɔ tso Mawu ŋu be: “Agakpe wònye, eƒe nuwɔwɔ de blibo; elabena eƒe mɔwo katã dzɔ. Mawu nyateƒetɔ wònye, eye alakpa mele eme o, nuteƒewɔla kple dzɔdzɔetɔ wònye. Wowɔ nu tovo ɖe eŋu, ŋukpenanu wonye, eye womenye viawo o; dzidzime baɖa kple ame gbegblẽwo wonye!” (5 Mose 32:4, 5) Eya ta eme kɔ be, menye lãwo ƒe tɔtrɔ vivivi va zu amegbetɔwo, si Mawu le megbe na, tae ameƒomea le fu siawo kpem fifia o. Ame ɖeka aɖe ƒe blibodede si wòbu na eya ŋutɔ kple eƒe dzidzimeviwo to aglãdzedze ɖe Mawu ŋu me la tae. Fifia si míeƒo nu tso Adam ŋu vɔ la, míate ŋu atrɔ ɖe Yesu ŋu. Ðe amedzɔtsolãme ƒe nufiafiaa wɔ ɖeka kple nya si Biblia gblɔ tso Yesu ŋua?

Ðe Nàte Ŋu Axɔ Amedzɔtsolãme Kple Kristotɔnyenye Siaa Dzi Asea?

Abe ale si ɖewohĩ nènyae ene la, Kristotɔwo ƒe nufiafia vevi aɖee nye be, “Kristo ku ɖe míaƒe nu vɔ̃wo ta.” (1 Korintotɔwo 15:3; 1 Petro 3:18) Be míakpɔ nu si tae amedzɔtsolãme ƒe nufiafiaa mewɔ ɖeka kple nufiafia ma o la, ehiã be míase nu si tae Biblia yɔ mí be nu vɔ̃ wɔlawo ɖo, kple nu si nu vɔ̃ gblẽna le mía ŋu la gɔme gbã.

Mí katã míenye nu vɔ̃ wɔlawo le gɔmesesea nu be, míetea ŋu srɔ̃a Mawu ƒe nɔnɔme nyui  wɔnukuawo, abe eƒe lɔlɔ̃ kple dzɔdzɔenyenye ene, bliboe o. Eya tae Biblia gblɔ be: “Wo katã wɔ nu vɔ̃, eye womete ŋu ɖoa Mawu ƒe ŋutikɔkɔe la gbɔ o.” (Romatɔwo 3:23) Biblia ƒe nufiafiae nye be, nu vɔ̃ ye hea ku vanɛ. Korintotɔwo Ƒe Agbalẽ Gbãtɔ, ta 15, kpukpui 56, gblɔ be: “Veve si hea ku vanɛ lae nye nu vɔ̃.” Nu vɔ̃ si dome míenyi la koŋ tae míedzea dɔ hã ɖo. Yesu ɖee fia be, nu vɔ̃ si le mía ŋu nana míedzea dɔ. Egblɔ na lãmetututɔ aɖe be: “Wotsɔ wò nu vɔ̃wo ke,” eye ŋutsua haya.—Mateo 9:2-7.

Aleke Yesu ƒe kua kpena ɖe mía ŋui? Biblia gblɔ vovototo si le Adam kple Yesu Kristo dome la ale: “Ale si ko amewo katã le kukum le Adam me la, nenema kee woagbɔ agbe wo katã hã le Kristo la me.” (1 Korintotɔwo 15:22) Yesu xe fe ɖe nu vɔ̃ si dome míenyi tso Adam gbɔ la ta esime wòtsɔ eƒe agbe na. Esia wɔe be, nu si Adam bu la agasu ame siwo katã ɖenɛ fiana be yewoxɔ Yesu dzi se, eye woɖoa toe la si—si nye agbe mavɔ ƒe mɔkpɔkpɔ.—Yohanes 3:16; Romatɔwo 6:23.

Èkpɔ nu si tae míele gbɔgblɔm be amedzɔtsolãme ƒe nufiafiaa mewɔ ɖeka kple Kristotɔnyenye o azɔa? Ne kakaɖedzi mele mía si be “amewo katã le kukum le Adam me” o ɖe, ekema aleke wɔ míele mɔ kpɔm be “woagbɔ agbe wo katã hã le Kristo la me?”

Nu Si Tae Amedzɔtsolãme Ƒe Nufiafiaa Vivia Amewo Nu

Biblia ɖe nu si tae nufiafiawo, abe amedzɔtsolãme ƒe nufiafiaa ene, ava bɔ la me. Egblɔ be: “Ɣeyiɣi aɖe ava, esime womaxɔ nufiafia nyuitɔ la o, ke boŋ le woawo ŋutɔwo ƒe nudzodzrowo nu la, woaƒo nufialawo nu ƒu na wo ɖokuiwo, bene woalũ tome na wo; eye woaɖe to ɖa le nyateƒe la ŋu, evɔ woatrɔ ɖe gliwo ya ŋu.” (2 Timoteo 4:3, 4) Togbɔ be dzɔdzɔmeŋutinunya ƒe nufiafiae ame geɖe susuna be amedzɔtsolãme ƒe nufiafiaa nye hã la, mawusubɔsubɔ ŋuti nufiafia boŋ ye. Efiaa ale si woabu agbeae kple nɔnɔme si woaɖe afia ɖe Mawu ŋu la amewo. Eƒe dzixɔseawo vivia amewo nu le woƒe ɖokuitɔdidi kple ɖokuisinɔnɔ ƒe gbɔgbɔ ta. Ame geɖe siwo xɔ amedzɔtsolãme ƒe nufiafiaa dzi se la gblɔna be yewoxɔ Mawu hã dzi se. Ke hã, wosena le wo ɖokui me be, yewoate ŋu abui be menye Mawue wɔ nuwo o, be medea nu amegbetɔwo ƒe nyawo me o, eye be madrɔ̃ ʋɔnu amewo o. Enye nufiafia aɖe si vivina le to me na amewo.

Zi geɖe la, kpeɖodzi aɖeke menɔa amedzɔtsolãme ŋuti nufialawo si o, ke boŋ “woawo ŋutɔwo ƒe nudzodzrowo” ye ʋãa wo—ɖewohĩ didi be yewoadze dzɔdzɔmeŋutinunyalawo, siwo dometɔ akpa gãtɔ xɔ nufiafia ma dzi se la, ŋu ye. Nu gbagbewo ƒe lãmetsi ƒe dɔwɔwɔ ŋuti nufiala Michael Behe, si zã eƒe agbenɔƒe ƒe akpa gãtɔ tsɔ srɔ̃ nu le nu siwo yia edzi le nu gbagbewo ƒe lã me ŋu la, ɖe nu me be, kpeɖodzi aɖeke mele ame siwo fiaa nu be ɖe amegbetɔwo ƒe lãmenu gbagbe viwo nɔ tɔtrɔm vivivi va zu ale si wole fifia la si o. Ðe nu gbagbe vi suesue siawo hã ate ŋu atrɔ ava zu nu bubuwoa? Dzɔdzɔmeŋutinunyala sia ŋlɔ be: “Nufiafia si nye be, nu bubu aɖewoe trɔ va zu nu gbagbe vi suesuewo la mewɔ ɖeka kple dzɔdzɔmeŋutinunya o. Dzɔdzɔmeŋutinunya ŋuti nuŋlɔɖi aɖeke—eɖanye esiwo dzɔdzɔmeŋutinunyala xɔŋkɔwo ŋlɔna edziedzi, esiwo dona edziedzi ku ɖe nu tɔxɛ aɖewo koŋ ŋu, alo agbalẽwo o—meƒo nu tso ale si wòdzɔe, alo ale si wòate ŋu anya wɔe, be nu bubu aɖewo natrɔ ava zu nu bubuwo le nuwɔwɔ siwo me agbeŋusẽ le la ƒomevi aɖeke me ŋu o. . . . Darwin ƒe nufiafia be, nu bubu aɖewoe trɔ va zu nu siwo li egbea la nye nufiafia si ŋu kpeɖodzi aɖeke mele o.”

Ne kpeɖodzi mele amedzɔtsolãme ŋuti nufialawo si o ɖe, ekema nu ka tae wole boblo dom woƒe susuawo lelele nenema gbegbe? Aƒetɔ Behe ɖo eŋu be: “Nya la koe nye be, ame geɖe, siwo dome dzɔdzɔmeŋutinunyala xɔŋkɔ siwo ŋu wodea bubui le la, medi be yewoaxɔe ase be ŋusẽtɔ aɖee wɔ nu siwo míekpɔna la o.”

Amedzɔtsolãme ŋuti nufiafiaa vivia subɔsubɔhakplɔla geɖe siwo dina be amewo nabu yewo be yewonye nunyalawo la nu. Wosɔ kple ame siwo ŋu apostolo Paulo ƒo nu tsoe le eƒe lɛta si wòŋlɔ na  Kristotɔ siwo nɔ Roma la. Paulo ŋlɔ be: “Nu si woate ŋu anya tso Mawu ŋu la dze le wo dome . . . Eƒe nɔnɔme makpɔmakpɔawo dzena gaglãa wokpɔna tso xexea wɔwɔ dzi heyina, elabena wodzena wokpɔna le nu siwo wòwɔ la me, ɛ̃, eƒe ŋusẽ mavɔmavɔ kple Mawunyenye la dzena, ale be womate ŋu ado taflatsɛ o; elabena togbɔ be wonya Mawu hã la, womedo eyama ɖe dzi abe Mawu ene o, eye womeda akpe nɛ hã o, ke boŋ woƒe tamebubu zu dzodzro, eye woƒe dzi masenugɔme la do viviti. Togbɔ be wogblɔna be yewonye nunyalawo hã la, wozu bometsilawo.” (Romatɔwo 1:19-22) Aleke nàwɔ be alakpanufialawo nagable wò o?

Wɔla La Dzi Xɔxɔ Se Si Ŋu Kpeɖodzi Le

Biblia te gbe ɖe kpeɖodzi ƒe vevienyenye dzi esi wòɖe xɔse gɔme. Egblɔ be: “Xɔse nye dziɖoɖo ɖe nu siwo wole mɔ kpɔm na la ŋu kple kakaɖedzi, nu ŋutɔŋutɔ siwo li togbɔ be womekpɔa wo o la ŋuti ɖeɖe fia si dze kɔtɛ.” (Hebritɔwo 11:1) Ele be Mawu dzi xɔxɔ se vavãtɔ nanɔ te ɖe kpeɖodzi siwo ɖee fia be Wɔla la li ŋutɔŋutɔ la dzi. Biblia fia afi si míate ŋu akpɔ kpeɖodzia le.

Biblia ŋlɔla David si gbɔgbɔ ʋã la ŋlɔ be: ‘Meda akpe na wò le ale si wowɔm nukutɔe la ta.’ (Psalmo 139:14) Ne míedi ɣeyiɣi de ŋugble le ale si wowɔ mía kple nu gbagbe bubuwo ƒe ŋutilãe nukutɔe ŋu la, enyɔa vɔvɔ̃ kple bubu ɖe mía me ɖe nunya si le mía Wɔlaa si la ŋu. Wotrɔ asi le lãmenu akpe geɖe siwo ƒe dɔwɔwɔ aduadu na míele agbe la ŋu nukutɔe. Azɔ hã, ale si dzɔdzɔmenu siwo le xexea me wɔa dɔe la ɖee fia be wole ɖoɖo nu pɛpɛpɛ. David ŋlɔ be: “Dziƒowo le Mawu ƒe bubu xlẽm fia, eye dziŋgɔli le gbeƒã ɖem eƒe asinudɔwɔwɔ.”—Psalmo 19:2.

Kpeɖodzi geɖe bɔ ɖe Biblia la ŋutɔ me, siwo ɖee fia be Wɔla la li. Ne èdi ɣeyiɣi dzro ale si agbalẽ 66 siwo le eme la me nyawo to mɔ ɖeka, ale si agbe nyui nɔnɔ ŋuti dzidzenu siwo le eme la ɖea vi ŋutɔ, kple ale si eme nyagblɔɖiwo va eme pɛpɛpɛ la, ana nàkpɔ kpeɖodzi gbogbo siwo ɖee fia be, ame si na woŋlɔe lae nye nuwo Wɔla. Biblia ƒe nufiafiawo gɔme sese hã ana nàka ɖe edzi be, Biblia nye Wɔla la ƒe Nya vavã. Le kpɔɖeŋu me, ne èva se Biblia ƒe nufiafia siwo ku ɖe nu si tae fukpekpe li ɖo, Mawu Fiaɖuƒea, nu si amegbetɔwo ate ŋu anɔ mɔ kpɔm na le etsɔ me, kple ale si míawɔ akpɔ dzidzɔ gɔme la, àkpɔ Mawu ƒe nunya ŋuti kpeɖodzi si dze kɔtɛ. Àva se le ɖokuiwò me abe Paulo ene esime wòŋlɔ be: “Oo, Mawu ƒe kesinɔnuwo kple nunya kpakple sidzedze me goglo loo! Aleke seɖoƒe meli na eƒe ʋɔnudɔdrɔ̃wo me dzodzro o, eye eƒe mɔwo mele nyanya me o ye nye esi!”—Romatɔwo 11:33.

Ne èdzro kpeɖodziawo me, eye wò xɔse le tsitsim la, ekema àva ka ɖe edzi be, ɣesiaɣi si nèle Biblia xlẽm la, ekema Wɔla la ŋutɔe nye ema le nu ƒom na wò. Egblɔ be: “Nyee wɔ anyigba, eye mewɔ ame ɖe edzi. Nye asie he dziƒo me, eye meɖo eŋu nuwo katã.” (Yesaya 45:12) Nyateƒee, ne èdze agbagba di kpeɖodzi siwo li be Yehowae nye nuwo katã Wɔla la, mave wò akpɔ o.

[Nya si ɖe dzesi si le axa 14]

Apostolo Paulo gblɔ na Helatɔ agbalẽnyalawo be: “Mawu . . . wɔ amewo ƒe dukɔ sia dukɔ tso ame ɖeka me”

[Nya si ɖe dzesi si le axa 15]

Le amedzɔtsolãme ŋuti nufiafiaa nu la, ale si amegbetɔ le fifia la nyo wu ale si wònɔ tsã esime wònɔ lã ƒe nɔnɔme me. Biblia ya ɖee fia be ale si amegbetɔ le fifia la gblẽ boŋ, elabena ede blibo tsã

[Nya si ɖe dzesi si le axa 16]

“Nufiafia si nye be, nu bubu aɖewoe trɔ va zu nu gbagbe vi suesuewo la mewɔ ɖeka kple dzɔdzɔmeŋutinunya o”

[Nya si ɖe dzesi si le axa 17]

Ale si wowɔ nu gbagbewo nukutɔe la nyɔa vɔvɔ̃ kple bubu ɖe mía me ɖe mía Wɔla la ƒe nunya ŋu