Ðe Nu Gbogbo Aɖewo Kpɔtɔ Li Wòle Be Míasrɔ̃a?

Srɔ̃tɔ dutanyanyuigblɔla aɖewo bɔbɔ nɔ anyi ɖe ƒuta le Ɣetoɖoƒe Afrika nɔ ɣleti ɖiɖi kpɔm ɖaa le yame. Srɔ̃ŋutsua gblɔ be: “Nuka sinue amewo nya tso ɣletia ŋu, eye nuka gbegbee gali woasrɔ̃ tso eŋu?”

Srɔ̃nyɔnua gblɔ ƒu edzi be: “Tsɔe be míate ŋu akpɔ anyigba ƒe zɔzɔme abe ɣletia ene—nukae amewo nya tso eŋu xoxo, eye nuka gbegbee gali be míasrɔ̃? Eye wò ya bu esia ŋu kpɔ! Menye ɖekoe anyigba la le xlã ƒom ɣe ko evɔ o, ke boŋ ɣe kple eŋuɣletinyigbawo hã le azɔli dzi. Esia fia be ɖewohĩ míagava to afisia tututu le yamenutowo me akpɔ o. Le nyateƒe me la, míenya afisi míele le esi afisi míele na ɣea kple ɣletiviwo metrɔna o la ta. Míenya nu geɖe ŋutɔ tso nanewo ŋuti, gake woate ŋu agblɔ be míenya afisi tututu míeɖo gɔ̃ hã o!”

NYA siawo he susu yi nyateƒenya vevi aɖewo dzi. Edze abe nu geɖe ŋutɔ gakpɔtɔ li míasrɔ̃ ene. Nyateƒee, mía dometɔ ɖesiaɖe srɔ̃a nu yeyewo gbesiagbe. Gake edze abe aleke kee míesrɔ̃ nui o, míate ŋu asrɔ̃ nusiwo katã míedi be míanya o ene.

Nyateƒee, hekpe ɖe ŋutete si le mía si be míasrɔ̃ nu yeyewo ŋu la, míaƒe sidzedze dzraɖoƒe hã va keke ɖe edzi ŋutɔ. Mɔ̃ɖaŋununya na be ameƒomea ƒe sidzedze dzadzraɖo mɔnu va lolo ŋutɔ. Agba siwo dzi woléa nyatakakawo ɖo zãna le kɔmpiuta me fifia ƒe ŋutete lolo ale gbegbe be ehiã be woakpa dzesideŋkɔ yeyewo na wo. Woate ŋu adzra nyatakaka gbogbo aɖe ɖo ɖe CD-ROM (agba siwo dzi woléa nyatakaka ɖo zãna le kɔmpiuta me) kpokploe aɖe dzi alo aléwo ɖe edzi; wogblɔ be eƒe nyatakaka léle ɖi ƒe ŋutetee nye megabytes 680 alo esi wu nenema. DVD (agba si dzi woléa video nukpɔkpɔwo ɖo) hã ƒe nyaléle ɖi ŋutete dea ema ƒe teƒe adre kloe, eye esiwo ƒe ŋutete kpe wu kura gɔ̃ hã le dodom.

Nyatakamɔnu siwo wozãna egbea wɔ nuku. Agbalẽtamɔ̃wo te ŋu trona sesĩe ŋutɔ eye wotaa nyadzɔdzɔgbalẽ, magazine, kple agbalẽ gbogbo aɖewo. Amesi le Internet zãm tɔ koe nye be wòate asi ɖe kɔmpiuta ŋuti nu vi aɖe dzi be wòaxɔ nyatakaka gbogbo aɖewo. Woto mɔ siawo kple bubu geɖewo nu le nyawo kakam kabakaba wu alesi míate ŋu axɔ woe. Ɣeaɖewoɣi la wotsɔa atsiaƒu wɔa nyatakaka gbogbo siawo ƒe kpɔɖeŋu, si sɔ gbɔ ale gbegbe be míagblɔe be ele be míanya eƒuƒu ale be míagano tsi fũ akpa o.  Woƒe agbɔsɔsɔ ɖeɖe zinɛ ɖe mía dzi be míatia wo me.

Susu bubu si ta wòle be míatia wo mee nye be nyatakaka aɖewo li siwo mehiã na mí gɔ̃ hã o. Le nyateƒe me la, wo dometɔ aɖewo menyo na mí gɔ̃ hã o, mehiã be míanya wo o. Ðo ŋku edzi be sidzedze enye nyatakakawo xɔxɔ—woɖanye nyuia alo gbegblẽa o, woɖaɖea vi alo womeɖea vi o. Nusi gatɔtɔa ame ɖe edzi wue nye be nanewo siwo ame geɖewo buna nyateƒenyawoe la menye nyateƒe ŋutɔŋutɔ o. Zi geɖe la, dziɖuɖumegã siwo ŋu wodea bubui ƒe nyawo nyea vodada, alo aʋatso! Le kpɔɖeŋu me, bu blema Efeso-dua ƒe agbalẽŋlɔla si ŋu woanya de bubui be enye amegã si nya nu geɖe la ŋu kpɔ. Egblɔ be: “Ameka gɔ̃e li, si menya bena, Efeso du la enye Diana gã la kple legba, si ge tso dziƒo la ƒe subɔla oa?” (Dɔwɔwɔwo 19:35, 36) Togbɔ be nya ma dze abe nusi amesiame nya—si ame geɖe agblɔ be enye nusi ŋu ɖikeke mele o—hã la, menye nyateƒee wònye be legba la ge tso dziƒo o. Eyata Biblia Kɔkɔea xlɔ̃ nu Kristotɔwo be woakpɔ nyuie le “aʋatsosidzedze ƒe nudadafiafia” ŋu.—Timoteo I, 6:20.

Susu vevi aɖe si ta wòle be míatia nusiwo míesrɔ̃na le sidzedze tutu ɖo mee nye be míaƒe agbenɔƒewo le kpuie ŋutɔ. Aleke kee nèɖatsii o, nu vovovowo ŋuti sidzedze li siwo nàdi godoo be yeanya, gake èkpɔe be yemate ŋu anɔ agbe wòadidi boo asrɔ̃ wo o.

Ðe kuxi sia ava ɖɔ ɖo gbaɖegbea? Ðe míate ŋu akpɔ sidzedze aɖe si ana agbe nadidi ɖe edzia, alo ana míanɔ agbe tegbee gɔ̃ hã? Ðe wòate ŋu anye be sidzedze sia li xoxoa? Ne eli la, ɖe wòate ŋu asu amesiame sia? Ðe ɣeyiɣi aɖe ava esime sidzedzewo katã anye nusi ko míekpɔ mɔ na si nye be woanye nyateƒe bliboa? Dutanyanyuigblɔla siwo ŋu míeƒo nu tsoe la kpɔ nyabiase mawo ŋuti ŋuɖoɖo siwo naa dzidzeme, wò hã àte ŋu akpɔe. Taflatse xlẽ nyati si kplɔe ɖo si ana sidzedze xɔxɔ tegbee ƒe mɔnukpɔkpɔa wò.