Èɖo Ŋku Wo Dzia?

Ðe Gbetakpɔxɔ ƒe tata siwo do nyitsɔ laa xexlẽ do dzidzɔ na wòa? Ke kpɔe ɖa be yeate ŋu aɖo biabia siwo gbɔna ŋu hã:

• Nukae Kristotɔ aɖe ate ŋu awɔ ne ele seselelãme kple gbɔgbɔ me nutikɔname ƒe fu kpem?

Ele be míade dzesi nusiwo nana nu tia kɔ na mí. Anyo be míabu akɔnta tso míaƒe nuwɔnawo kple nunɔamesi ŋu ahaɖe nusiwo mele vevie o, siwo nye agba bubuwo, ɖa le míaƒe agbenɔnɔ me. Míate ŋu aɖo taɖodzinu siwo gbɔ míate ŋu aɖo bɔbɔe na mía ɖokui. Beléle na mía ɖokui be míanɔ lãmesẽ me le gbɔgbɔ le vevie eye ele be míanɔ gbe dom ɖa ahanɔ ŋugble dem hã.—8/15, axa 23-6.

• Nukatae Yehowa Ðasefowo tsɔa xexlẽme 144,000 la be enye xexlẽme ŋutɔŋutɔ ke menye kpɔɖeŋu ƒe xexlẽme o?

Esi woƒo nu tso ame 144,000 ŋu na apostolo Yohanes vɔ megbe la, ekpɔ ‘ameha gã aɖe, si ame aɖeke mete ŋu xlẽ o.’ (Nyaɖeɖefia 7:4, 9) Ne kpɔɖeŋu koe xexlẽme 144,000 la nye eye wòtsi tre ɖi na ƒuƒoƒo aɖe si me tɔwo ƒe xexlẽme womenya o la, ke vovototo si dem wonɔ kpukpui eveawo dome la madze kura o. Yesu yɔ amesiwo aɖu fia kplii la be ‘ha sue.’ (Luka 12:32)—9/1, axa 30.

• Nukatae Israel-vi aɖe ate ŋu adzra lã tsiʋume na du bubu me tɔ aɖe?

Du bubu me tɔ alo amedzro siwo menye trɔ̃subɔla zu Yudatɔwo o la mele Sea te o. Eyata woɖe mɔ na Israel-viwo be woatsɔ lã siawo ana wo alo adzrae na wo. (Mose V, 14:21) Gake Se ƒe nubablaa ku ɖe amesi nye trɔ̃subɔla zu Yudatɔ ya ŋu eye mekpɔ mɔ aɖu lã si wometso ʋui o. (Mose III, 17:10)—9/15, axa 26.

• Nukae nye dzɔdzɔmenuwɔwɔwo sɔsrɔ̃, eye nukatae Kristotɔwo adi be yewoanya nusi wònye?

Enye dzɔdzɔmeŋutinunya ƒe akpa si me wosrɔ̃a dzɔdzɔmenuwɔwɔwo ahawɔ etɔgbe alo eƒomevi aɖe. Le kpɔɖeŋu me, Wright-ɖekakpuiawo to yameʋu vɛ le nusɔsrɔ̃ tso alesi xevi gãwo wɔna te ŋu nɔa yame ŋu vɔ megbe. Eyata dzɔdzɔmenuwɔwɔwo sɔsrɔ̃ ate ŋu aʋã Kristotɔwo be woatsɔ ŋutikɔkɔe na Wɔla la.—10/1, axa 9.

• Ameka ŋue woƒo nu tsoe le Korintotɔwo II, 12:2-4 me be wotsɔe dzoe yi ɖe paradiso me?

Esi Paulo ʋli eƒe apostolo nyenye ta megbe teti koe wògblɔ nya mawo. Esi Biblia meƒo nu tso ame bubu aɖeke si dzi nusia tɔgbe dzɔ ɖo ŋu o, eye Pauloe nye amesi gblɔe na mí ta la, anye be Paulo ye kpɔ ŋutega sia.—10/15, axa 8.

• Yesu ƒe nɔnɔme kawoe na wòdze anye Kplɔla si Mawu tia?

Yesu wɔ nuteƒe bliboe, eɖi anukware eye wòwɔ nu dzɔdzɔe. Etsɔ eɖokui ɖe adzɔgbe na Mawu keŋkeŋ. Yesu tsɔ ɖe le eme na amewo vevie eye elɔ̃na faa wɔa dɔ.—11/1, axa 6-7.

• Afikae gbɔgbɔ vɔ̃wo anɔ le Ƒe Akpe Ðeka Dziɖuɖua me?

Míate ŋu aƒo nya ta wòasɔ be wole wo de ge aʋli me akpe ɖe Satana ŋu le Kristo ƒe Ƒe Akpe Ðeka Dziɖuɖua me. (Nyaɖeɖefia 20:1-3) Wogblɔ ta gbagbã na da la si anye edede aʋli me le Ƒe Akpe Ðeka Dziɖuɖua me ŋu nya ɖi le Mose I, 3:15. Mawudɔla vɔ̃ɖiawo alo gbɔgbɔ vɔ̃awo nye Satana ƒe dzidzimevia ƒe akpa aɖe. Nyateƒe si wònye be gbɔgbɔ vɔ̃wo vɔ̃na na aʋli me yiyi fia be wonya be nusia ava dzɔ ɖe wo dzi. (Luka 8:31)—11/15, axa 30-1.

• Nukatae wòle be ame nakpɔ eɖokui dzi nyuie le aha muame nono ŋu, ne eƒoa asa na enono wòadze le eŋu be emu kura gɔ̃ hã?

Togbɔ be ame aɖewo noa aha gbogbo aɖe ŋutɔ hã la, medzena le wo ŋu be womu o. Gake ʋɛʋɛʋɛ la, aha muame nono edziedzi ava na wòazu numame na ame eye wòava zu ‘aha geɖe nola’ alo ahanoxe. (Tito 2:3) Yesu xlɔ̃ nu be míakpɔ nyuie bene ‘nutsuɖuɖu kple ahamumu nagate mí ɖe to o.’ (Luka 21:34, 35) Menye ɖe wonoa aha kakaka muna hafi wònana ame ƒe lãme wɔa dɔ̃ eye kuvia ɖoa ame le ŋutilã kple gbɔgbɔ me siaa o.—12/1, axa 19-21.