‘Ame Nyui Ƒe Nu Nyoa Mawu Ŋu’

YEHOWA MAWU gbɔe amesiame ƒe agbe dzɔ tso. (Psalmo 36:10) Ẽ, “eya me míele agbe, eye míeʋãna le.” (Dɔwɔwɔwo 17:28) Eye ɖe dzidzɔ meyɔa míaƒe dzi me ne míede ŋugble le teƒeɖoɖo siwo wònaa amesiwo tiae be yewoanɔ ƒomedodo kplikplikpli me kpli ŋu oa? Ẽ, “Mawu ƒe amenuvevenunana la enye agbe mavɔ.” (Romatɔwo 6:23) Aleke wòle vevie enye si be míadi be míaƒe nu nanyo Yehowa ŋu!

Hakpala la ka ɖe edzi na mí be ‘Mawu vea ame nu.’ (Psalmo 84:12) Gake amekawo nue wòvena? Egbea la, amewo vea ame bubuwo nu le woƒe sukudede, kesinɔtɔnyenye, ŋutigbalẽ ƒe amadede, gbe si dola wònye, kple bubuawo ta. Ameka nue Mawu vena? Blema Israel-fia Salomo ɖo eŋu be: “Ame nyui ƒe nu nyoa Yehowa ŋu, ke ebua fɔ ayeme la.”—Lododowo 12:2.

Eme kɔ ƒã be Yehowa kpɔa dzidzɔ ɖe ame nyui—amesi ƒe agbenɔnɔ nyo—ŋu. Ame nyui ƒe nɔnɔme nyuiwo dometɔ aɖewoe nye ɖokuimamlã, ameŋkumemakpɔmakpɔ, ɖokuibɔbɔ, nublanuikpɔkpɔ, kple ŋuɖɔɖɔɖo. Eƒe tamesusuwo nɔa dzɔdzɔe, eƒe nyawo dea dzi ƒo, eƒe nuwɔnawo dzɔna eye woɖea vi. Biblia ƒe agbalẽ si nye Lododowo ƒe ta 12 lia ƒe akpa gbãtɔ ɖe alesi wòle be nyuiwɔwɔ nakpɔ ŋusẽ ɖe míaƒe gbesiagbegbenɔnɔ dzi fia mí heɖe viɖe si nɔnɔme sia ɖeɖe fia hena vɛ la fia. Ŋugbledede le nusi wogblɔ le afima ŋu ‘ana míase nusita míawɔ nyui gɔme.’ (Psalmo 36:3, NW) Aɖaŋuɖoɖo nyui sia ŋudɔwɔwɔ akpe ɖe mía ŋu be míaƒe nu nanyo Mawu ŋu.

Amehehe le Vevie

Salomo gblɔ be: “Amesi lɔ̃a amehehe la, elɔ̃a sidzedze; ke amesi léa fu mokaname la, gbemelãe.” (Lododowo 12:1) Esi ame nyui dina be yeawɔ ŋgɔyiyi ta la, edina vevie be yeaxɔ amehehe. Etsɔa aɖaŋuɖoɖo siwo wòxɔna le Kristotɔwo ƒe kpekpewo alo le dzeɖoɖowo me la dea dɔwɔna me enumake. Ŋɔŋlɔawo kple Biblia-srɔ̃gbalẽwo me nyawo nɔa abe ameʋãnu ene nɛ si ƒonɛ ɖe enu be wòazɔ mɔ dzɔdzɔe dzi. Edia sidzedze hezãnɛ tsɔ dzɔa eƒe mɔwoe. Amesi lɔ̃a amehehe la, elɔ̃a sidzedze vavã.

Aleke gbegbee amehehe—vevietɔ ɖokuimamlã—le vevie na tadeagula vavãwo enye si! Ate ŋu anye míaƒe didi be Mawu ƒe Nya ŋuti sidzedze deto nasu mía si. Adzro mí be míado vevie nu wu le Kristotɔwo ƒe subɔsubɔdɔa me eye be míanye Mawu ƒe Nya fiala nyuiwo wu. (Mateo 24:14; 28:19, 20) Gake ebia ɖokuimamlã be didi siawo nasu mía si. Ðokuimamlã hiã le agbenɔnɔ ƒe akpa bubuwo hã. Le kpɔɖeŋu me, nusiwo ŋu wotrɔ asi le be wòanyɔ dzodzro gbegblẽ ɖe ame me la bɔ egbea. Ðe mebia ɖokuimamlã be woate ŋu aɖe ŋku ɖa be wòagakpɔ nu madzemadzewo oa? Gawu la, esi wònye ‘ame ƒe dzimesusu nye vɔ̃ tso ɖevime ke’ ta la, tamesusu gbegblẽ aɖe ate ŋu ado tso susua ƒe  gogloeƒe. (Mose I, 8:21) Ehiã ɖokuimamlã be woaɖe susu ɖa le tamesusu ma ŋu.

Gake amesi léa fu mokaname melɔ̃a amehehe alo sidzedze o. Le esi wònana amegbetɔ wɔnuvɔ̃ ƒe dzɔdzɔmenɔnɔme si nye be wòana amehehe nave dɔme nɛ ɖua edzi ta la, eɖea eɖokui dzi kpɔtɔna heɖia lã manyanu—gbemelã—aɖe si menya naneke tso agbenyuinɔnɔ ŋu o. Ele be míatsi tre ɖe nɔnɔme sia ŋu vevie.

‘Ke Siwo Womate Ŋu Aho O’

Enye nyateƒe be ame nyui mate ŋu anye ame madzɔmadzɔ alo numadzɔmadzɔwɔla o. Eyata nudzɔdzɔewɔwɔ hã hiã hafi ame ƒe nu nanyo Yehowa ŋu. Fia Dawid dzi ha be: “Yehowa, wòe yraa ame dzɔdzɔe, eye nètsɔa amenuveve ƒoa xlãe abe akpoxɔnu ene.” (Psalmo 5:13) Esi Salomo tsɔ ame dzɔdzɔewo ƒe nɔnɔme nɔ sɔsɔm kple ame vɔ̃ɖiwo tɔ la, egblɔ be: “Nu vɔ̃ɖi wɔwɔ mana amegbetɔ nali ɖi o; ke ame dzɔdzɔe ƒe ke maʋã o.”—Lododowo 12:3.

Adze abe ɖe ame vɔ̃ɖiwo le dzidzedze kpɔm ene. Bu hakpala Asaf ƒe nuteƒekpɔkpɔa ŋu kpɔ ko. Egblɔ be: “Ke nye la ekpɔtɔ ʋɛ nye afɔ da kloe, esusɔ vie nye afɔ ɖiɖi kloe.” Nukatae? Asaf ɖo eŋu be: “Elabena meʋã ŋu adegbeƒola, esi mekpɔ be, enyona na ame vɔ̃ɖi la.” (Psalmo 73:2, 3) Gake esime wòyi ɖe Mawu ƒe gbedoxɔa me la, eva kpɔe dze sii be ɖiɖiƒee Yehowa da wo ɖo. (Psalmo 73:17, 18) Dzidzedze ɖesiaɖe si wòadze abe ame vɔ̃ɖiwo kpɔ la nye ɣeyiɣi kpui aɖe ko ƒe nu. Nukatae wòle be míaʋã ŋu wo?

To vovo na esia la, amesi ƒe nu nyoa Yehowa ŋu la lia ke. Salomo zã ke sesẽ si le ati si la tsɔ wɔ kpɔɖeŋui gblɔ bena: “Ame dzɔdzɔe ƒe ke maʋã o.” (Lododowo 12:3) Ati gã, abe sequoia siwo le California ene, ƒe ke si womekpɔna o la ate ŋu axɔ agbleka (acre) geɖe eye wòate ŋu anye nusi alé atia ɖe te ne tsi ɖɔ eye ya sesẽwo le ƒoƒom. Sequoia si lolo ŋutɔ la ate ŋu anɔ te ɖe anyigbaʋuʋu sesẽwo gɔ̃ hã nu.

Abe ke mawo siwo le anyigba nyui tome ene la, ehiã be míaƒe susu kple dzi naku Mawu ƒe Nyaa me ayi ŋgɔ ahahe emetsi siwo naa agbe la. Esia naa míaƒe xɔse va lia ke hesẽa ŋu eye kakaɖedzi nɔa míaƒe mɔkpɔkpɔ ŋu eye meʋãna o. (Hebritɔwo 6:19) ‘Aʋatsonufiafia ƒe ya sia ya si ƒona yina gaƒona gbɔna’ la manɔ mía ƒom o. (Efesotɔwo 4:14) Ele eme baa be míase tetekpɔ sẽŋuwo ƒe ŋusẽkpɔɖeamedziwo ŋkɔ eye ŋɔ adzi mí le nɔnɔme sesẽwo me ya. Gake ‘maho ke si míeƒo ɖe to la o.’

“Nyɔnu Zãzɛ Enye Fiakuku na Srɔ̃a”

Ame geɖe nya nyagbɔgblɔ sia be, “Nyɔnu nyui ye naa ŋutsu ɖesiaɖe kpɔa dzidzedze.” Esi Salomo nɔ nu ƒom tso alesi nyɔnu kpekpeɖeŋunala le vevie ŋu la, egblɔ be: “Nyɔnu zãzɛ enye fiakuku na srɔ̃a; ke nyɔnu ŋukpenanuwɔla enye ŋuɖui le eƒe ƒuwo me.” (Lododowo 12:4) Nyuiwɔwɔ ƒe akpa geɖe dze le nya “zãzɛ” me. Srɔ̃nyɔnu nyui, abe alesi woɖɔe tsitotsito le Lododowo ta 31 ene, ƒe nyonyome lɔ dɔsesẽwɔwɔ, nuteƒewɔwɔ, kple nunya ɖe eme. Nyɔnu si si nɔnɔme siawo le la nye fiakuku na srɔ̃a elabena eƒe agbenɔnɔ nyui la naa wodea bubu eŋu eye wòdonɛ ɖe dzi le amewo dome. Metsɔa nɔƒegãdidi tsoa srɔ̃a ŋgɔ alo ʋlia ho kplii le ŋkɔxɔxɔ ta o. Ke boŋ enyea kpekpeɖeŋunala si doa alɔ srɔ̃a.

Aleke nyɔnu ate ŋu awɔ ŋukpenanue, eye nukae ado tso eme? Ŋukpenanu sia ate ŋu atso dzrehehe dzi aɖaɖo ahasiwɔwɔ dzi. (Lododowo 7:10-23; 19:13) Nu koe srɔ̃nyɔnu ƒe nuwɔna siawo wɔwɔ agblẽ le srɔ̃a ŋu. Abe alesi numekugbalẽ aɖe gblɔe ene la, ele abe “ŋuɖui le eƒe ƒuwo me” ene le susua nu be “agblẽ nu le eŋu, abe dɔléle aɖe si gbɔdzɔa ŋutilã la ene.” Numekugbalẽ bubu gblɔ be: “Nya si woate ŋu atsɔ asɔ kplii egbeae nye ‘kansa’—si nye dɔléle aɖe si xɔa ame ƒe  ŋusẽ le esi.” Neva eme be srɔ̃nyɔnu Kristotɔwo nadze agbagba be yewoƒe nu nanyo Mawu ŋu to srɔ̃nyɔnu zãzɛ ƒe nɔnɔme nyuiwo ɖeɖe fia me.

Tso Tamesusuwo me Yi Nuwɔnawo me Ðaɖo Emetsonuwo Dzi

Tamesusu kplɔa ame yia nuwɔna me, eye nuwɔna hea emetsonuwo vɛ. Azɔ Salomo ƒo nu tso alesi tamesusuwo va zua nuwɔnawoe ŋu eye wòyi edzi tsɔ ame dzɔdzɔewo nɔ sɔsɔm kple ame vɔ̃ɖiwo. Egblɔ be: “Ame dzɔdzɔewo ƒe tamesusuwo le eteƒe; ke ame vɔ̃ɖiwo ƒe aɖaŋudedewo nye alakpa. Ame vɔ̃ɖiwo ƒe nya dea xa ɖe ameʋu ŋu; ke dzi me dzɔdzɔetɔwo ƒe nu ɖea wo.”—Lododowo 12:5, 6.

Ame nyuiwo ƒe tamesusu gɔ̃ hã nyea nyuitɔ eye wonɔa akpaɖekedzimademade kple nudzɔdzɔewɔwɔ ŋu. Esi wònye lɔlɔ̃ na Mawu kple na havi amegbetɔwo ye ʋãa ame dzɔdzɔewo ta la, woƒe tamesusuwo nyea nyuitɔ. Gake ɖokuitɔdidie ʋã ame vɔ̃ɖiwo ya. Le esia ta woƒe nuwɔnawo—mɔ siwo dzi wotona ɖoa woƒe taɖodzinuwo gbɔ—nyea alakpatɔwo. Woƒe nuwɔnawo dea ame asi. Mesesẽna na wo be woaɖo mɔ̃ na ɖekemanyalawo, ɖewohĩ le ʋɔnudrɔ̃ƒe, to aʋatsonutsotsowo dzi o. Woƒe nyawo ‘dea xa ɖe ʋu ŋu’ elabena wodina be yewoawɔ nuvevi ɖekemanyalawo. Le esi ame dzɔdzɔewo dzea si ame vɔ̃ɖiwo ƒe nugbeɖoɖowo eye nunya si hiã be woaɖɔ ŋu ɖo le wo si ta la, wote ŋu ƒoa asa na afɔku ma. Woate ŋu axlɔ̃ nu amesiwo dzi woate ŋu adze bɔbɔe la ahaɖe wo tso ame vɔ̃ɖiwo ƒe tameɖoɖo vɔ̃wo me.

Aleke nuwo ava nɔ na ame dzɔdzɔewo kple ame vɔ̃ɖiwo? Salomo ɖo eŋu be: “Woatutu ame vɔ̃ɖiwo aƒu anyi, eye womaganɔ anyi o; ke ame dzɔdzɔe ƒe aƒe atsi anyi.” (Lododowo 12:7) Numekugbalẽ aɖe gblɔ be, aƒe la “tsi tre ɖi na aƒea me tɔwo kple amea ƒe nu xɔasi ɖesiaɖe, si na wòle agbe ŋutɔŋutɔ la.” Ate ŋu afia ame dzɔdzɔea ƒe ƒomea kple dzidzimeviwo gɔ̃ hã. Aleke kee wòɖale o, nusi lododoa di be yeafia la dze ƒã: Ame dzɔdzɔe la anɔ te sesĩe le nɔnɔme sesẽwo me.

Eme Anyo na Ðokuibɔbɔla

Esi Israel-fia la nɔ gbe tem ɖe nugɔmesese ƒe vevienyenye dzi la, egblɔ be: “Ame ƒe nunya nue wokafunɛ ɖo, ke wodoa vlo amesi ƒe nya medzea to o.” (Lododowo 12:8) Nugɔmesela menaa nyawo dona le enu kabakaba o. Ebua tame hafi ƒoa nu henɔa ƒomedodo nyui me kple ame bubuwo elabena ‘aɖaŋunyawo gbɔgblɔ’ ƒonɛ ɖe enu be wòatia eƒe nyawo nyuie. Ne wodo abunenya alo nyakpakpa aɖe ɖe nugɔmesela gbɔ la, ‘mekea nu kplakplakpla o.’ (Lododowo 17:27) Wokafua amesia eye eƒe nu nyoa Yehowa ŋu. Aleke gbegbee wòto vovo tso amesi ƒe ‘dzi tro’ eye nukpɔsusu totrowo le dodom tso eme gbɔe enye si!

Ẽ, wokafua aɖaŋudzela, gake lododo si kplɔe ɖo fia asixɔxɔ si le ɖokuibɔbɔ ŋu mí. Egblɔ be: “Ame tsɛ, si si subɔla le la, nyo wu amesi le asi tɔm akɔ, gake abolokoe le ewɔm.” (Lododowo 12:9) Edze abe ɖee Salomo nɔ gbɔgblɔm be anyo be ame nanye ɖokuibɔbɔla si si kesinɔnu boo mele o, ke subɔvi ɖeka koe le esi, wu be woagblẽ nusi wohiã hena agbemenuhiahiãwo ɖe agbe kɔkɔ nɔnɔ ŋu. Aɖaŋuɖoɖo nyui kae nye si esia nye na mí—be míanɔ agbe ɖe nusi le mía si nu!

Nyuiwɔwɔ Ŋuti Nusɔsrɔ̃wo le Lãnyinyi Me

Salomo zã lãnyinyi tsɔ fia nu eve le nyuiwɔwɔ ŋu. Egblɔ be: “Ame dzɔdzɔe sea veve na eƒe lãwo ti, ke dzi kplala li na ame vɔ̃ɖiwo.” (Lododowo 12:10) Ame dzɔdzɔe wɔa nu ɖe eƒe lãwo ŋu dɔmenyotɔe. Enya woƒe nuhiahiãwo eye wòtsɔa ɖe le woƒe nyonyo me. Ame vɔ̃ɖi agblɔ be yetsɔ ɖe le lãwo me, gake woƒe nuhiahiãwo metsɔa fu lãme nɛ o. Eƒe tamesusuwo nye ɖokuitɔdidi tɔ, eye eƒe nuwɔwɔ ɖe lãwo ŋu nɔ te ɖe viɖe si wòakpɔ tso wo ŋu dzi. Woate ŋu abu nusi amesia  buna lãwo dzi kpɔkpɔ la be enye ŋutasesẽ le wo ŋu.

Nuwɔwɔ ɖe lãwo ŋu dɔmenyotɔe ƒe gɔmeɖosea ku ɖe amegbɔlãwo hã ŋu. Ŋutasesẽ ka gbegbee nye si wòanye be woakplɔ lãwo ava ame ɖokui gbɔe evɔ ahanɔ fu wɔm wo madzemadzee to ɖekematsɔmatsɔ le eme na wo alo ŋlɔmiwɔwɔ le wo ŋu me! Le lã si le fu kpem vevie le dɔléle sesẽ alo nuvevi gã aɖe si wɔe gome la, dɔmenyonyo abia be woatso eƒe agbe dzi.

Esi Salomo ganɔ nu ƒom tso agbledede—anyigba dzadzraɖo—ŋu la, egblɔ be: “Amesi de eƒe agble la, akpɔ abolo fũ.” Le nyateƒe me la, dɔ ɖɔʋu wɔwɔ moveviɖoɖotɔe ɖea vi. “Ke amesi le nu ƒuƒluwo yome dim la, tagbɔ meli nɛ o.” (Lododowo 12:11) Esi wònye ‘ame manyanu’ mete ŋu bua nuwo ŋu nyuie alo sea nu gɔme o ta la, etia nu ƒuƒlu siwo ŋu viɖe mele o la yome. Nusɔsrɔ̃ siwo le kpukpui eve siawo me la me kɔ nyuie be: Nye nublanuikpɔla kple dɔsesẽwɔla.

Ame Dzɔdzɔe Kpɔa Dzidzedze

Fia nyanua gblɔ be: “Nu vlo wɔlawo ƒe aboyonu le ame vɔ̃ɖiwo dzrom.” (Lododowo 12:12a) Aleke nuvlowɔla la wɔa esiae? Anye to alesi wòana aboyonu siwo woakpɔ to mɔ gbegblẽwo nu la nadzroe me.

Nukae woate ŋu agblɔ le ame nyui la ŋuti? Ame sia nye amesi lɔ̃a amehehe eye wòli ke sesĩe le xɔse me. Enye ame dzɔdzɔe hewɔa nusi le eteƒe, edzea aɖaŋu eye wòbɔbɔa eɖokui, ekpɔa nublanui heɖoa movevi. Eye Salomo gblɔ be: “Ame dzɔdzɔewo ƒe ke adze” Alo “kpɔa dzidzedze.” (Lododowo 12:12b; New International Version) An American Translation gblɔ be: “Ame dzɔdzɔe ƒe ke anɔ anyi tegbee.” Ame sia lia ke eye wòanɔa te. Enye nyateƒe be ‘ame nyui ƒe nu nyoa Mawu ŋu.’ Ekema mina ‘míaɖo ŋu ɖe Yehowa ŋu, eye míawɔ nyui.’—Psalmo 37:3.

[Nɔnɔmetata si le axa 31]

Ame dzɔdzɔe ƒe xɔse lia ke sesĩe abe ati sẽŋu ene