Yehowa Fiaa Alesi Míaxlẽ Míaƒe Ŋkekewoe Mí
Yehowa Fiaa Alesi Míaxlẽ Míaƒe Ŋkekewoe Mí
“Fia alesi míaxlẽ míaƒe ŋkekewoe la mí, ne dzi nyanu naɖo mía si!”—PSALMO 90:12.
1. Nukata wòsɔ be míabia Yehowa be wòafia alesi “míaxlẽ míaƒe ŋkekewoe” mí?
YEHOWA MAWUE nye mía Wɔla kple Agbenala. (Psalmo 36:10; Nyaɖeɖefia 4:11) Eyata ame bubu aɖeke mate ŋu asu te afia mí alesi míazã míaƒe agbenɔƒewo le nunya me o. Eyata esɔ be hakpala la ƒo koko na Mawu be: “Fia alesi míaxlẽ míaƒe ŋkekewoe la mí, ne dzi nyanu naɖo mía si!” (Psalmo 90:12) Le nyateƒe me la, anyo be míadzro Psalmo 90 lia, si me kokoƒoƒoa dze le la, me nyuie. Gake gbã la, mina míanya nu ʋɛ aɖewo tso ha sia si Mawu na wokpa ŋu.
2. (a) Amekae woyɔ be eyae nye Psalmo 90 lia kpala, eye anye ɣekaɣie wokpae? (b) Aleke wòle be Psalmo 90 lia nakpɔ ŋusẽ ɖe alesi míebua agbee dzi?
2 Psalmo 90 ƒe ŋgɔdonyawo gblɔ be enye “Mose, Mawu ƒe ame, ƒe gbedodoɖa.” Esi psalmo sia te gbe ɖe alesi gbegbe amegbetɔ ƒe agbenɔƒe le kpuie dzi ta la, anye be esi woɖe Israel-viwo tso kluvinyenye me le Egipte, eye wonɔ ƒe 40 ƒe mɔzɔzɔa dzi le gbeadzi, le ame akpe geɖe ƒe kuku si na dzidzime maxɔse aɖe nu yi megbee wokpae. (Mose IV, 32:9-13) Ɣekaɣie wòɖakpae o, Psalmo 90 la ɖee fia be amegbetɔ madeblibo ƒe agbe le kpuie. Ekema edze ƒã be ele be míazã míaƒe agbemeŋkeke xɔasiawo le nunya me.
3. Nya vevi kawoe le Psalmo 90 lia me?
3 Le Psalmo 90 lia me la, kpukpui 1 vaseɖe 6 yɔ Yehowa be enye míaƒe sitsoƒe mavɔ. Kpukpui 7 vaseɖe 12 fia nusi míehiã bene míate ŋu azã míaƒe agbenɔƒe siwo nu yina kabakaba la le mɔ si adze eŋu nu. Eye abe alesi wòdze le kpukpui 13 vaseɖe 17 ene la, míedi vevie be míakpɔ amenuveve kple yayra tso Yehowa gbɔ. Ele eme baa be menye nusiwo me mí Yehowa subɔlawo dometɔ ɖesiaɖe ava to gblɔm psalmo sia le ɖi ya o. Ke hã ele be míatsɔ mawusosroɖa ƒe seselelãme siwo woɖe gblɔ le gbedodoɖa me la nu vevii. Eyata mina míadzro Psalmo 90 lia me nyuie abe alesi amesiwo ɖe adzɔgbe na Mawu abui ene.
Yehowa—Míaƒe ‘Sitsoƒe Vavã La’
4-6. Aleke Yehowa nye ‘sitsoƒe vavã’ na míi?
4 Nya siwo hakpala la tsɔ dze egɔmee nye be: “Aƒetɔ, sitsoƒe nènye na mí tso dzidzime yi dzidzime. Hafi towo nava do, eye anyigba kple xexeme nadzɔ la, wòe nye Mawu tso mavɔ me yi mavɔ me.”—Psalmo 90:1, 2.
5 Yehowa, “Mawu mavɔtɔ” la, nye ‘sitsoƒe vavã’—gbɔgbɔ me bebeƒe—na mí. (Romatɔwo 16:26) Míesenɛ le mía ɖokui me be míele dedie elabena enye ‘Gbedodoɖasela’ si li ɣesiaɣi akpe ɖe mía ŋu. (Psalmo 65:3) Esi míetoa míaƒe Dziƒofofo lɔlɔ̃a ƒe Vi dzi droa míaƒe dzimaɖitsitsiwo ɖe edzi ta la, ‘Mawu ƒe ŋutifafa, si ƒo gɔmesesewo katã ta dzɔa míaƒe dzi kple tamesusu ŋu.’—Filipitɔwo 4:6, 7; Mateo 6:9; Yohanes 14:6, 14.
6 Míenɔa dedie le gbɔgbɔ me elabena le kpɔɖeŋunyagbɔgblɔ nu la, Yehowa nye ‘sitsoƒe vavã’ na mí. Enaa ‘xɔgãwo’ hã mí—anye eƒe amewo ƒe hamewo koŋue wowɔnɛ—siwo nye gbɔgbɔ me bebeƒewo, afisi kplɔla lɔ̃amewo kua kutri geɖe be míanɔ dedie le. (Yesaya 26:20; 32:1, 2; Dɔwɔwɔwo 20:28, 29) Gakpe ɖe eŋu la, mía dometɔ aɖewo tso ƒome siwo le Mawu subɔm ƒe gbogbo aɖewoe nye sia me eye mía ŋutɔwo míekpɔe be eyama nye ‘sitsoƒe vavã tso dzidzime yi dzidzime.’
7. Gɔmesese ka nue ‘wodzi’ towo le eye be ɖe ‘wolé ku’ hafi dzi anyigbaa?
7 Yehowa li xoxoxo hafi towo va “do” alo hafi wova dzi anyigba abe alesi ‘woléa ku’ dzia vi ene. Le amegbetɔ ƒe nukpɔkpɔ nu la, ebia agbagbadzedze geɖe ŋutɔ be woawɔ anyigba kple edzinuwo, kple woƒe wɔwɔme, kpakple nu vovovo ƒe dɔwɔwɔ siwo gɔmesese sesẽ la katã. Eye esi hakpala la gblɔ be ‘wodzi’ towo eye be ‘wolé ku’ hedzi anyigba le New World Translation Biblia me la, bubu gã ŋutɔ wònɔ ɖeɖem fia ɖe dɔ siwo gbegbe Yehowa wɔ hafi wɔ nusiawo ŋu. Ðe mele be bubu kple akpedada ma tɔgbe nanɔ míawo hã me ɖe mía Wɔla la ƒe asinudɔwo ŋu oa?
Yehowa Li na Mí Ɣesiaɣi
8. Nya si wogblɔ be Yehowa nye Mawu “tso mavɔ me yi mavɔ me” gɔme ɖe?
8 Hakpala la dzi ha be: “Wòe nye Mawu tso mavɔ me yi mavɔ me.” Nya si gɔme woɖe be “mavɔ” ate ŋu alɔ nusiwo ŋu nuwuwu li na gake ɣeyiɣi ƒe didime ɖoɖi aɖeke meli na wo o ɖe eme. (Mose II, 31:16, 17; Hebritɔwo 9:15) Gake le Psalmo 90:2 kple teƒe bubu aɖewo le Hebri Ŋɔŋlɔawo me la, “mavɔ” fia “tegbee.” (Nyagblɔla 1:4) Míaƒe susu mate ŋu ase alesi wòdzɔe be Mawu li tso gbaɖegbe ke la gɔme o. Ke hã gɔmedzedze meli na Yehowa o eye nuwuwu hã manɔe nɛ o. (Xabakuk 1:12) Anɔ agbe ɖaa ahanɔ klalo be yeakpe ɖe mía ŋu.
9. Nukae hakpala la tsɔ amegbetɔ ƒe agbenɔnɔ ƒe akpe ɖeka sɔ kplii?
9 Gbɔgbɔ ʋã hakpala la wòtsɔ amegbetɔ ƒe agbenɔnɔ ƒe akpe ɖeka sɔ kple ɣeyiɣi kpui ŋutɔŋutɔ aɖe le Wɔla la ƒe nukpɔkpɔ nu. Eŋlɔ nu tso Mawu ŋu be: “Wòe nana amegbetɔwo gatrɔna zua kewɔ, eye nègblɔna bena: Mitrɔ gbɔ, mi amegbetɔviwo! Elabena ƒe akpe le ŋkuwò me abe etsɔ ŋkeke, si nu va yi, kple ŋudzɔɣi le zã me ene.”—Psalmo 90:3, 4.
10. Aleke Mawu wɔnɛ be amegbetɔ ‘trɔna zua kewɔe’?
10 Amegbetɔ te ŋu kuna, eye Mawu nana ‘wògatrɔna zua kewɔ.’ Efia be amegbetɔ “zua kewɔ” abe anyi si wotu memie ene. Ðeko wòle abe ɖe Yehowa le gbɔgblɔm be: ‘Mitrɔ yi anyi si me woɖe mi tsoe me’ ene. (Mose I, 2:7; 3:19) Nya sia lɔ amesiame ɖe eme—eɖanye ame sesẽ alo ame beli o, hotsuitɔ alo kotɔ o—elabena amegbetɔ madeblibo aɖeke ‘mate ŋu ato mɔ aɖeke nu axɔ nɔvia, alo axe etafe na Mawu, bene wòanɔ agbe tegbee o.’ (Psalmo 49:7-10) Gake aleke gbegbe míedaa akpee nye si be ‘Mawu tsɔ eƒe Tenuvi na be amesiame si axɔ edzi se nakpɔ agbe mavɔ’!—Yohanes 3:16; Romatɔwo 6:23.
11. Nukata míate ŋu agblɔ be ɣeyiɣi si didi ŋutɔ na mí la le kpuie ŋutɔ na Mawu ya?
11 Le Yehowa ƒe nukpɔkpɔ nu la, Metusala si xɔ ƒe 969 gɔ̃ hã menɔ agbe wòde ŋkeke ɖeka o. (Mose I, 5:27) Mawu ya bua ƒe akpe ɖeka abe etsɔ—gaƒoƒo 24 pɛ—si va yi ene. Hakpala la gagblɔ be le Mawu gbɔ la, ɖeko ƒe akpe ɖeka le abe dzɔla ƒe zãdzɔɣi gaƒoƒo ene le asaɖa me ene. (Ʋɔnudrɔ̃lawo 7:19) Ekema edze ƒã be ɣeyiɣi si didi ŋutɔ na mí la le kpuie ŋutɔ na Mawu mavɔ, Yehowa, ya.
12. Aleke Mawu ‘kplɔa amegbetɔwo yinae’?
12 Agbe si amegbetɔ le fifia le kpuie nyateƒe ne míetsɔ Mawu ƒe anyinɔnɔ tegbetegbe sɔ kplii. Hakpala la gblɔ be: “Èkplɔ wo yii, alɔ̃dɔdɔ ko wonye; ŋdi la wodze abe gbe ene. Ŋdi la eƒo se, eye wòdze, fiẽ la woyae, eye wòƒu.” (Psalmo 90:5, 6) Mose kpɔ Israel-vi akpe geɖe ƒe ku le gbeadzi teƒe, esime Mawu ‘kplɔ wo dzoe’ abe alesi tsiɖɔɖɔ kplɔa nu yinae ene. Woɖe psalmo la ƒe akpa sia gɔme be: “Èkplɔa amegbetɔwo yinae le ku ƒe alɔ̃dɔdɔ me.” (New International Version) Gake amegbetɔ madeblibowo ƒe agbenɔƒe nye ‘alɔ̃dɔɣi’ kpui aɖe ko—si sɔ kple zã ɖeka ko ƒe alɔ̃dɔdɔ.
13. Aleke míele ko “abe gbe ene,” eye ŋusẽ kae wòle be nya sia nakpɔ ɖe míaƒe tamebubu dzi?
13 Míele ko ‘abe gbe si ƒo se le ŋdi’ gake kaka fiẽ naɖo la, ɣe ƒe dzoxɔxɔ gbagbagbã na wòyrɔ ene. Ẽ, míaƒe agbe le kpuie abe gbe si yrɔna le ŋkeke ɖeka me ene. Eyata migana míagblẽ nu xɔasi sia dome o. Ke boŋ ele be míabia Mawu be wòafia alesi míazã ƒe siwo susɔ na mí le nuɖoanyi sia me la mí.
Yehowa Kpena Ðe Mía Ŋu ‘Míexlẽa Míaƒe Ŋkekewo’
14, 15. Aleke Psalmo 90:7-9 va eme ɖe Israel-viwo dzii?
14 Hakpala la gblɔ le Mawu ŋu be: “Wò dɔmedzoe na mía nu yi, eye wò dziku ɖe mí ɖa kple ŋɔdzi. Ètsɔ míaƒe vodadawo ɖo wò ŋku me, kple míaƒe nu ɣaɣlawo ɖo wò mo ƒe kekeli nu. Elabena míaƒe ŋkekewo katã nu yi le wò dziku la nu, míaƒe ƒewo vɔ ɖe mi abe ame ƒe ŋeŋe ene.”—Psalmo 90:7-9.
15 Israel-vi maxɔsewo ‘nu yi le Mawu ƒe dɔmedzoe me.’ ‘Eƒe dziku ka wo hlẽ’ alo ‘eƒe dɔmedzoe do ŋɔdzi’ na wo. (New International Version) ‘Woxlã wo dometɔ aɖewo ɖe anyi le gbeadzi’ ɖe Mawu ƒe ʋɔnudɔdrɔ̃ nu. (Korintotɔwo I, 10:5) Yehowa ‘tsɔ woƒe vodadawo ɖo eƒe ŋku me.’ Ebia tso wo si be woana akɔnta le woƒe nugbegblẽwɔwɔ gaglãa la ŋu, gake woƒe “nu ɣaɣlawo,” alo nuvɔ̃ siwo dzi wotsyɔ nui, nɔ ‘eƒe mo ƒe kekeli nu.’ (Lododowo 15:3) Esi Mawu do dɔmedzoe ɖe Israel-vi matrɔdzimeawo ŋu ta la, ‘woƒe ƒewo vɔ na wo abe ƒuƒu ene.’ Eyata míaƒe agbenɔƒe kpuie la le abe ya si dona tsoa míaƒe nume ne míeɖo ƒuƒu ɖe nu ene.
16. Ne mía dometɔ aɖewo tsɔ nuvɔ̃wɔwɔ ɖo dɔe le adzame la, nukae wòle be woawɔ?
16 Ne mía dometɔ aɖe tsɔ nuvɔ̃wɔwɔ ɖo dɔe le adzame la, ɖewohĩ míate ŋu aɣlae ɖe mía havi amegbetɔwo vaseɖe ɣeyiɣi aɖe. Gake míaƒe nuvɔ̃wɔwɔa adze le ‘Yehowa ƒe mo ƒe kekeli nu,’ eye míaƒe nuwɔna agblẽ mía kplii dome. Hafi mía kple Yehowa dome naganyo la, ahiã be míado gbe ɖa abia eƒe tsɔtsɔke, aɖe asi le míaƒe dzidadawo ŋu, eye míaxɔ gbɔgbɔ me kpekpeɖeŋu tso Kristotɔ hamemegãwo gbɔ ŋudzedzekpɔkpɔtɔe. (Lododowo 28:13; Yakobo 5:14, 15) Aleke gbegbe ema anyo wue nye si tsɔ wu be ɖewohĩ ‘míaƒe ƒewo navɔ na mí abe ƒuƒu ene,’ eye nya naku ɖe míaƒe agbe mavɔ nɔnɔ ƒe mɔkpɔkpɔa ŋu!
17. Ame akpa gãtɔ ƒe agbenɔƒe enye neni, eye nukawoe yɔ míaƒe ƒewo me?
17 Hakpala la gblɔ le amegbetɔ madeblibowo ƒe agbenɔnɔ ƒe didime ŋu be: “Míaƒe agbenɔƒewo nye ƒe blaadre, ne ede ƒã la, ƒe blanyi, eye fuɖename kple hiã nye wo adegbeƒonu; elabena wova yi kabakaba, eye míedzo.” (Psalmo 90:10) Ame akpa gãtɔ ƒe agbenɔƒe nye ƒe 70, eye esi Kaleb xɔ ƒe 85 la, eƒo nu tso eƒe ŋusẽ tɔxɛa ŋu. Ame aɖewo tɔ to vovo, wo dometɔ aɖewo nye Aron (123), Mose (120), kple Yosua (110). (Mose IV, 33:39; Mose V, 34:7; Yosua 14:6, 10, 11; 24:29) Gake le dzidzime maxɔse si ʋu tso Egipte gome la, wo dometɔ siwo woxlẽ, siwo xɔ tso ƒe 20 tsɔ yii la ku le ƒe 40 dome. (Mose IV, 14:29-34) Egbea le dukɔ geɖe me la, ame akpa gãtɔ ƒe agbenɔnɔ ƒe didime gakpɔtɔ nye esi hakpala la yɔ. “Fuɖename kple hiã” yɔ míaƒe agbenɔƒewo me fũ. Wo nu va yina kabakaba, “eye míedzo.”—Hiob 14:1, 2.
18, 19. (a) Nukae wòfia be ‘míaxlẽ míaƒe ŋkekewo bene dzi nyanu naɖo mía si’? (b) Nukae nunya ŋudɔwɔwɔ aʋã mí be míawɔ?
18 Hakpala la gadzi haa be: “Amekae dze si wò dɔmedzoe ƒe ŋusẽ kple wò dziku ɖe alesi woavɔ̃ wò nui? Fia alesi míaxlẽ míaƒe ŋkekewoe la mí, ne dzi nyanu naɖo mía si!” (Psalmo 90:11, 12) Mía dometɔ aɖeke menya Mawu ƒe dɔmedzoe ƒe sesẽme alo alesi gbegbe wòdoa dzikui o, eye ele be nya sia nana míavɔ̃ Yehowa ƒe mawunyenye ɖe edzi. Le nyateƒe me la, ele be wòaʋã mí míabia eyama “alesi míaxlẽ míaƒe ŋkekewoe . . . ne dzi nyanu naɖo mía si.”
19 Hakpala la ƒe nyawo nye gbedodoɖa be Yehowa nafia eƒe amewo alesi woadze nunya ade asixɔxɔ ŋkeke siwo susɔ na wo ŋu ahazãe le mɔ si dze Mawu ŋu nu. Ne ame aɖe anɔ agbe ƒe 70 la, ŋkeke siwo ade 25,500 ƒe agbenɔnɔe wòakpɔ mɔ na. Gake ƒe ka kee míexɔ o, ‘míenya alesi míaƒe agbe anɔ le etsɔme o, elabena afu si dona ɣeyiɣi kpui aɖe ko eye enu yina lae míenye.’ (Yakobo 4:13-15) Esi ‘azãgbe kple nuɖiɖeame li na mí katã’ ta la, míate ŋu anya agbe si míaganɔ ƒe didime o. Eyata mina míado gbe ɖa abia nunya be míatsɔ akpe akɔ kple dodokpɔwo, awɔ nu ɖe amewo ŋu nyuie, eye be míawɔ mía tɔ sinua le Yehowa ƒe subɔsubɔ me fifi laa—egbe sia! (Nyagblɔla 9:11; Yakobo 1:5-8) Yehowa fiaa mɔ mí to eƒe Nya, eƒe gbɔgbɔa, kple eƒe habɔbɔa dzi. (Mateo 24:45-47; Korintotɔwo I, 2:10; Timoteo II, 3:16, 17) Nunya ŋudɔwɔwɔ aʋã mí be ‘míadi Mawu Fiaɖuƒea gbãgbiagbã’ eye míazã míaƒe ŋkekewo le mɔ si akɔ Yehowa ŋuti eye wòado dzidzɔ na eƒe dzi nu. (Mateo 6:25-33; Lododowo 27:11) Ele eme baa be esubɔsubɔ tso dzi blibo me maɖe míaƒe kuxiwo katã ɖa ya o, gake ana míakpɔ dzidzɔ gã ŋutɔ.
Yehowa ƒe Yayra na Dzi Dzɔa Mí
20. (a) Mɔ ka nue ‘nu tena ɖe Mawu dzi le’? (b) Aleke Yehowa awɔ nu kpli mí ne míewɔ nuvɔ̃ gã gake trɔ dzime vavã?
20 Aleke gbegbe wòanyoe nye si ne ɖe míanɔ dzidzɔ kpɔm le míaƒe agbemeŋkeke susɔeawo katã me! Mose ƒo koko le esia ŋu be: “Yehowa, trɔ kɔ dzro! Vaseɖe ɣekaɣie? Eye na wò dɔme natrɔ ɖe wò dɔlawo ŋu! Tsɔ wò amenuveve [alo “nuteƒewɔwɔ ƒe lɔlɔ̃”] ɖi ƒo na mí le ŋdi, ekema míatso aseye, eye míakpɔ dzidzɔ le míaƒe ŋkekewo katã me!” (Psalmo 90:13, 14; NW ƒe etenuŋɔŋlɔ) Mawu medaa vo o. Ke hã ‘nu tena ɖe edzi’ eye ‘wòdzudzɔa’ dzikudodo kple tohehe ne nuxlɔ̃ame si wòna tso afɔɖeɖe aɖe ŋu wɔe be nuvɔ̃wɔla trɔdzimewo trɔ agbenɔnɔ kple nuwɔna. (Mose V, 13:18) Eyata nenye be míewɔ nuvɔ̃ gã aɖe gɔ̃ hã, gake míetrɔ dzime vavã la, Yehowa ‘atsɔ amenuveve aɖi ƒo na mí,’ eye awɔe be “míatso aseye.” (Psalmo 32:1-5) Eye ne míenɔ agbe dzɔdzɔe la, míakpɔ alesi Mawu lɔ̃a mí nuteƒewɔwɔtɔe eye míate ŋu “[akpɔ] dzidzɔ le míaƒe ŋkekewo katã me”—ẽ, le míaƒe agbenɔƒe susɔeawo me.
21. Le nya siwo le Psalmo 90:15, 16 nu la, anye nuka biam Mose nɔ?
21 Hakpala la do gbe ɖa vevie be: “Do dzidzɔ na mí ɖe ɣeyiɣi, si nète mí ɖe anyi, kple ƒe, siwo me dzɔgbevɔ̃e ɖi kpe mí la nu! Na wò dɔwɔwɔ nadze na wò dɔlawo, eye wò atsyɔ̃ nanɔ viwòwo ŋu!” (Psalmo 90:15, 16) Anye be Mose nɔ Mawu biam be wòatsɔ dzidzɔkpɔkpɔ ayra Israel wòasɔ ɖe ŋkeke siwo katã wote wo ɖe anyi nu kple ɖe ƒe siwo katã me dzɔgbevɔ̃e ɖi kpe wo la nu alo be yayraa nanɔ wo dzi le ɣeyiɣi mawo katã me. Ebia be ‘dɔ siwo Mawu wɔ’ wònye yayra na Israel-viwo la nadze na Esubɔlawo eye Eƒe atsyɔ̃ nadze le wo viwo, alo woƒe dzidzimeviwo ŋu. Asɔ be míawo hã míado gbe ɖa be woadudu yayrawo akɔ ɖe ameƒomea me tɔ toɖolawo dzi le Mawu ƒe xexeme yeye si ŋugbe wòdo me.—Petro II, 3:13.
22. Le nya siwo wogblɔ le Psalmo 90:17 nu la, nukae míate ŋu ado gbe ɖa abia?
22 Psalmo 90 la wu enu kple kukuɖeɖe sia be: “Ale Aƒetɔ, mía Mawu, ƒe dɔmenyo nanɔ mía dzi, eye wòana míaƒe asinudɔwo nali ke zã na mí, ẽ, míaƒe asinudɔwo wòana woayi dzi nyuie!” (Psalmo 90:17) Nya siawo fia be asɔ ŋutɔ be míado gbe ɖa abia Mawu be wòayra ɖe míaƒe agbagbadzedzewo le eƒe subɔsubɔdɔa me dzi. Mí Kristotɔ amesiaminawo alo mia hati “alẽ bubuwo,” míetsoa aseye be ‘Yehowa ƒe dɔmenyonyo’ le mía dzi. (Yohanes 10:16) Aleke gbegbe dzi dzɔa mí enye si be Mawu ‘na míaƒe asinudɔwo li ke nyuie’ le Fiaɖuƒegbeƒãɖeɖedɔa kple dɔ bubuwo wɔwɔ me!
Mina Míanɔ Míaƒe Ŋkekewo Xexlẽ Dzi
23, 24. Aleke ŋugbledede le Psalmo 90 lia ŋu aɖe vi na míi?
23 Ele be ŋugbledede le Psalmo 90 lia ŋu nana míaɖo ŋu ɖe Yehowa, míaƒe ‘sitsoƒe vavã’ la, ŋu geɖe wu. Ne míede ŋugble le alesi míaƒe agbe le kpuie ŋu la, ele be míadze sii ɖe edzi nyuie be míehiã Mawu ƒe mɔfiame le míaƒe ŋkekewo xexlẽ me. Eye ne míedo vevie nu le mawumenunya didi kple eŋudɔwɔwɔ me la, Yehowa ƒe amenuveve kple yayra anɔ mía dzi godoo.
24 Yehowa ayi edzi afia alesi míaxlẽ míaƒe ŋkekewoe mí. Eye ne míewɔ eƒe mɔfiafia dzi la, míate ŋu anɔ míaƒe ŋkekewo xexlẽ dzi yi ɖe mavɔmavɔ me. (Yohanes 17:3) Gake hafi míakpɔ mɔ na agbe mavɔ nɔnɔ nyateƒe la, ele be Yehowa nanye míaƒe sitsoƒe. (Yuda 20, 21) Abe alesi míava kpɔe le nyati si kplɔe ɖo me ene la, wona nya sia me kɔ nyuie ŋutɔ le Psalmo 91 lia me nya dedziƒonameawo me.
Aleke Nàɖo Wo Ŋui?
• Aleke Yehowa nye ‘sitsoƒe vavã’ na míi?
• Nukatae míate ŋu agblɔ be Yehowa le klalo ɣesiaɣi be yeakpe ɖe mía ŋu?
• Aleke Yehowa kpena ɖe mía ŋu ‘míexlẽa míaƒe ŋkekewoe’?
• Nukae kpena ɖe mía ŋu be “míakpɔ dzidzɔ le míaƒe ŋkekewo katã me”?
[Biabiawo]
[Nɔnɔmetata si le axa 11]
Yehowa nye Mawu ‘hafi towo va do’
[Nɔnɔmetata si le axa 12]
Le Yehowa ƒe nukpɔkpɔ nu la, Metusala si xɔ ƒe 969 menɔ agbe wòde ŋkeke ɖeka o
[Nɔnɔmetata siwo le axa 14]
Yehowa ‘na míaƒe asinudɔwo li ke nyuie’