“Ada Gbe le Wò Ƒoƒoli Ŋu”

WOXƆE se be nusiwo gbɔ ameƒomea ƒe dɔlélewo dometɔ geɖe tsonae nye seselelãme ƒe nuteɖeamedziwo abe vɔvɔ̃, konyifafa, ŋuʋaʋã, dzikudodo, fuléle, kple fɔɖiɖi ene. Esia ta aleke gbegbe nya si Biblia gblɔ be ‘Yehowa-vɔvɔ̃’ “ada gbe le wò ƒoƒoli ŋu eye wòana wò ƒuwo me nafa miaa” faa akɔ na amee nye si!—Lododowo 3:7, 8, NW.

Ƒuawoe nye nusi léa ametia ɖe te. Eyata Biblia zã nya “ƒuwo” le kpɔɖeŋumɔ nu tsɔ tsia tre ɖi na ame la ŋutɔ—vevietɔ le alesi seselelãme sesẽwo gblẽa nu le eŋui me. Gake mɔ ka nue Yehowa-vɔvɔ̃ “ada gbe le wò ƒoƒoli ŋu” le?

Biblia-nyalawo ƒe nukpɔsusuwo to vovo na wo nɔewo le “ƒoƒoli” si wozã le kpukpui sia me ŋu. Numeɖela aɖe gblɔ be esi “wònye ametia ƒe domedome” ye “ƒoƒoli” le ta la, atsi tre ɖi na ametia ƒe akpa veviwo katã. Biblia-nyala bubu gblɔ be nya “ƒoƒoli” ate ŋu afia ƒoƒolika, abe alesi wozãe le Xezekiel 16:4 ene. Ne aleae wòfia la, ke Lododowo 3:8 anɔ gbe tem ɖe alesi wòhiã be míakpɔ Mawu sinu le nusianu mee la dzi—abe alesi fugboe si ŋu wɔna aɖeke mele o kpɔa dadaa sinu hena nuɖuɖu ene. Susu bubue nye be “ƒoƒoli” si wozã le afisia ate ŋu afia ame ƒe lãmekawo kple kpeƒetsiakawo. Le nya siwo ƒo xlã kpukpui sia nu la, anye be wotsɔ ametia ƒe akpa siawo le sɔsɔm kple ame ƒe “ƒuwo”—si nye ametia ƒe akpa siwo sesẽ wu.

Nuka tututue wòɖafia o, nu ɖeka me kɔ: eyae nye be Yehowa-vɔvɔ̃ bubutɔe nye nusi me nunya le wòle be míawɔ. Nuwɔwɔ ɖe Mawu ƒe dzidzenuwo nu ate ŋu akpe ɖe mía ŋu míanɔ lãmesẽ me fifia. Gawu la, ate ŋu ana Yehowa nakpɔ ŋudzedze ɖe mía ŋu, si akplɔ mí ayi agbenɔnɔ tegbetegbe le lãmesẽ blibo me—le ŋutilã kple seselelãme gome—le eƒe xexe yeye si gbɔna me la me.—Yesaya 33:24; Nyaɖeɖefia 21:4; 22:2.

[Nɔnɔmetata Tsoƒe si le axa 32]

Dr. G. Moscoso/SPL/Photo Researchers