• Ame geɖe siwo nɔ ŋusẽnɔƒewo dze agbagba vevie be yewoabu mo na Biblia gake womete ŋui o. Le kpɔɖeŋu me, agbalẽ si nye Titinaɣeyiɣiwo Ƒe Biblia Ƒe Ŋgɔdonya (si le Eŋlisigbe me) gblɔ be: “Le dukɔ siwo gblɔna be Kristotɔwoe yewonye le Titinaɣeyiɣiwo me dometɔ aɖewo me la, ne Biblia le ame aɖe si [le gbegbɔgblɔ si ame akpa gãtɔ dona me] eye wòxlẽnɛ la, wobunɛ be enye aglãdzedze ɖe sɔlemehaa ŋu.” Agbalẽnyala siwo ɖe Biblia gɔme ɖe amewo ƒe degbewo me alo de Biblia sɔsrɔ̃ ƒe dzi ƒo na amewo la de woƒe agbe afɔku gã aɖe me, eye wowu wo dometɔ aɖewo.

• Togbɔ be ame geɖe tsi tsitre ɖe Biblia ŋu hã la, eyae nye agbalẽ si woma le xexea me wu ɖe sia ɖe eye wògale nenema egbea hã. Woɖe Biblia bliboa alo eƒe akpa aɖe gɔme ɖe gbegbɔgblɔ siwo wu 2,800 me, eye wota kɔpi siwo ade biliɔn atɔ̃. Esia to vovo kura na agbalẽ siwo wotana ku ɖe xexemenunya, dzɔdzɔmeŋutinunya kple bubuawo ŋu, elabena ʋɛ aɖewo koe wotea ŋu mana eye wo nu va yina kaba hã ŋutɔ.

• Biblia gɔme ɖeɖe ɖe gbe aɖewo me ye lé gbe mawo ɖe te eye wòwɔ akpa vevi aɖe le ale si wodoa gbe mawo hã me. Biblia si gɔme Martin Luther ɖe ɖe Germangbe me kpɔ ŋusẽ gã aɖe ɖe Germangbea dzi vevie ŋutɔ. Wogblɔ tso King James Version Biblia ƒe tata gbãtɔ ŋu be “ɖewohĩ eyae nye agbalẽ si wota si kpɔ ŋusẽ wu agbalẽ ɖe sia ɖe si wota ɖe Eŋlisigbe me kpɔ.”

• Numekugbalẽ aɖe gblɔ be Biblia “kpɔ ŋusẽ ɖe Ɣetoɖoƒedukɔwo dzi vevie eye menye woƒe subɔsubɔdzixɔsewo, nuwɔnawo kple dekɔnuwo dzi koe wòkpɔ ŋusẽ ɖo o, ke ekpɔ ŋusẽ ɖe woƒe aɖaŋudɔwo, agbalẽwo, sewo, dunyahehe kple nu bubu geɖe hã dzi.”—The Oxford Encyclopedia of the Books of the Bible.

Nu siwo ɖee fia be Biblia to vovo tso agbalẽ bubuwo gbɔ dometɔ ʋɛ aɖewo koe nye esia. Nu kae na Biblia nye agbalẽ si bɔ alea? Nu ka tae amewo de woƒe agbe afɔku me ɖe eta? Susu siwo tae dometɔ aɖewoe nye esi: Biblia ƒo nu tso agbe nyui nɔnɔ kple ale si míanɔ ƒomedodo nyui me kple Mawu ŋu. Biblia kpe ɖe mía ŋu míenya nu si gbɔ amegbetɔwo ƒe fukpekpewo kple masɔmasɔwo tso. Tsɔ kpe ɖe eŋu la, egblɔ be kuxi siawo katã nu ava yi eye wògblɔ ale si wo nu ava yii hã.

Sukudede le vevie. Gake Canadatɔwo ƒe nyadzɔdzɔgbalẽ si nye Ottawa Citizen gblɔ be “ne ame de suku . . . xɔ ɖaseɖigbalẽ gãwo hã la, esia mefia be awɔ nyametsotso nyuiwo le agbe nyui nɔnɔ gome kokoko o.” Habɔbɔ si nye Edelman, si wɔa numekuku tsoa amewo ƒe nuwɔnawo ŋu gblɔ be, agbalẽnyala gã siwo dometɔ aɖewo nye asitsala xɔŋkɔwo kple dudɔnunɔla gãwo wɔa nu fitifiti, baa ame eye wofia fi, si wɔnɛ be “amewo megakana ɖe wo dzi kura o.”

Biblia ƒo nu tso agbe nyui nɔnɔ kple mawusubɔsubɔ ŋu. Efia ‘nu si le dzɔdzɔe, nu si sɔ, kple nu si le eteƒe, ɛ̃, mɔ nyuiwo katã’ mí. (Lododowo 2:9) Le kpɔɖeŋu me, wode ɖekakpui aɖe si xɔ ƒe 23 si míayɔ be Stephen la gaxɔ me le Poland. Esi wòle gaxɔa me la edze Biblia sɔsrɔ̃ gɔme, eye wòkpɔ ŋudzedze ɖe eƒe aɖaŋuɖoɖo siwo me nunya le la ŋu. Eŋlɔ bena: “Azɔ mese nu si wòfia be ‘woabu ame fofo kple ame dada’ la gɔme. Mesrɔ̃ ale si maɖu ɖokuinye dzi vevietɔ ale si maɖu dziku helĩhelĩ dzi.”—Efesotɔwo 4:31; 6:2.

Mɔfiame si wɔ dɔ ɖe Stephen dzie nye esi le Lododowo 19:11 si gblɔ be: “Ame si sea nu gɔme nyuie la, medoa dziku kabakaba o, eye atsyɔ̃ wònye nɛ be wòaŋe aɖaba aƒu agɔdzedze dzi.” Fifia nenye be Stephen do go nɔnɔme aɖe si do dziku nɛ la, egbɔa dzi ɖi eye wòdzea agbagba be yeawɔ ɖe Biblia ƒe mɔfiame siwo ku ɖe nɔnɔmea ŋu dzi. Egblɔ be: “Meva kpɔe be Bibliae nye mɔfiamegbalẽ nyuitɔ kekeake.”

Nyɔnu aɖe si bua nazã ɖe Yehowa Ðasefo ŋu la do ɣli ɖe Maria si nye Yehowa Ðasefo ta hedzui le amewo dome. Le esi Maria hã nadzui teƒe la edzo kpoo nu makemakee. Nu si nyɔnua wɔ ɖe Maria ŋu la kpe ŋu nɛ emegbe eye wòdi Ðasefowo ƒe mɔ. Esi wòdo go Maria mlɔeba le ɣleti ɖeka megbe la, ekpla nɛ eye wòɖe kuku nɛ. Ekpɔe be Maria ƒe subɔsubɔha ƒe dzixɔsewoe kpɔ ŋusẽ ɖe edzi wòlé eɖokui kpoo hewɔ nu tufafatɔe. Nu kae do tso  eme? Nyɔnu sia si bua nazã ɖe Yehowa Ðasefowo ŋu tsã la ŋutɔ kple eƒe ƒomea me tɔ atɔ̃ tso nya me be Ðasefowo nasrɔ̃ Biblia kpli yewo.

Yesu Kristo gblɔ be nunya me tsonuwo atso afia dzɔdzɔe nɛ. (Luka 7:35) Kpeɖodzi geɖe ɖee fia be Biblia ƒe mɔfiamewo dzi wɔwɔ ɖea vi! Wonana míewɔa nu si sɔ. Wonana “bometsila dzea nunya,” “wodoa dzidzɔ na dzi,” eye wonana “ŋku dzi kɔna” ale be ame tea ŋu kpɔa ale si wòanɔ agbe nyui ahasubɔ Mawui.—Psalmo 19:7, 8.

Ne numekulawo le nu me kum tso dɔléle vɔ̃ɖi aɖe si le kakam kabakaba ŋu la wodzea agbagba dia nu si gbɔ wòtso. Mɔfiame ma ke akpe ɖe mía ŋu míase nu siwo gbɔ amegbetɔwo ƒe fukpekpe kple tɔtɔwo tso la gɔme. Biblia koe akpe ɖe mía ŋu le go sia hã me, elabena eƒo nu tso amegbetɔ ƒe ŋutinya ƒe gɔmedzedze esime amegbetɔ ƒe kuxiwo dze egɔme la ŋu.

Mose Ƒe Agbalẽ Gbãtɔ gblɔ be amegbetɔ ƒe fukpekpewo dze egɔme esi ame gbãtɔwo dze aglã ɖe Mawu ŋu. Nu si wowɔe nye be wotiae be yewoatso nya me le nyui kple vɔ̃ ŋu—evɔ mía Wɔla ɖeka ko sie gome sia le hafi. (1 Mose 3:1-7) Nublanuitɔe la, tso ɣemaɣi la, ame akpa gãtɔ tiae be yewoawɔ nyui kple vɔ̃ ŋuti tiatia na yewo ɖokui nenema ke. Nu kae do tso eme? Amegbetɔ ƒe ŋutinya yɔ fũu kple aʋawɔwɔ, ameteteɖeanyi, agbe nyui nɔnɔ ƒe toyiyi kple tete ɖa le Mawu ŋu, ke mehe ablɔɖe kple dzidzɔkpɔkpɔ vɛ o. (Nyagblɔla 8:9) Biblia gblɔe nyuie be: “Ŋusẽ mele amegbetɔ si be eya ŋutɔ nafia mɔ eƒe zɔzɔme o.” (Yeremiya 10:23) Nya nyui si li ye nye be eteƒe madidi kura o amegbetɔwo ƒe aglãdzedze ɖe Mawu ŋu si he fukpekpewo vɛ la nu ayi.

Biblia ka ɖe edzi na mí be, le lɔlɔ̃ si le Mawu si na ame siwo wɔna ɖe eƒe dzidzenuwo dzi eye wolɔ̃ ɖe edzi be eyae nye yewoƒe dziɖula ta la, maɖe mɔ ɖe nu gbegblẽ wɔwɔ kple fukpekpe si wòhena vɛ la ŋu tegbee o. Ame vɔ̃ɖiwo ‘akpɔ woƒe nuwɔnawo me tsonuwo.’ (Lododowo 1:30, 31) Ke “ame fafawo anyi anyigba la dome, eye dzi adzɔ wo geɖe ɖe ŋutifafa gbogbo la ŋuti.”—Psalmo 37:11.

Mawu ato “Mawu Fiaɖuƒe” la dzi ana eƒe tameɖoɖo be ŋutifafa nanɔ anyigba dzi la nava eme. (Luka 4:43) Fiaɖuƒe ma nye dziɖuɖu si aɖu xexea katã dzi eye Mawu ato edzi aɖu ameƒomea katã dzi, elabena eyae dze. Yesu na ƒomedodo si le Fiaɖuƒea kple anyigbaa dome dze esi wògblɔ le kpɔɖeŋugbedodoɖaa me be: “Wò Fiaɖuƒe nava. Wò lɔlɔ̃nu nava eme le anyigba dzi.”—Mateo 6:10.

Ɛ̃, Mawu Fiaɖuƒea teviwo awɔ Mawu ƒe lɔlɔ̃nu eye woalɔ̃ ɖe edzi be Wɔla lae nye Dziɖula si dze ke menye amegbetɔ aɖeke o. Nu fitifiti wɔwɔ, ŋukeklẽ, gatɔ alo hiãtɔ nyenye, nazãbubu kple aʋawɔwɔ nu ayi. Dziɖuɖu ɖekae aɖu xexe bliboa dzi, eye amewo anɔ agbe ɖe agbe nyui nɔnɔ ƒe dzidzenu ɖeka nu ahasubɔ Mawu ɖekae.—Nyaɖeɖefia 11:15.

Nu vevi si akpe ɖe ame ŋu be wòage ɖe xexe yeye ma mee nye be wòasrɔ̃ nu tso eŋu. Biblia gblɔ le 1 Timoteo 2:3, 4 be: “[Mawu] ƒe lɔlɔ̃nue nye be woaɖe amewo katã ƒomevi,  eye nyateƒe ƒe sidzedze vavãtɔ la nasu wo si.” Nyateƒe ma ƒe akpa aɖee nye Biblia ƒe nufiafia si míayɔ be Fiaɖuƒea ƒe sewo siwo dzi Fiaɖuƒea teviwo awɔ ɖo, eye míakpɔ se sia ƒe kpɔɖeŋu aɖewo le Yesu Kristo ƒe Todzimawunyaa me. (Mateo, ta 5-7) Ne èle ta etɔ̃ mawo xlẽm la, dze agbagba nàkpɔ ale si agbea anɔ ne ame sia ame awɔ ɖe Yesu ƒe nya siwo me nunya le la dzi.

Ðe wòle be wòawɔ nuku na mí be Bibliae nye agbalẽ si woma wu agbalẽ ɖe sia ɖe le xexea mea? Kura o! Nufiafia siwo le eme ɖee fia be Mawu gbɔe wòtso. Eye ale si wòbɔe nye kpeɖodzi be Mawu di be gbegbɔgblɔ ɖe sia ɖe dolawo kple dukɔwo katã nasrɔ̃ nu tso ye kple yeƒe Fiaɖuƒea ƒe yayrawo ŋu ne wòaɖe vi na wo.—Dɔwɔwɔwo 10:34, 35.