NU SI TAE WÒLE BE MÍADE BUBU MÍA ÐOKUI ŊU

• Numekuku ɖee fia be ame siwo mebua wo ɖokui ɖe ɖeke me o la tea ŋu tsia dzimaɖi, woléa blanui, eye womeɖua nu nyuie o. Enɔa bɔbɔe be woaƒo wo ɖokui ɖe aha geɖe nono kple atike vɔ̃ɖiwo zazã me.

• Ame siwo dea asixɔxɔ wo ɖokuiwo ŋu la metsɔa wo ɖokuiwo nɔa sɔsɔm kple ame bubuwo o; esia ta, enɔa bɔbɔe na wo be woanɔ anyi kple amewo le ŋutifafa me eye woadze xɔlɔ̃ nyuiwo. Gake ame siwo mebua wo ɖokuiwo ɖe ɖeke me o la dia vodada le amewo ŋu zi geɖe, eye esia wɔnɛ be wo kple amewo dome menɔa nyuie o.

• Ne ame siwo kpɔnɛ be bubu le yewo ŋu do go kuxiwo hã la, wonɔa te sesĩe eye womeɖea mɔ mɔxenu aɖeke wɔnɛ be woagaɖo woƒe taɖodzinuwo gbɔ o. Gake ame siwo mekpɔnɛ be bubu le yewo ŋu o la bua kuxi suesuesuewo be wonye mɔxenu gãwo. Esia wɔnɛ be wonaa ta bɔbɔe.

 NU SI NÀTE ŊU AWƆ

Tia xɔlɔ̃ nyuiwo. De ha kple ame siwo dea bubu ame ŋu, eye wotsɔa ɖe le eme na wò hedea dzi ƒo na wò.

Kpe ɖe amewo ŋu. Ne ènyoa dɔme na amewo katã eye nèkpena ɖe ame siwo mate ŋu aɖo eteƒe na wò o hã ŋu la, àkpɔ dzidzɔ vavã si dona tsoa nunana me. Ɛ̃, àkpɔ dzidzɔ ne amewo mede dzesi nu si nèwɔ alo kafu wò ɖe eta o gɔ̃ hã.

Kpe ɖe viwòwo ŋu woakpɔe be asixɔxɔ le yewo ŋu. Mɔ aɖe si dzi nàto awɔ esiae nye be nàɖe mɔ na wo be woakpɔ woawo ŋutɔ ƒe kuxiwo gbɔ, le ale si wòanya wɔe nu. Esia akpe ɖe viwòwo ŋu woasrɔ̃ ale si woanɔ te ɖe kuxiwo nu. Eye awɔe be woade asixɔxɔ wo ɖokuiwo ŋu fifia eye wòaɖe vi na wo ne wova tsi.