1-3. (a) Nu ka tae míate ŋu aka ɖe edzi be míate ŋu adze xɔlɔ̃ Mawu? (b) Ame kawo ƒe ŋutinyawo mee míadzro le nyati sia me?

WOYƆ Abraham le Biblia me zi gbɔ zi etɔ̃ be Mawu xɔlɔ̃. (2 Kronika 20:7; Yesaya 41:8; Yakobo 2:23) Eya ɖeka ko woyɔ le Biblia me tẽe be Mawu xɔlɔ̃. Ðe ema fia be Abraham koe nye amegbetɔ si Yehowa dze xɔlɔ̃ea? Ao. Biblia na míenya be mɔnukpɔkpɔ sia ate ŋu asu mí katã si.

² Woƒo nu tso ŋutsu kple nyɔnu nuteƒewɔla geɖe siwo vɔ̃ Yehowa, ɖo ŋu ɖe eŋu heva zu exɔlɔ̃ veviwo la ŋu le Mawu ƒe Nya la me. (Xlẽ Psalmo 25:14.) Woawo hã wole “ɖaseɖilawo ƒe alilikpo gã” si ŋu Paulo ƒo nu tsoe la dome. Mawu xɔlɔ̃woe ame siawo katã nye.—Hebritɔwo 12:1.

³ Mina míadzro Yehowa xɔlɔ̃ etɔ̃ aɖewo siwo ŋu woƒo nu tsoe le Biblia me la ƒe ŋutinyawo me kpɔ: (1) Rut, ahosi ɖetugbui wɔnuteƒe si tso Moab, (2) Hizkiya, Yuda fia wɔnuteƒe kple (3) Maria, Yesu dada ɖokuibɔbɔla. Nu kae míate ŋu asrɔ̃ tso ale si wo dometɔ ɖe sia ɖe wɔ va zu Mawu xɔlɔ̃ la me?

4, 5. Nyametsotso sesẽ kae wòva hiã be Rut nawɔ, eye nu ka tae ewɔwɔ menɔ bɔbɔe nɛ o? (Kpɔ nɔnɔmetata si le nyati sia ƒe gɔmedzedze.)

⁴ Naomi kple lɔ̃xoyɔviawo Rut kple Orpa wozɔ mɔ tso Moab yina Israel. Le mɔa dzi la, Orpa tiae be yeatrɔ ayi yewo de Moab. Gake Naomi ɖoe kplikpaa be yeayi aƒe. Ke Rut ya ɖe? Nyametsotso eve ye dze ŋgɔe. Ðe wòatrɔ ayi eƒe ƒometɔwo gbɔ le Moab loo, alo ayi Betlehem kple lɔ̃xoa Naomia?—Rut 1:1-8, 14.

⁵ Moab ye Rut ƒe ƒometɔwo le. Ate ŋu atrɔ ayi wo gbɔ eye ɖewohĩ woalé be nɛ. Edze si Moabtɔwo, ese gbea henya woƒe dekɔnuwo nyuie. Naomi mate ŋu ado esiawo dometɔ aɖeke ŋugbe na Rut ne ekplɔe ɖo yi Betlehem o. Eye Naomi nɔ vɔvɔ̃m hã be yemakpɔ ŋutsu nɛ wòaɖe alo akpɔ gbɔɖemeƒe nɛ o. ‘Nu eve mebɔa ame o,’ eya ta Naomi ɖo aɖaŋu na Rut be wòatrɔ ayi wo de Moab. Abe ale si míekpɔe va yi ene la, Orpa “trɔ yi eƒe dukɔ kple eƒe mawuwo gbɔ.” (Rut 1:9-15) Gake Rut ya tiae be yematrɔ ayi yewo de tɔwo kple woƒe alakpamawuwo gbɔ o.

6. (a) Aleke Rut tso nya me nunyatɔe? (b) Nu ka tae Boaz gblɔ be Rut va be ɖe Yehowa ƒe aʋala te?

⁶ Ewɔ abe Rut srɔ̃ nu tso Yehowa ŋu tso srɔ̃aŋutsu alo Naomi gbɔ ene. Ekpɔe be Yehowa mele abe Moab mawuwo ene o. Elɔ̃ Yehowa, ɛ̃, exɔe se be Yehowa dze na yeƒe lɔlɔ̃ kple subɔsubɔ. Rut tso nya me nunyatɔe. Egblɔ na Naomi be: “Wò dukɔ anye nye dukɔ eye wò Mawu anye nye Mawu.” (Rut 1:16) Ne míede ŋugble le ale si Rut lɔ̃ Naomi ŋu la, edea dzi gbɔ na mí ŋutɔ. Gake nu si gawɔa dɔ ɖe mía dzi wue nye ale si gbegbe Rut lɔ̃ Yehowae. Esiae wɔ dɔ ɖe Boaz hã dzi, si na wòkafui emegbe ɖe ale si wòva ‘be ɖe Yehowa ƒe aʋala te’ la ta. (Xlẽ Rut 2:12.) Nya si Boaz gblɔ la na míeɖoa ŋku ale si koklovi sina bena ɖe nɔa ƒe aʋala te hena takpɔkpɔ dzi. (Psalmo 36:7; 91:1-4) Nenema kee Yehowa kpɔ Rut ta lɔlɔ̃tɔe eye wòɖo eƒe xɔse teƒe nɛ. Nyametsotso sia meve Rut kpɔ gbeɖe o.

7. Nu kae akpe ɖe ame siwo nɔa hehem ɖe megbe le adzɔgbeɖeɖe na Yehowa ŋu la ŋu?

⁷ Ame geɖewo srɔ̃ nu tso Yehowa ŋu gake womedia sitsoƒe le egbɔ o. Wonɔa hehem ɖe megbe le adzɔgbeɖeɖe kple nyɔnyrɔxɔxɔ ŋu. Ne ele alea le gowòme la, bu nu si gbɔ wòanya tso ŋu. Ame sia ame subɔa mawu aɖe kokoko. (Yosua 24:15) Nu nyuitɔ si nàwɔ ye nye be nàsubɔ Mawu vavã la. Ne èɖe adzɔgbe na Yehowa la, esia aɖee afia be èxɔe se be anye sitsoƒe na ye. Eye akpe ɖe ŋuwò nàsubɔe kuxi ka ke me nàto o. Ema tututue Mawu wɔ na Rut.

8. Nɔnɔme kawo mee Hizkiya to?

⁸ Nɔnɔme si me Hizkiya nɔ ya to vovo kura tso Rut tɔ gbɔ. Dukɔ si ɖe adzɔgbe na Mawu mee wòtso. Gake menye Israel-viwo katãe nɔ nuteƒe wɔm o. Hizkiya fofo Fia Ahaz ƒe tame sẽ wu ahlihakpe. Mede bubu aɖeke kura Mawu ƒe gbedoxɔa ŋu o,  eye wòƒoe ɖe amewo nu be woasubɔ trɔ̃wo. Ahaz tɔ dzo eya ŋutɔ via siwo nye Hizkiya nɔvi aɖewo gɔ̃ hã tsɔ sa vɔ na trɔ̃wo. Hizkiya kpɔ nu dziŋɔwo teƒe le eƒe ɖevime vavã!—2 Fiawo 16:2-4, 10-17; 2 Kronika 28:1-3.

9, 10. (a) Nu kae ate ŋu ana Hizkiya nado dziku hafi? (b) Nu ka tae mele be míaƒe dzi nanyra ɖe Mawu ŋu o? (d) Nu ka tae mele be míasusui be ƒome si me míetsoe ana míazu ame nyui alo ame gbegblẽ o?

⁹ Ahaz ƒe kpɔɖeŋu gbegblẽa ate ŋu ana via Hizkiya ƒe dzi nanyra ɖe Yehowa ŋu hafi. Egbea ame aɖewo meto nu si de Hizkiya tɔ nu gɔ̃ hã me o, gake ewɔna na wo be yewo tɔ dzɔ be ‘yewoƒe dzi nanyra ɖe Yehowa’ kple eƒe habɔbɔa ŋu. (Lododowo 19:3) Eye ame aɖewo susuna be esi ‘aŋutiti metsea bisi o’ ta la, yewoƒe ƒometɔwo ƒe agbe maɖɔʋu nɔnɔ ate ŋu ana yewo hã yewoanɔ agbe vlo eye yewoawɔ vodada siwo yewo dzilawo wɔ. (Ezekiel 18:2, 3) Gake ɖe esia nyea nyateƒe ɣesiaɣia?

¹⁰ Hizkiya ƒe agbenɔnɔ ɖo kpe edzi be biabia ma ƒe ŋuɖoɖoe nye ao! Susu nyui aɖeke meli si tae míakpɔ dziku ɖe Yehowa ŋu o. Menana nya vɔ̃wo dzɔna ɖe amewo dzi o. (Hiob 34:10) Ele eme be dzilawo ate ŋu afia nu nyui alo nu gbegblẽ wo viwo ya. (Lododowo 22:6; Kolosetɔwo 3:21) Gake ema mefia be ƒome si me míetso ana míazu ame nyui alo ame gbegblẽ o. Nu ka tae? Elabe Yehowa na tiatiawɔwɔ ƒe nunana mí, si fia be míate ŋu atiae be míawɔ nyui alo vɔ̃. (5 Mose 30:19) Aleke Hizkiya wɔ nunana xɔasi ma ŋu dɔe?

11. Nu kae kpe ɖe Hizkiya ŋu wòzu Yuda fia nyuitɔwo dometɔ ɖeka?

¹¹ Togbɔ be Hizkiya fofo nye Yuda fia vɔ̃ɖitɔwo dometɔ ɖeka hã la, eya va zu fia nyuitɔwo dometɔ ɖeka. (Xlẽ 2 Fiawo 18:5, 6.) Eɖoe be yemasrɔ̃ ye fofo ƒe kpɔɖeŋu gbegblẽa o. Ke boŋ etiae be yeaɖo to Yehowa ƒe nyagblɔɖilawo abe Yesaya, Mika kple Hosea ene. Elé to ɖe woƒe aɖaŋuɖoɖowo kple nuxlɔ̃amewo ŋu. Esia ʋãe wòɖɔ nu  gbogbo siwo fofoa gblẽ ɖo. Ekɔ gbedoxɔa ŋu, ebia be Mawu natsɔ dukɔa ƒe nu vɔ̃wo ake wo, eye wògbã legbawo katã le anyigba la dzi. (2 Kronika 29:1-11, 18-24; 31:1) Emegbe Hizkiya ɖe dzideƒo blibo kple xɔse sẽŋu fia esi Asiria fia Senakerib ho ɖe Yerusalem ŋu. Eka ɖe edzi be Yehowa akpɔ yewo ta eye wòdo ŋusẽ dukɔ la. (2 Kronika 32:7, 8) Gake eva ɖo ɣeaɖeɣi la, Hizkiya do eɖokui ɖe dzi, ke hã esi Yehowa ɖɔe ɖo la, ebɔbɔ eɖokui. (2 Kronika 32:24-26) Eme kɔ ƒãa be Hizkiya nye kpɔɖeŋu nyui aɖe si míate ŋu asrɔ̃. Meɖe mɔ ƒome si me wòtso gblẽ eƒe agbe dome o. Ke boŋ eɖee fia be yenye Yehowa xɔlɔ̃ vavã.

12. Abe Hizkiya ene la, nu kae ame geɖe wɔ be woazu Yehowa xɔlɔ̃wo?

¹² Ame siwo le egbexexea me la ƒe tagbɔ sẽ eye womelɔ̃a ame o, esia wɔe be ɖevi geɖewo dzilawo meléa be na wo alo lɔ̃ wo o. (2 Timoteo 3:1-5) Togbɔ be egbea Kristotɔ geɖewo tso ƒome siawo tɔgbi me hã la, wotiae be yewoadze xɔlɔ̃ Yehowa. ‘Ame manya ɣeɖuɖue gblɔna be ʋua menyo o,’ eya ta abe Hizkiya ene la, womena ƒome si me wotso kpɔ ŋusẽ ɖe ame si wonye dzi o. Mawu na tiatiawɔblɔɖe mí, le ema ta míate ŋu atiae be míasubɔe ahade bubu eŋu abe Hizkiya ene.

13, 14. Nu ka tae wòdze abe dɔ si wode Maria si la sesẽ ene, ke hã nya kae wògblɔ tsɔ ɖo eŋu na Gabriel?

¹³ Ƒe geɖe le Hizkiya ƒe agbenɔɣi megbe la, ɖetugbui bɔbɔɖokui aɖe si ŋkɔe nye Maria hã zu Yehowa xɔlɔ̃ vevi, si na wòde dɔ vevi aɖe asi nɛ. Ðetugbuia afɔ fu adzi Mawu Viŋutsu ahakpɔ edzi wòatsi! Eme kɔ be Yehowa lɔ̃ Maria heka ɖe edzi, eya tae wòna mɔnukpɔkpɔ gã siae ɖo. Gake aleke wòwɔ nui esi wogblɔ dɔdeasia ŋu nya nɛ teti?

¹⁴ Míeƒoa nu tso bubu gã si wode Maria ŋu ŋuti zi geɖe. Gake nu kawo ŋue wòanya tsi dzimaɖi ɖo? Le kpɔɖeŋu me, mawudɔla Gabriel gblɔ nɛ be afɔ fu esi medɔ kple ŋutsu aɖeke o. Gake Gabriel meɖe esia me na ɖetugbuia ƒe ƒometɔwo kple aƒelikawo o. Nu kae woasusu? Aleke Maria aɖe eme na Yosef wòakpɔe be menye ɖe wòtrɔ ye to eme o? Agba kpekpe aɖe hã le edzi be wòahe Mawu ŋutɔ ƒe Vi si va zu amegbetɔ la! Míenya nu siwo katã ŋu Maria  anya tsi dzi ɖo o, gake míenya nya si wògblɔ esi Gabriel ƒo nu kplii. Egblɔ be: “Kpɔ ɖa, Yehowa ƒe dɔlanyɔnue menye! Neva eme nam le wò nya la nu.”—Luka 1:26-38.

15. Nu ka tae Maria ƒe xɔse le etɔxɛ?

¹⁵ Xɔse si Maria ɖe fia la ɖe dzesi vavã! Enɔ klalo be yeawɔ nu sia nu si wobia tso ye si abe dɔlanyɔnu ko ene. Eka ɖe edzi be Yehowa alé be na ye ahakpɔ ye ta. Aleke xɔse sesẽ sia wɔ su Maria si? Womedzi mí kple xɔse o. Gake míate ŋu atui ɖo ne míebia Mawu be wòakpe ɖe mía ŋu. (Galatiatɔwo 5:22; Efesotɔwo 2:8) Maria do vevie nu hafi tu eƒe xɔse ɖo. Aleke míewɔ nya? Na míadzro ale si wòɖoa to kple nu siwo ŋu wòƒoa nu tsoe me kpɔ.

16. Nu kae ɖee fia be Maria nye toɖola nyui?

¹⁶ Ale si Maria ɖoa toe. Biblia gblɔ be mía dometɔ ɖe sia ɖe “naɖe abla le nusese me, nanɔ blewu le nuƒoƒo me.” (Yakobo 1:19) Maria nye toɖola nyui. Biblia na míenya be eléa to ɖe nya ŋu nyuie, vevietɔ nya siwo ku ɖe Yehowa ŋu. Edia ɣeyiɣi bua nya vevi siawo ŋu. Esia ƒe kpɔɖeŋu ɖekae nye esime Maria dzi Yesu eye alẽkplɔlawo va gblɔ nya siwo mawudɔla aɖe gblɔ na wo la nɛ. Emegbe esi Yesu xɔ ƒe 12 la, egblɔ nya aɖe si wɔ nuku na Maria ale gbegbe. Le nudzɔdzɔ evea siaa me la, Maria ɖo to, elé nya siwo katã wòse ɖe tame henɔ wo ŋu bum vevie.—Xlẽ Luka 2:16-19, 49, 51.

17. Nu kae Maria ƒe nuƒoƒo fia mí tso eŋu?

¹⁷ Nu siwo ŋu Maria ƒo nu tsoe. Biblia meƒo nu fũu tso nya siwo Maria gblɔ ŋu o. Eƒe nuƒo diditɔ dze le Luka 1:46-55. Nya siawo ɖee fia be Maria nya Hebri Ŋɔŋlɔawo nyuie. Nu ka tae míegblɔe alea? Maria ƒe nyawo de sɔsɔ ge kple nya siwo Samuel dada Hana gblɔ le eƒe gbedodoɖa me. (1 Samuel 2:1-10) Edze abe Maria yɔ nya tso Ŋɔŋlɔawo me zi gbɔ zi 20 sɔŋ ene le eƒe nuƒoa me. Edze ƒãa be nuƒoƒo tso nyateƒenya siwo wòsrɔ̃ tso Exɔlɔ̃ vevitɔ Yehowa ŋu la gbɔgblɔ dzɔa dzi nɛ.

18. Aleke míate ŋu asrɔ̃ Maria ƒe xɔse?

¹⁸ Abe Maria ene la, ate ŋu adzɔ ɣeaɖewoɣi be Yehowa nade dɔ aɖewo asi na mí siwo míabu be wosesẽ na mí akpa. Mina míasrɔ̃ eƒe kpɔɖeŋua ne míabɔbɔ mía ɖokui axɔ dɔdeasia ahaka ɖe edzi be Yehowa akpe ɖe mía ŋu. Míagate ŋu asrɔ̃ Maria ƒe xɔse ne míeɖo to Yehowa nyuie eye míedea ŋugble le nu siwo míesrɔ̃ tso eya ŋutɔ kple eƒe tameɖoɖowo ŋu la ŋu. Esia aʋã mí be míagblɔ nu siwo míesrɔ̃ la na amewo dzidzɔtɔe.—Psalmo 77:11, 12; Luka 8:18; Romatɔwo 10:15.

19. Esi míele xɔse ƒe kpɔɖeŋu siwo le Biblia me srɔ̃m la, nu ka dzie míate ŋu aka ɖo?

¹⁹ Edze ƒãa be Rut, Hizkiya kple Maria nye Yehowa xɔlɔ̃wo abe Abraham ke ene. Woawo hã wokpe ɖe “ɖaseɖilawo ƒe alilikpo gã” siwo va zu Mawu xɔlɔ̃wo la ŋu. Mina míayi edzi asrɔ̃ xɔse ƒe kpɔɖeŋu ɖedzesi siawo. (Hebritɔwo 6:11, 12) Ne míewɔ esia la, aʋu mɔ na mí be míanye Yehowa xɔlɔ̃wo tso fifia yi ɖe mavɔmavɔ me!