1-2. Nu kae Biblia na míenya tso Israel-fia aɖewo ŋu?

 BIBLIA ƒo nu tso ŋutsu 40 kple edzivɔ siwo ɖu fia ɖe Israel dzi ŋu. a Eye Biblia klo nu le wo dometɔ aɖewo ƒe nuwɔna aɖewo dzi na mí. Le kpɔɖeŋu me, fia nyuiawo gɔ̃ hã wɔ nu gbegblẽ aɖewo. Bu fia nyui David ŋu kpɔ. Yehowa gblɔ tso eŋu be: ‘Nye subɔla David dze yonyeme kple eƒe dzi blibo hewɔ nu dzɔdzɔe sɔŋ le ŋkunyeme.’ (1 Fia. 14:8) Gake David wɔ ahasi kple nyɔnu srɔ̃tɔ aɖe eye wòwɔ ɖoɖo wowu nyɔnua srɔ̃ le aʋagbedzi.—2 Sam. 11:​4, 14, 15.

² Biblia ɖee fia hã be fia siwo mewɔ nuteƒe o la dometɔ geɖe wɔ nu nyui aɖewo. Wo dometɔ ɖekae nye Rehabeam. Yehowa gblɔ tso eŋu be “ewɔ nu si nye vɔ̃.” (2 Kron. 12:14) Gake Rehabeam ɖo to esi Mawu gblɔ nɛ be wòagawɔ aʋa kple Israel-to ewo siwo ma ɖa tso eƒe fiaɖuƒea gbɔ la o. Etso du sesẽwo hã eye esia kpɔ dukɔa ta.—1 Fia. 12:​21-24; 2 Kron. 11:​5-12.

3. Nya vevi kae fɔ ɖe te, eye nu ka mee míadzro le nyati sia me?

³ Nya vevi aɖe fɔ ɖe te. Esi wònye be Israel-fiawo wɔ nu nyuiwo kple nu gbegblẽwo siaa ɖe, nu ka dzie Yehowa nɔ te ɖo gblɔ be fia aɖe wɔ nuteƒe? Nya sia ƒe ŋuɖoɖo akpe ɖe mía ŋu míase nu si dim Yehowa le tso mía si la gɔme.  Míakpɔ nu etɔ̃ siwo ŋu Yehowa lé ŋku ɖo kpɔe be Israel-fia aɖe wɔ nuteƒe alo mewɔ nuteƒe o. Woawoe nye dzi ƒe nɔnɔme si le esi, eƒe dzimetɔtrɔ, kple nenye be eyi edzi subɔ Yehowa nuteƒewɔwɔtɔe.

WOƑE DZI KU ÐE YEHOWA ŊU BLIBOE

4. Vovototo kae nɔ fia wɔnuteƒewo kple fia mawɔnuteƒewo dome?

⁴ Fia siwo ƒe nu dze Yehowa ŋu la subɔe kple dzi blibo. b Fia nyui Yehosafat “di Yehowa kple eƒe dzi blibo.” (2 Kron. 22:9) Biblia gblɔ tso Yosiya ŋu be: “Fia aɖeke menɔ anyi do ŋgɔ nɛ si trɔ ɖe Yehowa ŋu kple eƒe dzi blibo . . . de enu o.” (2 Fia. 23:25) Ke Salomo si mewɔ nuteƒe le eƒe tsitsime o ya ɖe? Biblia gblɔ be ‘eƒe dzi meku ɖe Yehowa ŋu bliboe o.’ (1 Fia. 11:4) Eye Biblia gblɔ tso Abiyam, si nye fia mawɔnuteƒe bubu, hã ŋu be: “Eƒe dzi meku ɖe Yehowa eƒe Mawu la ŋu bliboe . . . o.”—1 Fia. 15:3.

5. Nu kae wòfia be ame nasubɔ Yehowa kple dzi blibo?

⁵ Ke nu kae wòfia be ame nasubɔ Yehowa kple dzi blibo? Ame si subɔa Mawu kple dzi blibo la mesubɔnɛ le esi wònya be ele be yeawɔe nenema ta ko o. Ke boŋ esubɔa Mawu le esi wòlɔ̃e vevie eye wòdea bubu eŋu ta. Gawu la, eyia edzi lɔ̃a Yehowa eye wòdea bubu eŋu le eƒe agbe me katã.

6. Aleke míana míaƒe dzi naku ɖe Yehowa ŋu bliboe? (Lododowo 4:23; Mateo 5:​29, 30)

⁶ Aleke míate ŋu asrɔ̃ fia wɔnuteƒewo ahaku ɖe Yehowa ŋu kple dzi blibo? Eyae nye be míaƒo asa na nu siwo akpɔ ŋusẽ gbegblẽ ɖe mía dzi. Ne míetsɔa nu siwo mesɔ o ɖea modzaka, ne míeƒoa mía ɖokui ɖe hadede vɔ̃wo me eye míaƒe dzi kple susu ku ɖe ŋutilãmenuwo ŋu la, ate ŋu awɔe be míaƒe dzi magaku ɖe Yehowa ŋu bliboe o. Eya ta ne míede dzesii be nane wɔe be lɔlɔ̃ si le mía si na Yehowa va le to yim la, ele be míatso kpla aɖe nu ma ɖa.—Xlẽ Lododowo 4:23; Mateo 5:​29, 30.

7. Nu ka tae wòle vevie be míaƒo asa na nu siwo akpɔ ŋusẽ gbegblẽ ɖe mía dzi?

⁷ Mele be míaɖe mɔ míaƒe dzi nama o. Ne míekpɔ nyuie o la, míava nɔ mía ɖokui flum ahasusui be esi míele geɖe wɔm le Yehowa subɔsubɔ me ta, magahiã be míaxe mɔ ɖe nu siwo akpɔ ŋusẽ gbegblẽ ɖe mía dzi nu o. Tsɔe be pepi do eye enu sẽ ale gbegbe. Ènɔ gota eye vuvɔ ɖo wò vevie eya ta esi nèɖo aƒe me la, èƒu dzo ale be dzo ɖo lãme na wò eye nège ɖe xɔ me tsyɔ avɔ. Ke ɖe nàgaʋu ʋɔtrua ada ɖi be ya fafɛa nage ɖe xɔa mea? Gbeɖe. Nufiameae nye eka? Eyae nye be menye ɖeko míawɔ nu siwo ado ŋusẽ mía kple Yehowa dome ƒomedodoa ko evɔ o. Ele be míatu ʋɔtrua le kpɔɖeŋunyagbɔgblɔ nu ale be xexe sia ƒe ya fafɛ si nye mawumavɔmavɔ̃ ƒe nɔnɔmewo nagage ɖe míaƒe dzi me ahate mí ɖa tso Yehowa gbɔ o.—Ef. 2:2.

WOTRƆ DZI ME TSO WOƑE NU VƆ̃WO ME

8-9. Aleke Fia David kple Fia Hizkiya wɔ nui esi woɖɔ wo ɖo? (Kpɔ nɔnɔmetata.)

⁸ Míekpɔe le memama gbãtɔ me be Fia David wɔ nu vɔ̃ gãwo. Gake esi Natan ʋu go David ƒe nu vɔ̃wo la, ebɔbɔ eɖokui eye wòtrɔ dzi me. (2 Sam. 12:13) David ƒe nya siwo dze le Psalmo 51 lia na míekpɔe be etrɔ dzi me vavã, ke menye ɖe wònɔ ameŋkumenu wɔm be yeatsɔ aflu  Natan alo aƒo asa na tohehe o.—Ps. 51:​3, 4, 17, etamenuŋɔŋlɔ.

⁹ Fia Hizkiya hã wɔ nu vɔ̃ ɖe Yehowa ŋu. Biblia gblɔ be: “Eƒe dzi de asi dada me, eye Mawu do dɔmedzoe ɖe eya kple Yuda kpakple Yerusalem ŋu.” (2 Kron. 32:25) Nu kae na Hizkiya va te dada? Anɔ eme be esi Yehowa na kesinɔnu geɖe su esi, ekpe ɖe eŋu wòɖu Asiriatɔwo dzi alo da dɔ nɛ nukutɔe ta la, esia na wòse le eɖokui me be yenye gã wu ame bubuwo. Anye dadae na wòtsɔ eƒe kesinɔnuwo katã fia Babilontɔwo. Esia na nyagblɔɖila Yesaya va gblɔ nɛ be Yehowa do dziku ɖe eŋu. (2 Fia. 20:​12-18) Abe David enea, Hizkiya hã bɔbɔ eɖokui eye wòtrɔ dzi me. (2 Kron. 32:26) Mlɔeba la, Yehowa bui be enye fia wɔnuteƒe si ‘wɔ nu si nyo.’—2 Fia. 18:3.

10. Aleke Fia Amaziya wɔ nu esi woɖɔe ɖo?

¹⁰ Yuda-fia Amaziya ya to vovo. Togbɔ be ewɔ nu si nyo hã la, “mewɔe kple dzi blibo o.” (2 Kron. 25:2) Nu kae mewɔ nyuie o? Esi Yehowa kpe ɖe Amaziya ŋu wòɖu Edomtɔwo dzi vɔ megbe la, ede ta agu na woƒe mawuwo. c Yehowa dɔ eƒe nyagblɔɖila be wòaƒo nu kplii gake esẽ dzi me eye wònyae.—2 Kron. 25:​14-16.

11. Le 2 Korintotɔwo 7:​9, 11 ƒe nya nu la, nu kae míawɔ be Yehowa natsɔ míaƒe nu vɔ̃wo ake mí? (Kpɔ fotoawo hã.)

¹¹ Nu kae míesrɔ̃ tso kpɔɖeŋu siawo me? Eyae nye be ele vevie be míatrɔ dzi me tso míaƒe nu vɔ̃wo me eye míadze agbagba ɖe sia ɖe be míagawɔe ake o. Ke ne hamemetsitsiwo ɖo aɖaŋu na mí, ɖewohĩ tso nane si dze abe mele vevie o ene ŋu ɖe? Megawɔ na mí be Yehowa melɔ̃ mí alo hamemetsitsiawo tɔ ŋku mí o. Israel-fia nyuiwo gɔ̃ hã megbɔ aɖaŋuɖoɖo kple ɖɔɖɔɖo ŋu o. (Heb. 12:6) Ne woɖɔ mí ɖo la, ele be (1) míabɔbɔ mía ɖokui axɔe, (2) míawɔ tɔtrɔ siwo hiã, eye (3) míayi edzi atsɔ dzi blibo asubɔ Yehowa. Ne míetrɔ dzi me tso míaƒe nu vɔ̃wo me la, Yehowa atsɔe ake mí.—Xlẽ 2 Korintotɔwo 7:​9, 11.

WOYI EDZI SUBƆ YEHOWA NUTEƑEWƆWƆTƆE

12. Nu kae ɖe dzesi le fia siwo wɔ nuteƒe la ŋu?

¹² Fia siwo Yehowa bu nuteƒewɔlawoe la ku ɖe tadedeagu dzadzɛa ŋu goŋgoŋ. Eye wode dzi ƒo na Yehowa ƒe amewo be woawo hã woawɔe nenema. Ele eme be wowɔ vodada aɖewo ya, gake wosubɔ Yehowa ɖeka ko. Eye woku kutri vevie be yewoaɖe trɔ̃subɔsubɔ ɖa le anyigba la dzi. d

13. Nu ka tae Yehowa drɔ̃ ʋɔnu Fia Ahab be mewɔ nuteƒe o?

¹³ Nu ka tae Yehowa drɔ̃ ʋɔnu fia aɖewo be womewɔ nuteƒe o? Ele eme be menye nu gbegblẽ koe fia mawo wɔ ɣesiaɣi o. Fia vɔ̃ɖi Ahab gɔ̃ hã ɖe ɖokuibɔbɔ aɖe sinu fia eye wòse veve be yewu Nabot. (1 Fia. 21:​27-29) Etso duwo hã eye wòɖu aʋa geɖe dzi na Israel. (1 Fia. 20:​21, 29; 22:39) Gake Ahab srɔ̃ kpɔ ŋusẽ ɖe edzi wòtsɔ trɔ̃subɔsubɔ ɖo dɔe hedoe ɖe ŋgɔ. Metrɔ dzi me le esia me gbeɖe o.—1 Fia. 21:​25, 26.

14. (a) Nu ka tae Yehowa bu Fia Rehabeam be mewɔ nuteƒe o? (b) Nu kae fia siwo mewɔ nuteƒe o dometɔ geɖe wɔ?

 ¹⁴ Bu Fia Rehabeam si hã mewɔ nuteƒe o ŋu kpɔ. Míekpɔe le memama evelia me be ewɔ nu nyui geɖe le eƒe fiaɖuɣi. Gake esi eƒe fiaɖuƒea nya li ke ko la, egblẽ Yehowa ƒe Sea ɖi eye wòsubɔ alakpamawuwo. (2 Kron. 12:1) Ema megbea, eva nɔ Yehowa subɔm ɣeaɖewoɣi eye wòsubɔa trɔ̃wo hã ɣebubuɣiwo. (1 Fia. 14:​21-24) Menye Rehabeam kple Ahab koe dzudzɔ Yehowa subɔsubɔ le mɔ nyuitɔ nu o. Nya lae nye be, fia siwo mewɔ nuteƒe o dometɔ akpa gãtɔ kpe asi ɖe alakpamawuwo subɔsubɔ ŋu le mɔ aɖe nu. Edze ƒãa be le Yehowa ŋkumea, ale si fiawo wɔ nu ɖe tadedeagu dzadzɛa ŋu koŋ dzie wònɔa te ɖo bua fia aɖe be enyo alo menyo o.

15. Nu ka tae Yehowa di vevie be woasubɔ ye le mɔ nyuitɔ nu?

¹⁵ Nu ka tae ale si fiawo subɔ Yehowa nɔ vevie nɛ nenema gbegbe? Susu ɖekae nye be fiawoe Yehowa de dɔ asi na be woakpe ɖe yeƒe amewo ŋu woasubɔ ye le mɔ nyuitɔ nu. Azɔ hã, alakpasubɔsubɔ kplɔa amewo dea nu vɔ̃ gã bubuwo kple nu madzɔmadzɔwo wɔwɔ me. (Hos. 4:​1, 2) Tsɔ kpe ɖe eŋu la, Israel-fiawo kple wo teviwo siaa ɖe adzɔgbe na Yehowa. Eya ta esi wova nɔ alakpamawuwo subɔm la, Biblia tsɔe sɔ kple ahasiwɔwɔ. (Yer. 3:​8, 9) Ne ame aɖe wɔ ahasi la, egbãa dzi na srɔ̃a vevie ŋutɔ! Nenema kee ne Yehowa subɔla ɖeadzɔgbe aɖe vae  subɔ alakpamawuwo la, ewɔ nu vɔ̃ ɖe Yehowa ŋu eye enana Yehowa ƒe dzi sea veve ŋutɔ! e—5 Mose 4:​23, 24.

16. Le Yehowa ŋkume la, nu ka koŋue dea vovototo ame dzɔdzɔe kple ame vɔ̃ɖi dome?

¹⁶ Nu kae míesrɔ̃ tso esia me? Eyae nye be míaɖoe kplikpaa aƒo asa na alakpasubɔsubɔ, míaku ɖe tadedeagu dzadzɛa ŋu eye míayi edzi ado vevie Yehowa subɔsubɔ. Nyagblɔɖila Malaki gblɔ vovototo si le ame nyui kple ame vɔ̃ɖi dome eme kɔ nyuie. Egblɔ be: “Miagakpɔ vovototo si le ame dzɔdzɔe kple ame vɔ̃ɖi dome, kple vovototo si le ame si subɔa Mawu kple ame si mesubɔnɛ o la dome.” (Mal. 3:18) Eya ta mele be míaɖe mɔ naneke, míaƒe blibomademade alo vodada siwo míewɔna gɔ̃ hã, naɖe dzi le mía ƒo ale gbegbe be míava dzudzɔ Yehowa subɔsubɔ o. Nu vɔ̃ gã wònye be ame nadzudzɔ Yehowa subɔsubɔ.

17. Nu ka tae wòle be míaɖɔ ŋu ɖo ne míele ame si míaɖe tiam?

¹⁷ Ne tre ye nènye eye nèle srɔ̃ɖeɖe ŋu bum la, aleke Malaki ƒe nyawo ate ŋu akpe ɖe ŋuwò nàtia ame si asɔ na wò? Bu nya sia ŋu kpɔ: Nɔnɔme nyuiwo ate ŋu anɔ ame aɖe si, gake ne amea mesubɔa Mawu vavã la o la, ɖe eya amea le dzɔdzɔe le Yehowa ŋkumea? (2 Kor. 6:14) Ne èɖe ame ma la, ɖe wòakpe ɖe ŋuwò nàyi edzi awɔ nuteƒe na Yehowa? Bu nya sia hã ŋu kpɔ: Nɔnɔme nyui aɖewo anya nɔ Fia Salomo srɔ̃ siwo nye trɔ̃subɔlawo la si. Gake womesubɔa Yehowa o, eya ta vivivi la, wotrɔ Salomo ƒe dzi wòva nɔ alakpamawuwo subɔm.—1 Fia. 11:​1, 4.

18. Nu kawoe wòle be dzilawo nafia wo viwo?

 ¹⁸ Dzilawo, miate ŋu azã Biblia me nuŋlɔɖi siwo ku ɖe Israel-fiawo ŋu atsɔ akpe ɖe mia viwo ŋu woatsɔ dzo ɖe Yehowa subɔsubɔ ŋu. Kpe ɖe wo ŋu woase egɔme be ale si fia aɖe do tadedeagu dzadzɛa ɖe ŋgɔ dzie Yehowa nɔ te ɖo bui be ewɔ nuteƒe alo mewɔ nuteƒe o. To wò nuƒoƒo kple nuwɔna dzi nàfia viwòwo woakpɔe be nu vevitɔwo le agbe me, siwo kpe ŋuwò nete ɖe Yehowa ŋu, dometɔ aɖewoe nye ɖokuisi Biblia sɔsrɔ̃, kpekpeawo dede kple gbeadzisubɔsubɔdɔa. (Mat. 6:33) Ne miewɔe alea o la, ɖeviawo malɔ̃ Yehowa ŋutɔŋutɔ o. Ðeko woanɔ esubɔm le esi mi dzilawo mienye Yehowa Ðasefowo ta ko. Esia ate ŋu awɔe be womatsɔ Yehowa subɔsubɔ aɖo nɔƒe gbãtɔ o alo woava dzudzɔ esubɔsubɔ kura.

19. Ne ame aɖe dzudzɔ Yehowa subɔsubɔ la, nu kae wòagate ŋu awɔ? (Kpɔ aɖaka si nye “ Àte Ŋu Atrɔ Ava Yehowa Gbɔ!” hã.)

¹⁹ Ne ame aɖe dzudzɔ Yehowa subɔsubɔ la, ɖe wòfia be magate ŋu ava nye Yehowa xɔlɔ̃ gbeɖe oa? Ao, mefia nenema o. Elabe ate ŋu ava trɔ dzi me eye wòagasubɔ Yehowa ake. Be wòate ŋu awɔ esia, ehiã be wòabɔbɔ eɖokui eye wòalɔ̃ faa hamemetsitsiwo nakpe ɖe eŋu. (Yak. 5:14) Agbagba ka kee wòɖadze o, mazu dzodzro o ne egava zu Yehowa xɔlɔ̃.

20. Ne míesrɔ̃ Israel-fia wɔnuteƒeawo la, aleke Yehowa abu míi?

²⁰ Nu kae míesrɔ̃ tso Israel-fiawo gbɔ? Míate ŋu anɔ abe fia wɔnuteƒeawo ene ne míeku ɖe Yehowa ŋu eye míesubɔe kple dzi blibo. Mina míasrɔ̃ nu tso míaƒe vodadawo me, míatrɔ dzi me eye míawɔ tɔtrɔ siwo hiã. Mina míaɖo ŋku edzi be ele vevie be míaku ɖe Mawu vavã ɖeka kolia la ŋu ahasubɔe. Ne èyi edzi wɔ nuteƒe na Yehowa la, abu wò be èwɔa nu dzɔdzɔe le ye ŋkume.