Wodzim le Quebec City, le Quebec, si nye Canada ƒe nuto si me wodoa Fransegbe le la me. Dzinyelawo, siwo ŋkɔwoe nye, Louis kple Zélia la, hem le lɔlɔ̃ me. Tɔnye nye ame si ŋu kpena le dzɔdzɔme nu, eye elɔ̃a nuxexlẽ. Ŋutinyaŋɔŋlɔ dzɔa dzi nam, eye menɔ mɔ kpɔm be mava nye nyadzɔdzɔŋlɔla gbe ɖeka.

Esi mexɔ abe ƒe 12 ene la, Rodolphe Soucy, si nye tɔnye ƒe hatidɔwɔla la kple exɔlɔ̃ aɖe wova mía ƒe me. Wonye Yehowa Ðasefowo. Nyemenya nu boo aɖeke tso Ðasefowo ŋu o, eye nyemetsɔ ɖeke le woƒe mawusubɔsubɔ me o. Ke hã, ale si wozãa Biblia tsɔ ɖoa biabiawo ŋui la dzɔa dzi nam. Esia wɔ dɔ de dzinyelawo hã dzi, eya ta, míelɔ̃ be woasrɔ̃ Biblia kpli mí.

Ɣemaɣi la, menɔ Katoliko-suku aɖe dem. Meƒoa nu tso nu siwo srɔ̃m menɔ le Biblia me la ŋu na nye sukuhatiwo ɣeaɖewoɣi. Ɣeyiɣi aɖewo megbe la, míaƒe nufiala siwo nye Katolikohaa ƒe nunɔlawo la va nya nu tso esia ŋu. Le esi woazã Ŋɔŋlɔawo atsɔ aɖee afia be nya siwo gblɔm menɔ la mele eme o teƒe la, ɖeko wo dometɔ ɖeka tsɔ nya ɖe ŋunye le sukuviawo katã ŋkume be menye aglãdzela! Togbɔ be nu si dzɔ la te ɖe dzinye hã la, nu nyui aɖewo do tso eme, elabe ekpe ɖe ŋunye meva kpɔe dze sii be nu siwo wonɔ mía fiam le sukua ku ɖe Mawu subɔsubɔ ŋu la mewɔ ɖeka kple nya si Biblia gblɔ o. Meva kpɔe be, ele be madzudzɔ suku ma dede. Megblɔ na dzinyelawo be mayi suku bubu, eye wolɔ̃ meyi suku bubu.

Meyi Biblia-sɔsrɔ̃a dzi ya, gake nyemenɔ ŋgɔ yim kabakaba o, elabe mevɔ̃na na tso aƒe me yi aƒe me dɔa wɔwɔ. Katolikohaa ƒe ŋkɔ de du ŋutɔ eye wotsi tsitre ɖe míaƒe gbeƒãɖeɖedɔa ŋu vevie. Dunyahehe ƒe kadodo kplikplikpli nɔ Quebec ƒe dudɔnunɔla  gbãtɔ, si ŋkɔe nye Maurice Duplessis kple Katolikohaa dome. Esi wòde wo dzi ta la, nu vlo wɔhawo ɖea fu na Ðasefowo hedzea wo dzi gɔ̃ hã. Ebia dzinɔameƒo geɖe be míaɖe gbeƒã ɣemaɣi.

Nɔviŋutsu aɖe si kpe ɖe ŋunye meɖu nye vɔvɔ̃a dzi ye nye John Rae, si de Gilead Sukua ƒe klass asiekelia. Nuteƒekpɔkpɔ geɖe su John si, ke hã, enye ame fatu, ɖokuibɔbɔla kple ame si ŋu wotea ŋu tena ɖo bɔbɔe. Togbɔ be ƒãa hafi wòɖoa aɖaŋu nam tẽe hã la, kpɔɖeŋu nyui siwo wòɖona la na mesrɔ̃ nu geɖe tso egbɔ. Fransegbea dodo meɖena na John kura o, eya ta, mekplɔnɛ ɖo yia gbeadzi edziedzi eye mekpena ɖe eŋu le gbea dodo me. Dɔwɔwɔ kple John alea kpe ɖe ŋunye meva tso nya me mlɔeba be mazu Yehowa Ðasefo. Eya ta, tso esime medo go Ðasefoawo zi gbãtɔ la, meva xɔ nyɔnyrɔ ƒe ewo megbe, le May 26, 1951 dzi.

Nɔvi siwo nɔ míaƒe hame sue si nɔ Quebec City me la dometɔ akpa gãtɔ nye gbesiagbe mɔɖelawo. Woƒe kpɔɖeŋu nyuiawo ʋãm meva zu gbesiagbe mɔɖela. Ɣemaɣi la, Biblia ɖeɖe koe míezãna le tso aƒe me yi aƒe me dɔa me. Esi míezãa agbalẽwo le gbeƒãɖeɖedɔa me o ta la, ele na mí be míawɔ Ŋɔŋlɔawo ŋu dɔ nyuie le gbeadzi. Eya ta, medze agbagba vevie be manya mawunyakpukpui siwo mate ŋu azã atsɔ aɖe nyateƒea me na amewo la nyuie. Ke hã, ame geɖe medina gɔ̃ hã be yewoaxlẽ Biblia si me dzeside mele be Katolikohaa da asi ɖe edzi o la o.

Le ƒe 1952 me la, meɖe Simone Patry si nye nɔvinyɔnu wɔnuteƒe aɖe si nɔ míaƒe hamea me. Míeʋu yi Montreal, eye ƒe ɖeka megbe la, Yehowa yra mí míedzi mía vinyɔnu Lise. Togbɔ be medzudzɔ mɔɖeɖedɔa ɣeyiɣi kpui aɖe hafi míeɖe srɔ̃ hã la, nye kple Simone míedze agbagba be míanɔ agbe tsɛ ale be míate ŋu awɔ geɖe ale si míate ŋui le hamea me.

Ƒe ewo va yi hafi megava te mɔɖeɖedɔa wɔwɔ ŋu bubu ake. Le ƒe 1962 me esime mede Fiaɖuƒe Subɔsubɔ Suku si wowɔ na hamemetsitsiwo le Canada Alɔdzedɔwɔƒea ɣleti ɖeka la, wona nye kple Nɔviŋutsu Camille Ouellette míenɔ xɔ ɖeka me. Dzo si nɔ Camille me ɖe gbeƒãɖeɖedɔa ŋu la wɔ dɔ ɖe dzinye ŋutɔ, vevietɔ le esi srɔ̃ kple viwo le esi ta. Ɣemaɣi la, esesẽ be woakpɔ nɔvi aɖe si nye dzila si le viwo dzi kpɔm evɔ wòganye mɔɖela la le Quebec; ke hã, esia tututue nye Camille ƒe taɖodzinu. Ɣemaɣi si nye kplii míenɔ anyi ɖekae la, ede dzi ƒo nam be mabu nye nɔnɔmea ŋu nyuie. Ɣleti ʋɛ aɖewo ko megbe la, mekpɔe be mate ŋu agawɔ gbesiagbe mɔɖeɖedɔa ake. Ame aɖewo nɔ ɖi kem be susu mele nye nyametsotsoa me o, ke hã, metɔ afɔ  to sesĩe, eye medze mɔɖeɖedɔa gɔme kple kakaɖedzi be Yehowa ayra ɖe agbagba siwo dzem menɔ be mawɔ geɖe wu le subɔsubɔdɔa me la dzi.

Le ƒe 1964 me la, woɖo nye kple Simone mɔɖela veviwo le mía de Quebec City, eye míesubɔ le afi sia ƒe geɖe. Gake fifia ya, womegatsi tsitre ɖe míaƒe subɔsubɔdɔa ŋu abe tsã ene o, ke hã, tsitretsiɖeŋula aɖewo gakpɔtɔ nɔ anyi kokoko.

Memleɖa ŋdɔ aɖe la, kpovitɔwo lém le Sainte-Marie, si nye du sue aɖe si medidi boo tso Quebec City gbɔ o la me. Kpovitɔ ɖeka kplɔm yi woƒe dɔwɔƒea, eye wodem gaxɔ me le esi menɔ gbeƒã ɖem tso aƒe me yi aƒe me eye nyemexɔ mɔɖegbalẽ o ta. Emegbe la, wokplɔm yi ʋɔnudrɔ̃la si ŋkɔe nye Baillargeon, si ame geɖe vɔ̃na na la, ŋkume. Ebiam be senyala kae le tanye ʋli ge le ʋɔnua mahã. Esi megblɔ nɛ be eyae nye Glen How, * Ðasefo senyala si amewo nya nyuie la, etɔtɔ, hegblɔ enumake be: “Oo, ao! Eya kea?” Glen How xɔ ŋkɔ le ale si wòkpena ɖe Ðasefowo ŋu woɖua dzi le senyawo me ta. Esia megbe kpuie la, ʋɔnudrɔ̃ƒea gblɔ nam be wote fli ɖe nya si wotsɔ ɖe ŋunye la me.

Esi wotsi tsitre ɖe míaƒe dɔa ŋu le Quebec ta la, esia wɔe hã be esesẽna be míakpɔ teƒe si sɔ nyuie na míaƒe kpekpewo wɔwɔ. Ʋudaɖoƒe aɖe si me fa la koe míaƒe hame sue la va kpɔ. Nɔviawo zãa mɔ̃ aɖe si me wodea amii la be wòade dzoxɔxɔ vi aɖe xɔa me, le esi yame fana miamiamia le vuvɔŋɔliwo ta. Zi geɖe la, míeva ƒoa ƒu ɖe eŋu gaƒoƒo ʋɛ aɖewo do ŋgɔ na kpekpeawo ƒe gɔmedzedze heɖoa dze tso nuteƒekpɔkpɔ tuameɖowo ŋu.

Ale si gbeƒãɖeɖedɔa kpɔ dzidzedze esi ƒeawo va nɔ yiyim la wɔ nuku ŋutɔ. Le ƒe 1960-awo me la, hame suesuesue ʋɛ aɖewo koe nɔ Quebec City, Côte-Nord, kple Gaspé Peninsula ƒe nutoawo me. Egbea la, gbeƒãɖela siwo le nuto mawo me la sɔ gbɔ wu nɔvi siwo le nutome sue eve me, eye wowɔa kpekpewo le Fiaɖuƒe Akpata dzeaniwo me.

Wokpe nye kple Simone be míawɔ nutome sue dzikpɔkpɔdɔa le ƒe 1970 me. Eyome, le ƒe 1973 me la, wode dɔ asi na mí be míawɔ nutome gã dzikpɔkpɔdɔa. Le ƒe mawo me la, mesrɔ̃ nu geɖe tso nɔviŋutsu bibiwo, siwo dometɔ aɖewoe nye Laurier Saumur kple David Splane, * siwo hã nye dzikpɔla mɔzɔlawo ɣemaɣi la gbɔ. Le takpekpe ɖe sia ɖe ƒe nuwuwu la, nye kple David míeɖoa aɖaŋu na mía nɔewo le ale si míawɔ be míaƒe nufiafia naganyo ɖe edzi la ŋu. Meɖo ŋku edzi be gbe ɖeka, David gblɔ nam be: “Léonce, wò nuƒo mamlɛa vivi nunye ŋutɔ. Enyo ŋutɔ, gake mate ŋu atsɔ nyatakaka mawo katã aƒo nuƒo etɔ̃!” Edze ƒãa be meƒoa nu tso nyatakaka geɖe ŋu le nye nuƒowo me akpa. Ehiã be masrɔ̃ ale si mawɔ be nye nuƒowo me nyawo nanɔ ʋɛ eye mayi nyaawo gbɔ tẽe.

Ɣemaɣi la, wodea dɔ asi na nutome gã dzikpɔlawo be woaɖade dzi ƒo na nutome sue dzikpɔlawo. Ke hã, gbeƒãɖela siwo nɔ Quebec la dometɔ geɖe nyam nyuie. Eya ta, ne meyi ɖasrã nutome sueawo kpɔ la, zi geɖe la, nɔviawo dina be yewoawɔ dɔ kplim le gbeadzi. Togbɔ be dɔwɔwɔ kpli  wo le gbeadzi doa dzidzɔ nam ŋutɔ hã la, esia wɔnɛ be nyemetea ŋu kpɔa vovo ɖe nutome sue dzikpɔlaa ya ŋu o. Ɣeaɖeɣi la, nutome sue dzikpɔla lɔ̃ame aɖe ɖo ŋku edzi nam be: “Enyo be nàkpɔ vovo ɖe nɔviawo ŋu ya, gake mègaŋlɔ be be, tanyee nèva afi sia ɖo kwasiɖa sia me o. Nye hã mehiã dzideƒo!” Aɖaŋuɖoɖo nyui sia kpe ɖe ŋunye meda sɔ nyuie wu.

Nublanuitɔe la, vɔ̃ aɖe si nyemenɔ mɔ kpɔm na o la va dzɔ ɖe dzinye le ƒe 1976 me. Simone, srɔ̃nye lɔlɔ̃a, va dze dɔ vevie eye wòva dɔ alɔ̃ le ku me. Eƒe ɖokuitsɔtsɔsavɔ ƒe gbɔgbɔa kple lɔlɔ̃ si le esi na Yehowa la wɔe be wònye kpeɖeŋutɔ nyui aɖe ŋutɔ nam. Esi mezãa ɣeyiɣi geɖe le gbeƒãɖeɖedɔa me ta la, esia kpe ɖe ŋunye mete ŋu do dzi le dzigbãnya sia me, eye meda akpe na Yehowa ɖe ale si wòkpe ɖe ŋunye lɔlɔ̃tɔe le nɔnɔme sesẽ sia me ta. Emegbe la, meɖe Carolyn Elliott, si nye mɔɖela bibi aɖe si doa Eŋlisigbe, si va le subɔsubɔm le Quebec ƒe afi si gbeƒãɖela geɖe wu hiã le. Carolyn nye ame si ŋu wotea ŋu tena ɖo bɔbɔe, eye enye ame si tsɔa ɖe le eme na ame bubuwo vevie ŋutɔ, vevietɔ, ame siwo ŋu kpena alo ame siwo tsi akogo. Eva wɔ ɖeka kplim le mɔzɔzɔdɔa me eye esia nye yayra gã aɖe nam.

Le January 1978 me la, wobia tso asinye be mafia nu le Mɔɖelawo Ƒe Subɔsubɔ Suku gbãtɔ si wowɔ le Quebec la me. Mevɔ̃ ŋutɔ, elabena nyemede suku ma kpɔ o, eye nyemekpɔ sukugbalẽa hã kpɔ o, eya ta, nu sia nu nye nu yeye na nye kple sukuviawo siaa. Dzidzɔtɔe la, mɔɖela kpɔnuteƒewo sɔ gbɔ ɖe klass gbãtɔ si mefia nui la me. Togbɔ be nyee nye nufialaa hã la, mesrɔ̃ nu geɖe tso sukuviawo gbɔ!

Esia megbe, le ƒe 1978 ma ke me la, míewɔ “Aʋadziɖuɖu ƒe Xɔse” Dukɔwo Dome Takpekpea le Montreal Olimpik Bɔlƒoƒea. Esia ye nye takpekpe gãtɔ kekeake si míewɔ le Quebec ɣemaɣi, eye ame 80,000 sɔŋ ye de. Wode dɔ asi nam be mawɔ dɔ kple takpekpea ƒe Nyatakaka Dɔwɔƒea si ɖea nu me na nyadzɔdzɔgblɔlawo. Meƒo nu kple nyadzɔdzɔgblɔla geɖewo, eye edo dzidzɔ nam ŋutɔ esi  mekpɔe be nyakakadɔwɔƒe geɖewo ƒo nu nyui tso mía ŋu. Wobia gbe mí le television kple radio dzi wɔna vovovowo me gaƒoƒo 20 kple edzivɔ, eye wota nyati vovovo alafa geɖe ɖe nyadzɔdzɔgbalẽwo me tso mía ŋu. Esia nye ɖaseɖiɖi gã aɖe na amewo!

Tɔtrɔ ɖedzesi aɖe va nye agbe me le ƒe 1996 me. Mesubɔ le Quebec si nye Canada ƒe nuto si me wodoa Fransegbe le la me tso nye nyɔnyrɔxɔɣi ke, gake azɔ la, wode dɔ asi nam be maɖasubɔ le Toronto ƒe nutome gã aɖe si me wodoa Eŋlisigbe le la me. Mese le ɖokuinye be nyemesu te na dɔ ma o, eye mevɔ̃ be nyemate ŋu aƒo nuƒowo nyuie o le esi nyemetea ŋu doa Eŋlisigbea nyuie o ta. Eva hiã be manɔ gbe dom ɖa edziedzi wu tsã eye magaɖo ŋu ɖe Yehowa ŋu bliboe wu tsã.

Fifia mate ŋu agblɔ le nyateƒe me be, mese vivi na ƒe eve siwo metsɔ subɔ le Toronto ƒe nutoa me la ale gbegbe. Carolyn gbɔ dzi ɖi nam hekpe ɖe ŋunye be kakaɖedzi geɖe wu nasu asinye le Eŋlisigbea dodo me, eye nɔviawo hã kpe ɖe ŋunye hede dzi ƒo nam ŋutɔ. Eteƒe medidi o, míedze xɔlɔ̃ yeyewo.

To vovo na dɔ bubu siwo míewɔna hafi wɔa takpekpe kwasiɖanuwuwuwo la, mewɔa tso aƒe me yi aƒe me dɔa abe gaƒoƒo ɖeka ene zi geɖe le Fiɖa fiẽwo. Ame aɖe abu be, ‘Nu ka tae nàgayi gbeadzi evɔ dɔ gbogbo aɖe li nègbɔna wɔwɔ ge le takpekpe me le kwasiɖanuwuwua?’ Ke hã, mekpɔe be dzeɖoɖo kple amewo le gbeƒãɖeɖedɔa me dea dzi ƒo nam. Fifia gɔ̃ hã la, ɣesiaɣi si mewɔ gbeƒãɖeɖedɔa la, mekpɔa dzidzɔ geɖe wu.

Le ƒe 1998 me la, wode dɔ asi na nye kple Carolyn be míagatrɔ ayi Montreal aɖawɔ mɔɖela vevi ƒe dɔa. Dɔ bubu aɖewo siwo wode asi nam, siwo mewɔ ƒe geɖe, la dometɔ aɖewoe nye be mawɔ ɖoɖo ɖe dutoƒoɖaseɖiɖidɔ tɔxɛwo ŋu eye mawɔ dɔ kple nyadzɔdzɔgblɔlawo aɖe nu me na wo ku ɖe susu totro si le amewo si ɖe Yehowa Ðasefowo ŋu la ŋu. Fifia, edzɔa dzi na nye kple Carolyn be míaɖe gbeƒã na amedzro siwo ʋu va Canada eteƒe medidi o, siwo dina vevie be yewoasrɔ̃ nu geɖe tso Biblia ŋu.

Ne mede ŋugble le ƒe 68 siwo metsɔ subɔ Yehowa tso esime mexɔ nyɔnyrɔ ŋu la, mekpɔnɛ be Yehowa yram ale gbegbe. Dzi dzɔam ŋutɔ, elabe mesrɔ̃ ale si mawɔ ase vivi na gbeƒãɖeɖedɔa eye mekpe ɖe ame geɖe ŋu wova nya nyateƒea. Esi vinyenyɔnu Lise kple srɔ̃a wohe wo viwo wotsi vɔ la, eya kple srɔ̃a hã va dze gbesiagbe mɔɖeɖedɔa gɔme. Ne mekpɔ ale si dzo gakpɔtɔ le eme ɖe subɔsubɔdɔa ŋu la, esia doa dzidzɔ nam ale gbegbe. Vevietɔ wu la, medaa akpe na nɔvi Kristotɔ siwo ƒe kpɔɖeŋu nyuiwo kple aɖaŋuɖoɖo nyuiwo kpe ɖe ŋunye ƒomedodo kplikplikpli va le nye kple Yehowa dome eye mesubɔ eyama le mɔ vovovowo nu la. Meva kpɔe be, ne míeɖo ŋu ɖe Yehowa ƒe gbɔgbɔ kɔkɔe triakɔ la ŋu ko hafi míate ŋu ayi edzi awɔ nuteƒe nɛ le subɔsubɔdɔ si wode asi na mí la me. (Ps. 51:11) Medaa akpe na Yehowa ɣesiaɣi ɖe mɔnukpɔkpɔ xɔasi si wònam be makafu eƒe ŋkɔa la ta!—Ps. 54:6.