1-2. Nu kawoe ate ŋu ana Marko kple Timoteo nahe ɖe megbe eye womawɔ geɖe le Yehowa subɔsubɔ me o hafi?

 NƆVIŊUTSU sɔhɛwo, ɖe miedi be yewoawɔ geɖe le Yehowa subɔsubɔ me eye yewoakpe ɖe nɔvi siwo le hamea me ŋu geɖe wua? Míeka ɖe edzi be nenemae miedi. Edzɔ dzi na mí be nɔviŋutsu sɔhɛ geɖe di be yewoatsɔ yewo ɖokui ana asubɔ! (Ps. 110:3) Gake ɖewohĩ nanewo le mɔ xem na wò. Ðe nèle hehem ɖe megbe be yeawɔ geɖe le subɔsubɔdɔa me le esi mènya ale si nuwo ava nɔ le etsɔme o ta? Alo ɖe nèle vɔvɔ̃m be ne wode dɔ aɖewo ye si la, yemate ŋu awɔe nyuie oa? Ne aleae nèle sesem le ɖokuiwò me la, ke menye wò ɖekae o.

² Marko kple Timoteo hã anya se le wo ɖokui me nenema. Togbɔ be womenya ale si nuwo ava yii o eye nuteƒekpɔkpɔ boo mesu wo si o hã la, womehe ɖe megbe o, wotiae be yewoawɔ geɖe na Yehowa. Esi apostolo Paulo kple Barnaba kpe Marko be wòava wɔ ɖeka kpli yewo le dutanyanyuigbɔgblɔ mɔzɔzɔ gbãtɔ me la, anɔ eme be enɔ dadaa gbɔ le aƒe nyui aɖe me ɣemaɣi. (Dɔw. 12:​12, 13, 25) Gake elɔ̃ faa dzo le aƒe nyui ma me ale be yeate ŋu awɔ geɖe na Yehowa. Gbãa, eyi Antiokia. Eyome ekplɔ Paulo kple Barnaba ɖo zɔ mɔ yi didiƒewo. (Dɔw. 13:​1-5) Nenema kee anɔ eme be Timoteo hã nɔ edzilawo gbɔ esime Paulo kpee be wòava kpe ɖe ye ŋu le gbeƒãɖeɖedɔa me. Esi ɖekakpui dzaa ko Timoteo nye ta la, ate ŋu asusui be nuteƒekpɔkpɔ mesu ye si be yeawɔ dɔ kple Paulo o. (Tsɔe sɔ kple 1 Korintotɔwo 16:​10, 11 kple 1 Timoteo 4:12.) Gake elɔ̃ faa be yeawɔ dɔ kple Paulo eye esia na wòkpɔ yayra geɖe.—Dɔw. 16:​3-5.

3. (a) Aleke gbegbee Paulo de asixɔxɔ Marko kple Timoteo ŋui? (2 Timoteo 4:​6, 9, 11) (Kpɔ nɔnɔmetataawo hã.) (b) Biabia kawo mee míadzro le nyati sia me?

 ³ Nuteƒekpɔkpɔ geɖe va su Marko kple Timoteo si, eye wosrɔ̃ ale si woatsɔ agbanɔamedzi kpekpewo le woƒe sɔhɛ me. Paulo de asixɔxɔ ɖekakpui siawo ŋu ale gbegbe be esime wòva nya be madidi o woawu ye la, ebia be woava ye gbɔ. (Xlẽ 2 Timoteo 4:​6, 9, 11.) Nɔnɔme nyui kawoe nɔ Marko kple Timoteo si si na Paulo lɔ̃ wo vevie heka ɖe wo dzi? Aleke nɔviŋutsu sɔhɛwo ate ŋu asrɔ̃ woƒe nɔnɔme? Eye aleke aɖaŋu si Paulo ɖo la ate ŋu aɖe vi na sɔhɛwo egbea?

SRƆ̃ MARKO—LƆ̃ FAA NÀSUBƆ AMEWO

4-5. Aleke Marko ɖee fia be yedi vevie be yeakpe ɖe amewo ŋu?

⁴ Numekugbalẽ aɖe ɖe nu si wòfia be woasubɔ amewo gɔme be ate ŋu afia be ame naku kutri vevie akpe ɖe amewo ŋu eye wòayi edzi anɔ kpekpem ɖe wo ŋu ne esia wɔwɔ sesẽ gɔ̃ hã. Marko ɖo kpɔɖeŋu nyui le esia me. Esi Paulo melɔ̃ be Marko nakplɔ ye ɖo le dutanyanyuigbɔgblɔ mɔzɔzɔ evelia me o la, anya te ɖe Marko dzi vevie eye dzi aɖe le eƒo. (Dɔw. 15:​37, 38) Gake esia mena Marko gbe be yemagasubɔ nɔviawo o.

⁵ Marko lɔ̃ faa kplɔ eƒe ƒometɔ Barnaba ɖo woyi ɖasubɔ le teƒe bubu. Anɔ abe ƒe 11 ene megbe esi wolé Paulo de gaxɔ me le Roma la, Marko hã yi ɖade dzi ƒo nɛ. (Filem. 23, 24) Le nyateƒe me la, Paulo kpɔ ŋudzedze ɖe kpekpeɖeŋu si Marko nɛ ŋu ale gbegbe be egblɔ be ‘eva zu akɔfafa gã aɖe na ye.’—Kol. 4:​10, 11.

6. Esi Marko de ha kple Kristotɔ kpɔnuteƒewo la, aleke wòɖe vi nɛ? (Kpɔ etenuŋɔŋlɔa.)

⁶ Esi Marko dea ha kple Kristotɔ tsitsi wɔnuteƒewo ta la, nuteƒekpɔkpɔ nyui geɖewo su esi. Marko kpe asi ɖe Paulo ŋu ɣeyiɣi aɖe le Roma, eyome eyi ɖakpe ɖe apostolo Petro hã ŋu le Babilon. Petro kple Marko dome va nɔ kplikplikpli ale gbegbe be Petro yɔe be “vinye Marko.” (1 Pet. 5:13) Esime wo ame evea nɔ dɔ wɔm ɖekae la, anɔ eme be Petro gblɔ nu dodzidzɔname siwo dzɔ esime wònɔ Yesu ŋu la ŋu nya na Marko tsitotsito, eye  Marko ŋlɔ nya mawo ɖe Nyanyuigbalẽ si ŋu eƒe ŋkɔ le la me. a

7. Aleke nɔviŋutsu Seung-Woo srɔ̃ Marko ƒe kpɔɖeŋua esime wònye sɔhɛ? (Kpɔ fotoa hã.)

⁷ Marko do vevie Yehowa subɔsubɔ eye wònɔ Kristotɔ siwo tsi le xɔse me la ŋu kplikplikpli. Aleke nàte ŋu asrɔ̃ Marko? Ðewohĩ èdi be yeawɔ geɖe le Yehowa subɔsubɔ me anye subɔsubɔdɔwɔla alo hamemetsitsi, gake mèkpɔ dze na subɔsubɔmɔnukpɔkpɔ ma haɖe o. Ne nenemae la, dzi megaɖe le ƒowò o. Di mɔ vovovo siwo dzi nàte ŋu ato asubɔ nɔviawo eye nàwɔ geɖe na Yehowa. Bu nu si me nɔviŋutsu Seung-Woo si nye hamemetsitsi fifia to ŋu kpɔ. Esime wònye sɔhɛ la, etsɔ eɖokui sɔna kple sɔhɛ bubu siwo le hamea me. Subɔsubɔmɔnukpɔkpɔwo su wo dometɔ aɖewo si do ŋgɔ nɛ. Seung-Woo se le eɖokui me be yemele vevie le hamea me o eye mlɔeba egblɔ eƒe dzimenyawo na hamemetsitsiawo. Wo dometɔ ɖeka ɖo aɖaŋu nɛ be wòalɔ̃ faa atsɔ eɖokui ana akpe ɖe amewo ŋu ne ame bubuwo mede dzesii o gɔ̃ hã. Aɖaŋuɖoɖo sia ʋã Seung-Woo wòtsɔ eɖokui na be yeakpe ɖe ame tsitsiwo kple nɔvi bubu siwo hiã kpekpeɖeŋu be woate ŋu anɔ kpekpeawo dem la ŋu. Seung-Woo gblɔ be: “Meva se nu si wòfia be woasubɔ amewo la gɔme ŋutɔŋutɔ. Mekpɔ dzidzɔ ŋutɔ elabe metsɔ ɖokuinye na faa kpe ɖe amewo ŋu.”

SRƆ̃ TIMOTEO—ÐEE FIA BE YETSƆ ÐE LE EME NA AMEWO

8. Nu ka tae Paulo tia Timoteo be wòazɔ mɔ kpli ye? (Filipitɔwo 2:​19-22)

⁸ Paulo hiã na zɔhɛ siwo ƒo dzi le ale be woazɔ mɔ kplii ayi du siwo me woti eyome le va yi. Gbãa, Paulo tia Kristotɔ kpɔnuteƒe aɖe si ŋkɔe nye Sila be wòakpe ɖe ye ŋu. (Dɔw. 15:​22, 40) Eyome etia Timoteo hã be wòawɔ dɔ kpli ye. Nu kae ɖe dzesi le Timoteo ŋu? Ðekae nye be nɔviwo ƒoa nu nyui tso eŋu. (Dɔw. 16:​1, 2) Azɔ hã Timoteo tsɔ ɖe le eme na amewo vevie.—Xlẽ Filipitɔwo 2:​19-22.

9. Aleke Timoteo ɖee fia be yetsɔ ɖe le eme na nɔviawo vevie?

⁹ Tso esime Timoteo dze subɔsubɔdɔa gɔme kple Paulo la, Timoteo ɖee fia be ame bubuwo ƒe nyonyo le vevie na ye wu ye ŋutɔ tɔ. Esia tae Paulo ka ɖe edzi eye wògblẽe ɖe Beroia be wòade dzi ƒo na nusrɔ̃la yeye siwo le afi ma ɖo. (Dɔw. 17:​13, 14) Sila hã tsi Beroia ɣemaɣi, eya ta anɔ eme be Timoteo srɔ̃ nu geɖe tso egbɔ. Emegbe Paulo dɔ Timoteo ɖeka be wòayi  Tesalonika aɖado ŋusẽ Kristotɔ siwo le afi ma. (1 Tes. 3:2) Le ƒe 15 siwo kplɔe ɖo me la, Timoteo va lɔ̃ nɔviawo ale gbegbe be esea veve ɖe wo nu eye ‘wòfaa avi kple ame siwo le avi fam’ gɔ̃ hã. (Rom. 12:15; 2 Tim. 1:4) Aleke Kristotɔ sɔhɛwo ate ŋu asrɔ̃ Timoteo?

10. Nu kae kpe ɖe nɔviŋutsu Woo Jae ŋu wòva srɔ̃ ale si wòatsɔ ɖe le eme na amewo?

¹⁰ Nɔviŋutsu aɖe si ŋkɔe nye Woo Jae srɔ̃ ale si wòatsɔ ɖe le eme na nɔviawo geɖe wu. Esime Woo Jae nye sɔhɛ la, esesẽna nɛ be wòaɖo dze kple nɔvi siwo tsi wui. Eya ta ne wova Fiaɖuƒe Akpataa me la, ɖeko wòdoa gbe na wo ko adzo. Hamemetsitsi aɖe ɖo aɖaŋu nɛ be ne ete ɖe nɔviawo ŋu la, nedo ŋgɔ wòagblɔ nu siwo dzɔa dzi nɛ tso nɔviawo ŋu la na wo, eye esia ana wòanɔ bɔbɔe be wòaɖo dze kpli wo. Hamemetsitsia de dzi ƒo nɛ hã be wòabu nu siwo me nɔviawo tsɔ ɖe le la ŋu. Woo Jae wɔ ɖe hamemetsitsia ƒe aɖaŋuɖoɖoawo dzi. Fifia enye hamemetsitsi. Egblɔ be: “Ele bɔbɔe nam fifia be maɖo dze tuameɖowo kple ame siwo xɔ ƒe vovovo. Meda akpe be azɔ la, menya nu siwo me tom ame bubuwo le. Esia kpena ɖe ŋunye menyana nu si tututu nɔviawo hiã kple nu si mawɔ atsɔ akpe ɖe wo ŋu.”

11. Aleke nɔviŋutsu sɔhɛwo awɔ asrɔ̃ ale si woatsɔ ɖe le eme na amewo le hamea me? (Kpɔ fotoa hã.)

¹¹ Nɔviŋutsu sɔhɛwo, miawo hã miate ŋu asrɔ̃ ale si miatsɔ ɖe le eme na amewo. Le kpekpeawo la, mite ɖe ame vovovowo ŋu miaɖo dze kpli wo, ɖeviwo kple tsitsiawo siaa. Bia wo ale si nuwo le yiyim na wo eye nàɖo to wo nyuie. Ne èwɔa esia la, àva de dzesi nu siwo nàwɔ atsɔ akpe ɖe wo ŋu. Ðewohĩ àva de dzesii be ame tsitsi aɖewo hiã kpekpeɖeŋu be woate ŋu azã JW Library^® dɔwɔnua. Alo àva de dzesii be womewɔ ɖoɖo kple ame aɖeke be yewoayi gbeadzi o. Ðe nàte ŋu akpe ɖe ame siawo ŋu woanya ale si woazã woƒe mɔ̃wo nyuie alo awɔ ɖoɖo kpli wo miayi gbeadzia? Ne èɖoe ɖokuiwò dzi kpena ɖe amewo ŋu le mɔ siawo nu la, ànye kpɔɖeŋu nyui na ame bubuwo le hamea me.

NA AÐAŊU SI PAULO ÐO NAÐE VI NA WÒ

12. Nu kae nɔviŋutsu sɔhɛwo awɔ be aɖaŋu si Paulo ɖo na Timoteo naɖe vi na wo?

¹² Paulo ɖo aɖaŋu nyuiwo na Timoteo siwo akpe ɖe eŋu wòakpɔ dzidzɔ le agbe me eye wòakpɔ dzidzedze le subɔsubɔdɔa me. (1 Tim. 1:18; 2 Tim. 4:5) Ne nɔviŋutsu sɔhɛe nènye la, nu kae nàwɔ be aɖaŋuɖoɖo mawo naɖe vi na wò hã? Xlẽ lɛta eve siwo Paulo ŋlɔ na Timoteo la  beléletɔe abe wòe wòŋlɔe na ene, eye nàkpɔ ale si nàwɔ eŋu dɔ le wò agbenɔnɔ me. Na míadzro aɖaŋuɖoɖo mawo dometɔ aɖewo me.

13. Nu kae akpe ɖe mía ŋu míayi edzi awɔ nu siwo dzea Yehowa ŋu?

¹³ ‘Tsɔ mawusosroɖa nɔ ɖokuiwò mlam.’ (1 Tim. 4:7b) Nu kae nye mawusosroɖa? Efia ale si ame aku ɖe Mawu ŋu goŋgoŋ ahawɔ nu siwo dzea eŋu. Womedzi ame aɖeke kple mawusosroɖa o, eya ta ele be míasrɔ̃e. Aleke míate ŋu awɔ esia? Helagbe me nya si gɔme woɖe be ‘mla ɖokuiwò’ nye nya si wozãna zi geɖe tsɔ ɖɔa ale si kamedefefewɔlawo dea kame vevie tsɔ dzrana ɖo ɖe hoʋiʋli ŋu. Ehiã be kamedefefewɔla natu nɔnɔme vevi aɖewo ɖo eye wòaɖu eɖokui dzi le nu geɖe me. Nenema kee wòle be míawo hã míatsɔ mawusosroɖa amla mía ɖokui le mɔ sia nu be míatu nɔnɔme nyui siwo ana míate ɖe Yehowa ŋu kplikplikpli la ɖo.

14. Ne míele Biblia xlẽm la, nu kae wòle be wòanɔ vevie na mí? Wɔ eƒe kpɔɖeŋu.

¹⁴ Ele vevie be nàna Biblia xexlẽ gbe sia gbe nazu numame na wò eye nàɖo ŋku edzi be susu vevi si ta yele esia wɔm ɖoe nye be yeate ɖe Yehowa ŋu. Le kpɔɖeŋu me, tsɔe be èxlẽ Marko 10:​17-22 si ku ɖe Yesu kple ɖekakpui kesinɔtɔa ŋu. Bia ɖokuiwò be, ‘Nu kae esia fiam tso Yehowa ŋu?’ Ðekakpui kesinɔtɔa ka ɖe edzi be Yesue nye Mesia la, gake xɔse menɔ esi wòdze eyome o. Togbɔ be ele alea hãa, Yesu ‘lɔ̃e.’ Ðe ale si Yesu ƒo nu na ɖekakpuia mewɔ dɔ ɖe dziwò ŋutɔ oa? Nyateƒee, ale si Yesu wɔ nu ɖe ɖekakpuia ŋu na wòdze ƒãa be edi be ɖekakpuia natso nya me nyuie ava subɔ Yehowa. Eɖee fia hã be Yehowa lɔ̃ ɖekakpuia. (Yoh. 14:9) Esi nèle nudzɔdzɔ sia ŋu bum la, bu wò nɔnɔmea hã ŋu eye nàbia ɖokuiwò be, ‘Nu kae wòle be mawɔ be nye kple Yehowa dome naganɔ kplikplikpli wu eye masubɔ nɔviawo geɖe wu?’

15. Nu ka tae wòle vevie be nɔviŋutsu sɔhɛwo naɖo kpɔɖeŋu nyui? Wɔ eƒe kpɔɖeŋu. (1 Timoteo 4:​12, 13)

¹⁵ Nye “kpɔɖeŋu na nuteƒewɔlawo.” (Xlẽ 1 Timoteo 4:​12, 13.) Esi Paulo de dzi ƒo na Timoteo be wòado vevie nuxexlẽ kple nufiafia la, egblɔ nɛ hã be wòatu nɔnɔme nyuiwo abe lɔlɔ̃ kple xɔse ene ɖo, eye wòanɔ agbe nyui. Nu ka tae? Elabena amewo dea dzesi míaƒe agbenɔnɔ nyui wu nya siwo míegblɔna. Tsɔe be wode dɔ asiwò be nàƒo nuƒo tso ale si míatsɔ dzo ɖe gbeƒãɖeɖedɔa ŋu la ŋu. Ne ènye ame si tsɔa dzo ɖe gbeƒãɖeɖedɔa ŋu la, ke anɔ bɔbɔe be dzi nanɔ ƒowò nàƒo nu tso nyati ma ŋu. Esia ana wò nuƒoa naʋã amewo be woatsɔ dzo ɖe gbeƒãɖeɖedɔa ŋu.—1 Tim. 3:13.

16. (a) Nu atɔ̃ kawo mee Kristotɔ sɔhɛwo ate ŋu anye kpɔɖeŋu nyui le? (b) Aleke nɔviŋutsu sɔhɛ awɔ ava nye kpɔɖeŋu nyui “le nuƒoƒo me”?

¹⁶ Le 1 Timoteo 4:12 la, Paulo yɔ nu atɔ̃ siwo me nɔviŋutsu sɔhɛwo naɖo kpɔɖeŋu nyui le. Ðe manyo be nàsrɔ̃ nu tso wo dometɔ ɖe sia ɖe ŋu le wò ɖokuisinusɔsrɔ̃ me oa? Le kpɔɖeŋu me, tsɔe be èdi be yeanye kpɔɖeŋu nyui “le nuƒoƒo me.” Nu kae akpe ɖe ŋuwò? De ŋugble le nya siwo nàgblɔ atsɔ ade dzi ƒo na amewo ŋu. Ðe manyo be nànɔ akpe dam na dziwòlawo ɖe nu nyui siwo wɔm wole na wò la ta oa? Ne miekpa le kpekpeawo la, ɖe manyo be nàte ɖe ame siwo wɔ dɔdeasiwo la dometɔ aɖe ŋu agblɔ nu si do dzidzɔ na wò le eƒe dɔa ŋu la nɛ oa? Azɔ hã àte ŋu adze agbagba be yeanɔ nya ŋu ɖom le wò ŋutɔ wò nyagbewo me. Ne èkua kutri be  yeanye kpɔɖeŋu nyui le nuƒoƒo me la, wò ŋgɔgbedede adze ƒãa na amewo katã.—1 Tim. 4:15.

17. Nu kae akpe ɖe nɔviŋutsu sɔhɛ ŋu wòaɖo eƒe taɖodzinuwo gbɔ? (2 Timoteo 2:22)

¹⁷ “Si le sɔhɛmenɔɣi ƒe nudzodzrowo nu, ke boŋ ti dzɔdzɔenyenye . . . yome.” (Xlẽ 2 Timoteo 2:22.) Paulo ɖo aɖaŋu na Timoteo be wòaƒo asa na nu siwo mana wòaɖo eƒe taɖodzinuwo gbɔ o kple nu siwo agblẽ eya kple Yehowa dome. Ðewohĩ àkpɔe be nuwɔna aɖewo siwo menye nu gbegblẽ o ate ŋu awɔe be màkpɔ ɣeyiɣi awɔ geɖe le Yehowa subɔsubɔ me o. Le kpɔɖeŋu me, bu ɣeyiɣi agbɔsɔsɔ si nèzãna ɖe kamedefefewo, Internet dzi hahoo kadoƒewo, kple videofefewo ŋu la ŋu kpɔ. Ðe nàte ŋu azã ɣeyiɣi mawo ƒe ɖe atsɔ awɔ dɔ na Yehowa alo akpe ɖe nɔviawo ŋua? Azɔ hã, àte ŋu akpe asi ɖe eŋu alé be na Fiaɖuƒe Akpataa alo anɔ dutoƒoɖaseɖiɖi kekevia gbɔ. Ne èwɔa nu siawo la, àdze xɔlɔ̃ yeye siwo akpe ɖe ŋuwò nàɖo wò taɖodzinuwo gbɔ.

ÀKPƆ YAYRA GEÐE NE ÈTSƆ ÐOKUIWÒ NA SUBƆ NƆVIAWO

18. Yayra kawoe Marko kple Timoteo kpɔ?

¹⁸ Marko kple Timoteo tsɔ nu geɖe sa vɔe ale be yewoate ŋu asubɔ nɔviawo bliboe. Esia na Yehowa yra wo, eye wokpɔ dzidzɔ kple dzidzeme geɖe le agbe me. (Dɔw. 20:35) Marko zɔ mɔ yi teƒe didiwo vae kpe ɖe nɔviwo ŋu. Mɔnukpɔkpɔ su esi wòŋlɔ nu dodzidzɔnamewo tso Yesu ƒe agbenɔnɔ kple subɔsubɔdɔa ŋu. Timoteo hã kpe ɖe Paulo ŋu woɖo hame geɖe eye wode dzi ƒo na nɔviawo. Edze ƒãa be Yehowa kpɔ ŋudzedze ɖe ɖokuitsɔtsɔsavɔ ƒe gbɔgbɔ si Marko kple Timoteo ɖe fia ŋu.

19. Nu ka tae wòle be nɔviŋutsu sɔhɛwo nawɔ ɖe aɖaŋu si Paulo ɖo na Timoteo dzi, eye aleke esia aɖe vi na wo le agbe me?

¹⁹ Ale si gbegbe Paulo lɔ̃ exɔlɔ̃a Timoteo dze le lɛta siwo wòŋlɔ nɛ me. Lɛta mawo hã ɖee fia be Yehowa lɔ̃ mi nɔviŋutsu sɔhɛwo ale gbegbe. Edi be miakpɔ dzidzedze le ye subɔsubɔ me. Eya ta miɖoe kplikpaa miawɔ ɖe Paulo ƒe aɖaŋuɖoɖoawo dzi, eye mialɔ̃ faa asubɔ nɔviawo geɖe wu. Ne miewɔe alea la, miakpɔ dzidzɔ kple dzidzeme le agbe me fifia eye le etsɔme la, ‘miaƒe asi asu agbe vavã la dzi.’—1 Tim. 6:​18, 19.