Biblia gblɔ be Goliat kɔ “abɔklugui ade kple asi ɖeka.” (1 Samuel 17:4) Abɔklugui si wowɔnɛ la le sentimeta 44 kple afã, eye asi ɖeka la hã nye sentimeta 22 kple nu vi aɖe. Ne wobu akɔnta la, eƒe kɔkɔme ade meta 3 kloe. Ame aɖewo tea tɔ ɖe edzi be Goliat mate ŋu akɔkɔ nenema gbegbe o, gake bu nya sia ŋu kpɔ: Egbea la, ame si kɔkɔ wu le xexea me la ƒe kɔkɔmee nye meta 2 kple sentimeta 70. Esia fia be Goliat kɔkɔ wu ame ma sentimeta 15. Ðe esia mate ŋu adzɔ oa? Refaim ƒe dzidzimeviwo, siwo nye ame dzɔtsuwo la domee Goliat dzɔ tso. Egiptetɔwo ƒe nuŋlɔɖi aɖe si li tso ƒe alafa 13 lia Do Ŋgɔ Na Yesu (D.Y.) me la gblɔ be aʋawɔla dziŋɔ aɖewo nɔ Kanaan-nyigba dzi, siwo kɔkɔ wu meta 2 kple sentimeta 40. Esia fia be togbɔ be Goliat ƒe kɔkɔme mebɔ o hã la, esia menye nu si mate ŋu adzɔ o.

Tsã la, agbalẽnyala aɖewo nɔ gbɔgblɔm be Fia David aɖeke menɔ anyi kpɔ o, eye wogblɔna be eŋutinyawo nye nyakpakpawo, gake fifia, asesẽ be woagblɔ nya ma. Nu si tae nye be, blemaduwo nɔƒe kulawo ke ɖe nuŋɔŋlɔ si nye “David ƒe aƒe,” si woɖe ɖe kpe dzi tso blema ke la ŋu. Gakpe ɖe eŋu la, Yesu Kristo ƒo nu tso David ŋu be enye ame si nɔ anyi kpɔ. (Mateo 12:3; 22:43-45) Dzidzimenuŋlɔɖi vovovo eve, siwo me woyɔ dzidzimeawo le tsitotsito la, ɖo kpe edzi be Yesue nye Mesia la, eye nuŋlɔɖiawo ɖee fia be Fia David ƒe ƒomea mee wòdzɔ tso. (Mateo 1:6-16; Luka 3:23-31) Eme kɔ ƒãa be David nye ame si nɔ anyi kpɔ vavã.

Biblia gblɔ be Ela Bali la mee wowɔ aʋaa le. Gake egagblɔ nya bubuwo tsɔ ɖɔ afi si tututu aʋaa dzɔ le esi wògblɔ be Filistitɔwo ƒu asaɖa anyi ɖe togbɛ aɖe ŋu le du eve siwo nye Soko kple Azeka dome. Israel viwo hã ƒu asaɖa anyi ɖe balia ƒe go kemɛ dzi le togbɛa ŋu. Teƒe siwo li ŋutɔŋutɔwoe wonyea?

Nya si ame aɖe si ɖi tsa yi afi ma nyitsɔ laa la gblɔe nye esi: “Ame si kplɔ mí tsae le nutoa me la kplɔ mí yi Ela Bali la me, gake eya ŋutɔ nye ame aɖe si metsɔ ɖeke le mawusubɔsubɔnyawo me o. Míeto afɔmɔ aɖe dzi lia togbɛ aɖe yi etame. Esi míenɔ balia me kpɔm ɖaa la, ena míexlẽ 1 Samuel 17:1-3. Eyome, efia asi teƒe aɖe le balia megbe ɖaa hegblɔ be: ‘Du si zu aƒedo le miame ɖaa lae woyɔna be Soko le blema.’ Azɔ, efia asi akpa bubu hegblɔ be, ‘Du si woyɔna be Azeka lae nye ema le ɖusime ɖaa. Filistitɔwo ƒu asaɖa anyi ɖe teƒe aɖe le du eve mawo dome, le togbɛ siwo dze ŋgɔ mi la gbɔ lɔƒo. Ema afia be míele tsitre ɖe afi si Israel viwo ƒu asaɖa anyi ɖo.’ Mekpɔe ɖaa le susu me be afi si metɔ ɖo lae Saul kple David nɔ tsitre ɖo. Eyome míeɖi tso togbɛa dzi ge ɖe balia me, eye míetso tɔʋu si ƒu keŋkeŋ kloe, si me kpewo le fũu. Ɣemaɣi tututu la, ɖeko nye susu yi David dzi be eyae nye ema bɔbɔ le kpe zɔzrɔ̃e atɔ̃ siwo dometɔ ɖeka wòtsɔ wu Goliat la fɔm.” Esi tsaɖila sia kple tsaɖila bubuawo kpɔe be Biblia ƒe ŋutinyaa sɔ pɛpɛpɛ kple nu siwo kpɔm yewole la, ewɔ dɔ ɖe wo dzi ale gbegbe.

Susu aɖeke meli si tae ame aɖe nake ɖi be ŋutinya sia menye nyateƒe o. Eku ɖe ame siwo nɔ anyi kpɔ kple teƒe siwo li ŋutɔŋutɔ ŋu. Esi gale vevie wue nye be, ŋutinya sia nye Mawu ƒe Nya si tso gbɔgbɔ me la ƒe akpa aɖe, eya ta nyateƒe Mawu, Ame si “mate ŋu aka aʋatso o” la gbɔe wòtso.—Tito 1:2; 2 Timoteo 3:16.