MENYE aleae Mawu ɖoe be agbea nanɔ hafi o. Anye ne amegbetɔ siwo dea bubu Wɔlaa ƒe dziɖuɖu ŋu, siwo wɔna ɖe eƒe mɔfiamewo dzi, eye wosrɔ̃a Mawu ƒe lɔlɔ̃ kple nɔnɔme nyui bubuwo sɔŋ ye anɔ anyigbaa dzi hafi. Mawu di be woanɔ anyi le ɖekawɔwɔ me dzidzɔtɔe kple wo nɔewo esime wole viwo dzim, le kekem ɖe nu yeyewo ŋu, eye woana anyigba bliboa nazu paradiso.

• “[Atsi] aʋawɔwɔwo nu le anyigba bliboa dzi.”—Psalmo 46:9.

• “Ɣeyiɣi ɖoɖi la de be . . . nàtsrɔ̃ ame siwo le anyigba la gblẽm.”—Nyaɖeɖefia 11:18.

• “Dua me tɔ aɖeke magblɔ be, ‘Mele dɔ lém’ o.”—Yesaya 33:24.

• “Nye ame tiatiawo ase vivi na woawo ŋutɔwo ƒe asinudɔwɔwɔwo bliboe.”—Yesaya 65:22.

Aleke nyagblɔɖi siawo le eme va gee? Mawu tia Via Yesu, be wòanye fiaɖuƒe deblibo aɖe si aɖu dzi tso dziƒo ɖe anyigba dzi la ƒe Fia. Biblia yɔ fiaɖuƒe sia be Mawu Fiaɖuƒe. (Daniel 2:44) Biblia gblɔ tso Yesu ŋu be: ‘Mawu atsɔ fiazikpui la anɛ, eye aɖu Fia.’—Luka 1:32, 33.

Esime Yesu nɔ anyigba dzi la, ewɔ nukunu geɖe tsɔ ɖee fia be ne yeva le Fia ɖum la, yeana agbea nadze edzi na amegbetɔwo wu ale si wòle fifia.

• Eda dɔléle ɖe sia ɖe ƒomevi tsɔ ɖee fia be yeava ɖe lãmegbegblẽ ɖe sia ɖe ɖa.—Mateo 9:35.

• Ena atsiaƒu dze akɔ anyi tsɔ ɖee fia be yekpɔ ŋusẽ ɖe dzɔdzɔmeŋusẽwo dzi, be míava nɔ dedie.—Marko 4:36-39.

• Ena nuɖuɖu ame akpe geɖe tsɔ ɖee fia be yeava kpɔ míaƒe agbemenuhiahiã veviwo gbɔ.—Marko 6:41-44.

• Etrɔ tsi wòzu wain le srɔ̃ɖeƒe aɖe tsɔ ɖee fia be yeana amewo nase vivi na agbea le etsɔme.—Yohanes 2:7-11.

Aleke nàwɔ be agbe si ƒomevi Mawu di be ame siwo lɔ̃ ye nanɔ la nasu asiwò? “Mɔ” aɖe li si dzi wòle be nàzɔ. Biblia ɖɔ mɔ sia be enye “mɔ . . . si kplɔa ame yia agbe me, eye ame ʋɛ aɖewo koe kpɔnɛ.”—Mateo 7:14.

Nu kae nye agbemɔ la? Mawu gblɔ be: “Nye Yehowae nye wò Mawu, nyee nye ame si fiaa nu wò be wòaɖe vi na wò, Ame si kplɔa wò toa mɔ si dzi wòle be nàto.” (Yesaya 48:17) Mɔ sia dzi zɔzɔe ana wò asi nasu agbe vavã la dzi.

Yesu gblɔ be: “Nyee nye mɔ la kple nyateƒe la kpakple agbe la.” (Yohanes 14:6) Hafi míate ŋu ate ɖe Mawu ŋu akpɔ eme viɖewo la, ke ele be míaxɔ nyateƒenya siwo Yesu fia la dzi ase eye míasrɔ̃ kpɔɖeŋu nyui siwo wòɖo ɖi na mí la.

 Aleke nàwɔ ake ɖe agbemɔ la ŋu? Subɔsubɔhawo bɔ, gake Yesu xlɔ̃ nu be: “Menye ame sia ame si le gbɔgblɔm nam be, ‘Aƒetɔ, Aƒetɔ,’ ye ayi ɖe Dziƒofiaɖuƒe la me o, negbe ame si le Fofonye si le dziƒowo ƒe lɔlɔ̃nu wɔm la koe.” (Mateo 7:21) Eyi edzi gblɔ be: “Woƒe kutsetsewoe miatsɔ adze si woe.” (Mateo 7:16) Biblia ate ŋu akpe ɖe ŋuwò nàde dzesi subɔsubɔha vavãtɔ tso alakpatɔ gbɔ.—Yohanes 17:17.

Aleke nàwɔ ava zɔ agbemɔ la dzi? Ebia be nànya Ame si na agbe amewo katã: Ame kae wònye? Eŋkɔ ɖe? Aleke wòle? Nu ka wɔm wòle fifia? Nu kae wòdi tso mía si? *

Menye ɖeko Mawu wɔ amegbetɔwo be woawɔ dɔ, aɖu nu, aɖe modzaka, eye woadzi viwo dzro ko evɔ o. Míate ŋu anya mía Wɔlaa eye míanye exɔlɔ̃wo. Míate ŋu aɖee afia be míelɔ̃e ne míewɔa eƒe lɔlɔ̃nu. Yesu gblɔ be: “Esiae nye agbe mavɔ la bena woanya wò, Mawu vavã ɖeka la, kple Yesu Kristo si nèdɔ ɖa la.”—Yohanes 17:3.

Be ame ƒe nu nadze Mawu vavã ɖeka la ŋu la, ebia be wòawɔ tɔtrɔ aɖewo. Esia wɔwɔ ate ŋu asesẽ. Gake le nyateƒe me la, ne míedze agbagba ɖe afɔ gbãtɔ ma be míazɔ mɔ sia dzi la, ana dzi nadzɔ mí. Adzɔ dzi na Yehowa Ðasefowo be yewoakpe ɖe ŋuwò nàsrɔ̃ Biblia femaxee le ɣeyiɣi kple teƒe si asɔ na wò ale be nàkpɔ ŋuɖoɖo na nyabiase vevi siwo ku ɖe Mawu ŋu. Àte ŋu ayi míaƒe nyatakakadzraɖoƒe si nye www.jw.org abia be woava srɔ̃ Biblia kpli ye.