NU SI BIBLIA GBLƆ
Mesia La
Biblia gblɔe ɖi be Mesia la ava xexea me ahaɖe amewo tso dɔléle, fukpekpe kple ku si me. Yesu Kristoe nye Mesia la?
Aleke amewo awɔ anya ame si nye Mesia la?
Le Biblia me nyagblɔɖiwo nu la, dɔ siwo Mesia alo Kristo awɔ la ama ɖe akpa eve me, eye ƒe geɖe atso akpa eveawo dome. * Le dɔ siwo wòawɔ ƒe akpa gbãtɔ gome la, anye amegbetɔ. Biblia-ŋlɔlawo gblɔ Mesia la ƒe agbenɔnɔ kple eƒe subɔsubɔdɔa ƒe akpa geɖewo ɖi ale be amewo nate ŋu akpɔ eya amea adze sii bɔbɔe. Le nyateƒe me la, “ɖaseɖiɖi tso Yesu ŋu” koŋ ŋue Biblia me nyagblɔɖiwo ku ɖo.
Esi Yesu nye amegbetɔ la, ewɔ nukunu siwo wòava wɔ le xexea me godoo ne ezu gbɔgbɔmenuwɔwɔ triakɔ la ƒe akpa sue aɖe
NYA SI BIBLIA GBLƆ
Mesia la . . .
-
Anye Fia David ƒe dzidzimevi.
—Yesaya 9:7; Luka 3:23-31. * -
Woadzii le Betlexem.
—Mika 5:1; Luka 2:4-7. -
Anye “nya nyui” gblɔla ɖokuibɔbɔla.—Yesaya 61:1; Luka 4:43.
-
Anye ame si woalé fui eye woado vloe.
—Yesaya 53:3; Mateo 26:67, 68. -
Woadee asi axɔ klosalo 30.
—Zakariya 11:12, 13; Mateo 26:14, 15. -
Azi kpi kpoo le enutsolawo ŋkume ne wotso kufia nɛ madzemadzee.—Yesaya 53:6, 7; Mateo 27:12-14.
-
Anye “alẽvi” si woatsɔ asa vɔ ɖe amegbetɔwo ƒe nu vɔ̃wo ta ale be woate ŋu anɔ dzadzɛe le Mawu ŋkume.—Yesaya 53:7; Yohanes 1:29, 34, 36.
-
Woawui gake womaŋe eƒe ƒu aɖeke o.
—Psalmo 34:21; Yohanes 19:33, 36. -
Woaɖii ɖe kesinɔtɔwo dome.
—Yesaya 53:9; Mateo 27:57-60. -
Woafɔe ɖe tsitre le ŋkeke etɔ̃a gbe.
—Mateo 16:21; 28:5-7.
Nyagblɔɖi siawo kple bubu geɖewo va eme ɖe Yesu dzi. Eda dɔ na dɔnɔwo hefɔ ame kukuwo hã. To esia wɔwɔ me la, ena míekpɔe dze sii kɔtɛe be eyae nye Mesia la, eye wògana míekpɔ kpeɖodzi sẽŋuwo be nu siwo ŋugbe wodo le Biblia me be ava wɔ le xexea me godoo la ava eme godoo le etsɔme. (Luka 7:21-23; Nyaɖeɖefia 21:3, 4) Esi wofɔ Yesu ɖe tsitre megbe la, eyi ɖanɔ Mawu ƒe “nuɖusi me” hele lalam be yeawu yeƒe dɔ nu abe Mesia ene.
“Ne Kristo la va la, mawɔ dzesi siwo lolo wu esiwo wɔm ŋutsu sia le o ɖe, miekpɔe nenema oa?”—Yohanes 7:31.
Aleke Mesia la awu eƒe dɔa nui?
Yudatɔ siwo nɔ anyi le Yesu ƒe ŋkekea me nɔ mɔ kpɔm be Mesia la ava ɖe yewo tso Romatɔwo te eye wòagbugbɔ Israel ƒe fiaɖuƒea aɖo anyi ahazu eƒe fia. (Dɔwɔwɔwo 1:6) Emegbe hafi Yesu yomedzela siwo nye Yudatɔwo va se egɔme be dziƒoe Yesu anɔ hafi awu dɔ si wòawɔ abe Mesia ene la nu, anye gbɔgbɔmenuwɔwɔ triakɔ si wona ŋusẽ geɖee.
NYA SI BIBLIA GBLƆ
Le dɔ siwo Mesia awɔ la ƒe akpa evelia gome la . . .
-
Anye Mawu Fiaɖuƒe, dziɖuɖu si aɖu anyigba bliboa dzi, la ƒe Fia.
—Daniel 7:13, 14; Nyaɖeɖefia 11:15. -
Ahe yayrawo vɛ na ame siwo katã xɔ edzi se.
—1 Mose 22:17, 18; Psalmo 72:7, 8. -
‘Ana dukɔ geɖewo kple woƒe fiawo ƒe nu naku’ ne etsrɔ̃ wo le esi wotsi tre ɖe eŋu ta.
—Yesaya 52:15; Nyaɖeɖefia 19:19, 20. -
Akpɔ ame dzɔdzɔewo ƒe “ameha gã” aɖe ta ahana woanɔ xexe yeye si me ŋutifafa anɔ la me.
—Nyaɖeɖefia 7:9, 10, 13-17. -
Akpe ɖe Yehowa ŋu woafɔ ame kukuwo ɖe tsitre woanɔ Paradiso me le anyigba dzi.
—Luka 23:43; Yohanes 5:21, 28, 29. -
Afia ŋutifafamɔ vavã la eteviwo.
—Yesaya 11:1, 2, 9, 10. -
Aɖe nu vɔ̃ si gbɔ dɔléle kple ku tso la ɖa.
—Yohanes 1:29; Romatɔwo 5:12. -
Agblẽ Satana ƒe dɔwɔwɔwo katã me eye wòana ameƒomea nawɔ ɖeka le Yehowa Mawu ƒe dziɖuɖu te.
—1 Korintotɔwo 15:25-28; 1 Yohanes 3:8.
Yesu wu dɔ siwo wòle be wòawɔ abe Mesia ene la ƒe akpa gbãtɔ nu. Awu akpa evelia hã nu godoo. Eya ta ame siwo dze aɖaŋu la srɔ̃a nu tso Yesu ŋu nyuie, elabe eya ŋutɔ gblɔ be: “Nyee nye mɔ la kple nyateƒe la kpakple agbe la.”
“Ekema ame dzɔdzɔe la amie le eƒe ŋkekewo me, eye ŋutifafa axɔ aƒe, vaseɖe esime dzinu maganɔ anyi o. Aɖu fia . . . ɖase ɖe anyigba ƒe mlɔenuwo ke.”
—Psalmo 72:7, 8.
^ mm. 5 “Mesia” nye Hebrigbe me nya. Eye eƒe Helagbe me tɔe nye “Kristo.”
^ mm. 7 Mawunyakpukpui siwo le akpa gbãtɔa nye nyagblɔɖiwo, eye esiwo le akpa evelia ku ɖe ale si nyagblɔɖiawo va emee ŋu.
Ɖewohĩ Esia Hã Adzɔ Dzi Na Wò
BIBLIA ME BIABIAWO ƑE ŊUÐOÐOWO
Ðe Nyagblɔɖi Siwo Ku Ðe Mesia Ŋu Ðo Kpe Edzi Be Yesue Nye Mesia La?
Ðe Mesia geɖe ate ŋu anɔ anyia, alo ɖeka ko?
GBETAKPƆXƆ
“Míekpɔ Mesia La”!
Ame geɖe xɔe se be Yesue nye Mesia si ŋugbe wodo la. Gake ame aɖewo mexɔe se o. Xlẽ nu tso nya si Biblia gblɔ ŋu.
