Wotsi Agbe Le Tsiɖɔɖɔ Aɖe Me!

Etso Nyɔ! ŋlɔla si le Switzerland Gbɔ

LE October 2000 me la, wose tsiɖɔɖɔwo ŋuti nyatakakawo tso xexeame ƒe teƒe geɖe. Tsi ɖɔ ɖe towo gɔme le tsidzadza gãwo ta, helɔ kpewo kple gbeɖuɖɔwo ɖe nu hoo eye ati siwo ho kple ke gɔ̃ hã nɔ tsia ŋgɔ!

Anyiehe Switzerland ƒe nuto si nye Valais ye nya sia dzɔ le. Rhône, si nye tɔsisi aɖe si sina tsoa Rhône tsikpe siwo le Alps-to Titina dzi heɖoa ta ɣetoɖoƒe gome heva de nu Geneva-ta me la, ma nuto sia—si ƒe didime anye kilometa 170—me tso dzi va anyi. Tsi sina toa ʋe vovovo siwo le toawo ŋu me gena ɖe tɔsisia me. Zi geɖe la, tsi sina toa tsimɔ siawo me blewu. Gake ne tsi dza fũ heɖɔ ɖe teƒe bliboa la, ehea afɔku vɛ zi geɖe.

Nusia tututue dzɔ le Gondo, le Italy de dzi. Tsi kplɔ ba kple kpewo va ƒu kɔƒedu sia si le to dzi, si me ame 150 le la hegblẽ nu le dua ƒe akpa gã aɖe ŋu. Eteƒe medidi o Valais-nutoa ƒe akpa bubuwo hã ɖɔ, le tsidzadza gãwo ta. Lɔrimɔwo kple ketekemɔwo xe eye ba kple kpewo te kɔlili ɖe aƒewo me. Ba li kɔ ɖe teƒe aɖewo kɔkɔ yi yame meta 4 sɔŋ. Nyɔnu aɖe kpɔ batsi si kɔkɔ yi yame meta 30 kple edzivɔ lɔ kpe gãwo kpakple ati siwo ho kple ke ɖe nu hoo ɖo ta woƒe du mee!

Markus kple Tabitha, siwo nye srɔ̃tɔwo la nɔ Mörel esime nyaa dzɔ. Markus gblɔ be: “Esi ŋdi ga 6:00 ƒo to eŋu vie ko la, nane ƒe ɖiɖi hoo kple teƒea ƒe ʋuʋu nyɔ mí le aba dzi. Metsɔ tɔtsi do ɖe xexe be makpɔ be nukae hã, eye nusi mekpɔ la tso dzika ƒo nam ŋutɔ. Kpe gãwo lɔ aƒewo kple tɔdzisasrãwo hegblẽ nu le wo ŋu, eye kaa aɖe va lɔ aƒelika aɖe ƒe aƒe ɖe nu gbloo. Le ŋgɔgbe vie la, dua me tɔ aɖe kple srɔ̃a xaxa ɖe woƒe aƒe me. Mekpe ɖe wo ŋu woto fesre do. Esi metrɔ gbɔ la, mía kple Tabitha míeƒo te nuzazã ʋɛ aɖewo kpatakpata.”

Markus kple Tabitha nye Yehowa Ðasefowo, eye wosi yi ɖe wo havi Ðasefo siwo nɔ afisi tsiɖɔɖɔa megblẽ nu le o la gbɔ. Markus gblɔ be: “Togbɔ be míetsi agbe hã la, nudzɔdzɔa na vɔvɔ̃ tsi lãme na Tabitha ŋkeke geɖe.” Nukae kpe ɖe eŋu wònɔ te ɖe nudzɔdzɔa ƒe ŋɔdziléame nu? Tabitha ɖo eŋu be: “Mía nɔviŋutsu kple nɔvinyɔnu haxɔsetɔwo ƒe kpekpeɖeŋu kple hadedee kpe ɖe ŋunye, nenema kee dua me tɔ geɖewo ƒe ɖetsɔleme si woɖe fia hã kpe ɖe ŋunyee.”

Esia na Markus kple Tabitha ɖo ŋku nya si le Lododowo 18:24 dzi, si gblɔ be: “Xɔlɔ̃ aɖewo kuna ɖe ame ŋu wu ame nɔvi gɔ̃ hã.” Aleke gbegbee xɔlɔ̃ siawo xɔ asi le afɔkudzɔɣiwo enye si!

[Anyigbatata si le axa 18]

(Edze nyuie le agbalẽa ŋutɔ me)

Nuto si ŋu tsiɖɔɖɔa gblẽ nu le

Gondo

[Nɔnɔmetata si le axa 18]

Markus kple Tabitha

[Nɔnɔmetata Tsoƒe si le axa 18]

Mise à disposition par www.crealp.ch