Mateo 28:1-20
28 Le sabat la megbe, esi xexea me nɔ kɔkɔm le kwasiɖaa ƒe ŋkeke gbãtɔ dzi la, Maria Magdalatɔ kple Maria kemɛ la va yɔdo la kpɔ ge ɖa.
2 Eye kpɔ ɖa! Anyigba ʋuʋu sesĩe; elabena Yehowa ƒe dɔla ɖi tso dziƒo, eye wòte va hemli kpe la ɖa, eye wòbɔbɔ nɔ anyi ɖe edzi.
3 Eƒe dzedzeme nɔ abe dzikedzo ene, eye eƒe awu fu tititi abe sno ene.
4 Ɛ̃, dzɔlawo dzo nyanyanya le dzidzi si ƒo wo le eyama ŋu la ta, eye wozu abe ame kukuwo ene.
5 Gake mawudɔla la gblɔ na nyɔnuawo be: “Migavɔ̃ o, elabena menya be Yesu si wohe ɖe ati ŋu la dimee miele.
6 Mele afi sia o, elabena wofɔe ɖe tsitre, abe ale si wògblɔe ene. Miva kpɔ afi si wotsɔe mlɔ la ɖa.
7 Eye miɖe abla yi ɖagblɔ na eƒe nusrɔ̃lawo be wofɔe ɖe tsitre tso ame kukuwo dome, eye kpɔ ɖa! Edze mia ŋgɔ yina Galilea; afi mae miakpɔe le. Kpɔ ɖa! Megblɔe na mi.”
8 Eye esi wotsɔ vɔvɔ̃ kple dzidzɔ gã aɖe wɔ kaba dzo le ŋkuɖodziyɔdoa gbɔ la, woƒu du yi ɖaka eta na eƒe nusrɔ̃lawo.
9 Eye kpɔ ɖa! Yesu va kpe wo hegblɔ be: “Medo gbe na mi!” Wote ɖe eŋu, eye wolé eƒe afɔwo hebɔbɔ nɛ.
10 Eye Yesu gblɔ na wo be: “Migavɔ̃ o! Miyi ɖaka eta na nɔvinyewo, be woayi Galilea; eye afi mae woakpɔm le.”
11 Esi wonɔ mɔa dzi yina la, kpɔ ɖa! Dzɔlaawo dometɔ aɖewo yi dua me, eye woka nu siwo katã dzɔ la ta na nunɔlawo ƒe tatɔwo.
12 Eye esi ame siawo kpakple amegãwo kpe ta hede adaŋu vɔ la, wona klosalo gbogbo aɖe asrafoawo
13 gblɔ be: “Migblɔ be, ‘Eƒe nusrɔ̃lawo va fii le zã me esime míenɔ alɔ̃ dɔm.’
14 Eye ne nya sia ɖo nutomefia ƒe to me la, míable enu, eye miaɖo nya me o.”
15 Eya ta woxɔ klosaloawo, eye wowɔ abe ale si wogblɔ na wo ene; eye nya sia kaka ɖe Yudatɔwo dome va se ɖe egbegbe.
16 Ke hã, nusrɔ̃la wuiɖekɛawo yi Galilea, le to si dzi Yesu wɔ ɖoɖo be yewoado go le la dzi,
17 eye esi wokpɔe la, wobɔbɔ nɛ, gake wo dometɔ aɖewo ke ɖi.
18 Eye Yesu te ɖe wo ŋu heƒo nu na wo gblɔ be: “Wotsɔ ŋusẽ katã nam le dziƒo kple anyigba dzi.
19 Eya ta miheyi ɖawɔ dukɔwo katã me tɔwo woanye nusrɔ̃lawo, mianyrɔ wo ɖe Fofo la kple Vi la kpakple gbɔgbɔ kɔkɔe la ƒe ŋkɔ me,
20 miafia nu wo be, woawɔ nu siwo katã ƒe se mede na mi la. Eye kpɔ ɖa! Meli kpli mi ŋkekeawo katã va se ɖe nuɖoanyia ƒe nuwuɣi.”
