Mateo 12:1-50
12 Ɣemaɣi la, Yesu zɔ to nukugbleawo me le sabat dzi. Dɔ wu eƒe nusrɔ̃lawo, eye wote nukuawo ŋeŋe nɔ ɖuɖum.
2 Esi Farisitɔwo kpɔ nu sia la, wogblɔ nɛ be: “Kpɔ ɖa! Wò nusrɔ̃lawo le nu si ŋu se meɖe mɔ ɖo be woawɔ le sabat dzi o la wɔm.”
3 Egblɔ na wo be: “Ðe miexlẽ nu si David wɔ, esime dɔ nɔ eya kple eŋutimewo wum la oa?
4 Ale si wòge ɖe Mawu ƒe aƒe la me, eye woɖu abolo siwo wotsɔ ɖoa Mawu ŋkume, evɔ se meɖe mɔ le eŋu nɛ be wòaɖui hafi o, eye meɖe mɔ na eŋutimewo hã o, negbe nunɔlawo ko oa?
5 Alo ɖe miexlẽ le Se la me be, le sabat ŋkekewo dzi la, nunɔla siwo subɔna le gbedoxɔa me la mebua sabat la abe nu kɔkɔe ene o, gake womebua fɔ wo o oa?
6 Gake mele egblɔm na mi be nane si lolo wu gbedoxɔa la le afii.
7 Ke hã, ne ɖe miese nu si nya sia fia gɔme, be: ‘Nublanuikpɔkpɔ dim mele, menye vɔsa o’ la, anye ne miebu fɔ ame maɖifɔwo o.
8 Elabena sabat ƒe Aƒetɔe Amegbetɔvi la nye.”
9 Esi wòdzo le afi ma la, eyi ɖe woƒe ƒuƒoƒe la;
10 eye kpɔ ɖa! Ŋutsu aɖe nɔ afi ma, si titi lé asi na. Eya ta wobiae be, “Ðe se ɖe mɔ be woada dɔ le sabat dzia?” ale be woakpɔ nutsotso aɖe le eŋu.
11 Egblɔ na wo be: “Mia dometɔ ka sie alẽ ɖeka anɔ, eye ne ege ɖe do me le sabat dzi la, malée aɖee ado goe o?
12 Ne miebu eŋu nyuie la, ɖe amegbetɔ mexɔ asi sãsãsã wu alẽ oa? Eya ta se ɖe mɔ be woawɔ nu nyui le sabat dzi.”
13 Azɔ egblɔ na ŋutsu la be: “Mlo asi.” Eye wòmloe, eye wòɖɔ ɖo nyuie abe asi kemɛa ene.
14 Gake Farisitɔwo do go, eye wode adaŋu ɖe eŋu, ne woawui.
15 Esi Yesu va nya esia la, edzo le afi ma. Ame geɖewo hã dze eyome, eye wòda gbe le wo katã ŋu,
16 gake ede se na wo vevie be woagana woanya ye o;
17 bene nya si wogblɔ ɖi to Yesaya nyagblɔɖila la dzi la nava eme, esi wògblɔ be:
18 “Kpɔ ɖa! Nye dɔla si metia, si gbɔ nyemelɔ̃a nu le o, si dze nye luʋɔ ŋu! Matsɔ nye gbɔgbɔ la ada ɖe edzi, eye ana dukɔwo nase nu si dzɔdzɔenyenye fia la gɔme.
19 Mahe nya o, mado ɣli o, eye ame aɖeke mase eƒe gbe le ablɔwo dzi hã o.
20 Maɖe aƒla si ŋe vɔ kloe la ɖa le enu o, eye matsi ɖovu bibi si le tsitsim la o, va se ɖe esime wòna dzɔdzɔenyenye ɖu dzi.
21 Vavãe, eƒe ŋkɔ ana mɔkpɔkpɔ nasu dukɔwo si.”
22 Eye wokplɔ ŋkuagbãtɔ aɖe si nye mumu, si me gbɔgbɔ vɔ̃ le la va egbɔ; eye wòda gbe le eŋu, eye mumu la ƒo nu hekpɔ nu.
23 Ale amehaawo katã ƒe nu ku, eye wote gbɔgblɔ be: “Manye David ƒe Vi lae nye esia oa?”
24 Esi Farisitɔwo se esia la, wogblɔ be: “Gbɔgbɔ vɔ̃wo ƒe fia Beelzebul dzie ame sia tona nyaa gbɔgbɔ vɔ̃wo.”
25 Esi wònya woƒe susuwo ta la, egblɔ na wo be: “Fiaɖuƒe ɖe sia ɖe si ma ɖe eɖokui ŋu la zua aƒedo, eye du alo aƒe ɖe sia ɖe si ma ɖe eɖokui ŋu la mate ŋu ali ke o.
26 Nenema kee ne Satana nyaa Satana la, ema ɖe eɖokui ŋu; ekema aleke eƒe fiaɖuƒe awɔ ali ke?
27 Eye ne Beelzebul dzie metona nyaa gbɔgbɔ vɔ̃wo la, ekema ame ka dzie mia viwo ya tona nyaa wo? Esia tae woazu miaƒe ʋɔnudrɔ̃lawo ɖo.
28 Ke ne Mawu ƒe gbɔgbɔ dzie metona nyaa gbɔgbɔ vɔ̃wo la, ekema Mawu fiaɖuƒe la ɖi ɖe mi ŋutɔŋutɔ.
29 Alo aleke ame aɖe awɔ age ɖe ame sesẽ aɖe ƒe aƒe me aha eƒe nuwo, ne mebla ame sesẽ la gbã hafi o? Ema ko hafi wòaha eƒe aƒea.
30 Ame si mele dzinye o la, tsia tsitre ɖe ŋunye, eye ame si meƒoa nu nu ƒu kplim o la, kakaa nu hlẽna.
31 “Esia ta mele egblɔm na mi be: Woatsɔ nu vɔ̃ kple busunyagbɔgblɔ ɖe sia ɖe ake amewo, gake womatsɔ busunya si wogblɔ ɖe gbɔgbɔ kɔkɔea ŋu ya ake o.
32 Le kpɔɖeŋu me, ame sia ame si ƒoa nu tsi tsitre ɖe Amegbetɔvi la ŋu la, woatsɔe akee; gake ame sia ame si ƒoa nu tsi tsitre ɖe gbɔgbɔ kɔkɔe la ŋu la, womatsɔe akee o, ao, womatsɔe akee le nuɖoanyi sia loo alo esi gbɔna la me o.
33 “Mina atia nanyo, ekema eƒe kutsetse hã anyo, alo mina atia navó, ekema eƒe kutsetse hã avó, elabena ati ƒe tsetsee wotsɔna dzea sii.
34 Mi dzakpatawo ƒe dzidzimeviwo, aleke miate ŋu agblɔ nya nyuiwo, esi mienye ame vɔ̃ɖiwo? Elabena nya si wu dzi la, eyae nu gblɔna.
35 Ame nyui hea nu nyuiwo doa goe tso eƒe nu nyui dzraɖoƒe, gake ame vɔ̃ɖi ɖea nu vɔ̃ɖiwo doa goe tso eƒe nu vɔ̃ɖi dzraɖoƒe.
36 Mele egblɔm na mi be nya dzodzro ɖe sia ɖe si amewo gblɔna la, woabu akɔnta le eŋuti le Ʋɔnudrɔ̃ŋkeke la dzi;
37 elabena wò nyawo dzie woanɔ te ɖo abu wò ame dzɔdzɔe, eye wò nyawoe woatsɔ abu fɔ wò.”
38 Eye agbalẽfialawo kple Farisitɔwo dometɔ aɖewo ɖo eŋu nɛ be: “Nufiala, míedi be nàwɔ dzesi aɖe míakpɔ.”
39 Eɖo eŋu na wo be: “Dzidzime vɔ̃ɖi wɔahasi aɖe yi edzi le dzesi dim, gake womele dzesi aɖeke na gee o, negbe nyagblɔɖila Yona ƒe dzesi la ko.
40 Elabena ale si Yona nɔ tɔmelã gã la ƒe dɔ me ŋkeke etɔ̃ kple zã etɔ̃ la, nenema kee Amegbetɔvi la hã anɔ anyigba ƒe tu me ŋkeke etɔ̃ kple zã etɔ̃.
41 Niniwetɔwo afɔ le ʋɔnudɔdrɔ̃ la me kpe ɖe dzidzime sia ŋu, eye woabu fɔe; elabena wotrɔ dzi me le nya siwo Yona ɖe gbeƒãe la ta; gake kpɔ ɖa! Nane si lolo wu Yona la le afii.
42 Woafɔ anyiehe fianyɔnu la ɖe tsitre le ʋɔnudɔdrɔ̃ la me kpe ɖe dzidzime sia ŋu, eye wòabu fɔe; elabena etso keke anyigba la seƒe ke va be yease Salomo ƒe nunya, gake kpɔ ɖa! Nane si lolo wu Salomo la le afii.
43 “Ne gbɔgbɔ makɔmakɔ aɖe do go le ame aɖe me la, etsana le teƒe siwo ƒu kplakplakpla nɔa gbɔɖemeƒe dim, eye mekpɔa ɖeke o.
44 Azɔ egblɔna be, ‘Matrɔ ayi nye aƒe si me medo go le la me’; eye ne eva ɖo la, ekpɔna be ele ƒuƒlu, gake wokplɔ eme heɖo atsyɔ̃ nɛ.
45 Azɔ eyina ɖakplɔa gbɔgbɔ vovovo adre bubu siwo vɔ̃ɖi wu eya ŋutɔ la kpe ɖe eɖokui ŋu, eye ne woyi ɖe eme vɔ la, wonɔa afi ma; eye ame ma ƒe nɔnɔme mlɔetɔwo va gblẽna ɖe edzi wu gbãtɔwo. Nenema kee wòanɔ na dzidzime vɔ̃ɖi sia hã.”
46 Esi wòganɔ nu ƒom na amehaawo la, kpɔ ɖa! Dadaa kple nɔviawo va tɔ ɖe xexe, nɔ didim be yewoaƒo nu kplii.
47 Eya ta ame aɖe gblɔ nɛ be: “Kpɔ ɖa! Dawò kple nɔviwòwo le tsitre ɖe xexe le didim be yewoaƒo nu kpli wò.”
48 Ke eɖo eŋu na ame si gblɔe nɛ la be: “Ame kae nye danye, eye ame kawoe nye nɔvinyewo?”
49 Eye esi wòfia asi eƒe nusrɔ̃lawo la, egblɔ be: “Kpɔ ɖa! Danye kple nɔvinyewoe nye esi!
50 Elabena ame sia ame si wɔa Fofonye si le dziƒo la ƒe lɔlɔ̃nu la, eyae nye nɔvinyeŋutsu kple nɔvinyenyɔnu kple danye.”
