Romatɔwo 11:1-36
11 Azɔ mele biabiam be: Mawu megbe eƒe dukɔa o ɖe, alo? Gbeɖe! Elabena Israel vi ye nye hã menye, tso Abraham ƒe dzidzimea me, tso Benyamin toa me.
2 Mawu megbe eƒe dukɔ, si ŋu wòtrɔ susu ɖo gbã la o. Alo ɖe mienya nu si Ŋɔŋlɔ la gblɔ tso Eliya ŋu, ale si wòɖe kuku na Mawu tsɔ tso Israel nu la oa?
3 “Yehowa, wowu wò nyagblɔɖilawo, wogbã wò vɔsamlekpuiwo, eye nye ɖeka koe susɔ, eye wole nye luʋɔ dim.”
4 Ke hã, nya kae Mawu ƒe nya la gblɔ nɛ? “Megblẽ ŋutsu akpe adre ɖi na ɖokuinye, ŋutsu siwo medze klo na Baal o.”
5 Eya ta nenema kee le fifi ɣeyiɣia me hã la, ame susɔe aɖewo li, le tiatia aɖe si wowɔ le amenuveve ta la nu.
6 Ke ne amenuveve tae la, ekema meganye dɔwɔwɔwo tae o; ne menye nenema o la, ke amenuveve la meganye amenuveve o.
7 Ekema nu kae? Nu si tututu Israel le didim vevie la, eƒe asi mesu edzi o, gake ame siwo wotia ya ƒe asi su edzi. Ame susɔeawo na woƒe dzi me sẽ;
8 abe ale si woŋlɔe ɖi ene be: “Mawu na alɔ̃dɔdɔ ayi eme ʋĩi ƒe gbɔgbɔ wo, ena ŋku wo bene woagakpɔ nu o, kple to wo bene woagase nu o, va se ɖe egbegbe.”
9 David hã gblɔ be: “Na woƒe kplɔ̃ nazu mɔ kple aza kple nukikli kpakple tohehe na wo;
10 na woƒe ŋkuwo nado viviti, bene woagakpɔ nu o, eye na woƒe dzi me naxa gobaa ɣesiaɣi.”
11 Eya ta mele biabiam be: Ðe wokli nu, si wɔe be wodze anyi keŋkeŋua? Gbeɖe! Ke boŋ woƒe afɔ baɖa ɖeɖe la zu ɖeɖe na dukɔwo me tɔwo, bene wòana woaʋã ŋu.
12 Ke ne woƒe afɔ baɖa ɖeɖe la zu kesinɔnuwo na xexea, eye wo dzi si ɖe kpɔtɔ la zu kesinɔnu na dukɔwo me tɔwo la, ekema ɖe woƒe xexlẽme blibo la mazui geɖe wu oa?
13 Azɔ mele nu ƒom na mi ame siwo nye dukɔwo me tɔwo. Esi menye apostolo ŋutɔŋutɔ na dukɔwo ta la, medoa nye subɔsubɔdɔ la ɖe dzi,
14 bene mate ŋu ato mɔ aɖe dzi ana ame siwo nye nye ŋutɔ nye dukɔ me tɔwo la naʋã ŋu, eye maɖe wo dometɔ aɖewo.
15 Elabena ne wo gbegbe la nye Mawu kple xexea dome dzadzraɖo la, ekema nu kae wo xɔxɔ la anye, ne menye wo ɖeɖe tso ku me ava agbe me o?
16 Gawu la, ne amɔwɔ la ƒe akpa si woka be wòanye gbãtɔ la le kɔkɔe la, ekema amɔwɔ blibo la hã le kɔkɔe; eye ne ke la le kɔkɔe la, ekema alɔawo hã le kɔkɔe.
17 Ke ne woŋe alɔawo dometɔ aɖewo, gake wotsɔ wò, si nye amiti gbemetɔ, ya do ɖe susɔeawo dzi, eye nèzu gomekpɔla le amiti la ƒe ke, si me ami le me la,
18 mèganɔ ɖokuiwò dom ɖe dzi ɖe alɔawo ŋu o. Gake ne èle ɖokuiwò dom ɖe dzi la, menye wòe lé ke la ɖe te o, ke boŋ ke lae lé wò ɖe te.
19 Azɔ àgblɔ be: “Woŋe alɔwo ɖa, bene woatsɔm ado ɖe wo dzi.”
20 Enyo! Woƒe dzimaxɔse tae woŋe wo ɖa ɖo, gake wò ya xɔsee na nèle tsitre. Dzudzɔ nu kɔkɔwo ŋu bubu, nɔ vɔvɔ̃m boŋ.
21 Elabena ne Mawu mekpɔ nublanui na alɔ dzɔdzɔmetɔawo o la, ekema makpɔ nublanui na wò hã o.
22 Eya ta kpɔ Mawu ƒe dɔmenyonyo kple ale si eƒe asi sẽna ɖe ame dzii ɖa. Eƒe asi sẽna ɖe ame siwo dze anyi la dzi, gake ne èyi edzi nɔ Mawu ƒe dɔmenyonyo la me la, anyo dɔme na wò ya; ne menye nenema o la, woalã wò hã ɖa.
23 Eye woawo hã, ne womeyi edzi le woƒe dzimaxɔse la me o la, woatsɔ wo ado ɖe edzi; elabena Mawu agate ŋu atsɔ wo ado ɖe edzi ake.
24 Elabena ne wolã wò tso amiti si nye gbemetɔ tso dzɔdzɔme la ŋu, eye wowɔ nu si mele dzɔdzɔme nu o, be wotsɔ wò do ɖe amiti si le abɔ me dzi la, ekema ɖe womatsɔ esiawo, siwo nye dzɔdzɔmetɔ la, ado ɖe woawo ŋutɔwo ƒe amiti la dzi geɖe wu oa?
25 Elabena nɔviwo, nyemedi be nya ɣaɣla kɔkɔe sia nanɔ manyamanya ɖe mi o, bene miaganye aɖaŋudzelawo le mia ŋutɔwo miaƒe ŋkume o: be Israel ƒe akpa aɖe sẽ dzi me, va se ɖe esime dukɔwo me tɔwo ƒe xexlẽme blibo la ge ɖe eme,
26 eye aleae woana ɖeɖe Israel blibo la. Abe ale si woŋlɔe ɖi ene be: “Ðela la atso Zion, eye wòaɖe mawumavɔ̃mavɔ̃ ƒe nuwɔnawo ɖa tso Yakob gbɔ.
27 Eye esiae nye nubabla si anɔ mía kpli wo dome, ne maɖe woƒe nu vɔ̃wo ɖa.”
28 Nyateƒee wònye be, le nya nyui la gome la, wonye futɔwo le miaƒe viɖe ta, gake le Mawu ƒe tiatia la gome la, wonye lɔlɔ̃tɔwo le wo tɔgbuiwo ta.
29 Elabena Mawu ƒe nunanawo kple yɔyɔ la menye nu siwo avee o.
30 Elabena ale si ko mieɖo to Mawu tsã o, gake azɔ wokpɔ nublanui na mi le woƒe tomaɖomaɖo ta la,
31 nenema kee ame siawo hã meɖo to fifia o, eye nublanuikpɔkpɔ do tso eme na mi, bene woakpɔ nublanui na woawo ŋutɔwo hã azɔ.
32 Elabena Mawu tu nu ɖe wo katã nu ɖe tomaɖomaɖo me, bene wòakpɔ nublanui na wo katã.
33 Oo, Mawu ƒe kesinɔnuwo kple nunya kpakple sidzedze me goglo loo! Aleke seɖoƒe meli na eƒe ʋɔnudɔdrɔ̃wo me dzodzro o, eye eƒe mɔwo mele nyanya me o ye nye esi!
34 Elabena “ame kae te ŋu va nya Yehowa ƒe tamesusu, alo ame kae zu eƒe aɖaŋuɖola?”
35 Alo “Ame kae na nui gbã, bene woaɖo eteƒe nɛ?”
36 Elabena nuwo katã tso egbɔ, eye woto edzi, eye wonye etɔ. Etɔ nanye bubu yi mavɔmavɔ me. Amen.
