ANƆ eme be ènya be egbea amewo tsina kua amegã kple nyagã, wodzea dɔ, eye wokuna. Ðeviwo gɔ̃ hã kuna. Ðe wòle be nàvɔ̃ na ku alo na ame kukua?— Ènya nusi dzɔna ne míekua?—

Ame aɖeke meli egbea si ku va yi kpɔ eye wògagbɔ agbe va gblɔ alesi ku le na mí o. Gake esime Nufiala Gã la nɔ anyigba dzi la, ŋutsu aɖe nɔ anyi nenema. Nuxexlẽ tso eŋu akpe ɖe mía ŋu míasrɔ̃ nu tso nusi dzɔna ɖe amesiwo ku dzi la ŋu. Yesu xɔlɔ̃e ŋutsua nye eye enɔ Betania, si nye du sue aɖe si medidi tso Yerusalem gbɔ o. Eŋkɔe nye Lazaro, eye nɔvinyɔnu eve nɔ esi siwo ŋkɔe nye Marta kple Maria. Na míakpɔ nusi dzɔ si Biblia gblɔ na mí la ɖa.

Gbeɖeka Lazaro dze dɔ vevie. Ɣemaɣi Yesu nɔ didiƒe aɖe ke ɖaa. Eyata Marta kple Maria woɖo du ɖe Yesu be woagblɔ nɛ be yewo nɔviŋutsu Lazaro dze dɔ. Nusita woɖo du ɖee enye be wonya be Yesu ate ŋu ava da dɔ na yewo nɔvia. Menye ɖɔktae Yesu nye o, gake Mawu na ŋusẽe be wòate ŋu ada dɔléle ƒomevi ɖesiaɖe.—Mateo 15:30, 31.

Gake hafi Yesu nava ɖo la, Lazaro ƒe dɔa nyra nɛ ŋutɔ ale be wòku. Ke hã Yesu gblɔ na eƒe nusrɔ̃lawo be Lazaro le alɔ̃ dɔm eyata Yeyina be yeava nyɔe. Nusrɔ̃lawo mese Yesu ƒe nya siawo gɔme o. Eyata Yesu gblɔe na wo tẽ be: “Lazaro ku.” Nukae nya siawo fia mí tso ku ŋu?— Ẽ, efia be ku le abe alɔ̃dɔdɔ ayi eme  ʋĩ ene. Enye alɔ̃dɔdɔ si yi eme ʋĩ ale gbegbe be womegakua drɔ̃e gɔ̃ hã o.

Azɔ Yesu le mɔ dzi yina ɖe Marta kple Maria gbɔ. Ƒomea me tɔwo ƒe xɔlɔ̃ geɖewo hã va ɖo afima xoxo. Wova be yewoafa akɔ na Marta kple Maria ɖe wo nɔvi si ku ta. Esi Marta se be Yesu gbɔna la, edo go yi ɖakpee. Emegbe kpuie Maria hã yi be yeakpɔ Yesu. Maria lé blanui ale gbegbe le avi fam, eye wòva dze klo ɖe Yesu ƒe afɔnu. Xɔlɔ̃ bubu siwo dze Maria yome la hã le avi fam.

Nufiala Gã la bia afisi woɖi Lazaro ɖo. Eye ameawo kplɔ Yesu yi ɖe agado si me woɖi Lazaro ɖo la gbɔe. Esi Yesu kpɔ ameawo katã wole avi fam la, eya hã te avifafa. Enya alesi wòvena be ame ƒe lɔlɔ̃tɔ naku le ame gbɔ.

Wotsɔ kpe gã aɖe xe agadoa nu, eyata Yesu gblɔ na wo be: “Mikɔ kpe la ɖa.” Ðe wòhiã be woakɔe ɖa?— Marta susui be esia mehiã o. Egblɔ be: “Aƒetɔ, eƒaƒã xoxo, elabena exɔ ŋkeke ene sɔŋ.”

Gake Yesu gblɔ nɛ be: ‘Ðe nyemegblɔ na wò bena, ne èxɔe se la, àkpɔ Mawu ƒe ŋutikɔkɔe oa?’ Nusi Yesu wɔnɛ enye be Marta akpɔ nane si ahe ŋutikɔkɔe vɛ na Mawu. Nuka wɔ ge Yesu gbɔna? Esi womli kpea ɖa la, Yesu kɔ gbe dzi do gbe ɖa na Yehowa. Eye Yesu gblɔ kple gbe sesẽ be: “Lazaro lee, do go!” Ðe wòado goa? Ate ŋuia?—

Enyo, ɖe nàte ŋu anyɔ ame aɖe si le alɔ̃ dɔma?— Ẽ, ne èyɔe kple gbe sesẽ la, anyɔ. Gake ɖe nàte ŋu anyɔ ame aɖe si le alɔ̃ dɔm le ku mea?— Kura o. Aleke ke nàdo ɣli sesĩe ayɔ amesi ku lae o, mate ŋu asee o. Naneke meli si mía kpli wò alo ame bubu ɖesiaɖe si le anyigba dzi egbea ate ŋu awɔ atsɔ anyɔ ame kukuwoe o.

 Gake menye nenemae wòle le Yesu ya gome o. Ŋusẽ tɔxɛ le esi tso Mawu gbɔ. Eyata esime Yesu yɔ Lazaro la, nu wɔnuku aɖe dzɔ. Ŋutsu si ku ŋkeke ene sɔŋ la do tso agadoa me! Wogbɔ agbee! Agate ŋu agbɔ, azɔ azɔli, ahaƒo nu ake! Ẽ, Yesu fɔ Lazaro ɖe tsitre tso ame kukuwo dome.—Yohanes 11:1-44.

Azɔ bu nusia ŋu kpɔ: Nukae dzɔ ɖe Lazaro dzi esi wòku? Ðe eƒe akpa aɖe—eƒe luʋɔ alo eƒe gbɔgbɔ—do le eƒe ŋutilã me yi agbenɔnɔ dzi le teƒe bubu aɖea? Dziƒoe Lazaro ƒe luʋɔ yia? Mawu kple eƒe dɔla kɔkɔewo gbɔe wòyi va nɔ ŋkeke ene mawoa?—

Kura o. Ðo ŋku edzi be Yesu gblɔ be alɔ̃ dɔmee Lazaro nɔ. Ne èdɔ alɔ̃ la, aleke wònɔna? Ne èdɔ alɔ̃ yi eme ʋĩ la, ɖe nènyaa nusiwo le edzi yim le gbɔwòa?— Eye ne ènyɔ la, mànya ɣeyiɣi didi si nètsɔ dɔ alɔ̃e o vaseɖe esime nèkpɔ gaƒoɖokui me hafi.

 Nenema ke wòle le ame kukuwo hã gome. Womenya naneke o. Womesea naneke le wo ɖokui me o. Eye womate ŋu awɔ naneke o. Aleae wònɔ le Lazaro gome esime wòku. Ku le abe alɔ̃dɔdɔ ayi eme ʋĩ si me womegaɖoa ŋku naneke kura dzi o ene. Biblia gblɔ be: ‘Kukuawo ya meganya naneke kura o.’—Nyagblɔla 9:5, 10.

Gabu nya sia hã ŋu kpɔ: Ne dziƒoe Lazaro nɔ ŋkeke ene mawo la, ɖe magblɔ nya aɖeke atso eŋu oa?— Eye ne dziƒoe wòyi la, ɖe Yesu ana wòagatrɔ tso teƒe nyui ma ava anyigba dzia?— Kura koŋ o!

Gake ame geɖe gblɔna be luʋɔ le mía si, eye wogblɔna be luʋɔ la dona le ame me ne ŋutilã la ku. Wobe Lazaro ƒe luʋɔ nɔ agbe le teƒe aɖe. Gake Biblia megblɔ nenema o. Nusi wògblɔ enye be Mawu wɔ ame gbãtɔ Adam wònye “luʋɔ gbagbe.” Luʋɔe Adam nye. Biblia gblɔ hã be esi Adam wɔ nuvɔ̃ megbe la, eku. Eva zu “luʋɔ kuku,” eye wògatrɔ zu anyi si me wowɔ eyama tsoe. Biblia gblɔ hã be Adam ƒe dzidzimeviwo katã nyi nuvɔ̃ kple ku ƒe dome.—Mose I, 2:7; 3:17-19; Mose IV, 6:6; Romatɔwo 5:12.

Eyata eme kɔ ƒã be luʋɔ mele mía si wònye nusi le vovo na míaƒe ŋutilã o. Luʋɔe mía dometɔ ɖesiaɖe nye. Eye esi wònye  be amewo katã nyi nuvɔ̃ ƒe dome tso ame gbãtɔ Adam gbɔ ta la, Biblia gblɔ be: “Luʋɔ, si wɔ nuvɔ̃ la, eyae aku.”—Xezekiel 18:4.

Ame aɖewo vɔ̃na na ame kuku. Wovɔ̃na na ameɖibɔ me toto elabena wosusu be ame kukuwo ƒe luʋɔwo do go le woƒe ŋutilã me eye woate ŋu awɔ nuvevi agbagbeawo. Gake ɖe ame kuku ate ŋu awɔ nuvevi amesi le agbea?— Ao, mate ŋui o.

Ame aɖewo xɔe se gɔ̃ hã be ame kukuwo ate ŋu atrɔ ava abe gbɔgbɔ ene aɖi tsa ava agbagbeawo gbɔ. Le esia ta wodaa nuɖuɖu ɖi na ame kukuwo. Gake amesiwo wɔa nusiawo mexɔ nusi Mawu gblɔ tso kukuawo ŋu la dzi se ŋutɔŋutɔ o. Ne míexɔ nusi Mawu gblɔ dzi se la, ke míavɔ̃ ame kuku o. Eye ne míedaa akpe na Mawu nyateƒe ɖe agbe si míele ta la, ke míaɖee afia to nusiwo dzea Mawu ŋu la wɔwɔ me.

Gake àte ŋu abia be: ‘Ðe Mawu agbɔ agbe ɖevi siwo kua? Ðe wònye eƒe didi ŋutɔŋutɔ be yeawɔea?’ Míaƒo nu tso eŋu ɖe nya sia yome.