NUSƆSRƆ̃ 47
Ðe Nèsu Te Be Nàxɔ Nyɔnyrɔa?
Èva srɔ̃ nu geɖe tso Yehowa ŋu le wò Biblia sɔsrɔ̃a me. Anɔ eme be nu siwo nèsrɔ̃ la wɔe be èwɔ tɔtrɔ aɖewo le wò agbe me. Gake ɖewohĩ le susu aɖewo ta la, ewɔna na wò be yemesu te be yeatsɔ ye ɖokui aɖe adzɔgbe na Yehowa ahaxɔ nyɔnyrɔ o. Le nyati sia me la, míakpɔ nu siwo nana ame aɖewo hena ɖe megbe be yewoaxɔ nyɔnyrɔ kple nu si nàte ŋu awɔ tso wo ŋu.
1. Aleke gbegbee wòle be nànya Biblia hafi axɔ nyɔnyrɔ?
Hafi nàxɔ nyɔnyrɔ la, ele be “nyateƒe ƒe sidzedze vavãtɔ” nasu asiwò. (1 Timoteo 2:4) Esia mefia be ele be nànya ŋuɖoɖo na nya ɖe sia ɖe si amewo abia wò tso Biblia ŋu hafi axɔ nyɔnyrɔ o. Kristotɔ siwo xɔ nyɔnyrɔ ɣeyiɣi didi aɖee nye esia gɔ̃ hã gakpɔtɔ le nu srɔ̃m. (Kolosetɔwo 1:9, 10) Gake ehiã be nàse Biblia ƒe gɔmedzenufiafia veviwo ya teti gɔme. Ne mèka ɖe edzi tututu nenye be sidzedze si su asiwò la su be nàxɔ nyɔnyrɔ o la, ke hamemetsitsiwo ate ŋu akpe ɖe ŋuwò le go sia me.
2. Afɔ siwo wòle be nàɖe hafi axɔ nyɔnyrɔ la dometɔ aɖewo ɖe?
Hafi nàxɔ nyɔnyrɔ la, ele be ‘nàtrɔ dzi me, eye nàgbugbɔ.’ (Xlẽ Dɔwɔwɔwo 3:19.) Esia fia be nàse veve ɖe nu vɔ̃ siwo nèwɔ va yi la ta tso dzi me eye nàdo gbe ɖa na Yehowa be wòatsɔ wo ake wò. Efia hã be, nàtsri nuwɔna gbegblẽwo eye nàɖoe kplikpaa be yeanɔ agbe si ana wò nu nadze Mawu ŋu. Tsɔ kpe ɖe eŋu la, ahiã be nànɔ gome kpɔm le hamea ƒe dɔwɔnawo me. Esia ƒe ɖewoe nye be nànɔ kpekpeawo dem eye nàzu gbeƒãɖela maxɔnyɔnyrɔ anɔ gbeƒã ɖem nya nyuia.
3. Nu ka tae mele be nàvɔ̃ be yeaxɔ nyɔnyrɔ o?
Ame aɖewo vɔ̃na be ɖewohĩ yewomate ŋu awɔ ɖe adzɔgbe si yewoɖe na Yehowa la dzi o. Ele eme be àda vo ɣeaɖewoɣi ya, abe ale si ko wònɔ le ŋutsu kple nyɔnu nuteƒewɔla siwo ŋu Biblia ƒo nu tsoe la hã gome ene. Gake Yehowa nyae be ye subɔlawo mede blibo o, eya ta ate ŋu adzɔ be woada vo ɣeaɖewoɣi. (Xlẽ Psalmo 103:13, 14.) Gake edzɔa dzi nɛ ne èwɔa wò ŋutete ɖe sia ɖe be yeadze eŋu! Eya ŋutɔ hã akpe ɖe ŋuwò. Le nyateƒe me la, Yehowa ka ɖe edzi na mí be, naneke ‘mate ŋu ama mí ɖa tso yeƒe lɔlɔ̃ la gbɔ o.’—Xlẽ Romatɔwo 8:38, 39.
SRƆ̃ NU BUBUWO
Àkpɔe be ne èva nya Yehowa nyuie eye nèlɔ̃ faa be wòakpe ɖe ye ŋu la, esia akpe ɖe ŋuwò be nàɖu mɔxenu ɖe sia ɖe si ana wòasesẽ na wò be nàxɔ nyɔnyrɔ la dzi.
4. Dze agbagba nànya Yehowa nyuie wu
Aleke gbegbee wòle be nànya Yehowa hafi axɔ nyɔnyrɔ? Ele be nànya Yehowa nyuie ale be nàte ŋu alɔ̃e eye nàdi be yeawɔ nu si dzea eŋu. Mikpɔ VIDEOA be nàkpɔ ale si ame siwo wosrɔ̃ Biblia kplii le xexea ƒe teƒe vovovowo la wɔ esiae. Eyome midzro nyabiase si gbɔna me.
-
Le videoa me la, nu kae kpe ɖe ameawo ŋu wova dze hexɔ nyɔnyrɔ?
Mixlẽ Romatɔwo 12:2, eye miadzro nyabiase siawo me:
-
Ðe Biblia ƒe nufiafia aɖe li si dzi mèka ɖo tututu oa, alo ɖe mèka ɖe edzi nenye be Yehowa Ðasefowoe le nyateƒea fiam oa?
-
Ne nenemae la, ke nu kae nàte ŋu awɔ tso eŋu?
5. Ale si nàɖu nu siwo ate ŋu axe mɔ na wò nyɔnyrɔxɔxɔ la dzi
Esime mí katã míetso nya me be míatsɔ mía ɖokuiwo aɖe adzɔgbe na Yehowa ahaxɔ nyɔnyrɔ la, míedo go kuxiwo. Mikpɔ VIDEOA, be nàkpɔ esia ƒe kpɔɖeŋu, eyome miadzro biabia siwo gbɔna me.
-
Le videoa me la, kuxi kawo dzie wòle be Narangerel naɖu hafi ate ŋu asubɔ Yehowa?
-
Aleke lɔlɔ̃ si le esi na Yehowa kpe ɖe eŋu wòte ŋu ɖu kuxi mawo dzi?
Mixlẽ Lododowo 29:25 kple 2 Timoteo 1:7, eye miadzro biabia sia me:
-
Nu kae nana dzi nɔa mía ƒo míetea ŋu ɖua kuxiwo dzi?
6. Ðo ŋu ɖe Yehowa ŋu be wòakpe ɖe ŋuwò
Yehowa akpe ɖe ŋuwò be nàdze eŋu. Mikpɔ VIDEOA, eyome miadzro biabia siwo gbɔna me.
-
Le videoa me la, nu ka tae wònɔ sesẽm na ŋutsu si wosrɔ̃ Biblia kplii la be wòaxɔ nyɔnyrɔ?
-
Nu kae wòva nya si kpe ɖe eŋu wòva ka ɖe Yehowa dzi geɖe wu?
Mixlẽ Yesaya 41:10, 13, eye miadzro biabia sia me:
-
Nu ka tae nàte ŋu aka ɖe edzi be yeate ŋu awɔ adzɔgbe si yeɖe na Yehowa la dzi?
7. Wɔ nu si ana nàgakpɔ ŋudzedze ɖe Yehowa ƒe lɔlɔ̃ ŋu geɖe wu
Ne èdea ŋugble le ale si gbegbe Yehowa lɔ̃ wòe ŋu la, àgakpɔ ŋudzedze ɖe nu si wòwɔ na wò la ŋu geɖe wu eye esia aʋã wò nàdi be yeasubɔe tegbee. Mixlẽ Psalmo 40:5, eye miadzro nyabiase sia me:
-
Yehowa ƒe yayrawo dometɔ kae doa dzidzɔ na wò wu?
Nyagblɔɖila Yeremiya lɔ̃ Yehowa eye wòlɔ̃ eƒe nyaa hã, eye bubu gã aɖee wònye nɛ be Yehowa ƒe ŋkɔ le ye ŋu. Egblɔ be: ‘Wò nya la na nye dzi kpɔ dzidzɔ hetso aseye, elabena wò ŋkɔe woyɔ ɖe ŋunye, Oo Yehowa Mawu.’ (Yeremiya 15:16) Ðo biabia siwo gbɔna ŋu:
-
Ne ame aɖe va zu Yehowa Ðasefowo dometɔ ɖeka la, nu ka tae esia nye mɔnukpɔkpɔ gã aɖe ŋutɔ?
-
Èdi be yeaxɔ nyɔnyrɔ azu Yehowa Ðasefowo dometɔ ɖeka?
-
Ðe nane le mɔ xem na wò be nàgaxɔ nyɔnyrɔ azu Yehowa Ðasefo oa?
-
Nu kae nèkpɔ be ele be yeawɔ be yeate ŋu axɔ nyɔnyrɔ?
AME AÐEWO GBLƆNA BE: “Mele vɔvɔ̃m be ne mexɔ nyɔnyrɔ la, nyemate ŋu ava wɔ ŋugbe si medo na Yehowa la dzi o.”
-
Nenemae nèsena le ɖokuiwò mea?
NU SIWO MÍESRƆ̃
Le Yehowa ƒe kpekpeɖeŋu me la, àte ŋu aɖu nu sia nu si ana wòasesẽ na wò be nàxɔ nyɔnyrɔ la dzi.
Numetoto
-
Aleke gbegbee wòle be nànya Biblia hafi axɔ nyɔnyrɔ?
-
Tɔtrɔ kawoe wòahiã be nàwɔ hafi ate ŋu axɔ nyɔnyrɔ?
-
Nu ka tae mele be nàvɔ̃ be yeaxɔ nyɔnyrɔ o?
KU NU ME TSO NYATIA ŊU
Kpɔ nu si wòle be wòanye susu vevitɔ si tae nàxɔ nyɔnyrɔ ɖo la le nyati sia me.
Aleke nàwɔ aɖu nu siwo axe mɔ na wò nyɔnyrɔxɔxɔ la dzi? Xlẽ nu tso eŋu le nyati sia me.
Kpɔ ale si ŋutsu aɖe wɔ hafi te ŋu va ɖu nu si nɔ mɔ xem nɛ be wòagaxɔ nyɔnyrɔ o la dzi.
Tsã la, ŋutsu aɖe si ŋkɔe nye Ataa nɔ nyɔnyrɔxɔxɔ hem ɖe megbe. Kpɔ nu si na wòva ɖe afɔ vevi sia mlɔeba.
Ɖewohĩ Esia Hã Adzɔ Dzi Na Wò
NYA SIWO AMEWO BIANA EDZIEDZI
Aleke Biblia Nusɔsrɔ̃ Si Yehowa Ðasefowo Wɔna Kple Amewo La Le?
Àte ŋu azã Biblia gɔmeɖeɖe ɖe sia ɖe ne èle nu srɔ̃m le Biblia nusɔsrɔ̃ ƒe ɖoɖo si Yehowa Ðasefowo wɔna kple amewo femaxee la me. Àte ŋu akpe wò ƒometɔwo kple xɔ̃wòwo be woawɔ ɖeka kpli wò faa.
