Gbeƒãɖeɖedɔ gã si Yesu wɔ le Galilea la tse ku ŋutɔ. Ke hã, esi Yesu gblɔ be, “Ele nam be magblɔ Mawu Fiaɖuƒe ŋuti nya nyui la na du bubuwo hã” la, menye du siwo le Galilea nutoa me koe nɔ susu me nɛ o. Eya ta eyi ɖaɖe “gbeƒã le ƒuƒoƒewo le Yudea.” (Luka 4:43, 44) Esɔ be wòwɔe nenema, elabena adame ɖo azɔ eye eteƒe madidi o woaɖu ŋkekenyui le Yerusalem.

Nya si Nyanyuigbalẽawo gblɔ tso subɔsubɔdɔ si Yesu wɔ le Yudea ŋu le ʋɛ ne míetsɔe sɔ kple nu si wogblɔ tso esi wòwɔ le Galilea ŋu. Ne ame siwo le Yudea ƒe akpa gãtɔ mexɔ Yesu ƒe gbedeasia o hã la, eyi edzi wɔ geɖe le gbeƒãɖeɖedɔa me, eye wòwɔ dɔ nyuiwo le afi sia afi si wòyi.

Azɔ Yesu dze mɔ yina Yudea ƒe du vevitɔ si nye Yerusalem me hena ƒe 31 K.Ŋ. ƒe Ŋutitotoŋkekenyuia ɖuɖu. Le teƒe aɖe si ame geɖe nɔna, si te ɖe Alẽgboa ŋu la, ta aɖe si woyɔna be Betzata la le afi ma, eye akpata gã aɖe le eto. Dɔnɔwo, ŋkuagbãtɔwo, kple bunɔ geɖewo vaa ta sia to. Nu ka tae? Elabena amewo xɔe se be ne woblu tsia eye dɔnɔwo ge ɖe eme la, woahaya.

Sabat ŋkeke ɖo azɔ, eye Yesu kpɔ ŋutsu aɖe si le dɔ lém ƒe 38 sɔŋ la le ta la to. Yesu biae be: “Èdi be wò lãme nasẽa?” Ŋutsua ɖo eŋu be: “Aƒetɔ, ame aɖeke mele asinye akɔm ada ɖe ta la me ne woblu tsia o, eye kaka maɖo la, ame bubu gena ɖe eme doa ŋgɔ nam.”—Yohanes 5:6, 7.

Yesu gblɔ nya aɖe si awɔ nuku na ŋutsua kple ame sia ame si asee. Egblɔ be: “Tso! Tsɔ wò aba, eye nàzɔ.” (Yohanes 5:8) Nu ma tututue ŋutsua wɔ. Enumake ehaya eye wòtsɔ eƒe aba hedze azɔlizɔzɔ gɔme!

Esi Yudatɔwo kpɔ ŋutsu sia la, womekpɔ dzidzɔ ɖe nukunu sia si dzɔ la ŋu o, ke boŋ wohe nya ɖe eŋu be: “Egbee nye Sabat, eye se meɖe mɔ be nàtsɔ wò aba o.” Ŋutsua ɖo eŋu na wo be: “Ame si da gbe le ŋunye lae gblɔ nam be, ‘Tsɔ wò aba, eye nàzɔ.’” (Yohanes 5:10, 11) Medzɔ dzi na Yudatɔwo be ame aɖe da gbe le ame ŋu le Sabat dzi o.

Wobiae be, “Ame kae gblɔ na wò be, ‘Tsɔ wò aba, eye nàzɔ’?” Nu ka tae wobia nya ma ŋutsua? Elabena Yesu “dzo le afi ma hebu ɖe ameha la dome,” eye ŋutsu si ŋu wòda gbea le la menya Yesu ƒe ŋkɔ o. (Yohanes 5:12, 13) Gake ŋutsu sia agava do go Yesu. Emegbe le gbedoxɔa me la, ŋutsua kpɔ Yesu, eye wòdze sii be eyae nye ame si da gbe le ye ŋu le ta la to.

Ŋutsu si ŋu woda gbe le la kpɔ Yudatɔ siwo bia nyae ku ɖe ame si da dɔa nɛ ŋu. Egblɔ na wo be Yesue da dɔa na ye. Esi Yudatɔwo se esia la, woyi Yesu gbɔ. Ðe woyi be yewoase nu si gbɔ wòtso be Yesu te ŋu wɔ nukunu siawo gbegbea? Ao. Ke boŋ ɖe woyi be yewoaɖe vodada na Yesu be ewɔ nu nyuiwo le Sabat dzi. Eye wode asi eyome titi me gɔ̃ hã!