N’ BANGEBAGAW KA ƝƐYIRALI

Saan 1957, n’ bangebagaw bɔra Itali ka taga sigi Kindɛrle dugu la, Sakacewan mara la Kanada. Dɔɔni o kɔ, u ye tiɲɛn diinan lɔn ani o kɛra koo kɔrɔtaninba ye an ka ɲɛnamaya kɔnɔ. N’ hakili b’a la ko n’ denmisɛn tuma na, ne ni n’ somɔgɔw tun be wagati caaman kɛ waajuli la. O kama, tuma dɔw la, n’ b’a fɔ tulon na ko n’ kɛra “piyɔniye kɔrɔsigi” ye tuma min na n’ tun be ni saan seegi ye!

N’ bangebagaw tun ye fantanw ye, nga u kɛra ɲɛyirali ɲumanw ye n’ fɛ sabu u tun b’u yɛrɛ saraka Jehova ka baara la. Misali la, saan 1963, u y’u bololafɛn caaman feere ka se ka taga lajɛnba dɔ la Pasadena dugu la, o min be Kalifɔrni, Etazini mara la. O lajɛnba tun labɛnna jamana caaman kama. Saan 1972, an ye kilomɛtɛrɛ 1000 ɲɔgɔn kɛ ka taga Trɛl dugu la, Kolɔnbi Biritanik mara la Kanada. An yɛlɛmana yen walisa ka dɛmɛ don waajuli baara la Italiyɛn kafo dɔ kɔnɔ. O yɔrɔ la, u tun ye n’ facɛ ta baara la magazɛn dɔ la ko a ka to ka yɔrɔ ladon. Sababuw tun dira a ma ka wari caaman sɔrɔ. Nga a banna u bɛɛ la sabu a tun b’a fɛ ka sinsin Jehova ka baara lo kan.

N’ be n’ bangebagaw waleɲuman lɔn sabu u kɛra ɲɛyirali ɲumanw ye ne ni n’ kɔrɔcɛ ni n’ dɔgɔmusow fɛ. N’ bangebagaw ye n’ kalan min na, o lo kɛra fɔrɔmasɔn fɔlɔ ye n’ fɛ Jehova ka baara la. U ye n’ kalan koo dɔ la n’ tɛna ɲinɛ min kɔ n’ ka ɲɛnamaya kuru bɛɛ la. O ye ko ni n’ ye Jehova ka Masaya kɛ n’ ɲɛnako fɔlɔ ye, a bena a janto n’ na.—Mat. 6:33.

N’ YE KUDAYI CIDENYA BAARA DAMINƐ

Saan 1980, n’ ye balimamuso cɛɲumanin dɔ furu. A tɔgɔ ko Debbie ani Jehova ka baara lo y’a ɲɛnako fɔlɔ ye. An tun b’a fɛ ka kɛ kudayi  cidenya baarakɛlaw ye. O kama, kalo saba an furunin kɔ, Debbie ye piyɔniye baara daminɛ. Saan kelen an furunin kɔ, an yɛlɛmana kafo dennin dɔ la weleweledalaw tun man ca yɔrɔ min na ani ne fana ye piyɔniyeya daminɛ.

Wagati dɔ nana se, an fari fagara ani an y’a latigɛ ka yɛlɛma yɔrɔ wɛrɛ la. Nga, an kɔnna ka kuma o koo la ni kafokulu kɔrɔsibaga ye. A y’a kɔnɔ gwɛ k’a fɔ an ye ni kanuya ye ko: “Aw lo be koow gwɛlɛyara aw yɛrɛ ma. Aw be sinsinna aw ka gwɛlɛyaw lo kan. Nga n’ aw be koow filɛ ni ɲɛɛ ɲuman ye, aw bena a ye ko koo ɲumanw be yen.” An mako tun b’o ladili lo la jaatika (Zab. 141:5). An sinna k’a ka ladili sira tagama ani a ma mɛɛn, an y’a ye tiɲɛn na ko an ye duga caaman sɔrɔ. An ka kafoden caaman tun b’a fɛ ka dɔ fara u ka cidenya baara kan, hali kanbelew ni sunguruw ani balima dɔw minw furuɲɔgɔn tɛ tiɲɛn sira kan. U ka ɲɛyirali kɛra kalan barikaman ye an fɛ. An y’a ɲini ka sinsin koo ɲumanw lo kan ani ka Jehova makɔnɔ walisa koo minw ye gwɛlɛyaw ye an ɲɛɛ na, a k’o ɲɛnabɔ an ye (Mise 7:7). An ye ninsɔndiya sɔrɔ kokura ani koow tora ka fisaya.

An siɲɛ fɔlɔ ka piyɔniyew ka lakɔli kɛ, balima minw tun ye an kalanfaw ye, u la saba y’u ka cidenya baara kɛ jamana wɛrɛw la. U ye fotow yira an na. U ye gwɛlɛya ni duga minw sɔrɔ k’u to u ka cidenya baara la jamana wɛrɛw la, u y’o kofɔ an ye. O ye misɔndenya baara nege don an na. O kama, an y’a latigɛ ka misɔndenya baara kɛ an ka laɲinita ye.

Ka se k’o laɲinita dafa, saan 1984, an yɛlɛmana Kebɛki, yɔrɔ min na faransɛkan be fɔ. Kilomɛtɛrɛ 4000 ni kɔ lo b’o yɔrɔ ni Kolɔnbi Biritanik mara cɛ. O kɔrɔ ko an tun ka ɲi ka kaan kura ani kokɛcogo kura lo degi. Gwɛlɛya wɛrɛ ye ko an tun be fɔn wari la tuma caaman na. Wagati dɔ la, an tun be taga woso fɛfɛ foro dɔ kɔnɔ ka se k’an daradumuni sɔrɔ. Debbie tun b’o woso tobi cogo caaman na ani o tun ka di! O gwɛlɛyaw bɛɛ n’a ta, an muɲuna ani an y’an seko kɛ ka to ninsɔndiya la. Ka fara o kan, an y’a ye ko Jehova tun b’a jantora an na.—Zab. 64:11.

Loon dɔ, an ye weeleli dɔ sɔrɔ min barila an na. U ko an ka na baara kɛ Kanada Betɛli la. An ninsɔn tun ka di nga, an dusu tun tiɲɛnin lo fana sabu an tun ye demandi dafa walisa ka taga Gilead lakɔli  kɛ. O bɛɛ n’a ta, an sɔnna u ka weeleli la. Tuma min na an sera, an ye balimacɛ Kenneth Little ɲininga an ka Gilead demandi koo la. Kanada Betɛli ka kɔmite mɔgɔ dɔ lo. A y’an jaabi ko: “N’u nana aw weele, an bena kuma o koo la.”

Lɔgɔkun kelen o kɔ, u ye ne ni Debbie weele Gilead lakɔli la. O kama, an tun ka ɲi k’a latigɛ n’an bena to Betɛli la wala n’an bena taga Gilead lakɔli la. Balimacɛ Little y’a fɔ an ye ko: “Aw mana min o min sugandi, loon dɔ, aw bena a fɔ ko n’aw tun y’a lɔn, aw tun tɛna o lo sugandi. Desizɔn fila nunu cɛ, dɔ man fisa ni dɔ ye. Jehova be se k’aw duga u bɛɛ la.” An y’a latigɛ ka taga Gilead lakɔli la ani saan caaman o kɔ, an y’a ye ko balimacɛ Little ka kumaw kɛra tiɲɛn ye. Minw ka ɲi ka sugandili kɛ baara fila cɛma Jehova ka ɔriganisasiyɔn kɔnɔ, an ka teli ka balimacɛ Little ka kumaw fɔ u ye.

MISƆNDEN BAARA

An ninsɔn tun ka di kosɔbɛ ka kɛ kalanden 24 cɛma, Gilead klasi 83nan na. O kɛra saan 1987 awirilikalo la, Buruklini, Niyɔriki mara la. Balimacɛ Ulysses Glass ani Jack Redford tun ye an ka kalanfaw ye ani olu lo tun b’an kalan tuma caaman na. Kalo duuru tɛmɛna joona joona ani saan 1987 sɛtanburu tile 6, an ye an ka diplomuw sɔrɔ. U y’an bila ka taga Ayiti, ni John ani Marie Goode ye.

Saan 1962, u tun ye misɔndenw gwɛn ka bɔ Ayiti jamana na. Kabi o wagati, misɔnden si ma bila ka taga yen tugun. Lɔgɔkun saba an ka diplomuw sɔrɔnin kɔ, an tagara Ayiti. An tun be kafo dennin dɔ lo kɔnɔ kuluyɔrɔw logologo dɔ la ani weleweledala 35 lo tun be yen. An tun ye kanbele ni sunguru ye, an tun tɛ koo caaman lɔn ani an fila  dɔrɔn lo tun be misɔnden boon kɔnɔ. Mɔgɔw tun ye fantanw ye ani u fanba tun tɛ se kalan na. An ka cidenya baara daminɛ na, an ye koo caaman ye: politikikɛlɛw, fangabenw, wulikajɔw, ani fɔɲɔbaw.

Ayiti balimaw tun muɲunin lo ani u ninsɔn tun ka di. An ye kalan caaman sɔrɔ ka bɔ u fɛ. Koow tun man nɔgɔ u caaman fɛ nga, u tun be Jehova kanu ani waajuli baara tun ka di u ye. Balima musokɔrɔba dɔ tun tɛ se kalan na, nga a tun be vɛrise 150 ɲɔgɔn lɔn a kunfɛ. Min tun be kɛ loon o loon, o y’a to an tun b’a fɛ sɔbɛ la k’a fɔ mɔgɔw ye ko Ala ka Masaya kelenpe lo bena adamadenw ka gwɛlɛyaw bɛɛ ban. An ye bibulukalan kɛ ni mɔgɔ minw ye a daminɛ na, a diyara an ye k’a ye ko u dɔw kɛra kudayi piyɔniyew, dan na piyɔniyew ani diinan mɔgɔkɔrɔw ye.

K’an to Ayiti, n’ ye Trevor kunbɛn. Kanbele tun lo ani a tun ye misɔnden ye Mɔrmɔn diinan na. An ye baro kɛ Bibulu koo la siɲɛ damanin. Saan caaman o kɔ, a ye lɛtɛrɛ dɔ ci n’ ma. A ye min fɔ o lɛtɛrɛ kɔnɔ, o barila n’ na. A ko: “N’ bena batize lajɛnba nata la! N’ tun ye Mɔrmɔnw ka misɔnden ye yɔrɔ min na Ayiti, n’ b’a fɛ ka kɔsegi yen ka kɛ dan na piyɔniye ye.” A y’o lo kɛ jaatika. A n’a muso tagara kɛ piyɔniyew ye o yɔrɔ la saan caaman kɔnɔ.

AN TAGARA ERƆPU, O KƆ AFIRIKI

U y’an ci ka taga waajuli kɛ Erɔpu jamana dɔ la. Bali tun be wulila dɔɔni dɔɔni an ka waajuli baara kan yen. Saan 1992, an tagara Liyubliyana, Sloveni jamana na. N’ bangebagaw tun be o yɔrɔ gɛrɛfɛ le ka sɔrɔ ka taga sigi Itali. O wagati la, marifakɛlɛ bele tun be yen Yugɔslavi maraw la. Tɔnbolo minw be Viyɛni (Otirisi jamana na), Zagrɛbu (Krowasi jamana na) ani Bɛlgiradi (Sɛrbi jamana na), olu lo tun be waajuli baara ɲɛminɛna o maraw la. Sisan, jamana minw y’u ka ɛndepandansi sɔrɔ, u kelen kelen bɛɛ ka ɲi ka kɛ n’u ka Betɛli ye.

O la, an tun ka ɲi ka kaan kura ani kokɛcogo kura degi. Dugumɔgɔw tun ka teli k’a fɔ ko: “An ka kaan nin ka gwɛlɛ dɛ!” Ani a tun ka gwɛlɛ tiɲɛn na! O dugu balimaw tun koo ka di an ye u ka kantigiya kosɔn ani u tun be sɔn ɔriganisasiyɔn ka yɛlɛmaniw na fana. An y’a ye Jehova y’u duga cogo min na. O yɔrɔ la fana, an y’a ye Jehova be koow ɲɛnabɔ cogo min na ni kanuya ye tuma bɛɛ  ani wagati bɛnnin na. An ye koo caaman faamu k’an to Sloveni. Nga an tun ye kalan minw sɔrɔ sanni an ka taga yen, o y’an dɛmɛ k’o yɔrɔ gwɛlɛyaw muɲu.

Nga yɛlɛmani wɛrɛw tun b’an kɔnɔna tugun. Saan 2000, u y’an ci ka taga Kɔdiwari (Côte d’Ivoire), Afiriki tilenben fan fɛ. Saan 2002 novanburukalo la, siyakɛlɛ dɔ wulila ani u y’an cɛ ka taga n’an ye Siraleyɔni. An tagara a sɔrɔ ko saan 11 siyakɛlɛ dɔ bantɔ lo. A gwɛlɛyara an ma ka boli ka bɔ Kɔdiwari. Nga an ye kalan minw sɔrɔ yen, o y’an dɛmɛ ka to ninsɔndiya la.

An tora ka miiri an ka kiinmɔgɔw koo la minw tun b’a fɛ ka tiɲɛn lɔn ani an balima kanulenw koo la minw ye muɲuli kɛ saan caaman kɔnɔ marifakɛlɛ bɛɛ n’a ta. Fantanw tun lo, nga u tun b’a fɛ k’u bololafɛnw tilan ni tɔɔw ye. Balimamuso dɔ tun ye faniw di Debbie ma. Debbie tun t’a fɛ ka sɔn. Nga balimamuso y’a fɔ a ye ko: “Ne lo ko i k’a minɛ. Kɛlɛ tuma na, dugu wɛrɛw balimaw y’an dɛmɛ. Sisan, anw lo ka ɲi k’aw dɛmɛ.” An fana y’a latigɛ k’u ladegi.

Kɔfɛ, an kɔsegira Kɔdiwari. Nga, politikikɛlɛ wulila yen tugun. O kama, saan 2004 novanburukalo la, elikɔptɛri dɔ nana an cɛ ka taga n’an ye Faransi sɔrɔdasiw sigiyɔrɔ la. An lara yen duguma ani o loon dugusagwɛ, awiyɔn dɔ y’an ta ka taga n’an ye Swisi jamana na. An kelen kelen bɛɛ ka minanw tun man kan ka tɛmɛ kilo 10 kan. An sera o yɔrɔ Betɛli la sufɛ miniwi ɲɔgɔn, ani kɔmite mɔgɔw ni Cidenyabaara degeli Lakɔli kalanfaw n’u musow nana an kunbɛn. U y’u bolo meleke an na, ka dumuni gwanin di an ma ani Swisi sokola caaman. An dusu diyara kosɔbɛ.

U y’an bila ka taga Gana wagati damanin kɔnɔ. O kɔ, tuma min na kɛlɛ nɔgɔyara Kɔdiwari, u y’an kɔsegi yen tugun. An ye gwɛlɛya minw sɔrɔ, balimaw ka ɲumanya y’an dɛmɛ k’o muɲu. Tiɲɛn lo ko a bɛnnin lo Jehova ka ɔriganisasiyɔn kɔnɔ balimaw k’a yira k’u be ɲɔgɔn kanu. Nga ne ni Debbie y’a latigɛ ko an tɛna o jati waajibiko ye abada. Tiɲɛn na, an y’a ye k’o wagati gwɛlɛnw kɛra fɔrɔmasɔn nafaman lo ye an fɛ.

JAMANA MINW BE KƆRƆN FAN FƐ

Saan 2006, an ka sigiyɔrɔsoba ye bataki dɔ ci an ma k’a fɔ ko an ka taga jamana dɔ la min be kɔrɔ fan fɛ. O yɔrɔ la fana, an ye gwɛlɛyaw sɔrɔ, an ye kaan kuraw ni kokɛcogo kuraw degi. An ye koo caaman ye o yɔrɔ la sabu gwɛlɛyaw tun be yen politikikow ni diinankow ta fan fɛ. A diyara an ye k’a ye ko kaan caaman tun be fɔ kafow kɔnɔ. An y’a ye fana ko balimaw kaan tun bɛnnin lo u kɛtɔ ka ɔriganisasiyɔn ka cikanw labato. Balimaw tun koo ka di an ye kosɔbɛ sabu u fanba ye kɔrɔbɔliw muɲu ni jagwɛlɛya ye ka bɔ u somɔgɔw, u lakɔli filankuruw, u baarakɛɲɔgɔnw ani u sigiɲɔgɔnw fɛ.

Saan 2012, an tagara lajɛnba kɛrɛnkɛrɛnnin dɔ la Tɛl Aviv, Israɛl jamana na. O tun ye lajɛnba fɔlɔ ye, o min na Jehova sagokɛla caamanba ye ɲɔgɔn lajɛn o mara la kabi saan 33 Pantekɔte loon na. An tɛna ɲinɛ o kɔ abada!

O saanw na, an tagara jamana dɔ la o min na bali tun sigira an ka baara kan. An tagara n’an ka gafe dɔw ye, an ye waajuli kɛ ani an tagara kafokulu lajɛnbaw la u ye minw kɛ jɛnkulu denninw kɔnɔ. Yɔrɔ bɛɛ, sɔrɔdasiw tun lɔ lɔnin lo ni  marifa farimanw ye u bolo ka to ka kɔrɔsili kɛ. Nga tuma min na an tun be taga ni segi kɛra ni balima damanin ye an tun b’an yɛrɛ kɔrɔsi. O kama, a tun b’an ɲɛɛ na ko an latanganin lo.

AN KƆSEGIRA AFIRIKI

Saan 2013, u ye ci dɔ kalifa an ma min be dan na tɔɔw la: U y’an ci ka taga Kɔngo Kinsasa Betɛli la. Kɔngo Kinsasa jamana ka bon, a cɛ ka ɲi, nga fantanya tun ka jugu yen ani marifa kɛlɛw fana tun ka ca. A daminɛ na, an y’a fɔ ko: “An b’a lɔn Afiriki be cogo min na. O kama, an labɛnnin lo ka ban.” Jaa, an mako tun b’a la ka koo wɛrɛw lɔn sanko n’i ka ɲi ka taga dugu dɔw la o minw na sira ni pɔɔnw tɛ yen. Nga koo caaman tun be yen an sinsinna minw kan. U dɔw ye ko balimaw tun jijanin lo ani u ninsɔn tun ka di Jehova ka baara la wariko gwɛlɛyaw bɛɛ n’a ta. Waajuli baara tun ka di u ye ani u tun be jijalibaw lo kɛ ka se ka taga lajɛnw ni lajɛnbaw la. An y’a ye ko mɔgɔ caaman be sera ka tiɲɛn sira lɔn Jehova ka dɛmɛ barika lo la. An ye saan minw kɛ Kɔngo Jehova ka baara la, o y’an dɛmɛ ka koo caaman faamu ani ka teriw sɔrɔ minw kɛra i n’a fɔ an somɔgɔw.

Saan 2017 laban fan fɛ, u y’an ci ka taga Afirikidisidi Betɛli la. O ye Betɛliba lo ye an tun ma deli ka baara kɛ min ɲɔgɔn na ka ye. O kama, a kɛra komi an tun be Betɛli baara daminɛna le kura ye. O yɔrɔ la fana, an ye koo caaman degi. An ye kalan sɔrɔ koo tɛmɛnin minw na, o y’an dɛmɛ kosɔbɛ. O yɔrɔ balimaw koo ka di an ye sabu u be muɲuli kɛra kabi saan caaman. K’a ye ko Betɛlidenw be baara kɛ ɲɔgɔn fɛ kelenya la hali k’a sɔrɔ u ka siya n’u ka kokɛcogow tɛ kelen ye, o be mɔgɔ kabakoya yɛrɛ le! Hɛɛrɛ min b’u ni ɲɔgɔn cɛ, a gwɛnin lo k’o ye Jehova ka duga lo ye sabu a sagokɛlaw b’u jija ka kɛ ni jogo kuraw ye ani ka Bibulu ka sariyakolow sira tagama.

Saan caaman kɔnɔ, u ye ne ni Debbie ci ka taga yɔrɔ minw na, u diyara an ye ani an ye kokɛcogo caaman ani kaan kuraw degi. A tun man nɔgɔ an ma tuma bɛɛ, nga Jehova tora ka tɛmɛ a ka ɔriganisasiyɔn ani an balimaw fɛ k’a yira an na ko ale b’an kanu kosɔbɛ (Zab. 144:2). An ye koo caaman lɔn an ka kudayi cidenya baara sababu fɛ. O y’an dɛmɛ ka kɛ Jehova sagokɛla ɲumanw ye.

N’ bangebagaw ye n’ kalan min na, n’ b’u waleɲuman lɔn kosɔbɛ o kosɔn. N’ be n’ muso kanulen Debbie fo a ka dɛmɛ kosɔn. Balima minw be duniɲa kuru bɛɛ kɔnɔ, n’ b’olu fana waleɲuman lɔn kosɔbɛ u ka ɲɛyirali ɲuman kosɔn. An Karamɔgɔba y’an kalan koo minw na, k’an to siniɲasigi makɔnɔni na, an jijanin lo k’o kalanw sira tagama.