Ciden Pol y’a fɔ Tesaloniki kerecɛnw ye ko: “An bɛ kalan min di aw ma nin sɛbɛn na, ni mɔgɔ dɔ ma sɔn o ma, aw ka o kɔlɔsi.” (2 Tes. 3:14, Bible senuma). Fɔlɔ la, an tun b’a fɔ ko o ladili ɲɛsinna diinan mɔgɔkɔrɔw lo ma. Ni mɔgɔ dɔ tun tɛ sɔn ka Bibulu ka sariyakolow labato, diinan mɔgɔkɔrɔw tun b’a ladi siɲɛ caaman. N’a ma sɔn o ladiliw ma, u be kalan dɔ kɛ ka kafodenw lasɔmi o tigi ka kɛwalew koo la. O kɔ, ka lajɛnw ni waajuli niin bɔ a la, kafodenw tun tɛ jɛn n’o tigi ye tugun.

Nka, an ka ɲi ka yɛlɛmani don o vɛrise faamuyali koo la. Kafoden kelen kelen bɛɛ ka ɲi ka min latigɛ koo dɔw la, sisan an b’a faamu ko Pol ka ladili ɲɛsinna o lo ma. O la, kuun t’a la diinan mɔgɔkɔrɔw ka kalan dɔ kɛ o koo la. An tun be 2 Tesalonikaw 3:14 faamu cogo min na, mun na an ye yɛlɛmani don o la? An k’a filɛ Pol tun be kumana fɛɛn min koo la tuma min na a y’o ladili di.

Pol ko Tesaloniki kafoden dɔw “tun be koo ferekeninw kɛ.” A y’o fɔ sabu a basigira Ala ka Kuma kan ka ladili minw di, u banna k’o sira tagama. Ka kɔn o ɲɛ, tuma min na a tun nana bɔ u ye, a tun y’a fɔ u ye ko: “Mɔgɔ min te sɔn baara ma, o tigi kana dumuni kɛ fana.” Nka, dɔw bele tun be banna ka baara kɛ k’u yɛrɛ mako wasa, hali k’a sɔrɔ u tun be se k’o kɛ. U tun b’u daa don fana mɔgɔ wɛrɛw ka koow la. Kerecɛnw ka ɲi k’o ɲɔgɔnna mɔgɔw minɛ cogo di?—2 Tes. 3:6, NW; 2 Tes. 3:10-12.

Pol ko: “Aw ka o kɔlɔsi.” Gɛrɛkikan kumaden min bayɛlɛmana o cogo la, o kɔrɔ ko an ka ɲi k’an janto kosɔbɛ walisa o tigi ka kɛwale juguw kana nɔɔ to an kan. Pol m’o ladili di diinan mɔgɔkɔrɔw dɔrɔn ma. Nka, a y’o di kafodenw bɛɛ lo ma (2 Tes. 1:1; 3:6). O la, ni kerecɛn dɔ y’a kɔrɔsi ko a kerecɛnɲɔgɔn dɔ be koo ferekeninw kɛ ani a tɛ Bibulu ka ladiliw sira tagama, a be se k’a latigɛ a yɛrɛ ma ko ‘ale ni o tigi [tɛna] jɛ foyi la.’

Yala o kɔrɔ ko an ka ɲi k’o tigi minɛ i n’a fɔ mɔgɔ min tɛ kafoden ye tugun wa? Ayi, sabu Pol y’a fɔ fana ko: “Aw k’a laadi i ko balima dɔ.” O la, an bele be se ka jɛn n’a tigi ye kafo ka lajɛnw ani waajuli la. Nka, an tɛ jɛn n’a ye ka ɲɛnagwɛkow kɛ. Mun na do? Pol ko: “Walisa a ka maloya.” O balima min be koo ferekeninw kɛ, n’an tɛ sɔn ka ɲɛnagwɛkow kɛ n’a ye tugun, n’a sɔrɔ a bena maloya a ka kɛwalew kosɔn ani k’a sɔɔn yɛlɛma.—2 Tes. 3:14, 15, Bible senuma.

Bi, kerecɛnw be se k’o ladili sira tagama cogo di? A fɔlɔ, an ka ɲi ka la a la ko a tigi be min kɛra, o ye ‘koo ferekenin’ lo ye tiɲɛn tiɲɛn na i ko Pol y’a fɔ cogo min na. Tuma dɔw la, kerecɛn dɔw diyanankow n’an taw tɛ kelen ye wala an dusukun b’an kɛlɛ koo minw na, o tɛ basi ye olu fɛ. Pol tun kaan t’o ɲɔgɔnna mɔgɔw ma. Minw be don an gasi la, a tun kaan tɛ olu ma fana. U basigira Ala ka Kuma kan ka minw ladi, nka u ma sɔn ka mɛnni kɛ, Pol tun kaan b’olu lo ma.

Bi, n’an y’a kɔrɔsi ko kerecɛn dɔ murutinin lo o cogo la, an be se k’a latigɛ an yɛrɛ ma ko an tɛna ɲɛnagwɛkow n’a ɲɔgɔnnakow kɛ n’a ye. a Komi an yɛrɛ lo b’o koo latigɛ, an man ɲi ka baro kɛ ni mɔgɔ wɛrɛw ye o koo la, k’an somɔgɔw niin bɔ a la. An bele be to ka jɛn n’o tigi ye lajɛnw ani waajuli la. Nka n’a tigi y’a sɔɔn yɛlɛma, an be se k’a latigɛ ka ɲɛnagwɛkow n’a ɲɔgɔnnakow kɛ n’a ye kokura.