BAROKUN KALANTA KAFO KƆNƆ 31
DƆNKILI 12 Jéhovah, Dieu magnifique (Ala kɔrɔtaninba Jehova)
Jehova ye mun lo kɛ walisa k’an kisi ka bɔ jurumu ni saya la?
“Ala ye diɲɛ kanu haali, fɔɔ a y’a Deen kelenpe ci mɔgɔw ma.”—ZAN 3:16.
BAROKUN KƆNƆNAKOW
An bena a ye Jehova ye min kɛ walisa k’an dɛmɛ an ka see sɔrɔ jurumu kan. An bena a ye fana cogo min na a y’a yira ko a be makari an na, a kɛtɔ ka sababu di an ma an ka kɛ mɔgɔ dafaninw ye ani ka ɲɛnamaya kɛ fɔɔ abada.
1-2. a) Jurumu ye mun lo ye ani an be se ka see sɔrɔ a kan cogo di? (“Kuma dɔ ɲɛfɔli” lajɛ fana). b) An bena mun lo ye barokun nin ani Kɔrɔsili Sangaso nin ka barokun tɔɔw la? (Yɔrɔ nin lajɛ fana Kɔrɔsili Sangaso nin kɔnɔ: “Kalanbagaw, aw y’aw janto”).
YALA i b’a fɛ k’a lɔn Jehova Ala b’i kanu kosɔbɛ cogo min na wa? Walisa k’o lɔn, i be se ka sɛgɛsɛgɛri kɛ k’a filɛ a ye min kɛ walisa k’i kisi ka bɔ jurumu ni saya la. Jurumu a y’an jugu fariman lo ye ani an tɛ se ka see sɔrɔ a kan an yɛrɛ ka setigiya barika la. An bɛɛ be jurumu kɛ loon o loon ani jurumu lo kosɔn an be sa (Ɔrɔm. 5:12). Nka kibaro diiman dɔ be yen. O ye ko Jehova ka dɛmɛ barika la, siga t’a la, an bena see sɔrɔ jurumu kan pewu pewu!
2 Kabi saan 6000 ɲɔgɔn, Jehova be adamadenw dɛmɛna u ka see sɔrɔ jurumu kan. Mun na do? Sabu a b’an kanu. Tiɲɛn na, Jehova be adamadenw kanu kabi u dan tuma. O la, a ye koo caaman kɛ walisa k’u dɛmɛ u ka see sɔrɔ jurumu kan. Ala b’a lɔn ko jurumu nɔfɛko ye saya lo ye. K’a sɔrɔ a t’a fɛ an ka sa, nka an ka ɲɛnamaya kɛ fɔɔ abada (Ɔrɔm. 6:23). A b’o lo fɛ ele fana ye. Barokun nin na, an bena ɲiningali saba nunu jaabi: 1) Jehova ye jigiya juman lo di adamaden jurumutɔw ma? 2) Bibulu sɛbɛwagati la, adamaden dafabali dɔw ye mun lo kɛ walisa k’u koo diya Jehova ye? 3) Yezu ye mun lo kɛ walisa ka adamadenw kisi ka bɔ jurumu ni saya la?
JEHOVA YE JIGIYA JUMAN LO DI JURUMUTƆW MA?
3. Adama ni Awa kɛra jurumutɔw ye cogo di?
3 Tuma min na Jehova ye cɛɛ fɔlɔ ni muso fɔlɔ dan, a tun b’a fɛ u ka to ninsɔndiya la. A ye sigiyɔrɔ ɲuman di u ma, k’u furu ɲɔgɔn ma ani ka baara ɲuman dɔ kalifa u ma. U tun ka ɲi ka deenw wolo ka dugukolo fa ani k’a yɔrɔ bɛɛ kɛ alijɛnɛ ye, i ko Edɛn nankɔtu. A ko u kana koo kelen dama lo kɛ. A y’u lasɔmi ko n’u banna k’o cikan labato, u bena laban ka sa. Min kɛra o kɔ, an b’o lɔn. Mɛlɛkɛ jugu dɔ ye Adama ni Awa lasun u ye Ala kaan bila. Ala ni adamadenw koo tun man di o mɛlɛkɛ ye. Adama ni Awa ma la u Faa kanutigi la ani u ye mɛnni kɛ o mɛlɛkɛ jugu fɛ minkɛ, u ye jurumu kɛ. Jehova ye min fɔ, o lo kɛra. Komi u ma mɛnni kɛ Jehova fɛ, u tɔɔrɔla u sii tɔɔ bɛɛ la. U kɔrɔla ani u labanna ka sa.—Zɛnɛzi 1:28, 29; 2:8, 9, 16-18; 3:1-6, 17-19, 24; 5:5.
4. Mun na jurumu ka gwo Jehova ye? A b’an dɛmɛ cogo di ka see sɔrɔ a kan? (Ɔrɔmukaw 8:20, 21).
4 Jehova y’a to u y’o maana sɛbɛ Bibulu kɔnɔ walisa an ka koo kɔrɔtanin dɔ faamu. O b’an dɛmɛ k’a faamu fɛɛn min kama jurumu ka gwo Jehova ye kosɔbɛ. Jurumu b’an ka jɛnɲɔgɔnya tiɲɛ ni Jehova ye ani a b’a to an be sa (Ezayi 59:2). Jehova ni adamadenw koo ka gwo Sutana ye. O lo kama, a ye Adama ni Awa lasun u ye jurumu kɛ ani hali bi, a be adamadenw lasunna k’o kɛ. O la, tuma min na Adama ni Awa ye jurumu kɛ, n’a sɔrɔ Sutana tun b’a miiri ko Jehova sagonata tɛna dafa tugun adamadenw koo la. Nka a m’a faamu Jehova be adamadenw kanu kosɔbɛ cogo min na. Jehova sagonata ye min ye Adama ni Awa deenw koo la, o ma yɛlɛma abada! A be u kanu minkɛ, a sinna ka jigiya di u bɛɛ ma (Ɔrɔmukaw 8:20, 21 kalan). Jehova tun b’a lɔn ko mɔgɔ dɔw tun bena ale kanu ani u bena a ɲini ale k’u dɛmɛ ka see sɔrɔ jurumu kan. A ye u Faa ani u Danbaga ye minkɛ, a ye labɛn kɛ walisa u ka se k’u magwɛrɛ ale la ani ka kisi ka bɔ jurumu ni saya bolo. A ye labɛn juman lo kɛ do?
5. Tuma juman lo la Jehova y’a yira ko jigiya be adamaden dafabaliw fɛ? A ɲɛfɔ (Zɛnɛzi 3:15).
5 Zɛnɛzi 3:15 kalan. Jehova y’a yira ko jigiya be adamaden dafabaliw fɛ tuma min na a y’a fɔ fɛɛn min bena Sutana sɔrɔ. A y’a fɔ ko “deen” wala “bɔnsɔn” dɔ lo bena adamadenw kisi. Sutana ye gwɛlɛya minw lase adamadenw ma kabi Edɛn nankɔ kɔnɔ, o bɔnsɔn bena o bɛɛ ɲɛnabɔ ani ka Sutana yɛrɛ halaki (1 Zan 3:8). Nka yanni o cɛ, o bɔnsɔn tun bena tɔɔrɔ. Sutana tun bena a cin a seen na, o kɔrɔ, k’a kɛ u b’a faga. O tun bena digi Jehova la yɛrɛ le! Nka a sɔnna ka tɔɔrɔ ani k’a to o bɔnsɔn fana ka tɔɔrɔ walisa ka adamadenw kisi ka bɔ jurumu ni saya la.
BIBULU SƐBƐWAGATI LA, MƆGƆ DAFABALI DƆW YE MUN LO KƐ K’U KOO DIYA JEHOVA YE?
6. Mɔgɔ limaniyanin dɔw i n’a fɔ Abɛli ni Nuhun ye mun lo kɛ walisa k’u magwɛrɛ Jehova la?
6 Dɔɔni dɔɔni, Jehova tora k’a yira ka gwɛ adamaden dafabaliw la u be se ka min kɛ walisa k’u magwɛrɛ ale la. Adama ni Awa murutinin kɔ, u dencɛ filanan Abɛli lo kɛra mɔgɔ fɔlɔ ye ka limaniya Jehova la. A ye saraka dɔ bɔ Jehova ye sabu a tun b’a kanu, a tun b’a fɛ k’a koo diya a ye ani k’a magwɛrɛ a la. Sagadɛndɛla tun lo. O kama, a y’a ka sagaden dɔw lo saraka Jehova ye. Yala Jehova sɔnna a ka saraka la wa? Ɔnhɔn, a “sɔnna Abɛli n’a ka saraka la.” (Zɛnɛzi 4:4). Jehova y’a yira ko a sɔnna Nuhun ni mɔgɔ wɛrɛw ka saraka la fana sabu u y’a yira ko u b’a kanu ani u jigi lanin b’a kan (Zɛnɛzi 8:20, 21). A sɔnna o sarakaw la minkɛ, a y’a yira ko adamaden jurumutɔw be se k’u magwɛrɛ a la ani k’u koo diya a ye. b
7. Ibrayima tun b’a fɛ k’a yɛrɛ dencɛ saraka. An be kalan juman lo sɔrɔ o la?
7 Ibrayima tun be ni limaniya barikaman ye. Jehova ko a ka koo gwɛlɛ dɔ kɛ. A ko a k’a dencɛ Isiyaka saraka. Siga t’a la, o ye Ibrayima niinaban yɛrɛ le! O bɛɛ n’a ta, a ye labɛnw kɛ walisa k’o cikan labato. Nka tuma min na a tun b’a fɛ ka Isiyaka faga, Ala ko a kana o kɛ. Ibrayima ka koo b’a yira Jehova tun bena min kɛ sini ma. A tun bena sɔn k’a Dencɛ kanulen saraka. O b’a yira ko Jehova be adamadenw kanu yɛrɛ le!—Zɛnɛzi 22:1-18.
8. Saraka caaman minw tun be kɛ Musa ka sariya kɔrɔ, u be mun lo yira an na? (Levitiki 4:27-29; 17:11).
8 Tuma min na Jehova ye sariya di Israɛldenw ma, a y’a fɔ u ye ko u ka to ka bɛgɛn sarakaw bɔ walisa u ka jurumuw ka yafa (Levitiki 4:27-29; 17:11 kalan). O sarakaw b’a yira Jehova tun bena sarakaba min bɔ, o min sababu la adamadenw ka jurumuw tun bena yafa pewu pewu. Layidu tun tara bɔnsɔn min koo la, Ala ka kiraw ye koo dɔw sɛbɛ a koo la hakili senu barika la. U y’a sɛbɛ k’o bɔnsɔn tun bena kɛ Ala Dencɛ kanulen lo ye ani ko mɔgɔw tun bena a tɔɔrɔ ani k’a faga. A tun bena kɛ i n’a fɔ sagaden, u ye min saraka (Ezayi 53:1-12). O la, Jehova ye layidu ta ko a tun bena a Dencɛ kanulen saraka walisa ka adamadenw kisi ka bɔ jurumu ni saya bolo. O ye kabako yɛrɛ lo ye ani a y’o kɛ ele fana kosɔn!
YEZU YE MUN LO KƐ K’AN KISI KA BƆ JURUMU NA?
9. Zan Batizelikɛla ye mun lo fɔ Yezu koo la? (Eburuw 9:22; 10:1-4, 12).
9 Saan kɛmɛkulu fɔlɔ la, Zan Batizelikɛla y’a fɔ Nazarɛtika Yezu koo la ko: “Ala ka Sagaden filɛ min be mɔgɔw ka hakɛw ban.” (Zan 1:29). O b’a yira ko Ala tun ye layidu ta bɔnsɔn min koo la kabi wagatijan, o ye Yezu lo ye. A tun bena a niin saraka. Sisan ka tɛmɛ sanga ni wagati bɛɛ kan, adamaden jurumutɔw tun be ni jigiya barikaman dɔ ye. O ye ko u bena kisi pewu pewu ka bɔ jurumu bolo.—Eburuw 9:22; 10:1-4, 12 kalan.
10. Yezu y’a yira cogo di ko ale “nana hakɛkɛlaw le wele”?
10 Mɔgɔ minw dusu tun kasinin lo u ka jurumuw kosɔn, Yezu ye olu lo dɛmɛ fɔlɔ ani a y’a ɲini u fɛ u ka kɛ a ka kalandenw ye. A tun b’a lɔn ko kuun jɔnjɔn min kama adamadenw be tɔɔrɔla, o ye ko u ye jurumutɔw ye. O la, mɔgɔ minw tun be tɔɔrɔla kosɔbɛ jurumu kosɔn, a ye olu yɛrɛ lo dɛmɛ. A tɛmɛna misali dɔ fɛ k’a ɲɛfɔ ko: “Mɔgɔ minw ka kɛnɛ, olu mako te furakɛla la, banabagatɔw le mako b’a la.” O kɔ, a ko: “Ne ma na mɔgɔtilenninw wele, nga ne nana hakɛkɛlaw le wele.” (Mat. 9:12, 13). Yezu ye min fɔ, a y’o lo kɛ. Tuma min na muso dɔ y’a ɲɛji kɛ ka Yezu seenw ko, Yezu kumana a fɛ ni ɲumanya ye ani a y’a ka jurumuw yafa (Luka 7:37-50). Yezu ye Samarika muso dɔ kalan tiɲɛnkalan nafamanw na, hali k’a sɔrɔ a tun b’a lɔn k’o muso siginin be ni cɛɛ min ye, a cɛɛ tɛ (Zan 4:7, 17-19, 25, 26). Mɔgɔw be sa jurumu kosɔn. Nka, Ala ye setigiya di Yezu ma a ye cɛɛw, musow ani denmisɛnw suu kunu.—Mat. 11:5.
11. Mun na a tun ka di jurumukɛlaw ye ka kɛ ni Yezu ye?
11 A tɛ bari an na k’a ye ko mɔgɔ minw tun be kojugubaw kɛ, a tun ka di olu yɛrɛ ye ka kɛ ni Yezu ye. Yezu tun b’u dusukunnakow faamu ani a tun b’u minɛ ni ɲumanya ye. U tun tɛ siran ka kuma n’a ye (Luka 15:1, 2). O mɔgɔw tun b’a yira k’u limaniyanin lo Yezu la minkɛ, a tun b’u tando ani k’u duga (Luka 19:1-10). Yezu y’a yira cogo dafanin na a Faa be makari cogo min na (Zan 14:9). A ka kumaw n’a ka kɛwalew fɛ, a y’a yira ko a Faa be makari mɔgɔw la ani ko a b’u kanu. A y’a yira fana ko a Faa b’a fɛ ka mɔgɔ kelen kelen bɛɛ dɛmɛ u ka see sɔrɔ jurumu kan. Yezu ye jurumukɛlaw dɛmɛ u k’a ɲini k’u ka ɲɛnamaya kɛcogo yɛlɛma ani ka tugu ale kɔ.—Luka 5:27, 28.
12. Yezu ye mɔgɔw kalan mun lo la a saya koo la?
12 Yezu tun b’a lɔn ko a ka ɲi k’a niin saraka. A y’a fɔ a ka kalandenw ye siɲɛ caaman ko dɔ bena a janfa ani a juguw bena a gwengwe lɔgɔ kan (Mat. 17:22; 20:18, 19). A tun b’a lɔn ko a ka saraka bena mɔgɔw ka hakɛw ban, i ko Zan ani kira tɔɔw tun kɔnna k’a fɔ cogo min na. A y’a fɔ fana ko a niin sarakanin kɔ, a “bena mɔgɔ bɛɛ sama ka na” ale fɛ (Zan 12:32). Adamaden jurumutɔw be se k’u koo diya Jehova ye u kɛtɔ ka sɔn a ma ko Yezu y’u Matigi ye ani k’a ladegi. N’u y’o kɛ, u laban bena u “yɛrɛ sɔrɔ ka bɔ hakɛ bolo.” (Ɔrɔm. 6:14, 18, 22; Zan 8:32). O la, Yezu y’a jaa gwɛlɛya ka sɔn sayajugu ma walisa k’an kisi.—Zan 10:17, 18.
13. Yezu sara cogo di ani a saya b’an dɛmɛ ka mun lo faamu Jehova Ala koo la? (jaa lajɛ fana).
13 Yezu teri sɔbɛ dɔ y’a janfa. O kɔ, a juguw y’a minɛ, u y’a nɛni ani ka ngalon tigɛ ka la a kan. U ye saya jalaki ben a kan ani u y’a tɔɔrɔ kosɔbɛ. Sɔrɔdasiw tagara n’a ye a fagayɔrɔ la ani u y’a gwengwe lɔgɔ kan. Yezu y’o tɔɔrɔba muɲu kantigiya la. Nka tuma min na Jehova y’a Dencɛ tɔɔrɔtɔ ye, o ye ale yɛrɛ tɔɔrɔ ka tɛmɛ Yezu kan. See tun be Jehova ye ka mɔgɔw bali u k’a Dencɛ tɔɔrɔ. Nka a m’o kɛ. Mun na do? Mun lo tun be se k’a to Faa kanutigi be sɔn a Dencɛ ka tɔɔrɔ o cogo la? A sɔnna o ma sabu a b’an kanu. Yezu ko: “Ala ye diɲɛ kanu haali, fɔɔ a y’a Deen kelenpe ci mɔgɔw ma, waasa ni mɔgɔ min y’a jigi la a kan, o tigi kana halaki, nga o ka nii banbali sɔrɔ.”—Zan 3:16.
Jehova tɔɔrɔla kosɔbɛ tuma min na a y’a to u y’a Dencɛ faga walisa k’an kisi ka bɔ jurumu ni saya la (dakun 13nan lajɛ).
14. I be kalan juman lo sɔrɔ Yezu ka saraka koo la?
14 Yezu ka saraka ye dalilu barikaman ye min b’a yira ko Jehova be Adama ni Awa bɔnsɔnw kanu. O b’a yira ko Jehova be ele kanu kosɔbɛ. A sɔnna k’a Dencɛ kanulen saraka ani ka tɔɔrɔba muɲu walisa k’i kisi ka bɔ jurumu ni saya la (1 Zan 4:9, 10). Hali k’a sɔrɔ an ye jurumutɔw ye, a b’a fɛ k’an kelen kelen bɛɛ dɛmɛ an k’a sago kɛ ani ka kisi pewu pewu ka bɔ jurumu na sini ma.
15. An ka ɲi ka mun lo kɛ walisa ka nafa sɔrɔ Yezu ka kunmabɔsara la?
15 Ala sɔnna k’a Dencɛ kelenpe saraka k’a kɛ kunmabɔsara ye walisa an ka jurumuw ka se ka yafa. Nka walisa Ala ka yafa an ka jurumuw ma, an ka ɲi ka mun lo kɛ? Zan Batizelikɛla ani Yezu Krista yɛrɛ y’o ɲiningali jaabi. U ko: “Aw ye nimisa ka faran aw ka kojuguw la, bari sankolo masaya waati surunyana.” (Mat. 3:1, 2; 4:17). O la, n’an b’a fɛ sɔbɛ la ka see sɔrɔ jurumu kan ani k’an magwɛrɛ kosɔbɛ an Faa kanutigi la, an ka ɲi ka koo tigitigi min kɛ, o ye ka nimisa. Nka nimisali kɔrɔ ko di ani a b’an dɛmɛ cogo di ka see sɔrɔ jurumu kan? An bena o lo ye barokun kalanta nata la.
DƆNKILI 18 Débordants de gratitude pour la rançon (Waleɲumanlɔn, kunmabɔsara koo la)
a KUMA DƆ ƝƐFƆLI: Bibulu kɔnɔ n’a fɔra ko “jurumu,” o be se ka ɲɛsin kɛwale juguw ma wala n’an ma koow kɛ ka kɛɲɛ ni Jehova ka sariya tilenninw ye. “Jurumu” ɲɛsinna fana an ka dafabaliya ma, an ye min sɔrɔ cɛɛn ye Adama fɛ. O jurumu lo b’a to an bɛɛ be laban ka sa.
b Mun na Jehova sɔnna o mɔgɔ kantigiw ka sarakaw la? A sɔnna o sarakaw la sabu a tun b’a lɔn ko sini ma, Yezu Krista tun bena a niin saraka walisa ka sababu di adamadenw bɛɛ ma u ka kisi pewu ka bɔ jurumu ni saya la.—Ɔrɔm. 3:25.
