N’an be Bibulu sɛgɛsɛgɛra, an be min kalanna Jehova koo la, an b’a fɛ o k’an dusukun sɔrɔ. Ɛsidirasi ye ɲɛyirali ɲuman to an ye o koo la. A y’a dusukun labɛn walisa ka “Masaba ka sariya kalan.” (Ɛsid. 7:10). I be se k’i dusukun labɛn cogo di?

Delili kɛ. Tuma o tuma, delili kɛ ka sɔrɔ k’i ka kelenna kalan daminɛ. I be min kalanna, Jehova deli a k’i dɛmɛ i k’o faamu ani k’o sira tagama.—Zab. 119:18, 34.

I yɛrɛ majigi. Minw ye kuncɛbaw ye ani u b’u jigi la u yɛrɛ ka hakilitigiya kan, Ala be tiɲɛnkalanw dogo olu la (Luka 10:21). An t’a fɛ fana ka sɛgɛsɛgɛri kɛ walisa k’an yɛrɛ yira. N’i y’a ye ko i ka miiriyaw bɛnnin tɛ ni Ala taw ye, i yɛrɛ majigi ani sɔn ka yɛlɛmaniw kɛ.

An ka dɔnkiliw dɔ lamɛn. Dɔnkiliw be se ka nɔɔ to an kan. N’i b’an ka dɔnkiliw dɔ lamɛn ka sɔrɔ k’i ka kelenna kalan daminɛ, o be se k’i dɛmɛ ka miiri Jehova koo la. O la, i ye min kalan, o bena i dusukun sɔrɔ.