1. U y’i kalan mun lo la an Danbaga koo la?

N’I BANGEBAGAW ye Jehova Seerew ye, n’a sɔrɔ u y’i kalan Jehova koo la kabi i denmisɛn tuma. U y’i kalan ko ale lo ye Danbaga ye, ko a be ni jogo ɲumanw ye ani ko a bena dugukolo kɛ alijɛnɛ ye.—Zɛnɛzi 1:1; Kɛw. 17:24-27.

2. Mɔgɔ minw lanin b’a la ko Danbaga be yen, dɔw be mun lo miiri olu koo la?

² Mɔgɔ caaman lanin t’a la ko Ala be yen wala ko ale lo ye fɛɛn bɛɛ dan. U b’a miiri ko ɲɛnamaya daminɛna a yɛrɛ ma ani dɔɔni dɔɔni, ninmanfɛn misɛnw yɛlɛmana ka kɛ ninmanfɛnbabaw ye. O mɔgɔ dɔw ye kalanbabaw kɛ. U b’a fɔ ko lɔnnikow y’a yira ko Bibulu ka fɔtaw tɛ tiɲɛn ye, ko kunfinw, mɔgɔ minw hakili man di ani u be la koo bɛɛ la, olu lo lanin b’a la ko Danbaga be yen.

3. Mun na a kɔrɔtanin lo an kelen kelen bɛɛ k’an ka limaniya sabati?

³ Mɔgɔ minw ye kalanbabaw kɛ, yala u ka fɔtaw b’a to an lanin t’a la tugun ko Jehova lo ye an Danbaga kanutigi ye wa? O jaabili bena bɔ min na, o ye fɛɛn min kama an lanin b’a la ko Jehova lo ye Danbaga ye. Yala an lanin b’o la sabu u y’o fɔ an ye dɔrɔn le, wala an ye wagati ta ka sɛgɛsɛgɛri kɛ walisa ka daliluw sɔrɔ o koo la? (1 Kor. 3:12-15). An ye Jehova Seerew ye a mɛɛnna wo, a ma mɛɛn wo, an bɛɛ ka ɲi ka to k’an ka limaniya barika bonya. N’an b’o kɛ, mɔgɔ minw be Ala ka Kuma sɔsɔ, olu tɛna se k’an lafili ni adamadenw ka hakilitigiya n’u ka “lɔnniyafu ye.” (Kɔlɔs. 2:8; Eburuw 11:6). Walisa k’an dɛmɛ, an bena ɲiningali nunu jaabi barokun nin na: 1) Mun na mɔgɔ caaman lanin t’a la ko Danbaga be yen? 2) I be se ka i ka limaniya sabati cogo di an Danbaga Jehova koo la? 3) I be se ka mun lo kɛ walisa i ka limaniya sabatinin ka to?

4. Ka kɛɲɛ ni Eburuw 11:1 ye, limaniya sɔbɛ basiginin be mun lo kan?

⁴ Mɔgɔ dɔw b’a miiri ko limaniya kɔrɔ ko ka la fɛɛn dɔ la hali ni dalilu foyi t’i fɛ. Nka ka kɛɲɛ ni Bibulu ka fɔta ye, o tɛ limaniya sɔbɛ ye (Eburuw 11:1 kalan). Bibulu b’a ɲɛfɔ ko limaniya basiginin lo daliluw lo kan. O la, hali n’an ɲɛɛ tɛ Jehova, Yezu ani Ala ka Masaya la, dalilu barikamanw b’a yira ko u be yen yɛrɛ yɛrɛ la (Eburuw 11:3). Lɔnnikɛla dɔ ye Jehova Seere ye ani a ko: “An ka limaniya tɛ kunfɛko ye sabu an t’an ɲɛɛ tugu lɔnnikow kan.”

5. Mun na mɔgɔ caaman lanin t’a la ko Danbaga be yen?

⁵ Mun na mɔgɔ caaman lanin t’a la ko Ala lo ye fɛɛn bɛɛ dan, k’a sɔrɔ dalilu caaman b’a yira ko ale lo ye Danbaga ye? Dɔw lanin t’o la sabu u ma o daliluw lajɛ ka ye. Robert ye Jehova Seere ye sisan ani a ko: “Komi u ma an kalan lakɔli la abada ko fɛɛnw danna le, n’ tun b’a miiri ko o koo tɛ tiɲɛn ye. Tuma min na n’ tun be ni saan 20 ni kɔ ye, n’ ye baro kɛ ni Jehova Seerew ye. O wagati lo la n’ y’a faamu ko Bibulu be dalilu barikamanw di an ma minw b’a yira ko Ala lo ye fɛɛn bɛɛ dan.” *—Koorilen nin lajɛ: “ Bangebagaw, aw y’aw janto.”

6. Mun na dɔw lanin t’a la ko Danbaga be yen?

⁶ Dɔw lanin tɛ Danbaga la sabu u b’a fɔ ko olu ɲɛɛ ma la min kan, u tɛ la o la. Nka tiɲɛn na, o mɔgɔw lanin lo fɛɛn dɔw la minw tɛ ye ɲɛɛ na. Misali la, fanga min b’a to n’i ye fɛɛn dɔ fili sanfɛ a be ben duguma, u lanin b’o la sabu daliluw b’a  yira k’o ye tiɲɛn ye. Limaniya sifa min kofɔra Bibulu kɔnɔ, o fana basiginin lo tiɲɛnkow kan an ɲɛɛ tɛ minw na (Eburuw 11:1). Walisa k’o tiɲɛnkow sɛgɛsɛgɛ an yɛrɛ ma, o be wagati ta ani o tɛ ɲɛ jijaliw kɔ. Nka, mɔgɔ caaman t’a fɛ k’o jijaliw kɛ. Mɔgɔ min ma o daliluw sɛgɛsɛgɛ a yɛrɛ ma, o tigi be se k’a miiri ko Ala tɛ yen.

7. Minw ye kalanbabaw kɛ, yala olu bɛɛ lo lanin t’a la ko Ala lo ye fɛɛn bɛɛ dan wa? A ɲɛfɔ.

⁷ Lɔnnikɛla dɔw ye daliluw lajɛ ani o kɔ, u lara a la ko Ala lo ye fɛɛn bɛɛ dan. * I ko Robert min kofɔra ka tɛmɛ,, dɔw lanin t’a la ko Danbaga be yen sabu u m’u kalan inivɛrisite la ka ye ko fɛɛnw danna le. Nka  lɔnnikɛla caaman sera ka Jehova lɔn ani k’a kanu. U y’an kalan koo o koo la lakɔli la, an ka ɲi k’a ɲini k’an ka limaniya barika bonya Ala koo la i k’o lɔnnikɛlaw y’a kɛ cogo min na. Mɔgɔ si tɛ se k’o kɛ an nɔɔ na.

8-9. a) An bena ɲiningali juman lo lajɛ sisan? b) N’an ye sɛgɛsɛgɛri kɛ danfɛnw koo la, o bena an nafa cogo di?

⁸ I be se k’i ka limaniya sabati cogo di Danbaga koo la? An ka cogo naani lajɛ.

⁹ Sɛgɛsɛgɛri kɛ danfɛnw koo la. N’i be to ka bɛgɛnw, yiriw ani lolow n’a ɲɔgɔnnaw lajɛ koɲuman, i bena i ka limaniya barika bonya Danbaga koo la (Zab. 19:2; Ezayi 40:26). N’i ye sɛgɛsɛgɛri caaman kɛ o fɛɛnw koo la, i bena la a la kosɔbɛ ko Jehova lo ye Danbaga ye. Barokun dɔw ka teli ka sɔrɔ an ka gafew kɔnɔ minw be koo caaman ɲɛfɔ danfɛnw koo la. Kana ban k’o barokunw kalan hali n’i b’a miiri ko i tɛna u faamu bɛrɛbɛrɛ. A ɲini ka koo caaman faamu u kɔnɔ. Videwo diiman dɔw bɔra danfɛnw koo la ani u yirala an ka tile saba lajɛnba la saan tɛmɛninw na. Kana ɲinɛ k’olu fana lajɛ an ka site jw.org kan.

10. Misali dɔ fɔ min b’a yira ko Danbaga be yen (Ɔrɔmukaw 1:20).

¹⁰ N’an be sɛgɛsɛgɛri kɛra danfɛnw koo la, u be fɛɛn minw yira Danbaga koo la, an k’an janto o la kosɔbɛ (Ɔrɔmukaw 1:20 kalan). Misali la, tile be funteni ni yeelen di an ma ani an mako b’o la walisa ka to niin na. Nka, tile yeelen dɔw man ɲi an ma (rayons ultraviolets). An adamadenw ka ɲi ka latanga o yeelenw ma. An do latanganin lo o ma fana. Cogo di do? Gazi dɔ be dugukolo lamini ani o b’an latanga o yeelenw ma. O gazi be weele ko ozoni gazi. Tile yeelen minw man ɲi an ma, n’u barika be bonyana, dɔ be fara ozoni gazi barika kan. Yala o koow t’a yira ko Danbaga be yen, ko a b’an kanu ani ko hakilitigi lo wa?

11. I be se ka kunnafoniw sɔrɔ yɔrɔ juman walisa k’i ka limaniya barika bonya Danbaga koo la? (Koorilen nin lajɛ: “ Kunnafoni minw bena i ka limaniya barika bonya Danbaga koo la.”)

¹¹ N’i ye Index des publications des Témoins de Jéhovah lajɛ ani ka sɛgɛsɛgɛri kɛ jw.org kan, i bena kunnafoni caaman sɔrɔ danfɛnw koo la minw bena i ka limaniya barika bonya. Barokunw ni videwo surun dɔw be to ka bɔ minw kuun ko: “Fɛɛnw danna le wala u kɛra u yɛrɛ ma?” I be se k’a daminɛ k’olu lajɛ. U be kunnafoni kabakoman damanin di bɛgɛnw ni danfɛn wɛrɛw koo la. A yirala yen fana cogo min na lɔnnikɛlaw y’a ɲini ka danfɛnw ladegi walisa ka fɛɛn dɔw dilan.

12. Bibulu sɛgɛsɛgɛtɔ an ka ɲi k’an janto koo minw na, u dɔw ye jumanw ye?

¹² Bibulu sɛgɛsɛgɛ. Lɔnnikɛla min kofɔra ka tɛmɛ, a daminɛ na, ale tun lanin t’a la ko Danbaga be yen. Nka, a nana la o la kɔfɛ. A ko: “N’ ye lɔnniko kalan minw kɛ, n’ ka limaniya ma basigi o dɔrɔn kan. Nka, n’ ka limaniya sabatira fana sabu n’ ye Bibulu sɛgɛsɛgɛ koɲuman.” N’a sɔrɔ i be Bibulu ka kalanw lɔn ka ɲɛ. Nka, walisa k’i ka limaniya barika bonya Danbaga koo la, i ka ɲi ka to ka Ala ka Kuma sɛgɛsɛgɛ (Zozuwe 1:8; Zab. 119:97). A sɛgɛsɛgɛtɔ, koo minw kɛra kabi galen, a kɔrɔsi Bibulu b’o lakali ka ɲɛ cogo min na. Bibulu ka kiraya kuma minw dafara, i janto u la. A kɔrɔsi fana Bibulu sɛbɛbagaw ka kumaw be taga ɲɔgɔn fɛ cogo min na. N’i b’o kɛ, i bena la a la kosɔbɛ ko Danbaga kanutigi ni hakilitigi dɔ lo y’an dan ani ko ale lo y’a kɛ u  ye Bibulu sɛbɛ. *—2 Tim. 3:14; 2 Piyɛri 1:21.

13. Misali dɔ fɔ k’a yira hakilitigiya min be sɔrɔ Ala ka Kuma kɔnɔ.

¹³ Ala ka Kuma sɛgɛsɛgɛtɔ, a kɔrɔsi a ka ladiliw be se k’i nafa cogo min na. Misali la, kabi wagatijan Bibulu b’an lasɔmi ko minw be wari kanu, olu be bɔnɛ lase u yɛrɛ ma ani ka “tɔɔrɔ la u yɛrɛ kan.” (1 Tim. 6:9, 10; Talenw 28:20; Mat. 6:24). Yala o kumaw bele ye tiɲɛn ye bi wa? Gafe dɔ be kuma an ka wagati mɔgɔw ka kokɛcogow koo la. A fɔra yen ko: “Tuma caaman na, mɔgɔ minw be boli boli wari nɔfɛ, olu ninsɔn diyanin tɛ ani hakiliɲagami bana ka teli k’u minɛ. Hali minw b’a fɛ ka wari dɔɔni sɔrɔ ka fara u ta kan, u ninsɔn diyanin tɛ ani u ka teli ka bana.” O b’a yira ko Bibulu be ladili minw di wari kanuya koo la, o ye ladili ɲumanw ye yɛrɛ le! Yala i hakili be Bibulu ka ladili wɛrɛw la minw y’i nafa wa? N’an be miiri Bibulu ka ladili ɲumanw bɛɛ koo la, an bena a ye ko an Danbaga kanutigi b’a lɔn min ka fisa an ma. O bena an lasun fana k’a ka ladiliw ɲini tuma bɛɛ (Zaki 1:5). O la, an bena ninsɔndiya kosɔbɛ an ka ɲɛnamaya kɔnɔ.—Ezayi 48:17, 18.

14. Bibulu sɛgɛsɛgɛri bena i dɛmɛ ka mun lo faamu Jehova koo la?

¹⁴ Bibulu sɛgɛsɛgɛtɔ, i ka laɲinita ka ɲi ka kɛ min ye, o ye ka Jehova lɔn koɲuman (Zan 17:3). N’i tora ka Bibulu sɛgɛsɛgɛ, i bena a faamu Jehova ye Ala sugu min ye ani i bena a ka jogow lɔn. I y’o jogow lo kɔrɔsi tuma min na i ye sɛgɛsɛgɛri kɛ danfɛnw koo la. N’i ye Jehova ka jogow lɔn, i bena la a la ko a be yen tiɲɛn tiɲɛn na (Ɛkis. 34:6, 7; Zab. 145:8, 9). N’i tora ka Jehova lɔn koɲuman, dɔ bena to ka fara i ka limaniya kan. I bena a kanu kosɔbɛ fana ani i be teriya min kɛra n’a ye, o barika bena bonya.

15. N’i b’i ka limaniya kofɔ tɔɔw ye, o bena i nafa cogo di?

¹⁵ I be ni limaniya min ye Ala koo la, o kofɔ tɔɔw ye. N’i b’o kɛ, o bena i ka limaniya barika bonya. Nka i be mɔgɔ min waajura, n’a tigi lanin t’a la ko Ala be yen, i bena mun lo kɛ do? Bibulu be min fɔ o koo la, o ɲɛfɔra an ka gafew kɔnɔ. Baro kɛ n’o tigi ye o gafe dɔ kɔnɔnakow kan (1 Piyɛri 3:15). I be se ka dɛmɛ ɲini balima kolɔnbaga dɔ fɛ fana. I ye kunnafoni minw sɔrɔ Bibulu kɔnɔ, o tigi sɔnna o ma wo, a ma sɔn o ma wo, o bena ele yɛrɛ nafa sabu i ye sɛgɛsɛgɛri kɛ. O bena i ka limaniya barika bonya. O la, mɔgɔ minw be u yɛrɛ jati hakilitigiw ye wala minw ye kalanbabaw kɛ ani u b’a fɔ ko Danbaga tɛ yen, i tɛna la olu ka ngalon kumaw na.

16. N’i tɛ to k’i ka limaniya barika bonya, mun lo be se ka kɛ?

¹⁶ An be Jehova sago kɛra a mɛɛnna wo, a ma mɛɛn wo, an ka ɲi ka to k’an ka limaniya barika bonya a koo la. Mun na do? Sabu n’an m’an janto o koo la, an ka limaniya bena nagasi. An k’a to an hakili la ko limaniya basiginin lo tiɲɛnkow lo kan an ɲɛɛ tɛ minw na. An do ɲɛɛ tɛ fɛɛn minw na, an ka teli ka ɲinɛ u kɔ. O kama, ciden Pol ko limaniyabaliya ye hakɛ ye “min ka teli ka see an kɔrɔ.” (Eburuw 12:1). O la, an be se k’an yɛrɛ tanga o ma cogo di?—2 Tes. 1:3.

17. Mun lo bena an dɛmɛ an ka to ni limaniya barikaman ye?

 ¹⁷ A fɔlɔ, to ka Jehova deli a ka hakili senu na tuma o tuma. Mun na do? Sabu limaniya ye hakili senu deen faan dɔ lo ye (Gal. 5:22, 23). An tɛ se ka limaniya an Danbaga la ani ka to n’o limaniya ye ni a ka hakili senu m’an dɛmɛ. N’an tora ka Jehova deli a ka hakili senu na, a bena o di an ma (Luka 11:13). An yɛrɛ be se k’a deli ko: “Dɔ fara an ka lanaya kan.”—Luka 17:5.

18. Ka kɛɲɛ ni Zaburuw 1:2, 3 ye, nɛɛmaba juman lo b’an fɛ?

¹⁸ To ka Ala ka Kuma sɛgɛsɛgɛ tuma o tuma fana (Zaburuw 1:2, 3 kalan). Tuma min na zaburuw fɔlɔ sɛbɛra, Ala ka sariyasɛbɛ kuturu tun be sɔrɔ Israɛlden damanin dɔrɔn lo fɛ. Saan wolonfila o saan wolonfila, labɛnw tun be kɛ walisa “cɛɛ fara musow kan, ni denmisɛnw” ani lonan minw tun siginin be Israɛl jamana na, olu ka Ala ka sariya kalan lamɛn (Deter. 31:10-12). Yezu ka wagati la, Ala ka Kuma kitabuw tun be sɔrɔ mɔgɔ damanin dɔrɔn lo fɛ ani kalansow kɔnɔ. Nka bi, mɔgɔw fanba be se ka Ala ka Kuma yɔrɔ dɔw wala a kuturu yɛrɛ sɔrɔ k’a kalan. O ye nɛɛmaba yɛrɛ lo ye! An be se k’a yira cogo di ko an be Jehova waleɲuman lɔn o nɛɛmaba kosɔn?

19. An ka ɲi ka mun lo kɛ walisa an ka limaniya sabatinin ka to?

¹⁹ An be se k’a yira ko an be Ala waleɲuman lɔn a ka Kuma kosɔn an kɛtɔ k’a kalan loon o loon. An ka ɲi ka wagati kunmabɔ walisa ka Ala Kuma kalan ani k’a sɛgɛsɛgɛ. An man ɲi k’o kɛ ni wagati b’an fɛ dɔrɔn. N’an be Ala ka Kuma sɛgɛsɛgɛ tuma o tuma, an ka limaniya sabatinin bena to.

20. An ka ɲi k’an cɛsiri ka mun lo kɛ?

²⁰ An tɛ komi duniɲa nin ka “lɔnnikɛlaw ni hakilitigiw.” An be ni limaniya barikaman ye min basiginin lo Ala ka Kuma kan (Mat. 11:25, 26). An be Bibulu sɛgɛsɛgɛ minkɛ, an b’a faamu fɛɛn min kama duniɲa ka koow be nagasira ka taga ani Jehova bena min kɛ walisa k’o lalaga. O kama, an k’an cɛsiri ka dɔ fara an ka limaniya barika kan ani ka mɔgɔ caamanba dɛmɛ u ka limaniya an Danbaga la (1 Tim. 2:3, 4). An ka to ka wagati nin makɔnɔ, wagati min na bɛɛ bena Jehova tando k’a fɔ ko: “An matigi n’an ka Ala, i ka kan ni bonya ni tandoli ye . . . Bari, e le ye fɛɛn bɛɛ dan.”—Yir. 4:11.