1. Mun na mɔgɔ caaman hakili ɲagaminin lo diinanko la?

DIINAN waa caaman be yen bi minw b’a fɔ k’u ye kerecɛnw ye ani k’u be Ala batora i ko a b’a fɛ cogo min na. O lo kama, mɔgɔ caaman hakili ɲagaminin lo diinanko la. U b’u yɛrɛ ɲininga ko: “Yala tiɲɛn diinan kelen dɔrɔn lo be yen wala Ala be sɔn diinanw bɛɛ la?” Ayiwa ele do, yala i lanin b’a la ko Jehova Seerew be mɔgɔw kalan min na, o ye tiɲɛn ye wa? Yala i lanin b’a la fana ko u ka batoli kɛcogo dɔrɔn lo ka di Jehova ye wa? Mun lo be se k’i dɛmɛ i ka la o la? An ka daliluw lajɛ o koo la.

2. Mun na ciden Pol tun lanin b’a la ko a ka lannakow ye tiɲɛn ye? (1 Tesalonikaw 1:5).

² Ciden Pol tun lanin b’a la ko a be tiɲɛn diinan lo la (1 Tesalonikaw 1:5 kalan). A ka lanaya tun basiginin tɛ a dusukunnakow lo kan. Pol tun be Ala ka Kuma sɛgɛsɛgɛ koɲuman. A tun lanin b’a la ko “Ala ka kuma bɛɛ sɛbɛnna Ala yɛrɛ ka sebagaya barika la.” (2 Tim. 3:16). Pol tun ye mun lo faamu Ala ka Kuma kɔnɔ? A ye dalilu barikamanw sɔrɔ yen minw b’a yira ko layidu tara Masiya min koo la, o ye Yezu lo ye. Yahutu diinan kuntigiw y’a latigɛ k’u ɲɛɛw tugu o daliluw kan. U tun b’a fɔ k’u be mɔgɔw kalan tiɲɛnkow la Ala koo la, nka Ala be koo minw kɔniya, u tun be o lo kɛ (Titi 1:16). Pol tun be dan na o diinan kuntigiw la. A m’a latigɛ ka la Ala ka Kuma yɔrɔ dɔw la ani ka ban ka la yɔrɔ wɛrɛw la. A tun labɛnnin lo ka mɔgɔw kalan ‘Ala ka kolatigɛninw’ bɛɛ la ani k’u sira tagama.—Kɛw. 20:27.

3. Yala an ka ɲi k’an ka ɲiningaliw bɛɛ jaabiliw sɔrɔ walisa ka la a la ko an ye tiɲɛn diinan sɔrɔ wa? (Koorilen nin fana lajɛ: “ Jehova ka kokɛtaw n’a ka miiriyaw ka ca fɔɔ u tɛ se ka jati.”)

 ³ Dɔw b’a miiri ko tiɲɛn diinan ka ɲi ka se ka ɲiningaliw bɛɛ jaabi, hali Bibulu tɛ ɲiningali minw jaabi tigitigi. Yala o bɛnnin lo wa? An ka ciden Pol ka ɲɛyirali lajɛ. A y’a kerecɛnɲɔgɔnw jija ko u ka “koo bɛɛ sɛgɛsɛgɛ.” (1 Tes. 5:21). Nka, a sɔnna a ma fana ko koo caaman be yen ale tɛ minw faamu. A y’a sɛbɛ ko “daan b’an ka lɔnniya la.” A y’a fɔ fana ko “an be koo minw yera, a kɛra i n’a fɔ an b’u yera dubalen na le.” (1 Kor. 13:9, 12). Pol tun tɛ koo bɛɛ faamu. An fana tɛ koo bɛɛ faamu. Nka, Pol tun be tiɲɛnko jɔnjɔnw faamu Jehova koo la. A sera ka koo caaman faamu, o min y’a to a lara a la ko a be tiɲɛn diinan lo la!

4. An be se ka mun lo kɛ walisa ka la a la kosɔbɛ ko an ye tiɲɛn diinan sɔrɔ? An bena mun lo lajɛ kerecɛn sɔbɛw koo la?

⁴ An be se ka la a la cogo minw na ko an ye tiɲɛn diinan sɔrɔ, u la dɔ ye ka Jehova Seerew ka batoli kɛcogo suma ni Yezu ta ye. Barokun nin na, an bena a ye ko kerecɛn sɔbɛw 1) be ban boli batoli ma, 2) u be bonya la Jehova tɔgɔ kan, 3) tiɲɛnkalanw ka di u ye ani 4) u be ɲɔgɔn kanu kosɔbɛ.

5. Yezu y’an dɛmɛ ka mun lo faamu Ala batocogo ɲuman koo la? Yezu y’an kalan min na, an be se k’o sira tagama cogo di?

⁵ Yezu be Jehova kanu kosɔbɛ. O kama, a tun be ale kelenpe dɔrɔn lo bato. A tun b’o lo kɛ k’a to sankolo la ani tuma min na a nana dugukolo kan (Luka 4:8). A y’a fɔ a ka kalandenw ye  ko olu fana ka Jehova kelenpe lo bato. Yezu wo, a ka kalanden kantigiw wo, u si ma baara kɛ ka ye ni jaaw ye u ka batoli la. Mɔgɔ tɛ se ka Ala ye. O kama, mɔgɔ si tɛ se ka fɛɛn dɔ dilan min bɔnin lo Ala ma! (Ezayi 46:5). Nka, mɔgɔw b’a miiri ko dɔw ye senumanw ye ani u be u jaaw dilan ka tɛmɛ o fɛ ka delili kɛ. An be se ka mun lo fɔ o koo la? Jehova tun ye cikan tan minw di Israɛldenw ma, a y’a fɔ olu la filanan na ko: “Aw kana joo si dilan aw yɛrɛ ye, k’a kɛ i n’a fɔ sanfɛ fɛɛn dɔ jaa, walima dugukolo kan fɛɛn . . . Aw kana aw kunbiri gwan o kɔrɔ.” (Ɛkiz. 20:4, 5). Minw b’a fɛ k’u koo diya Ala ye, olu b’a faamu ko Ala t’a fɛ an ka tɛmɛ jaaw fɛ k’ale bato.

6. Bi, Jehova Seerew be jɔnw lo ladegi u ka batoli la?

⁶ Minw be tarikikow sɛgɛsɛgɛ olu ko cidenw ka wagati la, kerecɛnw tun be Ala kelenpe lo bato. Misali la, tariki gafe dɔ b’a fɔ ko miiriya min ye ko mɔgɔ be se ka tɛmɛ jaaw fɛ ka batoli kɛ, kerecɛn fɔlɔw “tun b’o kɔniya.” Bi, Jehova Seerew be kerecɛn fɔlɔw lo ladegi. An tɛ tɛmɛ “senumanw” wala mɛlɛkɛw jaaw fɛ ka delili kɛ. An yɛrɛ tɛ Yezu deli. An fana tɛ darapo fo wala ka koo si kɛ min b’a yira ko an be faamanw bato. A mana kɛ min o min ye, an b’an cɛsiri ka Yezu ka kuma nunu labato: “E ka Matigi i ka Ala bato ka baara kɛ ale kelenpe ye.”—Mat. 4:10.

7. Koo jumanw na, Jehova Seerew be dan na pewu diinan tɔɔw la?

⁷ Bi bi nin na, waajulikɛla minw tɔgɔ bɔra kosɔbɛ, a ka di mɔgɔ caaman ye k’olu lamɛn. O waajulikɛlaw koo be diya u ye fɔɔ a laban, a be kɛ komi u b’u batora le. Mɔgɔw be fa o diinan kuntigiw ka legiliziw la, u be u ka gafew san ani u be wariba di u ma walisa k’u dɛmɛ. O waajulikɛlaw mana min o min fɔ, mɔgɔ dɔw be la o la. U mana o waajulikɛlaw ye, u ninsɔn be diya i n’a fɔ u ye Yezu yɛrɛ lo ye! Nka, Jehova batobaga sɔbɛw tɛ tugu mɔgɔw lo kɔ. Hali n’an be an ɲɛminɛbagaw bonya, an be sɔn Yezu ka kuma nunu ma: “Aw bɛɛ ye balimaw ye.” (Mat. 23:8-10). An tɛ adamadenw bato, a ka kɛ diinan kuntigiw ye wo wala politiki ɲɛmɔgɔw. An fana tɛ dɛmɛ don u ka diinankow wala politikikow la. An t’an seen don fewu duniɲa nin ka koow la. O koow bɛɛ la, diinan minw b’a fɔ k’olu ye kerecɛnw ye, an be dan na pewu ni olu ye.—Zan 18:36.

8. An b’a lɔn cogo di ko Jehova b’a fɛ an ka bonya la ale tɔgɔ kan ani an k’a tɔgɔ kofɔ mɔgɔ bɛɛ ye?

⁸ Loon dɔ, Yezu ye delili kɛ ko: “N Faa, i k’i yɛrɛ tɔgɔ boɲa!” Jehova y’o delili jaabi ni kumakanba ye ka bɔ sankolo la. A ye layidu ta ko ale bena a tɔgɔ bonya (Zan 12:28). Yezu ka cidenya baara kuru bɛɛ la, a ye bonya la a Faa tɔgɔ kan (Zan 17:26). O kama, kerecɛn sɔbɛw b’a jati ko nɛɛma lo u fɛ ka Ala weele a tɔgɔ la ani k’o tɔgɔ kofɔ tɔɔw ye.

9. Kerecɛn fɔlɔw y’a yira cogo di k’u be bonya la Ala tɔgɔ kan?

⁹ Saan kɛmɛkulu fɔlɔ la, dɔɔni kerecɛn kafo juu siginin kɔ, Jehova y’a janto siya wɛrɛw la ka “siya dɔ woloma u cɛma k’o kɛ a tɔgɔla ta ye.” (Kɛw. 15:14). A tun ka di o kerecɛn fɔlɔw ye ka Ala weele a tɔgɔ la ani k’o tɔgɔ kofɔ tɔɔw ye. Waajuli la, u tun be Ala tɔgɔ fɔ mɔgɔw ye ani Bibulu ka kitabuw  sɛbɛtɔ, u ye Ala tɔgɔ sɛbɛ u kɔnɔ. * O cogo la, u y’a yira ko olu dɔrɔn lo tun be tɔɔw dɛmɛna ka Ala tɔgɔ lɔn.—Kɛw. 2:14, 21.

10. An b’a lɔn cogo di ko Jehova Seerew dama lo be Jehova tɔgɔ kofɔ mɔgɔw ye?

¹⁰ Yala Jehova Seerew dama lo be Ala tɔgɔ kofɔ mɔgɔw ye wa? An ka dalilu dɔw lajɛ. Bi, diinan kuntigi caaman be koo bɛɛ lajɛnnin kɛra walisa ka Ala tɔgɔ dogo mɔgɔw la. U ye Ala tɔgɔ bɔ u ka Bibulu bayɛlɛmaniw kɔnɔ. Tuma dɔw la yɛrɛ, u be u ka diinandenw bali k’o tɔgɔ weele u ka legiliziw kɔnɔ. * A gwɛnin lo ko Jehova Seerew dama lo be bonya la kosɔbɛ Ala tɔgɔ kan. An be mɔgɔw dɛmɛna duniɲa kuru bɛɛ kɔnɔ u ka Ala tɔgɔ lɔn! An b’o kɛra ka tɛmɛ diinan tɔɔw bɛɛ kan. An ye Jehova Seerew ye ani an b’an seko bɛɛ kɛ ka koow kɛ ka kɛɲɛ n’o tɔgɔ ye! (Ezayi 43:10-12). An ye “La Bible. Traduction du monde nouveau” den miliyɔn 240 ni kɔ bɔ papiye kan. Mɔgɔw ye Ala tɔgɔ bɔ yɔrɔ minw na Bibulu bayɛlɛmani dɔw kɔnɔ, an y’o tɔgɔ segi a nɔɔ na Traduction du monde nouveau kɔnɔ. An be sɛbɛw dilan kaan 1 000 ni kɔ la!  O sɛbɛw basiginin lo Bibulu kan ani Jehova tɔgɔ be sɔrɔ u kɔnɔ fana.

11. Kerecɛn fɔlɔw y’a yira cogo di ko tiɲɛnkalanw ka di u ye?

¹¹ Tiɲɛnkalan minw ɲɛsinna Ala n’a sagonata koo ma, olu ka di Yezu ye. A tun be koow kɛ ka kɛɲɛ n’o tiɲɛnkalanw ye ani a tun b’o kofɔ tɔɔw ye (Zan 18:37). Tiɲɛnkalanw tun ka di kosɔbɛ Yezu ka kalanden sɔbɛw fana ye (Zan 4:23, 24). Ciden Piyɛri yɛrɛ ye kerecɛn diinan weele ko “tiɲɛsira” (2 Piyɛri 2:2). Tiɲɛnkalanw tun ka di kerecɛn fɔlɔw ye. O kama, u tun be ban diinanw ka kalanw, landakow ani adamadenw ka miiriyaw ma minw tun tɛ tiɲɛn ye (Kɔlɔs. 2:8). O cogo kelen na bi, kerecɛn sɔbɛw b’u jija kosɔbɛ walisa ka to ka “Ala ka tiɲɛ” sira tagama. U b’o kɛ cogo di do? U b’u ka lannakow bɛɛ basigi Jehova ka Kuma kan ani ka koow kɛ ka kɛɲɛ n’o ye.—3 Zan 3, 4.

12. Minw be an ka baara ɲɛminɛ, n’olu y’a ye ko an ka ɲi ka yɛlɛmani don an ka faamuyali la koo dɔ la, u be mun lo kɛ do? Mun na u b’o yɛlɛmaniw kɛ?

¹² Jehova Seerew t’a fɔ ko u be Bibulu ka kalanw bɛɛ faamu bɛrɛbɛrɛ tuma bɛɛ. Tuma dɔw la, u filila Bibulu ka kalan dɔ ɲɛfɔli la wala an ka ɔriganisasiyɔn ka koow labɛncogo la. O man ɲi ka bari an na. Ala ka Kuma b’a yira ka gwɛ ko dɔ be to ka fara dɔɔni dɔɔni le Ala sagokɛlaw ka faamuyali kan tiɲɛnkalanw koo la (Kɔlɔs. 1:9, 10). Jehova be a sagokɛlaw dɛmɛ dɔɔni dɔɔni le ka tiɲɛnkalanw faamu. O kama, an ka ɲi ka muɲu ka kɔnɔni kɛ fɔɔ an ka faamuyali sɔrɔ bɛrɛbɛrɛ o kalanw koo la (Talenw 4:18). An be kalan dɔ faamu cogo min na wala an be koo dɔ kɛ cogo min na, ni Koow Ɲɛnabɔla Jɛnkulu y’a faamu ko an ka ɲi ka yɛlɛmani don o la, a be sin k’o kɛ. Bi, legilizi caaman b’u ka kalanw yɛlɛma walisa k’u ka diinandenw dusu diya. U b’o kɛ fana walisa ka tɔgɔba sɔrɔ duniɲa kɔnɔ. Nka, an Jehova Seerew be yɛlɛmaniw kɛ sabu an b’a fɛ k’an magwɛrɛ kosɔbɛ Ala la ani k’a bato i ko Yezu tun b’a kɛ cogo min na (Zaki 4:4). An tɛ yɛlɛmaniw kɛ sabu duniɲamɔgɔw ka miiricogo yɛlɛmana. Nka, an be u kɛ sabu an ye Ala ka Kuma faamu bɛrɛbɛrɛ. Tiɲɛnkalanw ka di an ye kosɔbɛ!—1 Tes. 2:3, 4.

13. Kerecɛn sɔbɛw be ni jogo juman lo ye min kɔrɔtanin lo ka tɛmɛ jogo tɔɔw bɛɛ kan? Jehova Seerew b’o jogo yira cogo di bi?

¹³ Kerecɛn fɔlɔw tun be ni jogo caaman ye. Nka, u tun lɔnnin lo jogo minw bɛɛ sababu fɛ, o bɛɛ la belebeleba ye kanuya lo ye. Yezu y’a fɔ ko: “Mɔgɔ bɛɛ ben’a lɔn o seen fɛ ko aw kɛra ne ka kalandenw ye, ni aw be ɲɔgɔn kanu.” (Zan 13:34, 35). Bi duniɲa kuru bɛɛ kɔnɔ, Jehova Seerew be ɲɔgɔn kanu sɔbɛ la ani u kaan bɛnnin lo. An ye denbaya kelen mɔgɔw ye, hali k’a sɔrɔ an ka jamanaw ani an ka kokɛcogo tɛ kelen ye. O kama, an be dan na diinan tɔɔw la. An ka lajɛnw ani lajɛnbaw la, an b’a ye ko an be ɲɔgɔn kanu sɔbɛ la. O b’a to an lanin b’a la kosɔbɛ ko an ka batoli kɛcogo ka di Jehova ye.

14. Ka kɛɲɛ ni Kɔlɔsikaw 3:12-14 ka fɔta ye, cogo kɔrɔtanin juman na an b’a yira ko an be ɲɔgɔn kanu kosɔbɛ?

¹⁴ Ala ka Kuma b’an jija ko an ka “ɲɔgɔn kanu kosɔbɛ.” (1 Piyɛri 4:8). An b’o kɛ cogo minw na, u dɔ ye ka yafa  ɲɔgɔn ma ani ka ɲɔgɔn ka dafabaliyakow muɲu. An be sababuw ɲini fana ka tɔɔw sɔn ani k’u ladon an ka soo. An b’o kɛ kafodenw bɛɛ ye, hali minw donna an gasi la (Kɔlɔsikaw 3:12-14 kalan). Tiɲɛn na, an be ɲɔgɔn kanu cogo min na, o b’a yira ko an ye kerecɛn sɔbɛw lo ye.

15. An be kerecɛn fɔlɔw ka batoli kɛcogo ladegi cogo wɛrɛ jumanw na?

¹⁵ An be kerecɛn fɔlɔw ka batoli kɛcogo ladegi cogo wɛrɛw la fana. Misali la, an ka ɔriganisasiyɔn labɛnnin lo i ko saan kɛmɛkulu fɔlɔ kerecɛnw tun labɛnnin lo cogo min na. An fana be ni kafokulu kɔrɔsibagaw, diinan mɔgɔkɔrɔw ani kɔrɔsigi cidenw ye (Filip. 1:1; Titi 1:5). I ko kerecɛn fɔlɔw, an be Jehova ka sariyaw labato cɛnimusoko, furu ani joli koo la. Minw t’a fɛ ka Ala ka sariyaw labato, an be kafo latanga olu ma fana.—Kɛw. 15:28, 29; 1 Kor. 5:11-13; 6:9, 10; Eburuw 13:4.

16. Efɛzikaw 4:4-6 b’an dɛmɛ ka mun lo faamu?

¹⁶ Yezu y’a fɔ ko mɔgɔ caaman bena a fɔ ko u ye ale ka kalandenw ye. Nka, a ko o mɔgɔw bɛɛ tɛ ale ka kalanden sɔbɛw ye (Mat. 7:21-23). Ala ka Kuma tun kɔnna k’an lasɔmi fana ko laban loonw na, mɔgɔ caaman “bena u yɛrɛ kɛ Ala ɲasiranbagaw ye.” (2 Tim. 3:1, 5). Nka, Bibulu b’a fɔ an ye ka gwɛ ko “lanaya kelen” wala batoli kɛcogo kelen lo ka di Ala ye.—Efɛzikaw 4:4-6 kalan.

17. Bi, jɔnw lo be lanaya kelen sira tagamana ani u be Yezu ladegira?

¹⁷ Jɔnw lo be o lanaya kelen sira tagamana bi? An ye daliluw lajɛ. An y’a ye Yezu ye mɔgɔw kalan batoli kɛcogo min na. An y’a ye fana ko kerecɛn fɔlɔw tun be batoli kɛ o cogo lo la. A gwɛnin lo ko Jehova Seerew dɔrɔn lo be o lanaya kelen sira tagamana bi. Nɛɛmaba lo an fɛ ka kɛ Jehova sagokɛla dɔw ye ani ka tiɲɛn lɔn Jehova n’a sagonata koo la! O la, an b’a fɛ k’an seko bɛɛ kɛ walisa ka la a la ko an be tiɲɛn sira lo kan.