1. Ka kɛɲɛ ni 3 Zan 3, 4 ye, mun lo b’an ninsɔn diya?

CIDEN ZAN tun ye dɔw dɛmɛ u ye tiɲɛn lɔn. Miiri k’a filɛ a dusu diyara cogo min na k’a mɛn ko u bele tun be Jehova sago kɛra kantigiya la! Gwɛlɛya caaman tun b’u kan ani Zan tun jijanin lo k’u ka limaniya sabati sabu a tun b’u jati a deenw ye Alako ta fan fɛ. An fana ninsɔn ka di n’an wolodenw wala an ka Bibulu kalandenw ye u yɛrɛkun di Jehova ma ani u jijanin lo tiɲɛn sira kan.—3 Zan 3, 4 kalan.

2. Zan y’a ka batakiw sɛbɛ kuun juman lo kama?

² U tun ye Zan waajibiya a tagara sigi Patimɔsi guun kan. A bɔnin kɔ yen, n’a sɔrɔ a tagara Efɛzi dugu la wala a gɛrɛfɛ. A be komi Zan tun siginin b’o yɔrɔ la saan 98 Krista tile la. O wagati la, Jehova ka hakili senu y’a lasun a ye bataki saba sɛbɛ. A y’u sɛbɛ walisa ka kerecɛn kantigiw jija u limaniyanin ka to Yezu la ani u ka to tiɲɛn sira kan.

3. An bena ɲiningali jumanw lo jaabi?

³ Zan kelen dɔrɔn lo tun tora cidenw cɛma. Ngalon kalanw tun be nɔɔ min tora kafow kan, Zan tun be hami o kosɔn * (1 Zan 2:18, 19, 26). Minw tun b’o murutili kalanw kɛ, u tun b’a fɔ k’u be Jehova lɔn k’a sɔrɔ u tun tɛ a ka cikanw labato. Hakili senu ye Zan lasun ka ladili minw di, an k’u lajɛ. U lajɛtɔ, an bena ɲiningali saba nunu jaabi: Ka tagama tiɲɛn sira kan, o kɔrɔ ko di? Gwɛlɛya jumanw lo  b’an seen kɔrɔ? Ani an be se ka ɲɔgɔn dɛmɛ cogo di ka to tiɲɛn sira kan?

4. Ka kɛɲɛ ni 1 Zan 2:3-6 ani 2 Zan 4, 6 ye, walisa ka tagama tiɲɛn sira kan, an ka ɲi ka mun lo kɛ?

⁴ Walisa ka tagama tiɲɛn sira kan, an ka ɲi ka Bibulu ka tiɲɛnkalanw lɔn. An ka ɲi ka “Ala ka kuma bato” fana, o kɔrɔ, k’a sira tagama (1 Zan 2:3-6; 2 Zan 4, 6 kalan). Yezu kɛra ɲɛyirali ɲuman ye an fɛ o koo la. A ye mɛnni kɛ Jehova fɛ cogo dafanin na. O la, an be se ka mɛnni kɛ Jehova fɛ cogo jɔnjɔn minw na, u la dɔ ye ka Yezu ladegi koɲuman.—Zan 8:29; 1 Piyɛri 2:21.

5. An ka ɲi ka la koo jumanw lo la?

⁵ Walisa ka to ka tagama tiɲɛn sira kan, an ka ɲi ka la a la ko Jehova ye tiɲɛntigi Ala ye, o kɔrɔ, a ye min o min fɔ a ka Kuma kɔnɔ, o bɛɛ ye tiɲɛn ye. An ka ɲi ka la a la fana ko Yezu ye Masiya ye layidu tara min koo la. Bi, mɔgɔ caaman lanin t’a la ko Yezu lo sugandira ka kɛ Ala ka Masaya Masacɛ ye. Minw labɛnnin tɛ ka tiɲɛn lafasa Jehova ni Yezu koo la, Zan ko “galontigɛla caaman” be se k’olu lafili (2 Zan 7-11). A y’a sɛbɛ ko: “Mɔgɔ min b’a fɔ ko Yezu te Ala ka mɔgɔ wolomanin [wala Krista] ye, o tigi le ye galontigɛla ye.” (1 Zan 2:22). An be se ka koo kelenpe min kɛ walisa u kana an lafili, o ye ka Bibulu sɛgɛsɛgɛ. N’an b’o kɛ, an bena Jehova ni Yezu lɔn ani an bena la a la ko an be tiɲɛn sira kan.—Zan 17:3.

6. Gwɛlɛya minw be kerecɛn kanbelew ni sunguruw kan, u la dɔ ye juman ye?

⁶ Kerecɛnw bɛɛ kan ɲi k’u janto walisa mɔgɔ si kana u kunnatiɲɛ ni adamadenw ka hakilitigiya ye (1 Zan 2:26). Kerecɛn kanbelew ni sunguruw yɛrɛ lo ka ɲi k’u yɛrɛ kɔrɔsi o ma. Alexia * be ni saan 25 ye ani a be bɔ Faransi. A ko: “Tuma min na n’ tun be lakɔli la, u y’an kalan ko bɛgɛnw lo yɛlɛma yɛlɛmana ka kɛ mɔgɔw ye ani u y’an kalan adamadenw ka hakilitigiya wɛrɛw la. O kalanw ye n’ hakili ɲagami. Tuma dɔw la, a tun be n’ ɲɛɛ na k’u bɛnnin lo. Nka, n’ y’a miiri ko a bɛnnin  tɛ n’ ka sɔn kalanfaw ka kumaw bɛɛ ma k’a sɔrɔ n’ yɛrɛ m’a ɲini k’a faamu Bibulu be min fɔ o koo la.” Alexia ye gafe nin sɛgɛsɛgɛ: La vie : comment est-elle apparue ? Évolution ou création ? Lɔgɔkun damanin o kɔ, a tun tɛ sigasigara tugun. A ko: “N’ ye koow sɛgɛsɛgɛ n’ yɛrɛ ma ani n’ lara a la ko Bibulu be min fɔ, o ye tiɲɛn ye. N’ y’a faamu ko n’ bena hɛɛrɛ ni ninsɔndiya sɔrɔ ni n’ be Bibulu ka fɔta labato.”

7. An ka ɲi k’an janto mun lo la ani mun na?

⁷ Kerecɛnw bɛɛ, denmisɛnw fara mɔgɔkɔrɔbaw kan, an bɛɛ k’an janto an kana filankafoya kɛ. Zan y’a yira ka gwɛ ko an tɛ se ka to tiɲɛn sira kan ani ka to ka kakalayakow kɛ (1 Zan 1:6). N’an b’a fɛ an koo ka diya Jehova ye sisan ani sini ma, fɔɔ an k’a to an hakili la ko an be koo o koo kɛ, Jehova ɲɛɛ b’o la. O kɔrɔ ko an be dibidibiko minw kɛ, hali ni mɔgɔw ɲɛɛ t’an na, Jehova kɔni ɲɛɛ b’an na.—Eburuw 4:13.

8. An man ɲi ka mun lo kɛ?

⁸ Kerecɛnw man ɲi ka jurumuko jati i ko duniɲamɔgɔw b’a jati cogo min na. Ciden Zan y’a sɛbɛ ko: “N’an y’a fɔ ko an ma hakɛ kɛ, an b’an yɛrɛ nigɛ.” (1 Zan 1:8). Zan ka wagati la, kerecɛn murutininw tun b’a fɔ ko mɔgɔ be se ka tugu ka jurumuw kɛ ani ka to ka jɛnɲɔgɔnya kɛ ni Ala ye. Mɔgɔw b’o lo miiri bi fana. U fanba b’a fɔ ko u lanin be Ala la. Nka, a be min fɔ jurumu koo la, u be ban o la sanko n’o ɲɛsinna cɛnimusoko ma. Jehova be min jati jurumu ye, olu fɛ, bɛɛ lo ka ɲi k’a latigɛ n’a bena o kɛ wala n’a tɛna o kɛ.

9. Ni kanbelew ni sunguruw be tugu Bibulu ka fɔta kɔ, u be nafa jumanw lo sɔrɔ o la?

⁹ Kerecɛn kanbelew ni sunguruw ka lakɔli filankuruw wala u baarakɛɲɔgɔnw ka teli k’u lasun u ka cɛnimusokow jati i  ko olu b’a jati cogo min na. O ɲɔgɔn lo ye Aleksandar sɔrɔ. A ko: “Lakɔliso, sunguru dɔw tun be n’ ɲɛɛ gwan ko n’ ka cɛnimusoko kɛ n’olu ye. U ko komi sunguru tɛ n’ fɛ, i be taga a sɔrɔ n’ ye cɛɲɔgɔnɲinila lo ye.” N’o koo ɲɔgɔn b’i kan, a to i hakili la ko n’i be tugu Bibulu ka fɔta kɔ, i bena danbe la i yɛrɛ kan, ka to kɛnɛya la, k’i yɛrɛ tanga dusukasikow ma ani ka to ka teriya kɛ ni Jehova ye. N’i tora ka ban ka koo jugu kɛ, a tɛna gwɛlɛya i ma ka koo ɲuman kɛ. A to i hakili la fana ko duniɲamɔgɔw be cɛnimusoko jati cogo min na, o bɛnnin tɛ fewu ani o bɔra Sutana lo yɔrɔ. O la, n’i be ban ka koow jati i ko olu, i be see sɔrɔ Sutana kan.—1 Zan 2:14.

10. Min fɔra 1 Zan 1:9 kɔnɔ, o b’an dɛmɛ cogo di ka Jehova bato ni dusukun ɲuman ye?

¹⁰ An sɔnna a ma ko joo be Jehova lo fɛ k’a latigɛ koo min ye jurumu ye. An b’an seko kɛ fana walisa an kana jurumu kɛ. Nka n’an ye jurumu kɛ, an b’o fɔ Jehova ye delili la (1 Zan 1:9 kalan). A ye diinan mɔgɔkɔrɔw sigi walisa u ka u janto an na. O kama, n’an ye jurumuba kɛ, an be dɛmɛ ɲini u fɛ (Zaki 5:14-16). Nka, an man ɲi ka to k’an yɛrɛ jalaki an ka jurumu tɛmɛninw kosɔn. Mun na do? Sabu an Faa kanutigi y’a Dencɛ di k’a kɛ kunmabɔ saraka ye walisa an ka jurumuw ka se ka yafa. O kama, ni Jehova ko a bena yafa jurumukɛla ma min nimisara, an k’a lɔn ko a bena o kɛ tiɲɛn na. O la, foyi tɛ se k’an bali ka Jehova bato ni dusukun ɲuman ye.—1 Zan 2:1, 2, 12; 3:19, 20.

11. Kalan minw be se k’an ka limaniya nagasi, an be se k’an yɛrɛ tanga olu ma cogo di?

¹¹ An ka ɲi ka ban kerecɛn murutininw ka kalanw ma. Kabi kerecɛn kafo sigituma na, Sutana b’a ɲinina ka sigasigali miiriya don Ala sagokɛla  kantigiw kuun na. O kama, an ka ɲi k’a lɔn min ye tiɲɛn ye ani min tɛ tiɲɛn ye. * Tuma dɔw la, an juguw be tɛmɛ ɛntɛrɛnɛti wala rezo sosiyow fɛ k’a ɲini k’an ka limaniya nagasi Jehova koo la. U be tɛmɛ o fɛɛrɛw fɛ fana k’a ɲini k’an ka kanuya nagasi an balimaw koo la. An kana la u ka ngalon kalanw na sabu u be bɔ Sutana lo yɔrɔ.—1 Zan 4:1, 6; Yir. 12:9.

12. Mun na an ka ɲi k’an ka limaniya barika bonya tiɲɛn koo la?

¹² An ka ɲi ka mun lo kɛ walisa Sutana kana se k’an ka limaniya nagasi? An ka ɲi k’an ka limaniya sabati Yezu koo la ani ka sɔn a ma ko Jehova be tɛmɛ ale lo fɛ k’a sago dafa. Jehova be tɛmɛna cɛɛ minw fɛ k’a ka ɔriganisasiyɔn ɲɛminɛ, an ka ɲi ka la olu fana na (Mat. 24:45-47). An be dɔ fara an ka limaniya barika kan, n’an be to ka Bibulu sɛgɛsɛgɛ. O la, an ka limaniya bena kɛ i ko yiri min lili donnin lo ka ɲɛ dugukolo kɔnɔ. Pol y’o ɲɛyirali ɲɔgɔn lo kofɔ a ka lɛtɛrɛ kɔnɔ, a ye min sɛbɛ Kɔlɔsi kafo ma. A ko: “Aw sɔnna Matigi Yesu Krisita ma cogo min na, aw ka taama ale la ten. Aw ka kɛ Yesu la i ko jiri dili donnen, ka jiidi ale la, ka sabati dannaya la.” (Kɔlɔs. 2:6, 7, Bible senuma). N’an b’an jija k’an ka limaniya sabati, Sutana n’a kɔmɔgɔw tɛna se k’an bali ka tagama tiɲɛn sira kan.—2 Zan 8, 9.

13. Mun lo man kan ka bari an na ani mun na?

¹³ Ni duniɲamɔgɔw b’an kɔniya, o man kan ka bari an na (1 Zan 3:13). Zan b’an hakili jigi ko “diɲɛ kɔnɔ fɛɛn tɔw bɛɛ be Sutana sago kɔrɔ.” (1 Zan 5:19). Duniɲa nin laban be surunyana kosɔbɛ ani Sutana dimininba lo (Yir. 12:12). Walisa k’an lafili, a be tɛmɛ jaan dɔw fɛ i n’a fɔ kakalayakow wala kerecɛn murutininw ka ngalon kalanw. A be sin k’an kɛlɛ fana. Ɲɛyirali fɛ, a be se ka kɔrɔbɔli gwan an kun. A b’a ɲinina k’an ka waajuli baara lalɔ ani k’an ka limaniya nagasi. A b’a lɔn ko wagati caaman t’a fɛ tugun k’o kɛ. A tɛ bari an na k’a ye ko jamana dɔw la, faamanw ye bali sigi an ka baara wala a faan dɔw kan. O bɛɛ n’a ta, an balimaw be muɲuli kɛra. O la, Sutana mana koo o koo kɛ an Jehova sagokɛlaw la, an be se ka to kantigiya la!

14. An be se k’an balimaw dɛmɛ cogo minw na u ka to tiɲɛn sira kan, u la dɔ ye juman ye?

¹⁴ Walisa k’an balimaw dɛmɛ u ka to tiɲɛn sira kan, an ka ɲi k’a yira ko an be makari u la (1 Zan 3:10, 11, 16-18). Koow ka ɲi wo, koow man ɲi wo, an ka ɲi ka ɲɔgɔn kanu. Yala i be dɔ lɔn min ka mɔgɔ kanulen dɔ sara ani a mako be dususalo wala dɛmɛ wɛrɛw la wa? Yala i y’a mɛn ko balima dɔw bɔnɛna u bololafɛnw na balawo dɔ kosɔn ani u mako be dɛmɛ na walisa k’u ka Masaya Boonw wala u ka soow lɔ wa? An b’a yira ko an b’an balimaw kanu ani ko an be makari u la kosɔbɛ an ka kumaw fɛ. Nka an be min kɛ u ye, o yɛrɛ lo kɔrɔtanin lo kosɔbɛ.

15. Ka kɛɲɛ ni 1 Zan 4:7, 8 ye, an ka ɲi ka mun lo kɛ?

¹⁵ N’an be ɲɔgɔn kanu, an b’a yira ko an b’an sankolola Faa kanutigi ladegi (1 Zan 4:7, 8 kalan). An be se k’o kanuya yira cogo di? O kɛcogo jɔnjɔn dɔ ye ka yafa ɲɔgɔn ma. Ɲɛyirali fɛ, dɔ be se k’an hakɛ ta ani o kɔ, a b’an deli ko an ka yafa a ma. N’an yafara a ma ani an tɛ miiri o koo la  tugun, an b’a yira ko an b’a tigi kanu (Kɔlɔs. 3:13). O koo ɲɔgɔn lo ye balimacɛ Aldo sɔrɔ. A tun be balimacɛ dɔ bonya kosɔbɛ. Nka loon dɔ, o balimacɛ ye kuma jugu fɔ Aldo ka siyamɔgɔw koo la. Aldo ko: “N’ tora ka Jehova deli a ka n’ dɛmɛ n’ kana kɛ ni miiriya jugu ye o balimacɛ koo la.” Nka Aldo ma dan o ma. A y’a ɲini o balimacɛ fɛ ko u ka waajuli kɛ ɲɔgɔn fɛ. Waajuli kɛtɔ, Aldo y’a ɲɛfɔ a ye a ka kumaw y’ale dusu tiɲɛ cogo min na. Aldo ko: “Tuma min na o balimacɛ y’a mɛn a ka kumaw ye min kɛ n’ na, a ye yafa deli n’ fɛ. A kumacogo fɛ, n’ y’a faamu ko a tun nimisanin lo kosɔbɛ. O kɔ, an kɛra teri ɲumanw ye tugun.”

16-17. An ka ɲi k’an cɛsiri ka mun lo kɛ?

¹⁶ Ciden Zan tun b’a balimaw kanu kosɔbɛ ani a tun b’a fɛ u ka kɛ ni limaniya barikaman ye. A ka ladili minw be sɔrɔ a ka bataki saba kɔnɔ, u b’o lo yira. Ninsɔndiya lo k’a lɔn ko cɛɛw ni muso minw bena mara kɛ ni Krista ye, olu be i ko Zan!—1 Zan 2:27.

¹⁷ An ye ladili minw lajɛ barokun nin na, an k’u ta sɔbɛ la. An k’an cɛsiri ka tagama tiɲɛn sira kan, o kɔrɔ, ka kolo Jehova ye koo bɛɛ la. An ka Bibulu kalan ani an ka la a ka fɔta la. An k’an ka limaniya sabati Yezu koo la. An ka ban koo nunu ma: adamadenw ka hakilitigiya, mɔgɔ murutininw ka kalanw, filankafoya ani jurumukow. An ka Jehova ka sariya tilenninw labato. Balima minw y’an hakɛ ta, an ka yafa u ma ani minw mako be dɛmɛ na, an k’u dɛmɛ. O la, u ka limaniya sabatinin bena to. N’an b’o kɛ, an bena to ka tagama tiɲɛn sira kan gwɛlɛyaw bɛɛ n’a ta.