1-2. a) Ka kɛɲɛ ni Yezu ka cikan ye Matiyo 28:18-20 kɔnɔ, cii fɔlɔ juman lo kalifara kerecɛn kafo ma? b) An bena ɲiningali jumanw lo lajɛ barokun nin na?

CIDENW ninsɔndiyanin ye ɲɔgɔn lajɛn kulu dɔ kan. Yezu suu kununa a ma mɛɛn ani ale lo ko u ka na o yɔrɔ la (Mat 28:16). N’a sɔrɔ o wagati lo la, ‘a y’a yɛrɛ yira balimaw na minw tun tɛmɛna mɔgɔ kɛmɛ duuru kan.’ (1 Kor 15:6). Mun na Yezu y’a ɲini a ka kalandenw fɛ u k’ale kunbɛn yen? A tun b’a fɛ ka cii kɔrɔtanin dɔ kalifa u ma. A ko: “Aw ye taga siyaw bɛɛ kɛ ne ka kalandenw ye.”—Matiyo 28:18-20 kalan.

² Kalanden minw ye Yezu ka kumaw mɛn, kɔfɛ, olu lo ye kafo fɔlɔ juu sigi. Cii fɔlɔ min kalifara o kerecɛnw ma, o ye ka mɔgɔw kɛ Krista ka kalandenw ye. * Bi, kerecɛn sɔbɛw be ni kafo waa caaman ye duniɲa kuru bɛɛ kɔnɔ ani o cii kelen lo kalifara u bɛɛ ma. Barokun nin na, an bena ɲiningali naani nunu lajɛ: Mun na a kɔrɔtanin lo kosɔbɛ an ka mɔgɔw kɛ Yezu ka kalandenw ye? An be se ka mɔgɔw kɛ Yezu ka kalandenw ye cogo di? Yala kerecɛn kelen kelen bɛɛ be se ka dɛmɛ don o baara la wa? Mun na an ka ɲi ka muɲu n’an b’o baara kɛra?

3. Ka kɛɲɛ ni Zan 14:6 ani 17:3 ye, mun na a kɔrɔtanin lo an ka mɔgɔw kɛ Yezu ka kalandenw ye?

³ Mun na a kɔrɔtanin lo kosɔbɛ an ka mɔgɔw kɛ Yezu ka kalandenw ye? O kɔrɔtanin lo sabu Yezu ka kalandenw dɔrɔn lo be se ka kɛ Ala teriw ye. Ka fara o kan, u b’u ka ɲɛnamaya kɛcogo fisaya kabi sisan ani u be ni jigiya ye ka ɲɛnamaya kɛ fɔɔ abada sini ma (Zan 14:6; 17:3 kalan). Siga t’a la, Yezu ye cii min kalifa an ma, o kɔrɔtanin lo yɛrɛ le! Nka, an t’o cii dafa an yɛrɛ fanga barika la. Ciden Pol y’a sɛbɛ ale yɛrɛ n’a teri sɔbɛ dɔw koo la ko: “An ni Ala ye baarakɛɲɔgɔnw ye.” (1 Kor. 3:9, Bible senuma). Jehova ni Krista ye nɛɛmaba kɛ an adamaden dafabaliw ye yɛrɛ le!

4. Ivan ni Matilde ka koo b’an dɛmɛ ka mun lo faamu?

⁴ Ka mɔgɔw kɛ Yezu ka kalandenw ye, o be se k’an ninsɔn diya kosɔbɛ. An ka Ivan n’a muso Matilde ka koo lajɛ. U be bɔ Kolɔnbi jamana na. U ye kanbele dɔ waaju min tɔgɔ ko Davier. A y’a fɔ u ye ko: “N’ b’a fɛ ka n’ ka ɲɛnamaya kɛcogo yɛlɛma, nka n’ tɛ sera k’o kɛ.” Davier tun be bɔksi kɛ, ka dɔrɔgi ta, ka dɔrɔ min kojugu ani ale n’a ka sunguru Erika tun be ɲɔgɔn fɛ boon kelen na. Ivan ko: “An ye bibulukalan daminɛ ni Davier ye. A tun be dugudennin min na, o yɔrɔ tun ka jan n’an ka dugu ye. An tun ka ɲi ka nɛgɛso boli lɛri caaman na pɔtɔpɔtɔ kɔnɔ ka sɔrɔ ka se yen. Erika nana a kɔrɔsi ko Davier y’a ka ɲɛnamaya kɛcogo yɛlɛma. O kama, a farala a kan ka bibulukalan kɛ.” Davier ye dɔrɔgi, dɔrɔ ani bɔksi dabila. A ye Erika furu fana. Matilde ko: “Davier ni Erika batize tuma na saan 2016, an hakili jigira Davier ka kumaw na ani an kasira ninsɔndiya bolo. A tun ko ale b’a fɛ ka yɛlɛmaniw kɛ, nka a tɛ sera k’o kɛ.” Siga t’a la, n’an be mɔgɔw dɛmɛ u ka kɛ Krista ka kalandenw ye, o b’an ninsɔn diya kosɔbɛ!

5. An ka ɲi ka fɛɛn fɔlɔ juman lo kɛ walisa ka mɔgɔw kɛ Yezu ka kalandenw ye?

⁵ An ka ɲi ka fɛɛn fɔlɔ min kɛ walisa ka mɔgɔw kɛ Yezu ka kalandenw ye, o ye ka mɔgɔ sɔbɛw “yɔrɔ ɲini.” (Mat. 10:11). An b’a yira ko an ye Jehova Seerew ye, n’an be Jehova kofɔ kafo ka kiinmɔgɔw bɛɛ ye. Yezu ye cii min di ko an ka mɔgɔw waaju, n’an b’o labato, an b’a yira ko an ye kerecɛn sɔbɛw ye.

6. An ka ɲi ka mun lo kɛ walisa mɔgɔw k’an lamɛn waajuli la?

⁶ Dɔw b’a fɛ sɔbɛ la ka Bibulu faamu. Nka, an be mɔgɔ minw kunbɛn, a be komi u caaman t’u mako don a daminɛ na. N’a sɔrɔ an ka ɲi k’u jija u k’a ɲini ka dɔ lɔn tugun. Walisa mɔgɔw k’an lamɛn waajuli la, an ka ɲi k’an yɛrɛ labɛn ka ɲɛ. I bena mɔgɔ minw kunbɛn, barokun tigitigi dɔw sugandi minw be se ka diya u ye. O kɔ, a filɛ i bena o barokunw kelen kelen bɛɛ dadon cogo min na.

7. I be se ka baro dadon ni mɔgɔw ye cogo di? Ele fɛ, mun na a kɔrɔtanin lo ka mɔgɔ lamɛn ani k’i janto a ka miiriya la?

⁷ Ɲɛyirali fɛ, i be se ka dɔ ɲininga ko: “N’ be se k’i ka miiriya lɔn koo dɔ kan wa? Gwɛlɛya caaman b’an kan bi duniɲa kɔnɔ. Ele fɛ, gofɛrɛnɛman dɔ be yen min be se k’o gwɛlɛyaw ɲɛnabɔ wa?” O kɔ, i be se ka baro kɛ Daniyɛli 2:44 kan. Wala i be se k’o tigi ɲininga ko: “Ele ka miiri la, mɔgɔ be se k’a deenw  kolo koɲuman cogo di?” O kɔ, baro kɛ n’a ye Deteronɔmu 6:6, 7 kan. I mana a latigɛ ka baro kɛ min o min kan, i bena mɔgɔ minw waaju, miiri olu koo la. Miiri k’a filɛ u bena nafa min sɔrɔ k’a lɔn kalan tigitigi min be Bibulu kɔnɔ. N’i be kumana n’u ye, a kɔrɔtanin lo i k’u lamɛn ani i k’i janto u ka miiriyaw la. O la, i bena u faamu koɲuman ani u ka teli k’i lamɛn.

8. Mun na an ka ɲi ka to ka viziti kuraw kɛ?

⁸ N’a sɔrɔ i ka ɲi ka wagati ta ani k’i jija ka viziti kuraw kɛ mɔgɔ fɛ fɔlɔ, a tigi be sɔrɔ ka sɔn bibulukalan ma. Mun na do? Sabu tuma min na i be taga bɔ a ye, n’a sɔrɔ a labilanin tɛ k’i lamɛn. O kama, n’a sɔrɔ i ka ɲi ka segi a tigi fɛ siɲɛ caaman, a be sɔrɔ ka sɔn ka bibulukalan kɛ n’i ye. A to i hakili la ko walisa yiri ka bonya, fɔɔ an ka jii kɛ a la tuma o tuma. O cogo kelen na, walisa makodonmɔgɔ dɔ ka kanuya barika ka bonya Jehova ni Yezu koo la, fɔɔ an ka baro kɛ n’a ye Bibulu koo la tuma o tuma.

9-10. Mun na an be se k’a fɔ ko kerecɛn kelen kelen bɛɛ be se ka dɛmɛ don ka mɔgɔ kɔnɔgwɛw yɔrɔ ɲini?

⁹ Kerecɛn kelen kelen bɛɛ be se ka dɛmɛ don ka mɔgɔ kɔnɔgwɛw yɔrɔ ɲini. An be se k’o baara suma ni deen tununin dɔ ɲinini ye. Walisa k’o faamu an ka miiri cɛdennin dɔ la min be ni saan saba ye ani a tununa. Mɔgɔ 500 ɲɔgɔn tagara a yɔrɔ ɲini. Lɛri 20 ɲɔgɔn o deen tununin kɔ, cɛɛ dɔ y’a ye kabaforo dɔ kɔnɔ. O cɛɛ tun t’a fɛ mɔgɔw k’ale tando o kosɔn. A ko: “O deen yera sabu mɔgɔ kɛmɛ duuru jɛnna k’a yɔrɔ ɲini.”

¹⁰ Mɔgɔ caaman be komi o deen tununin. U tɛ ni jigiya ye ani u mako be  dɛmɛ na (Efɛz. 2:12). An mɔgɔ miliyɔn seegi ni kɔ be baara kɛra ɲɔgɔn fɛ walisa k’o mɔgɔw yɔrɔ ɲini. A be se ka kɛ ko i ma mɔgɔ dɔ sɔrɔ min sɔnna bibulukalan na. Nka, weleweledala wɛrɛw be se ka mɔgɔ dɔ sɔrɔ i ka kafo ka kiinw kɔnɔ min b’a fɛ ka Bibulu ka tiɲɛnkalanw lɔn. Ni balima dɔ ye mɔgɔ dɔ sɔrɔ ani a tigi sɔnna ka kɛ Krista ka kalanden ye, kerecɛnw bɛɛ ka ɲi ka ninsɔndiya. Mun na do? Sabu u bɛɛ ye dɛmɛ don k’o tigi yɔrɔ ɲini.

11. Hali ni bibulukalan t’i fɛ, i be se ka dɛmɛ don cogo wɛrɛ jumanw na walisa ka mɔgɔw kɛ Krista ka kalandenw ye?

¹¹ Hali ni bibulukalan t’i fɛ sisan, i be se ka dɛmɛ don cogo wɛrɛw la walisa ka mɔgɔw kɛ Krista ka kalandenw ye. Ni mɔgɔ kuraw nana lajɛn na, i be se k’u bisimila ani k’u dɛmɛ. N’i b’i ka kanuya yira u la o cogo la, i bena se k’u dɛmɛ u k’a ye ko an ye kerecɛn sɔbɛw ye (Zan 13:34, 35). Lakalitaw kɛ lajɛnw na hali n’u ka surun. O la, i bena a yira mɔgɔ kuraw la u be se k’u ka limaniya kofɔ cogo min na ni kɔnɔgwɛ ani bonya ye. I be se ka weleweledala kura dɔ bila sira waajuli la fana. I be se k’a yira a la a be se ka baara kɛ ni Bibulu ye cogo min na ka hakilijagabɔ kɛ ni mɔgɔw ye. N’i b’o kɛ, i bena a dɛmɛ a ka Krista ladegi.—Luka 10:25-28.

12. Yala an mako be setigiya kabakomanw na walisa ka mɔgɔw kɛ Krista ka kalandenw ye wa? A ɲɛfɔ.

¹² An man ɲi k’a miiri ko an mako be setigiya kabakomanw na walisa ka mɔgɔw kɛ Krista ka kalandenw ye. Mun na do? An ka Faustina ka koo lajɛ. A be Bolivi jamana na. Siɲɛ fɔlɔ min na Jehova Seerew y’a kunbɛn, a tun tɛ se kalan na. Kabi o tuma, a ye kalan degi ani sisan a be se a la dɔɔni dɔɔni. A batizera ani a ka di a ye ka tɔɔw kalan. A yɛrɛ be bibulukalan duuru kɛ lɔgɔkun o lɔgɔkun. Faustina be kalan kɛ ni mɔgɔ minw ye, hali n’a tɛ se kalan na ka se u fanba ma, a y’u mɔgɔ wɔɔrɔ dɛmɛ u batizera.—Luka 10:21.

13. Hali n’an bolo degunnin lo kosɔbɛ, an be se ka nafa jumanw lo sɔrɔ n’an be mɔgɔw kɛ Yezu ka kalandenw ye?

¹³ Kerecɛn caaman bolo degunnin lo kosɔbɛ sabu u be baara caaman kɛ minw kɔrɔtanin lo. O bɛɛ n’a ta, u be wagati kunmabɔ ka bibulukalanw kɛ ani u be ninsɔndiyaba sɔrɔ o la. An ka Melanie ka koo lajɛ. A be Alaska mara la ani a kelen lo tun b’a denmuso lamɔna min tun be ni saan seegi ye. Ka fara o kan, a tun be kudayi baloɲini baara dɔ la. A tun b’a bangebaga dɔ ladonna fana min be ni kansɛri bana ye. Melanie  tun be dugu min na, o yɔrɔ tun ka jan dugu tɔɔw la ani ale kelenpe lo tun ye Jehova Seere ye o yɔrɔ la. A tun be to ka delili kɛ walisa ka fanga sɔrɔ ka taga waajuli kɛ nɛnɛ bɛɛ n’a ta. A tun b’o kɛ sabu a tun b’a fɛ sɔbɛ la ka bibulukalan kɛ ni mɔgɔ dɔ ye. A laban, a ye Sara kunbɛn. A diyara ale ye kosɔbɛ k’a lɔn ko tɔgɔ be Ala la. Dɔɔni o kɔ, Sara sɔnna bibulukalan na. Melanie ko: “Jumalon bɛɛ sufɛ, ne ni n’ denmuso tun be to ka taga a ka bibulukalan kɛ hali k’a sɔrɔ n’ sɛgɛnninba tun lo. Ne ni n’ denmuso ye nafa sɔrɔ o la. Sara tun be ɲiningali minw kɛ, a tun ka di an ye k’o jaabiliw ɲini. A diyara an ye kosɔbɛ k’a ye ko a kɛra Jehova teri ye.” Sara y’a jaa gwɛlɛya ka kɔrɔbɔliw muɲu. A bɔra a ka legilizi la ani a ye batɛmu ta.

14. a) Ka mɔgɔ kɛ Yezu ka kalanden ye, cogo juman na o ni jɛgɛminɛ bɔnin be ɲɔgɔn fɛ? b) Pol ye min fɔ 2 Timote 4:1, 2 kɔnɔ, o b’i lasun ka mun lo kɛ?

¹⁴ Hali n’i ma mɔgɔ sɔrɔ fɔlɔ min b’a fɛ ka kɛ Yezu ka kalanden ye, kana i fari faga. A to i hakili la ko Yezu y’an ka baara suma ni jɛgɛminɛ ye. Jɛgɛminɛla be se ka lɛri caaman kɛ ka sɔrɔ ka jɛgɛ dɔ minɛ. Tuma caaman na, a be se ka baara kɛ fɔɔ dugutilama wala dugugwɛ dafɛ. Tuma dɔw la fana, a be taga yɔrɔjan baji kan (Luka 5:5). O cogo kelen na, weleweledala dɔw be muɲu ka waajuli kɛ lɛri caaman kɔnɔ. U b’o kɛ yɔrɔ caaman na ani u t’o kɛ wagati kelen na. Mun na do? Sabu u b’a fɛ ka sababu sɔrɔ ka kuma  ni mɔgɔ caaman ye. Minw be jijaliba kɛ o cogo la, olu ka teli ka mɔgɔ dɔw sɔrɔ minw b’u mako don kibaro diiman na. I ka teli ka mɔgɔw sɔrɔ wagati wala yɔrɔ min na, yala i be se k’i jija ka waajuli kɛ o yɔrɔ wala o wagati la wa?—2 Timote 4:1, 2 kalan.

15. Mun na an ka ɲi ka muɲu n’an be bibulukalan kɛra ni mɔgɔ ye?

¹⁵ Mun na an ka ɲi ka muɲu n’an be bibulukalan kɛra ni mɔgɔ ye? An ka ɲi ka Bibulu kalanden dɛmɛ a ka Bibulu ka kalanw lɔn ani u koo ka diya a ye. Nka o dɔrɔn tɛ. An ka ɲi k’a dɛmɛ a ka Jehova lɔn, ale min ye Bibulu Tigi ye ani a k’a kanu. Yezu be koo minw ɲini a ka kalandenw fɛ, an ka ɲi ka Bibulu kalanden dɛmɛ fana a k’u faamu ani a k’a lɔn a be se k’u sira tagama cogo min na. N’a b’a jijara ka Bibulu ka sariyaw labato, an ka ɲi ka muɲu k’a dɛmɛ. Bibulu kalanden dɔw be se k’u ka miiricogo n’u ka delinankow yɛlɛma kalo damanin dɔrɔn kɔnɔ. Nka, dɔw b’o kɛ wagati caaman kɔnɔ.

16. Raúl ka koo y’i dɛmɛ ka mun lo faamu?

¹⁶ Misɔnden dɔ be Peru jamana na ani a ka Bibulu kalanden dɔ ka koo b’a yira nafa min b’a la ka muɲu kalandenw kɔrɔ. A ko: “N’ ye bibulukalan kɛ ni Raúl ye gafe fila kɔnɔ. Nka, a bele tun ka ɲi ka yɛlɛmanibaw kɛ. Hɛɛrɛ tun t’a ka furu kɔnɔ, a tun be kuma nɔgɔninw fɔ ani a tun ka gwɛlɛ a deenw ma k’a bonya. Nka komi a tun be na lajɛnw na tuma o tuma, n’ tun be to ka taga bɔ a ye walisa k’ale n’a ka denbaya dɛmɛ. Saan saba ni kɔ an ka ɲɔgɔnyeko fɔlɔ kɔ, a ye saratiw dafa ka batize.”

17. An bena mun lo lajɛ barokun nata la?

¹⁷ Yezu ye cii di an ma ko: “Aw ye taga siyaw bɛɛ kɛ ne ka kalandenw ye.” Walisa k’o cii dafa, tuma caaman na an be kuma mɔgɔ dɔw fɛ minw ka lannakow n’an taw tɛ kelen ye fewu. U dɔw tɛ diinan si la wala u yɛrɛ lanin tɛ Ala la. Barokun nata bena a yira cogo min na an be se ka kibaro diiman fɔ o mɔgɔ suguw ye.