1-2. Koo jumanw lo kɔrɔtanin lo Jehova Seerew fɛ?

KOO kɔrɔtaninba dɔw ɲɛsinna an ma bi: Ala ka masabaya ani a tɔgɔ saniyako. An ye Jehova Seerew ye minkɛ, a ka di an ye ka kuma o koo kɔrɔtaninw koo la. Ala ka masabaya ani a tɔgɔ saniyako tɛ taga ka ɲɔgɔn dan.

² An bɛɛ b’a faamu ko Ala tɔgɔ ka ɲi ka saniya. An b’a faamu fana ko an ka ɲi k’a yira ko Ala ka masabaya ɲɔgɔn tɛ yen. O koo fila bɛɛ kɔrɔtanin lo.

3. Jehova tɔgɔ be mun lo yira a koo la?

³ Jehova tɔgɔ b’a yira a ye Ala sifa min ye ani a be kuntigiya kɛ cogo min na. O la, n’an ko Jehova tɔgɔ saniyako kɔrɔtanin lo ka tɛmɛ fɛɛn bɛɛ kan, an b’a fɔra le fana ko a ka kuntigiya ka ɲi ka lafasa. Jehova lo ye duniɲa kuru bɛɛ Masaba ye. A tɔgɔ b’a yira a be kuntigiya kɛ cogo min na.—Koorilen nin lajɛ: “ Koo minw ɲɛsinna Ala tɔgɔ saniyako ma.”

4. Zaburuw 135:13 be mun lo fɔ Ala tɔgɔ koo la? An bena ɲiningali jumanw lo jaabi barokun nin na?

⁴ Jehova tɔgɔ ɲɔgɔn tɛ yen (Zaburuw 135:13 kalan). Mun na do? Ala tɔgɔ tiɲɛna cogo di Edɛn nankɔ kɔnɔ? Ala b’a tɔgɔ saniya cogo di? An be se k’o tɔgɔ lafasa cogo di? An k’o ɲiningaliw jaabi.

5. Dɔw be se k’u yɛrɛ ɲininga mun lo la?

⁵ Yezu ko: “I tɔgɔ ka saniya.” (Mat. 6:9, Bible senuma).  A k’o ye koo kɔrɔtaninba ye an ka ɲi ka delili kɛ min koo la. Nka, ka Ala tɔgɔ saniya o kɔrɔ ko di? Ka fɛɛn dɔ saniya, o kɔrɔ ko k’a kɛ senuman ye wala ka nɔgɔ bɔ a la. Dɔw be se k’u yɛrɛ ɲininga ko: “Mun na Jehova tɔgɔ ka ɲi ka saniya k’a sɔrɔ a tɔgɔ ka senu ani a saniyanin lo ka ban?” Walisa k’o ɲiningali jaabi, an ka ɲi k’a filɛ fɔlɔ mɔgɔ tɔgɔ be min yira a tigi koo la.

6. Mun lo kɔrɔtanin lo mɔgɔ tɔgɔ koo la?

⁶ Tɔgɔ tɛ kumadenw dama ye an be minw fɔ wala k’u sɛbɛ papiye kan. A filɛ Bibulu be min fɔ: “Tɔgɔɲuman ka fisa ni nafolo caaman ye.” (Talenw 22:1; Waaj. 7:1). Mun na mɔgɔ tɔgɔ kɔrɔtanin lo ten? A kɔrɔtanin lo sabu a b’a yira mɔgɔw be min miiri a tigi koo la. O la, mɔgɔ tɔgɔ be sɛbɛ wala a be weele cogo min na, o lo kɔrɔtanin tɛ. Min kɔrɔtanin lo kosɔbɛ, o ye mɔgɔw be min miiri n’u y’o tɔgɔ ye wala n’u y’a mɛn.

7. Mɔgɔw be Ala tɔgɔ tiɲɛ cogo di?

⁷ Ni mɔgɔw be ngalon la Jehova kan, u b’a tɔgɔ tiɲɛna le. U b’o kɛ walisa mɔgɔw ka koo jugu miiri a koo la. Siɲɛ fɔlɔ min na dɔ ye Ala tɔgɔ tiɲɛ, o kɛra Edɛn nankɔ lo kɔnɔ. An k’a filɛ an be kalan minw sɔrɔ o koo la.

8. Adama ni Awa tun be mun ni mun lo lɔn? O be ɲiningali jumanw lo lawuli?

⁸ Adama ni Awa tun b’a lɔn ko Ala tɔgɔ ko Jehova. U tun be koo kɔrɔtanin wɛrɛw lɔn Ala koo la. Ɲɛyirali fɛ, u tun b’a lɔn ko ale lo y’u Danbaga ye, ale lo ye niin, yɔrɔ cɛɲumanin ani furuɲɔgɔn dafanin d’u ma (Zɛnɛzi 1:26-28; 2:18). Nka, Jehova ye koo minw bɛɛ kɛ u ye, yala u tun bena to ka miiri o la wa? Yala u tun bena to ka dɔ fara u ka kanuya n’u ka waleɲumanlɔn kan a koo la wa? O ɲiningaliw jaabira tuma min na Ala jugu y’u kɔrɔbɔ.

9. Ka kɛɲɛ ni Zɛnɛzi 2:16, 17 ani 3:1-5 ka fɔta ye, Jehova ye mun lo fɔ Adama ni Awa ye? Sutana ye miiriya jugu don u kuun na cogo di Ala koo la?

⁹ Zɛnɛzi 2:16, 17 ani 3:1-5 kalan. Sutana y’a kɛ i n’a fɔ saa lo tun be kumana Awa fɛ. A ye Awa ɲininga ko: “Tiɲɛ na,  Ala y’a fɔ ko aw kana yɔrɔ nin yiriw si deen dumu wa?” Sutana ka ɲiningali la, a ye ngalon la Ala kan. O y’a to Awa y’a daminɛ ka kɛ ni miiriya jugu ye Ala koo la. Ala tun ye min fɔ, o ye k’u be se ka yiriw bɛɛ deen dumu fɔɔ kelen dama. Adama ni Awa tun be se ka yiri sifa caaman deen dumu (Zɛnɛzi 2:9). Siga t’a la, Jehova tɛgɛ labilanin lo ka mɔgɔ sɔn. Yiri kelen dɔrɔn lo tun be yen Ala ko Adama ni Awa man kan ka min deen dumu. Nka, Sutana ka ɲiningali y’a to Awa y’a miiri ko Ala tɛgɛ labilanin tɛ. N’a sɔrɔ a y’a yɛrɛ ɲininga ko: “Kɔni Ala t’an jɛnna fɛɛn ɲuman dɔ la?”

10. Sutana sinna ka Ala tɔgɔ tiɲɛ cogo di? O nɔfɛko kɛra mun lo ye?

¹⁰ Tuma min na Sutana ye Awa ɲininga, Awa bele tun be Jehova jati a Kuntigi ye. Ala tun ye min fɔ u ye ka gwɛ, a y’o fɔ Sutana ye. A ko u man kan ka maga o yiri la yɛrɛ. Awa tun b’a kala ma ko Ala ko n’u ma mɛnni kɛ ale fɛ, u bena sa. Nka Sutana y’a jaabi ko: “Aw tena sa.” (Zɛnɛzi 3:2-4). Sisan, Sutana ma munumunu tugun. A sinna ka Ala tɔgɔ tiɲɛ walisa Awa k’a miiri ko Ala ye ngalontigɛla ye. O cogo la, Sutana kɛra naafigi ye, o kɔrɔ ngalontigɛla. Sutana ye Awa lafili pewu a lara a ka kumaw na (1 Tim. 2:14). A lara Sutana na ka tɛmɛ Jehova kan. O y’a to a ye desizɔn dɔ ta min ka jugu ni desizɔnw bɛɛ ye. A y’a latigɛ ka muruti Jehova ma. Jehova tun ko u kana yiri min deen dumu, Awa y’o dumu ani o kɔ a ye dɔ di Adama ma.—Zɛnɛzi 3:6.

11. Adama ni Awa tun ka ɲi ka mun lo kɛ? Nka u ma mun lo kɛ?

¹¹ Miiri dɔɔni k’a filɛ Awa tun ka ɲi ka min fɔ Sutana ye. A tun be se k’a fɔ ko: “N’ t’i lɔn, nka n’ be n’ Faa Jehova lɔn. N’ b’a kanu ani n’ lanin b’a la. Ale lo ye fɛɛn bɛɛ di ne ni Adama ma. Ele yɛrɛ ye jɔn lo ye n’i be sɔn ka koo jugu fɔ n’ Faa koo la! Taa ka bɔ yen!” Jehova dusu tun bena diya yɛrɛ le n’a denmuso kanulen tun y’o fɔ! (Talenw 27:11). Nka, Awa n’a cɛɛ tun tɛ ni kanuya kantigiman ye u Faa Ala koo la. O kama, u m’a tɔgɔ lafasa.

12. Sutana ye sigasigali miiriya don Awa kuun na cogo di? Adama ni Awa ma mun lo kɛ?

¹² I ko an y’a ye ka tɛmɛ cogo min na, Sutana y’a daminɛ ka sigasigali miiriya don Awa kuun na. A y’a kɛ Awa y’a yɛrɛ ɲininga ni Ala ye Faa ɲuman ye tiɲɛn na. Adama ni Awa ma Jehova tɔgɔ lafasa tuma min na Sutana ye ngalonfin la a kan. U ye mɛnni kɛ Sutana fɛ ani u murutira u Faa ma. Sutana be tɛmɛ o fɛɛrɛw ɲɔgɔn lo fɛ bi. A be Jehova tɔgɔ tiɲɛ a kɛtɔ ka ngalon la a kan. Minw be la Sutana ka ngalonw na, olu ka teli ka ban Jehova ka kuntigiya tilennin ma.

13. Ezekiyɛli 36:23 be Bibulu ka barokun jɔnjɔn bɔ kɛnɛ kan cogo di?

¹³ Sutana ye ngalon min la Jehova kan, yala Jehova ma foyi kɛ o koo la wa? Ayi, a ye koo dɔ kɛ. Bibulu kuturu b’a yira Jehova ye min kɛ walisa k’a yira ko Sutana ye min fɔ Edɛn nankɔ kɔnɔ, o ye ngalon lo ye (Zɛnɛzi 3:15). An be se ka Bibulu ka barokun jɔnjɔn fɔ ka surunya ten ko: Jehova b’a tɔgɔ saniya a Dencɛ ka Masaya sababu la ani a be tilenninya ni hɛɛrɛ sigi kokura dugukolo kan. Kunnafoniw be sɔrɔ Bibulu kɔnɔ minw b’an dɛmɛ k’a faamu Jehova bena a tɔgɔ saniya cogo min na.—Ezekiyɛli 36:23 kalan.

14. Murutiliko min kɛra Edɛn nankɔ kɔnɔ, Jehova y’o ta cogo min na, o b’a tɔgɔ saniya cogo di?

¹⁴ Sutana be koo bɛɛ lajɛnnin kɛra walisa ka Jehova bali a k’a sagonata dafa. Nka, a tɛ sera. Bibulu b’a yira Jehova be min kɛra. A b’a yira fana ko Jehova Ala ɲɔgɔn tɛ yen. Tiɲɛn lo, Sutana n’a nɔfɛmɔgɔw ka murutili be Jehova dusu kasi kosɔbɛ (Zab. 78:40). Nka, Jehova b’o koo ɲɛnabɔra ni hakilitigiya, muɲuli ani tilenninya ye. A b’a ka sebagaya yira cogo caaman na fana. Min yɛrɛ kɔrɔtanin lo ka tɛmɛ, o ye ko a ka kanuya be ye a ka kokɛtaw bɛɛ la (1 Zan 4:8). Jehova bele be baara kɛra walisa a tɔgɔ ka saniya.

15. Sutana be Ala tɔgɔ tiɲɛna bi cogo di ani o nɔfɛkow ye jumanw ye?

¹⁵ Sutana bele be Ala tɔgɔ tiɲɛna. A be sigasigali miiriya don mɔgɔw kuun na. A t’a fɛ u ka la a la ko Ala lo ye sebagayatigi ye, ko a tilennin lo ani ko a ye hakilitigi ni kanutigi ye. Ɲɛyirali fɛ, a b’a fɛ u k’a miiri ko Jehova lo tɛ Danbaga ye. Mɔgɔ minw lanin b’a la ko Ala be yen, Sutana be koo bɛɛ lajɛnnin kɛ walisa u k’a miiri ko Ala ka sariyaw ka gwɛlɛ ani k’u tilennin tɛ. A yɛrɛ be mɔgɔw kalan ko Jehova dusu ka gwɛlɛ ani ko a be mɔgɔw jɛni jahanama tasumaman kɔnɔ. N’u lara o ngalonfinw na, u ka teli ka  ban Jehova ka kuntigiya ma, a b’o min kɛ ni tilenninya ye. Jehova bena Sutana halaki pewu! Nka sanni o cɛ, Sutana bena to ka Jehova tɔgɔ tiɲɛ ani k’a ɲini k’i lafili walisa i fana ka muruti Jehova ma. Yala a bena se k’o kɛ wa?

16. Ele be se ka mun lo kɛ Adama ni Awa ma min kɛ?

¹⁶ Jehova b’a to adamaden dafabaliw ka dɛmɛ don walisa k’a tɔgɔ saniya. O la, Adama ni Awa ma min kɛ, ele be se k’o kɛ. Duniɲa kɔnɔ bi, mɔgɔ caaman be Ala tɔgɔ tiɲɛ. Nka, sababu dira i ma ka Jehova tɔgɔ lafasa ani k’a fɔ mɔgɔw ye ko Ala senuman lo, a tilennin lo, a ka ɲi ani a ye kanutigi ye (Ezayi 29:23). I be se ka Jehova ka kuntigiya lafasa. I be se fana ka mɔgɔw dɛmɛ u k’a faamu ko Jehova ka kuntigiya dama lo tilennin lo kosɔbɛ. Ka fara o kan, i be se k’u dɛmɛ u k’a faamu k’o kuntigiya dɔrɔn lo sababu la, danfɛnw bɛɛ bena hɛɛrɛ ni ninsɔndiya sɔrɔ.—Zab. 37:9, 37; 146:5, 6, 10.

17. Yezu y’a Faa tɔgɔ kofɔ mɔgɔw ye cogo di?

¹⁷ N’an be Jehova tɔgɔ lafasa, an be Yezu Krista lo ladegira (Zan 17:26). Yezu y’a Faa tɔgɔ kofɔ mɔgɔw ye, a kɛtɔ k’a tɔgɔ fɔ u ye ani k’a yira u la Jehova ye Ala sifa min ye. Ɲɛyirali fɛ, a ye Fariziɲɛw sɔsɔ, olu minw tun b’a yira ko Jehova dusu ka gwɛlɛ, a yɔrɔ ka jan mɔgɔw la, a tɛ hinɛ ani a ka koo ka gwɛlɛ. Yezu ye mɔgɔw dɛmɛ walisa u k’a ye ko a Faa ka koo ka nɔgɔ, a be muɲu, kanutigi lo ani a be yafa. A y’a Faa ka jogow ladegi cogo dafanin na a ka loon o loon ɲɛnamaya la. O cogo la, a ye mɔgɔw dɛmɛ u ka Jehova lɔn.—Zan 14:9.

18. An be se ka mun lo kɛ walisa k’a yira ko Jehova juguw ye min fɔ a koo la, o tɛ tiɲɛn ye?

¹⁸ I ko Yezu, an be min lɔn Jehova koo la, an be se k’o fɔ mɔgɔw ye. An b’o kɛ an kɛtɔ k’u kalan ko Jehova ye kanutigi Ala ye ani ko a ka ɲi kosɔbɛ. N’an b’o kɛ, an b’a yira ko Jehova juguw ye min fɔ a koo la, o tɛ tiɲɛn ye. An be Jehova tɔgɔ saniya fana, an kɛtɔ ka mɔgɔw dɛmɛ u k’a faamu k’o tɔgɔ ka senu. An be se ka Jehova ladegi fana. An be se k’o kɛ hali  k’a sɔrɔ an ye dafabaliw ye (Efɛz. 5:1, 2). Jehova ye Ala sifa min ye tigitigi, an k’o yira an ka kumaw n’an ka kɛwalew fɛ. O la, an bena dɛmɛ don walisa k’a tɔgɔ saniya. An be Ala tɔgɔ lafasa an kɛtɔ ka mɔgɔw dɛmɛ u ka tiɲɛn lɔn Ala koo la. * Ka fara o kan, an b’a yira ko adamaden dafabaliw be se ka kantigiya kɛ Jehova ye.—Zɔbu 27:5.

19. An ka laɲinita fɔlɔ ka ɲi ka kɛ min ye n’an be mɔgɔw kalanna, Ezayi 63:7 b’an dɛmɛ k’o faamu cogo di?

¹⁹ An be se ka koo wɛrɛ kɛ walisa ka Jehova tɔgɔ saniya. N’an be mɔgɔw kalanna Bibulu ka tiɲɛn kalanw na, an ka teli ka sinsin Ala ka masabaya lo kan. An b’a yira ko joo be Jehova lo fɛ ka duniɲa mara. O ye tiɲɛn ye. A kɔrɔtanin lo an ka mɔgɔw kalan Ala ka sariyaw koo la. Nka, an ka laɲinita fɔlɔ ye k’u dɛmɛ u ka an Faa Jehova kanu ani u ka kantigiya kɛ a ye. O la, an ka ɲi ka sinsin Jehova ka jogo kabakomanw kan ani k’a yira ka gwɛ a ye Ala sifa min ye (Ezayi 63:7 kalan). N’an be mɔgɔw kalan o cogo la, an bena u dɛmɛ u ka Jehova kanu ani u ka mɛnni kɛ a fɛ sabu u b’a fɛ ka kantigiya kɛ a ye.

20. An bena mun lo lajɛ barokun nata la?

²⁰ A ka ɲi an ka kɛwalew n’an ka mɔgɔw kalancogo ka nɔɔrɔ la Jehova tɔgɔ kan ani u ka mɔgɔw lasun u k’u magwɛrɛ a la. An be se k’o kɛ cogo di? An bena o lo lajɛ barokun nata la.