1. Jehova be mun lo filɛ a ka mɔgɔw la?

JEHOVA ALA “ka mɔgɔw koo ka d’a ye.” (Zab. 149:4). O b’an ninsɔn diya kosɔbɛ! Jehova b’an ka jogo ɲumanw lo filɛ ani a b’a ye an be se ka kɛ mɔgɔ ɲuman min ye. A b’an dɛmɛ fana an ka kɛ a teriw ye. N’an tora kantigiya la, a magwɛrɛnin bena to an na fɔɔ abada!—Zan 6:44.

2. Mun na a ka gwɛlɛ dɔw ma ka la a la ko Jehova be u kanu?

² Dɔw be se k’a fɔ ko: “N’ b’a lɔn ko Jehova b’a ka jamakulu kanu, nka yala a be ne kanu wa?” Mun na u b’u yɛrɛ ɲininga o la? Oksana tɔɔrɔla kosɔbɛ a denmisɛn tuma. * A ko: “N’ ninsɔn tun ka di kosɔbɛ n’ batize tuma na ani n’ kɛra piyɔniye ye. Nka saan 15 o kɔ, koo jugu minw tun ye n’ sɔrɔ n’ denmisɛn tuma, n’ y’a daminɛ ka miiri o la. N’ tora k’a miiri ko Jehova tɛ n’ kanu tugun ani ko n’ man kan n’a ka kanuya ye.” Balimamuso Yua ye piyɔniye ye ani ale fana ye gwɛlɛya caaman sɔrɔ a denmisɛn tuma. A ko: “N’ ye n’ yɛrɛkun di Jehova ma sabu n’ tun b’a fɛ k’a dusu diya. Nka, n’ tun lanin b’a la ko a tɛna n’ kanu abada!”

3. An bena mun lo lajɛ barokun nin na?

³ Siga t’a la, i k’o balimamuso kantigiw, i be Jehova kanu kosɔbɛ. Nka, n’a sɔrɔ i b’i yɛrɛ ɲininga n’a be ele kanu. Mun na i ka ɲi ka la a la kosɔbɛ ko Jehova b’i kanu sɔbɛ la? Mun lo be se k’i dɛmɛ n’i b’a miiri ko Jehova t’i kanu? An k’o ɲiningaliw jaabiliw lajɛ.

4. N’an lanin t’a la ko Jehova b’an kanu, mun na farati b’o la?

⁴ N’an lanin b’a la ko Jehova b’an kanu, o bena an lasun k’an seko bɛɛ kɛ walisa k’a sago kɛ gwɛlɛyaw bɛɛ n’a ta. Nka, n’an lanin t’a la ko Jehova b’an kanu, an “barika bɛ dɔgɔya.” (Talenw 24:10, Bible senuma). N’an fari fagara sabu an b’a miiri ko Ala t’an kanu, an tɛna see sɔrɔ Sutana kan.—Efɛz. 6:16.

5. Mun lo y’an balima dɔw sɔrɔ sabu u tun lanin t’a la ko Ala b’u kanu?

⁵ An balima dɔw ka limaniya nagasira sabu u y’a daminɛ k’a miiri ko Jehova t’u kanu ani ko a t’a janto u la. James ye diinan mɔgɔkɔrɔ ye. A ko: “N’ tun be baara kɛ Betɛli la. N’ tun be kafo dɔ kɔnɔ fana kaan wɛrɛ be fɔ yɔrɔ min na ani a tun ka di n’ ye ka waajuli kɛ o kaan na. O bɛɛ n’a ta, n’ tun be jijali minw kɛra, n’ tun be n’ yɛrɛ ɲiningara n’o ka di Jehova ye. Wagati dɔ la yɛrɛ, n’ tun be n’ yɛrɛ ɲiningara ni Jehova be n’ ka deliliw lamɛn.” Eva fana be kudayi cidenya baara la. A ko: “N’ y’a faamu ko farati b’a la k’a miiri ko Jehova t’an kanu. Farati b’o la sabu an be fɛɛn o fɛɛn kɛ Jehova ye, o be nɔɔ to o kan. O b’a to fana an t’a fɛ ka koow kɛ Jehova ye tugun ani an tɛ ninsɔndiya sɔrɔ a sago kɛli la.” Michael ye kudayi piyɔniye ye ani diinan mɔgɔkɔrɔ lo. A ko: “N’i lanin t’a la ko Ala b’i kanu, a laban, i bena i yɔrɔ janya a la.”

6. An ka ɲi ka mun lo kɛ n’an y’a daminɛ k’a miiri ko Ala t’an kanu?

⁶ O lakalitaw b’a yira ko n’an b’a miiri ko Jehova t’an kanu, o be se k’an ka limaniya nagasi. Nka, an ka ɲi ka mun lo kɛ n’an y’a daminɛ k’a miiri ko Ala t’an kanu? An ka ɲi ka sin k’o miiriya bɔ an kɔnɔ. Haminanko minw b’a to i b’o miiri, Jehova deli a k’i dɛmɛ i k’o bɔ i kɔnɔ ani a k’a ka “hɛrɛ” d’i ma walisa o k’i “tanga hamikojugu ma.” (Zab. 139:23; Filip. 4:6, 7). A to i hakili la ko balima kantigi dɔw fana b’u jijara k’o miiriyaw ɲɔgɔn kɛlɛ. Hali minw ye Jehova sago kɛ galen, u dɔw y’o miiriyaw ɲɔgɔn kɛlɛ. An k’a filɛ an be kalan minw sɔrɔ ciden Pol ka koo la.

7. Gwɛlɛya jumanw lo tun be Pol kan?

⁷ Yala tuma dɔw la i b’a jati ko i ka kunkanbaaraw ka ca kojugu ani ko i tɛ se k’u bɛɛ dafa wa? N’o lo, i bena Pol faamu. A tun tɛ hami kafo kelen dɔrɔn lo koo la, nka a tun “be hami ni Krista ka jamakuluw bɛɛ ka koo ye.” (2 Kor. 11:23-28). Yala kɛnɛyakow b’i kan minw b’i ka ninsɔndiya nagasi wa? “Ŋɔni dɔ dɔnna [Pol] farikolo la” ani o tun b’a tɔɔrɔla kosɔbɛ. N’a sɔrɔ o tun ye kɛnɛyako dɔ lo ye ani a tun b’a fɛ n’a dusu bɛɛ ye o ka ban (2 Kor. 12:7-10, Bible senuma). Yala i fari be faga tuma dɔw la i ka dafabaliyakow kosɔn wa? O ɲɔgɔn tun be Pol fana sɔrɔ. Pol ko ale ye “sigɛnbagatɔ ye” sabu a tun ka ɲi ka bondori kɛ tuma o tuma walisa ka koo tilennin kɛ.—Ɔrɔm. 7:21-24.

8. Mun lo ye Pol dɛmɛ ka see sɔrɔ a ka gwɛlɛyaw kan?

⁸ O gwɛlɛyaw bɛɛ n’a ta, Pol tora ka Jehova sago kɛ. Mun lo ye fanga di a ma? Pol tun b’a ka dafabaliyakow kala ma bɛrɛbɛrɛ. Nka, a tun limaniyanin lo kosɔbɛ kunmabɔsara koo la. Yezu ye layidu ta ko “mɔgɔ min y’a jigi la [ale] kan, o tigi . . . ka nii banbali sɔrɔ.” Pol tun b’o layidu lɔn (Zan 3:16; Ɔrɔm. 6:23). Siga t’a la, a tun limaniyanin lo kunmabɔsara koo la. A tun lanin b’a la ko hali minw ye jurumuba kɛ, n’u nimisara, Jehova labɛnnin lo ka yafa u ma.—Zab. 86:5.

9. Pol ka kuma minw be sɔrɔ Galatikaw 2:20 kɔnɔ, an be kalan juman lo sɔrɔ o la?

⁹ Pol tun lanin b’a la fana ko Ala b’ale kanu kosɔbɛ sabu a ye Yezu ci ka na sa ale kosɔn (Galatikaw 2:20 kalan). A kɔrɔsi o vɛrise yɔrɔ laban be mɔgɔ hakili sigi cogo min na. Pol y’a fɔ ko: “Ala Dencɛ . . . ye ne kanu fɔɔ k’a yɛrɛ di ne kosɔn.” Pol tun t’a miiri ko ale man kan ni Ala ka kanuya ye. A tun t’a fɔ ko: “Jehova be n’ balimaw kanu kuun caaman kosɔn, nka n’ t’a lɔn fɛɛn min kama a bena ne kanu.” Pol ye Ɔrɔmukaw hakili jigi ko: “K’an to an ka hakɛ la, Krista sara an kosɔn.” (Ɔrɔm. 5:8). Tiɲɛn na, foyi tɛ se ka Ala bali k’an kanu kosɔbɛ!

10. Ɔrɔmukaw 8:38, 39 b’an dɛmɛ ka mun lo faamu?

¹⁰ Ɔrɔmukaw 8:38, 39 kalan. Pol tun lanin b’a la kosɔbɛ ko Ala ka kanuya barika ka bon yɛrɛ le! A y’a sɛbɛ ko: “Fɛɛn si te yen min be se k’an faran ka  bɔ Ala ka kanuya la.” Pol tun b’a lɔn ko Jehova muɲuna kosɔbɛ Israɛldenw kɔrɔ. A tun b’a lɔn fana Jehova makarila ale la cogo min na. A be komi Pol tun b’a fɔra le ko: “Jehova y’a Dencɛ ci ka na sa ne kosɔn minkɛ, n’ man ɲi k’a miiri ko a tɛ n’ kanu.”—Ɔrɔm. 8:32.

11. Pol ye jurumu minw kɛ, u dɔw kofɔra 1 Timote 1:12-15 kɔnɔ. O jurumuw bɛɛ n’a ta, mun na a tun lanin b’a la ko Ala b’ale kanu?

¹¹ Vɛrise nunu kalan: 1 Timote 1:12-15. Pol tun ye koo minw kɛ tuma min na a tun tɛ kerecɛn ye, a tun mana miiri o la, n’a sɔrɔ o tun b’a tɔɔrɔ kosɔbɛ. A ko ale “ka jugu” ni jurumukɛla tɔɔw bɛɛ ye. O tɛ bari an na! Sanni Pol ka tiɲɛn lɔn, a tun be taga dugu ni duguw la ka kerecɛnw tɔɔrɔ kosɔbɛ. A tun b’u dɔw don kaso la ani a tun be sɔn u k’u dɔw faga (Kɛw. 26:10, 11). Miiri k’a filɛ: Pol tun be se ka kerecɛn kanbele dɔ kunbɛn min bangebagaw sara ale kosɔn. Siga t’a la, o tun b’a dusu tiɲɛ kosɔbɛ. Pol tun nimisanin lo a ka jurumu kosɔn. Nka, a tun b’a lɔn ko koo minw kɛra, a tɛ se k’u yɛlɛma. A tun lanin b’a la ko Yezu sara ale kosɔn ani a ko: “Ne be yɔrɔ min na sisan, o ye Ala ka nɛɛma nɔɔ ye.” (1 Kor. 15:3, 10). An be kalan juman lo sɔrɔ o la? La a la ko Krista sara ele kosɔn ani ko o sababu la, i be se ka teriya sɔbɛ kɛ ni Jehova ye (Kɛw. 3:19). An tun ye Jehova Seerew ye wo, an tun t’a ye wo, an ye fili minw kɛ ka tɛmɛ, Ala t’o lo filɛ. An be koo minw kɛra sisan ani an bena minw kɛ sini ma, o lo kɔrɔtanin lo a fɛ.—Ezayi 1:18.

12. N’an b’a miiri ko nafa foyi t’an na wala ko an man kan ni Ala ka kanuya ye, 1 Zan 3:19, 20 kɔnɔkumaw be se k’an dɛmɛ cogo di?

¹² Yezu sara i ka jurumuw kosɔn minkɛ, n’i miirila o la, n’a sɔrɔ i b’a fɔ i yɛrɛ ye ko: “Ne man kan n’o nɛɛma ye.” Mun na i b’o  miiri? Komi an ye mɔgɔ dafabaliw ye, an dusukun be se k’an lafili ani k’a to an b’a miiri ko nafa foyi t’an na wala ko an man kan ni Ala ka kanuya ye (1 Zan 3:19, 20 kalan). N’an y’a daminɛ k’o miiri, an k’a to an hakili la ko “Ala ka bon n’an kɔnɔnako ye.” Hali n’an b’a miiri ko an sankolola Faa Jehova t’an kanu wala ko a tɛna yafa an ma, an k’a lɔn ko a bele b’an kanu ani a bena yafa an ma. An ka ɲi ka sɔn a ma ko Jehova b’an kanu. Walisa ka sɔn o ma, an ka ɲi k’a ka Kuma kalan tuma o tuma, ka to k’a deli ani ka jɛn n’a sagokɛla kantigiw ye. Mun na a kɔrɔtanin lo an k’o kɛ?

13. N’an be Bibulu sɛgɛsɛgɛ, o be se k’an dɛmɛ cogo di? (Koorilen nin fana lajɛ: “ Ala ka Kuma y’u dɛmɛ cogo min na.”)

¹³ Bibulu sɛgɛsɛgɛ loon o loon. O la, i bena Jehova n’a ka jogo kabakomanw lɔn kosɔbɛ. I bena a faamu ko a b’i kanu yɛrɛ le! N’i be miiri Ala ka Kuma kan loon o loon, o be se k’i dɛmɛ i k’i ka miiriyaw n’i dusukunnakow latilen (2 Tim. 3:16). Diinan mɔgɔkɔrɔ dɔ tɔgɔ ko Kevin. A tun be to k’a miiri ko nafa foyi t’ale la. A ko: “N’ ye Zaburuw 103nan kalan ani ka miiri a kan. O ye n’ dɛmɛ ka n’ ka miiriya latilen ani k’a faamu Jehova be min miiri tiɲɛn na n’ koo la.” Eva min kofɔra ka tɛmɛ, ale ko: “Jehova be koow jati cogo min na, loon bɛɛ wulafɛ, n’ be wagati ta ka miiri o la. O be n’ hakili sigi ani ka n’ ka limaniya barika bonya.”

14. Delili be se k’an dɛmɛ cogo di?

¹⁴ Delili kɛ tuma o tuma (1 Tes. 5:17). N’i b’a fɛ ka teriya kɛ ni mɔgɔ dɔ ye, i ka ɲi ka to ka kuma a fɛ tuma o tuma ani k’i dusukunnakow fɔ a ye. O kelen lo fana n’an b’a fɛ ka teriya kɛ ni Jehova ye. An k’an dusukunnakow, an ka miiriyaw ani an ka haminankow fɔ a ye. O la, an b’a yira ko an lanin b’a la ani ko an b’a lɔn ko a b’an kanu (Zab. 94:17-19; 1 Zan 5:14, 15). Yua min kofɔra, ale ko: “Ni n’ be Jehova deli, koo minw ye n’ sɔrɔ tile kɔnɔ, n’ t’o dɔrɔn lo fɔ a ye. N’ ka miiriyaw ani n’ dusukunnakow ye minw ye tigitigi, n’ b’o fana fɔ a ye. Dɔɔni dɔɔni, n’ labanna ka Jehova jati i ko faa dɔ, min b’a deenw kanu sɔbɛ la. N’ t’a jati i ko baara ɲɛmɔgɔ dɔ.”—Koorilen nin lajɛ: “ Yala i y’a kalan wa?”

15. Jehova b’a yira cogo di ko a b’a mako do an na sɔbɛ la?

¹⁵ Jɛn n’i balima kerecɛnw ye. Jehova ka nilifɛnw lo (Zaki 1:17). An sankolola Faa y’a yira ko a b’a mako don an na sɔbɛ la sabu a ye balimaw di an ma kafo kɔnɔ. O balimaw b’a yira “waati bɛɛ”  ko an “koo ka di” u ye (Talenw 17:17). Pol ka bataki kɔnɔ Kɔlɔsikaw ma, a ye balima dɔw tɔgɔ fɔ minw y’a dɛmɛ ani a ko u y’ale “jigi tugulaw ye.” (Kɔlɔs. 4:10, 11). Yezu Krista yɛrɛ mako tun b’a teriw ka dɛmɛ na. A teri minw y’a dɛmɛ, mɛlɛkɛw wo, adamadenw wo, a y’u bɛɛ waleɲuman lɔn.—Luka 22:28, 43.

16. An balima kerecɛnw be se k’an dɛmɛ cogo di an k’an magwɛrɛ kosɔbɛ Jehova la?

¹⁶ Yala i be dɛmɛ ɲini i balima kerecɛnw fɛ ani i be sɔn u ka dɛmɛ na wa? N’an b’an ka haminankow fɔ kerecɛn kolɔnbaga dɔ ye, o kɔrɔ tɛ ko an ye fagobagatɔ ye. O b’an latanga le. James min kofɔra ka tɛmɛ, ale ko: “Ka teriya sɔbɛ kɛ ni kerecɛn kolɔnbagaw ye, o ye n’ dɛmɛ kosɔbɛ. Ni miiriya juguw be n’ hakili ɲagamina, o teri sɔbɛw be muɲu ka n’ lamɛn ani u b’a fɔ n’ ye ko u be n’ kanu. O b’a yira ko Jehova be n’ kanu ani a b’a janto n’ na.” A kɔrɔtanin lo kosɔbɛ an ka to ka teriya sɔbɛ kɛ n’an balimaw ye!

17-18. An ka ɲi ka mɛnni kɛ jɔn lo fɛ ani mun na?

¹⁷ Sutana ka laɲinita ye k’an fari faga koo ɲuman kɛli la. A b’a fɛ an k’a miiri ko Jehova t’an kanu ani ko an man kan ni kisili ye. Nka i ko an y’a ye cogo min na, o tɛ tiɲɛn ye.

¹⁸ Jehova b’i kanu. I koo ka gwɛlɛ a ma kosɔbɛ. I ko Yezu, n’i be mɛnni kɛ a fɛ, i bena ‘to a ka kanuya la’ fɔɔ abada! (Zan 15:10). O la, kana mɛnni kɛ Sutana fɛ. Kana mɛnni kɛ i dusukun fana fɛ, n’a b’a fɔra i ye ko Jehova t’i kanu. Nka, mɛnni kɛ Jehova fɛ, ale min b’an kelen kelen bɛɛ ka jogo ɲumanw lo filɛ. La a la ko a “ka mɔgɔw koo ka d’a ye” ani ele yɛrɛ!