BIBULU sɛbɛwagati la, soo kunnasigibaga tun be mɔgɔ wɛrɛ ka sokɔnɔkow wala a bololafɛnw kun na. Eburu ani gɛrɛkikan kumaden minw bayɛlɛmana ko “soo kunnasigibaga,” u be se ka ɲɛsin dɔ ka soo kɔrɔsibaga wala a ka sokɔnɔkow ɲɛnabɔbaga lo ma.

Tuma min na cɛmɔgɔba Yakuba dencɛ Yusufu tun be jɔnya la Ezipiti, a kɛra a kuntigi ka soo kunnasigibaga ye. Yusufu kuntigi yɛrɛ “tun y’a ka fɛɛn bɛɛ to [a] bolo.” (Zɛnɛzi 39:2-6). Kɔfɛ, tuma min na Yusufu kɛra kuntigiba ye Ezipiti, a ye soo kunnasigibaga sigi a yɛrɛ ka soo kun na.​—Zɛnɛzi 44:4.

Yezu ka wagati la, forotigiw tun ka teli ka to dugubaw kɔnɔ. U yɔrɔ tun ka jan u ka forow la. O kama, u tun be soo kunnasigibagaw sigi walisa u ka baarakɛlaw ka baara kɔrɔsi foro kɔnɔ loon o loon.

Jɔn lo tun be se ka kɛ soo kunnasigibaga ye? Ɔrɔmukaw ka sɛbɛrikɛla dɔ min tɔgɔ ko Columella, ale y’a fɔ ko jɔɔn min tun be kɛ soo kɔrɔsibaga wala soo kunnasigibaga ye, ale ka ɲi k’a “ka baara lɔn koɲuman.” O tigi ka ɲi k’a “janto ko baarakɛlaw b’u ka baara kɛ ka ɲɛ, nka a man ɲi ka fariya u ma.” Columella y’a fɔ tugun ko: “Min kɔrɔtanin lo ka tɛmɛ, o ye ko a man ɲi k’a miiri ko ale be koo bɛɛ lɔn. A ka ɲi k’a ɲini tuma bɛɛ ka fɛɛn kuraw degi.”

Ala ka Kuma kɔnɔ, ɲɛyirali tara soo kunnasigibaga n’a ka baara koo la walisa ka baara dɔw kofɔ minw be kɛ kerecɛn kafo kɔnɔ. Ɲɛyirali fɛ, ciden Piyɛri ye kerecɛnw jija ko Ala ye setigiya min di u ma, u “ka ɲɔgɔn mako ɲɛ n’o ye i ko soo kunnasigibaga ɲuman.”​—1 Piyɛri 4:10, NW.

Luka 16:1-8 kɔnɔ, Yezu yɛrɛ ye ɲɛyirali ta soo kunnasigibaga dɔ koo la. A y’a ka kalandenw hakili sigi fana ko a bena “jɔncɛ kantigiman hakiliman” wala “soo kunnasigibaga kantigiman” dɔ sigi. A y’o fɔ tuma min na a tun be kiraya kɛra k’a ɲɛfɔ tagamasiɲɛ min tun bena a yira ko ale be masaya la (Mat. 24:45-47, NW; Luka 12:42, NW ). “Soo kunnasigibaga kantigiman” be gafew labɛn an ye ani an be se k’u sɔrɔ duniɲa kuru bɛɛ kɔnɔ walisa k’an ka limaniya barika bonya. An b’a waleɲuman lɔn kosɔbɛ o kosɔn.