1. Mun na an lanin b’a la ko an be “laban tuma” na?

YALA i wolola saan 1914 kɔ wa? N’o lo, o kɔrɔ ko i ye i ka ɲɛnamaya bɛɛ kɛ duniɲa nin “laban tuma na.” (2 Tim. 3:1). Yezu tun kɔnna k’a fɔ k’o wagati la, kɛlɛw, kɔngɔ, dugukoloyɛrɛyɛrɛ ani fɔɲɔbanaw tun bena kɛ. A tun y’a fɔ fana ko juguya bena caya ani mɔgɔw bena Jehova sagokɛlaw kɛlɛ (Mat. 24:3, 7-9, 12; Luka 21:10-12). An kelen kelen bɛɛ delila k’u koo mɛn. Ka fara o kan, mɔgɔw ka kɛwalew yɛlɛmana i ko ciden Pol tun kɔnna k’a fɔ cogo min na. (Koorilen nin lajɛ: “ Bimɔgɔw sɔɔn.”) An ye Jehova batobagaw ye minkɛ, an lanin b’a la ko an be “laban tuma” lo la.

2. A kɔrɔtanin lo an ka ɲiningali jumanw lo jaabiliw sɔrɔ?

² Wagati caaman tɛmɛna kabi saan 1914. An be se k’a fɔ ko an be “laban tuma” laban wagati lo la. O la, a kɔrɔtanin lo an ka ɲiningali jɔnjɔn nunu jaabiliw ɲini: Mun lo bena kɛ “laban tuma” laban wagati nin na? K’an to o koow makɔnɔni na, Jehova b’a fɛ an ka mun lo kɛ?

3. Ka kɛɲɛ ni 1 Tesalonikaw 5:1-3 ka fɔta ye, jamanaw ɲɛmɔgɔw bena mun lo fɔ?

³ Bibulusen nin kalan: 1 Tesalonikaw 5:1-3. O bibulusen kɔnɔ, Pol ko: “Matigi bena na loon min na [o kɔrɔ, Jehova ka loon, NW ].” Loon min kofɔra, o bena daminɛ ni Babilonɛba halakili ye ani ka laban  ni Arimagedɔn kɛlɛ ye. Babilonɛba ye ngalon diinanw jɛnkulu lo ye (Yir. 16:14, 16; 17:5). Dɔɔni ka kɔn “Jehova ka loon” ɲɛ, jamanaw ɲɛmɔgɔw bena a fɔ ko “hɛrɛ ni jigisigi be yen.” (Bibulu dɔw b’o bayɛlɛma ko: “Hɛrɛ, tɔɔrɔ tɛ.”) Tuma dɔw la, ni jamanaw ɲɛmɔgɔw b’a fɛ k’u ka jɛnɲɔgɔnya fisaya u ni ɲɔgɔn cɛ, u b’o kumadenw ɲɔgɔn fɔ. * Nka, Bibulu b’a fɔ k’u bena “hɛrɛ ni jigisigi” min kofɔ, o be dan na. Mun na do? Sabu n’u y’o fɔ tuma min na, mɔgɔ caaman bena a miiri ko jamanaw ɲɛmɔgɔw sera ka hɛɛrɛ sigi duniɲa kɔnɔ. Nka dɔɔni kɔ, “tɔɔrɔ [halakili] bena ben u kan.”—Mat. 24:21.

4. a) Jamanaw ɲɛmɔgɔw bena min fɔ, an tɛ mun lo lɔn o koo la? b) Nka, an be mun lo lɔn?

⁴ Jamanaw ɲɛmɔgɔw bena a fɔ ko “hɛrɛ ni jigisigi be yen.” An be koo dɔw lɔn, nka an tɛ koo dɔw lɔn o koo la. Ɲɛyirali fɛ, an t’a lɔn fɛɛn min bena a to u b’o koo wangola ani u bena o kɛ cogo min na. An t’a lɔn fana n’u bena o kɛ siɲɛ kelen dɔrɔn wala siɲɛ caaman le. Nka an be min lɔn, o ye ko an man ɲi k’a to u k’an lafili an k’a miiri k’u be se ka hɛɛrɛ sɔbɛ sigi duniɲa kɔnɔ. Bibulu ko an k’an janto o kumaw na sabu o koo ye tagamasiɲɛ ye min b’a yira ko “Jehova ka loon” be nana daminɛ!

5. Min fɔra 1 Tesalonikaw 5:4-6 kɔnɔ, o b’an dɛmɛ cogo di an k’an yɛrɛ labɛn “Jehova ka loon” kama?

⁵ Tesalonikaw fɔlɔ 5:4-6 kalan. An be se k’an yɛrɛ labɛn cogo di “Jehova ka loon” kama? Pol ye min fɔ, o be se k’an dɛmɛ. A ko an man ɲi ka “sinɔgɔ i n’a fɔ mɔgɔ tɔɔ nunu.” Nka, an ka ɲi ka “to ɲana tuma bɛɛ.” Ɲɛyirali fɛ, an ka ɲi k’an janto an kana an niin don duniɲa ka koow la, i n’a fɔ politikikow. N’an y’an niin don o koow la, an bena kɛ “diɲɛ ta ye.” (Zan 15:19). An do b’a lɔn ko Ala ka Masaya kelenpe lo be se ka hɛɛrɛ sigi duniɲa kɔnɔ.

6. An b’a fɛ ka tɔɔw dɛmɛ u ka mun lo kɛ ani mun na?

⁶ An b’a fɛ ka to ɲɛɛ na. Bibulu tun kɔnna ka min fɔ an ka duniɲa koo la, an b’a fɛ fana ka tɔɔw dɛmɛ u k’a lɔn k’o be dafara. An ka ɲi k’o kɛ sisan le sabu ni tɔɔrɔba daminɛna, mɔgɔw tɛna se ka tuubi tugun ka kɛ Jehova batobagaw ye. O lo kama, waajuli ye kɔrɔtɔko ye! *

7. Jehova b’a fɛ an ka mun lo kɛ sisan?

⁷ Wagati dɔɔni min tora sanni “Jehova ka loon” ka se, a b’a fɛ an ka to k’an jija waajuli la. An ka ɲi k’an jija kosɔbɛ “Matigi ka baara la.” (1 Kor. 15:58). An  ka ɲi ka min kɛ, Yezu tun kɔnna k’o fɔ. Koo jɔnjɔn minw tun bena kɛ laban tuma na, a kumatɔ u koo la, a ko: “Wajibi lo kibaru diman ka fɔ siyaw bɛɛ ye fɔlɔ.” (Mariki 13:4, 8, 10; Mat. 24:14). Miiri k’a filɛ: Tuma o tuma n’i be waajuli kɛra, i be dɛmɛ donna walisa k’o kiraya kuma dafa!

8. An b’a lɔn cogo di ko ɲɛtaga be kɛra Masaya waajuli baara la?

⁸ Ɲɛtaga juman lo be kɛra Masaya waajuli baara la? Saan o saan, Masaya kibaro diiman be fɔ mɔgɔ caamanba ye. Miiri k’a filɛ weleweledalaw hakɛ cayara cogo min na saan tɛmɛninw na. Saan 1914, weleweledala 5 155 lo tun be yen jamana 43 kɔnɔ. Bi, mɔgɔ miliyɔn 8 ni tilan ɲɔgɔn lo be waajuli kɛra jamana 240 kɔnɔ! Nka, waajuli baara ma ban fɔlɔ. An ka ɲi ka to k’a fɔ mɔgɔw ye ko Ala ka Masaya kelenpe lo be se ka adamadenw ka kunkow bɛɛ ɲɛnabɔ.​—Zab. 145:11-13.

9. Mun na an ka ɲi ka to ka waajuli kɛ?

⁹ An bena to ka waajuli kɛ fɔɔ tuma min na Jehova bena a fɔ k’o baara banna. Wagati hakɛ juman lo tora mɔgɔw fɛ u k’a ɲini ka Jehova ni Yezu lɔn? (Zan 17:3). An t’o lɔn. An be min lɔn, o ye ko yanni tɔɔrɔba ka daminɛ, minw bɛɛ “labɛnnin lo ka sɔn ɲɛnamaya banbali ma,” olu bena se ka sɔn kibaro diiman ma ani k’a latigɛ ka Jehova sago kɛ (Kɛw. 13:48, NW). O la, an be se k’o mɔgɔw dɛmɛ cogo di sanni wagati ka tɛmɛ?

10. Jehova b’an dɛmɛ cogo di an ka se ka mɔgɔw kalan tiɲɛn koo la?

¹⁰ An mako be fɛɛn o fɛɛn na walisa ka mɔgɔw kalan tiɲɛn koo la, Jehova be tɛmɛ a ka ɔriganisasiyɔn fɛ k’o di an ma. Ɲɛyirali fɛ, an be fɔrɔmasɔn sɔrɔ lɔgɔkun bɛɛ kerecɛnw ka ɲɛnamaya n’u ka waajuli baara lajɛn na. O b’an dɛmɛ k’a lɔn an be se ka ɲɔgɔnyeko fɔlɔ, viziti kura ani bibulukalan kɛ cogo min na. Jehova ka ɔriganisasiyɔn be kalankɛminanw fana di an ma. U b’an dɛmɛ . . .

•   ka baro daminɛ,

• ka baro diya don mɔgɔw la,

• ka mɔgɔw lasun u k’a ɲini ka dɔ lɔn tugun Bibulu koo la,

• ka bibulukalan kɛ ni mɔgɔw ye ani

• ka makodonmɔgɔw jija u k’an ka site web lajɛ ani u ka na Masaya Boon na.

Nka ka kɛ n’o minanw ye, o dama tɛ bɔri kɛ. An ka ɲi ka baara kɛ n’u ye. * Ɲɛyirali fɛ, baro diiman kɛnin kɔ ni mɔgɔ dɔ ye, i be se ka sɛbɛnin wala zurunali dɔ di a ma. O la, a bena to k’a kalan yanni i ka segi ka na bɔ a ye. An kelen kelen bɛɛ ka kunkanbaara lo k’an niin don bɛrɛbɛrɛ waajuli la kalo o kalo.

11. Bibulukalan min be kɛ jw.org kan, mun na o sigira sen kan?

¹¹ Jehova be tɛmɛ fɛɛrɛ nin fana fɛ ka mɔgɔw dɛmɛ u ka tiɲɛn lɔn: Bibulukalan, jw.org^® kan. Mun na o fɛɛrɛ sigira sen kan? Kalo o kalo, duniɲa kɔnɔ, mɔgɔ caamanba b’a ɲini ka Bibulu ka kalanw faamu ɛntɛrɛnɛti kan. Bibulukalan min be kɛ an ka site web kan, o be se k’o mɔgɔw dɛmɛ u ka tiɲɛn lɔn Ala ka Kuma koo la. An be minw waaju, n’a sɔrɔ u dɔw be sigasiga ka bibulukalan kɛ. N’o lo, o fɛɛrɛ kura yira u la an ka site web kan wala a sɔrɔyɔrɔ ci u ma. *

12. Bibulukalan be kɛ yɔrɔ min na an ka site web kan, mɔgɔ be se ka mun lo faamu yen?

¹² Bibulukalan be kɛ yɔrɔ min na an ka site kan, barokun nunu be sɔrɔ yen: “Bibulu ani Bibulu Tigi,” “Bibulu be kuma mɔgɔ minw koo la” ani “Bibulu be kuma jigiya min koo la.” U lajɛtɔ, mɔgɔ be se ka ɲiningali nunu jaabili sɔrɔ:

• Bibulu be se ka mɔgɔ dɛmɛ cogo di?

• Jehova, Yezu ni mɛlɛkɛw ye jɔnw lo ye?

• Mun na Ala ye adamadenw dan?

• Mun na tɔɔrɔ ani koo jugu be yen?

Kalan dɔw fana b’a yira cogo min na Jehova bena . . .

• dan sigi tɔɔrɔ ni saya la,

• mɔgɔ saninw lakunu ani

• a ka gofɛrɛnɛman sigi adamadenw taw nɔɔ na, olu minw dɛsɛra.

13. Bibulukalan min be kɛ an ka site web kan, yala mɔgɔ ka ɲi ka ta o ma k’a miiri ko kuun t’a la a ka bibulukalan kɛ ni Jehova Seere dɔ ye wa? A ɲɛfɔ.

¹³ Bibulukalan min be kɛ an ka site web kan, mɔgɔ man ɲi ka ta o ma k’a miiri ko kuun t’a la a ka bibulukalan kɛ n’an ye. Yezu y’a ɲini an fɛ an ka mɔgɔw kɛ ale ka kalandenw ye. O ye nɛɛmaba ye an fɛ! Bibulukalan min be kɛ jw.org kan, an jigi b’a la k’o bena diya makodonmɔgɔw ye ani k’u bena a ɲini ka dɔ lɔn tugun. O la, n’a sɔrɔ u bena sɔn ka bibulukalan kɛ n’an ye. Kalan kelen kelen bɛɛ laban na, a ɲinina mɔgɔw fɛ u ka yɔrɔ dɔ dafa o kama. Duniɲa kuru bɛɛ kɔnɔ, loon o loon mɔgɔ 230 ni kɔ be tɛmɛ an ka site web fɛ k’a ɲini mɔgɔ dɔ ka na bibulukalan kɛ n’u ye! Tiɲɛn na, ka bibulukalan kɛ ni Jehova Seere dɔ ye, o kɔrɔtanin lo yɛrɛ le!

14. Ka kɛɲɛ ni Yezu ka cikan ye min be sɔrɔ Matiyo 28:19, 20 kɔnɔ, an ka ɲi k’an jija ka mun lo kɛ ani mun na?

¹⁴ Matiyo 28:19, 20 kalan. N’an be bibulukalan kɛra ni mɔgɔw ye, an ka ɲi k’an jija k’u “kɛ [Yezu] ka kalandenw ye . . . , k’u kalan, waasa u ka [Yezu] ka kuma bato.” An k’u dɛmɛ u k’a faamu ko a kɔrɔtanin lo u k’a latigɛ ka Jehova bato ani ka sɔn a ka Masaya ma. O kɔrɔ, u ye min faamu, an k’u jija u k’o sira tagama, u k’u yɛrɛkun di Jehova ma ani ka batize.  O cogo lo la u bena se ka kisi Jehova ka loonba la.—1 Piyɛri 3:21.​

15. An man ɲi k’an ka wagati tiɲɛ mun lo la ani mun na?

¹⁵ I ko an y’a ye cogo min na, wagati dɔɔni dɔrɔn lo tora sanni duniɲa laban ka se. O kama, an man ɲi k’an ka wagati tiɲɛ ka to ka bibulukalan kɛ ni mɔgɔw ye minw t’a fɛ sɔbɛ la ka kɛ Krista ka kalandenw ye (1 Kor. 9:26). An ka baara ye kɔrɔtɔko ye! Mɔgɔ caaman bele mako b’a la ka Masaya kibaro diiman mɛn sanni wagati ka tɛmɛ.

16. Ka kɛɲɛ ni Yirali 18:2, 4, 5, 8 ye, an kelen kelen bɛɛ ka ɲi ka mun lo kɛ? (Jukɔrɔla kunnafoni fana lajɛ.)

¹⁶ Yirali 18:2, 4, 5, 8 Kalan. O vɛrisew b’a yira Jehova b’a fɛ a sagokɛlaw ka koo wɛrɛ min kɛ. Kerecɛn sɔbɛw bɛɛ ka ɲi k’u jija walisa u kana u niin don ngalon diinanw ka koo si la. A be se ka kɛ ko Bibulu kalanden dɔ tun be ngalon diinan dɔ kɔnɔ ka sɔrɔ ka tiɲɛn lɔn. N’a sɔrɔ a tun b’a niin don o diinan ka batoli n’a ka koo wɛrɛw la, wala a tun be wari di k’a dɛmɛ. Sanni sira ka di Bibulu kalanden dɔ ma a ka kɛ weleweledala ye min ma batize fɔlɔ, a ka ɲi k’a niin bɔ ngalon diinanw ka koow bɛɛ la. O la, a ka ɲi ka lɛtɛrɛ dɔ sɛbɛ k’a ci a ka diinan kɔrɔ ɲɛmɔgɔw ma. A tun be jɛnkulu o jɛnkulu kɔnɔ min ɲɛsinna ngalon diinan ma, a ka ɲi ka lɛtɛrɛ ci o fana ma. A ka ɲi k’a yira ka gwɛ o lɛtɛrɛw kɔnɔ wala cogo wɛrɛ la ko ale t’o diinanden wala o jɛnkuluden dɔ ye tugun. *

17. Kerecɛn sɔbɛ ka ɲi ka ban baloɲini baara sugu jumanw lo la ani mun na?

¹⁷ Kerecɛn sɔbɛ ka ɲi k’a janto ko a be baloɲini baara min na, o ma ɲɛsin Babilonɛba ka koo si ma (2 Kor. 6:14-17). Ɲɛyirali fɛ, a man ɲi ka kɛ legilizi wala misiri si ka baarakɛla ye. Ka fara o kan, n’a be baara kɛ sosiyete dɔ la, a ka ɲi k’a janto kosɔbɛ walisa a kana sɔn baara si ma min ɲɛsinna ngalon diinan ma. A man ɲi ka sɔn baara ma min bena dɔ fara ngalon diinanw ka batoso dɔ cɛɲi kan. N’a be baara kɛ a yɛrɛ tɔgɔ la, a tɛna sɔn baara dɔ la min ɲɛsinna Babilonɛba ma. Mun na an b’o koo ta sɔbɛ la ten? Sabu ngalon diinanw  nɔgɔnin lo Ala ɲɛɛ kɔrɔ. O kama, an t’a fɛ k’an niin don u ka koow n’u ka jurumu si la.​—Ezayi 52:11. *

18. Ka ɲɛsin a ka baloɲini baara ma, balimacɛ dɔ tugura Bibulu ka sariyakolow kɔ cogo di?

¹⁸ An ka kuma diinan mɔgɔkɔrɔ dɔ koo la. Miniziye tun lo ani a tun be baara kɛ a yɛrɛ tɔgɔ la. Mɔgɔ dɔ tun be deli ka baara di a ma. A saan damanin ye nin ye, o tigi y’a ɲini a fɛ a ka baara dennin dɔ kɛ legilizi dɔ kɔnɔ. Balimacɛ be dugu min na, o legilizi be yen. O tigi tun b’a lɔn ko balimacɛ tɛ sɔn ka baara kɛ legilizi kɔnɔ. Nka nin sen nin na, a tun tɛ mɔgɔ wɛrɛ sɔrɔla o baara kama. O bɛɛ n’a ta, balimacɛ ye Bibulu ka sariyakolow labato ani a banna k’o baara kɛ. Lɔgɔkun kelen o kɔ, miniziye wɛrɛ foto yirala u ka dugu ka zurunali dɔ kan. A tun be kuruwa gwengwena legilizi sanfɛ. N’an balimacɛ tun ma Bibulu ka sariyakolow labato, ale foto lo tun bena ye o zurunali kan! Miiri k’a filɛ o tun bena a tɔgɔ tiɲɛ cogo min na a kerecɛnɲɔgɔnw cɛma! Miiri k’a filɛ fana o yɛrɛ tun bena min kɛ Jehova la!

19-20. a) An ye mun lo faamu? b) An ka ɲi k’a ɲini ka mun lo faamu tugun?

¹⁹ Ka kɛɲɛ ni Bibulu ka kiraya kumaw ye, kooba dɔ bena kɛ yanni dɔɔni duniɲa kɔnɔ: Jamanaw ɲɛmɔgɔw bena a fɔ ko “hɛrɛ ni jigisigi be yen.” Nka, Jehova y’an dɛmɛ k’a faamu k’u tɛna se ka hɛɛrɛ sɔbɛ ni hɛɛrɛ banbali sigi. An ka ɲi ka mun lo kɛ yanni o wagati ka se ani halakili ka cun mɔgɔw kan? Jehova b’a fɛ an ka to k’an jija ka waajuli kɛ Masaya koo la ani ka mɔgɔ caamanba dɛmɛ u ka kɛ Yezu ka kalandenw ye. An man ɲi k’an seen don fewu ngalon diinanw ka koo si la fana. O kɔrɔ ko an ka ɲi k’a to ngalon diinan mɔgɔw k’a faamu ko an t’u dɔ ye. Baara o baara ɲɛsinna Babilonɛba ma, an man ɲi fana k’o kɛ.

²⁰ Koo wɛrɛw bena kɛ “laban tuma” laban wagati la. Jehova b’a fɛ an ka koo wɛrɛw fana kɛ. O koow ye mun ni mun lo ye? Koo minw bɛɛ bena kɛ yanni dɔɔni, an be se k’an yɛrɛ labɛn u kama cogo di? An bena o lo ye barokun nata la.